الجمعة، 13 ديسمبر 2013

أنا عروسة


مين كان يصدق حلم السنين اللى حلمته اتحقق 
واخيرااااا بقى الفستان الابيض والتاج والزفة 
وعريسى حبيبى وفرح بالنهار و السماء بتمطر فرحة كمان
الحمد لله عمرى ما كنت اتخيل ولا احلم باكتر من اللى انا فيه دلوقتى 
الحمد لله على الصحاب الحلوين اوووووى اللى فرحتها وصلانى من غير ما اشوفهم 
خلاص الجمعة الجاية ان شاء الله هروح بيتى مش قادرة استوعب لسه بس بحاول يعنى 
رغم كل حاجة عدت وكل موقف حصلى وكل الضغوط اللى فى اليومين دول 
الا انى فرحانة اووووى ربنا يكملنا على خير يارب
والبوست الجاى يكون من بيتى الجديد بقى بإذن الله 
وبهذه المناسبة السعيدة احب اقول انى بحبك اوووووى جدا خالص يا عريسى
واقول لصحابى اللى قالوا انهم جايين الفرح انى فرحت اكتر بانك هتيجى فى البرد الفظيع ده
واقول لصحابى الجمال جداااا اللى بعتوا مسجات ان فرحتى زادت بكلامك
ربنا يخليكم ليا ياااارب 

الثلاثاء، 12 نوفمبر 2013

وماذا بعد




وماذا بعد 
أحتضن صوتك كل مساء و أغفو بإرتياح 

وماذا بعد 
أحلام ترعبنى فأستيقظ أستجدى إبتسامتك و أغفو بإرتياح

عند منتصف - منتصف - ليلى أهاتفك فتجيب وصوتك لم يستيقظ بعد
وأسرد عليك مخاوفى جميعها وما حدث فى يومى وأبكى 
وفى نهاية مكالمتى أخبرك كم أحبك حينها فقط تجيب - وانا أحبك كثيرا دعينى أحتضنك و لتغمضى عينيكى اذا - وأغفو بإرتياح

" أعترف .... يحدث ذلك كثيرا وان لم تتذكر غالبا انه يحدث "

..................................

وماذا بعد
بعض قصاصات الصور الملقاه فى أروقة الذاكرة 

وماذا بعد
عباراتهم الخالدة على جدار القلب كأنها حفر على آثر 

أقف كثيرا أمام صورتى وصورهم كيف كنت ابدو عندما كانوا وكنا 
ولما تبدو - الكاف - بهذه القسوة فى الوصف وكأنها تعلو على الجميع لتجرح الحنين بجواب رادع - كان - 

" أعترف ... أجدنى الوحيدة التى تكتسب جمال مع مرور الزمن وكأن - كان - تشوههم وفقط "

....................................

وماذا بعد 
قديما كانت أحلامى لأطفالى لكن منذ أحببتك أصبحت أحققها لك 

وماذا بعد 
تخبرنى ان القادم سيساعدنى على النجاح أكثر و انتظر القادم كى أتفرغ لك 

صادفت اليوم مقولة " علموا بنتاكم تحقيق أحلامهن قبل الزواج فالرجل ليس مصباح علاء الدين "
لم اكن اعلمها قبل اليوم لكنى كنت مؤمنة بجوهرها .. انا اتزوج من أجل إسعاد رجل وليس من اجل تحقيق احلامى 

" أعترف ... حبك كان مصباح علاء الدين لذا فقد حققت قدر كبير جدا من أحلامى ينقصنى اشياء مفادها - أنت - "

الثلاثاء، 29 أكتوبر 2013

يوم من عمرنا




النهاردة عيد ميلادى بقاله سنين كتير اوى بيجى فى نفس اليوم 
وبيحصل فيه دايما حاجات مميزة عادى يعنى 
بس اول مرة فى حياتى يعدى عليا يوم زى النهاردة 
من اول فرحة انك جاي تاخدنى من المدرسة وهلبس ايه و شكلى هيكون ازاى 
اصل يعنى دى اول مرة نمشى سوا كدا من يوم ما اتخطبنا اللى هو من سنة ونص 
فالموضوع كان مش عادى اطلاقا 
لحد ما اخدتنى اختار التورته بتاعتى فى الاول كنت مخضوضه كدا ومستغربه 
لحد ما رحنا نشترى عروسة يااااااااااااااه احساس مش ممكن اوصفه 
بس لاقيت عينى دمعت من الفرحة وانا مش مستوعبه اول مرة فى حياتى اشترى لعب لنفسى
وكمان العروسة اللى بحبها ولابسه فستان موف وفراشة ملونة كم انت جميل يا حبيبى :)))
واهم حاجة بقى واحنا بنحجز الاستديو ليوم الفرح ان شاء الله كنت طايرة من الفرحة بجد 
كان احلى يوم فى حياتى علشان كل تفاصيله معاك و بيك 
علشان حسيت انك كل حاجة ليا فى الدنيا وانت بتطبطب عليا وانت بتضحكنى 
حتى واحنا بنلعب ريست وبكسبك :P
ربنا يخليك ليا يا حبيبى وكل سنة وانت بتحبنى اكتر

السبت، 26 أكتوبر 2013

تهييس عاقل جدااا




بعد اسبوع من النوم اللى مش بيكمل 3 ساعات 
والتناوب بين القهوة والنسكافيه كان طبيعى جدا اوصل لمرحلة التهييس 
والتهييس بالنسبالى هو التركيز مع كل الحاجات الحيويه اللى مش بكون مركزة معاها 
زى مثلا ليه لبان فله بيعمل بلونه بس مش بيفرقع 
وفضلت وراه فى المدرسة انا اعمل البلونه واستناها تفرقع مفيش فايدة 
لحد ما فرقعت وقولت هييييييه و تقريبا كل المكتب اتصدم منى 
ولقيتهم بيبصولى بازبهلال وانا بقولهم ما تشغلولنا مش هتيجى مش هروح 
بدل حماقى والنكد ده وتوالت نظرات الازبهلال تزداد وبعدين قالولى مالك يا بنتى 
وانا طبعا كنت فى قمة انشغلالى باللبان اللى مش عايز يقرقع 
اذ فجاة الناظر جاى يقولى الكتاب ده مش مكتوب عليه اسمه بتاع مين 
وبمنتهى الهدوء و الانشكاح رديت " مش مشكلتى على فكرة " 
طبعا الراجل مش متعود منى على كدا خرج من المكتب وهو بيكلم نفسه 
وباقى المدرسات بيضحكوا وهما بيقلدوا جملتى اللى اصبحت شهيرة مش مشكلتى على فكرة 
اللى اتكررت بعدها بدقايق معدودة كـ رد على مدرسة زميلة بتسالنى عن كتاب ولد فى فصلى راح فين
واللى بعد ما وصلتها لمرحلة انها اتعصبت خلاص ومشيت رحت جبتلها الكتاب بمنتهى السهولة 
فكرة انك تبقى مضغوط زيادة عن اللزوم صعبة بالنسبة لناس كتير وعادية جدا بالنسبالى 
لانى مريت بضغوط تفوق اللى انا فيه دلوقتى بمراحل كتير اوى 
الفكرة فى ان الاسهل هو انك تكبر دماغك لكن هما مش قادرين يفهموا كدا 
مش معنى انى ملتزمة زيادة عن اللزوم فى شغلى وانى بحب الاطفال انى اقبل ان حد يستغلنى 
لا انا ممكن اعمل اى حاجة علشان الاطفال بس بمزاجى لكن لو بيحبوا اللى يكبر دماغه فدى حاجة سهله والله 
ومش مشكلتى خالص ان فى حد تانى مكبر دماغه ومش عايز يتعب نفسه وجاى يتعبنى انا 
وبالنسبة للبان فالافضل هو الهارتى ارخص و بيعمل بلونه وبتفرقع كمان المصرى دايما متعدد المميزات
اما بقى المغزى من مش هتيجى مش هروح فهو نفس نظرية نيوتن لكل فعل رد فعل مساوى له فى المقدار و مضاد له فى الاتجاه
الاسبوع انتهى امبارح بفرح بنت خالتى و بانى اول مرة فى حياتى اتصور فى استديو صورة بجد
بـ ميك اب كامل و فستان كتب كتابى و المصور يقولى كمان اتفضلى يا عروسة
و بانى احاول لاول مرة بردو انى ازغرط والاقينى فى امل انها تطلع حلوة
اليوم خلص بانى اصحى من النوم علشان اتصل بيك علشان اتاكد انى مش بحلم واقولك بحبك قوى وانام تانى
وعلى فكرة بحبك اوى تفرق عن بحبك قوى بالالف بتعبر عن الحجم يعنى كتير لكن بالقاف بتدل عن القوة 
السؤال اللى بيطرح نفسه دلوقتى بقى ايه السر اللى مخلى الزبيب موجود مع البندق فى شيكولاته كادبرى 
سؤال يحتاج لدراسة و فرصة تهييسيه قادمة ^___^


الثلاثاء، 8 أكتوبر 2013

أكتوبرى




من الغريب جدا ان يبدأ " أكتوبر " دون ان استقبله 
ربما احساسى ان سبتمبر كانت له معى بدايات جعلتنى أكف عن الإنتظار 
فمر بى أكتوبر دون ان أشعر بوجوب الإستمتاع به 
لكن حتى وان لم أجد الكلمات التى اقولها له هذا العام 
فيكفى انه يعرف تماما كم أحبه وكم تمنيت فيه ولازلت أتمنى 
أكتوبرى أحبك 

.......................................


نتسأل من - هم - وقد يكون كل - هم - انا
فلا نشعر بقدرنا الا اذا صاغنا احدهم بـــ هم

5 أكتوبر2011

.............................................


رغم تخطيها للعشرين الا انها مازالت طفلة فى كل تفاصيلها 
تبتهج دون مقدمات وترسم لليوم ملامح ابتسامة لتمضى الساعات مغمرة فـ السعادة
قادرة على إصطحابك الى سماوات الاحلام الوردية وإهدائك زهرتها البنفسجية
كى تخبرك انها احتفظت بطفولتها فقط " لك "

6 أكتوبر 2012 

..............................................

أجمل ما فى هذا العام ان انا وانت فى ذات الورقة 
بين عيد و شتاء و فرح 
أحبك قدر بهجة المطر المنبعثة من دعاء الفرح 

7  أكتوبر 2013

الأحد، 22 سبتمبر 2013

وانى أحبك

بما انى مجنونة صور 
وطول الوقت عماله اصور كل حاجة واى حاجة 
وبما انى فرحانة جدا الفترة دى علشان علمت البوم صور جديد
فيه صور ليا انا ومحمد من واحنا صغيرين لحد ما كتب الكتاب 
فالبوست دى مخصوص لأكتر صور رومانسية بحبها 













وفاكرة الدبلتين واللمة و الزغايط 
و صورة مبينه ضحكة شفايفك بس 
علشان كنا بنتوشوش فكان وشى دايب فيكى 
وقلت حبيبتى انا اسف نعيد اللقطة من تانى 
فرديتى بفرحة باينة فى عنيكى 
دى اول مرة صورة تبقى حقيقية 
ملامحى دايبة فى ملامحك 
وضحكة قلبى معكوسة فى ضى عنيك


الخميس، 29 أغسطس 2013

عن العلامات




عن علامات الخير التى ربما تجدها فى حلم او صدفة 
او كلمات من احدهم تصل الى اذنيك بالصدفة البحته لتطمئن قلبك 
فتظل متيقن ان قريبا سيأتيك الفرج 

عن بعض الاشارات الغير مترابطة التى تدفعك لربطها جميعا 
فيتتبعها قلبك ليصل بك الى الراحة 

عن ان الفتيات فى العموم يعشقن العلامات يستبشرن و يبتهجن 

عن كونى ادعوا الله كثيرا بعلامات الفرح 
وأظل متيقنه ان حديثى مع صديقتى و طمئنتها لى علامة 
وان حلم الامس المزهو بالخضار علامة 
وان نبؤات الاطفال لى علامة
وان تدوينة انجى علامة 
وان ما انا فيه الان علامة 
العلامات جميعها تخبرنى بان الفرج قادم لا محالة 



اللهم انى استبشر الخير فى كل ما يحمله لى قدرى 
فتقبل يقينى بقبول حسن وامنحنى الفرح قدر رحمتك

الجمعة، 23 أغسطس 2013

أبيض و أسود




يحتضننى كل ليلة بذراعيه الممتدان بطول تلك الليالى الحزينة بداخلى
أحاول ان أهرب من سيطرته على لكن الى اين
فعندما قررت الفرار من كل شئ لم يحتوينى سواه
ذلك الرصيف الذى يتغير كل ما حوله الا هو .. يبقى بعدما يرحل كل شئ
أبيض .. اسود .. أبيض .. اسود ..
اتذكر ضجر جدتى من عدم رغبتى فى النوم بعد العشاء
و اصرارى على اكمال واجب العربى
هل كانت محقة فى ان الستر اهم من فك الخط
هل كنت بالسذاجة الكافية لتصديق ان العلم نور
إنطفئ النور و استوحش الظلام وعدت من جديد لاختار موضع نومى
أبيض .. اسود .. ابيض .. اسود .. ابيض
الاحلام جميعها بيضاء ما من حلم اسود السواد داخلنا فقط
كنت احلم بان أكمل تعليمى حتى اصبح طبيبة لأعالج امى
و أمتلك الكثير من الاموال كى أعطيها لأبى حتى لا ينهال علينا ضربا كل ليلة
لكن أمى خذلتنى ورحلت و أبى فقد عمله و اصبح يمتهن جلدنا
لم يكن لدى سوا اخ واحد يكبرنى بعامين هو ايضا رحل وجئت هنا ابحث عنه
أبيض .. أسود .. أبيض .. اسود ..
الاسود هو أبى وهو كذلك جدتى التى دفعتنى للعمل فى منازل الاثرياء وانا لم أكمل عامى الثامن
الاسود هو ذلك الثرى الغليظ الذى حاول مطاردتى وانا احطم كل ما يعوقنى كى أخرج من منزله
الاسود هو ذلك الليل فى بلادنا الذى يفضح اكثر مما يستر
وكذلك هو موضع نومى تلك الليلة
أبيض .. أسود .. أبيض .. اسود .. ابيض
كغيرى ممن يأويهم ذلك الرصيف العتيق ابتهجت كثيرا لمجئ هؤلاء
وصارت الايام تمضى بين رقض و قذف و حوارات لم اكن اعيها تماما ولكنى حفظت منهم الكثير
مصر هى وطنا الذى يجب ان نحبه وندافع عنه اتذكر مصر تلك التى كنا نهتف بها ونحن نحى العلم
ما من مرة قابلتها كى أحبها لكنى أحببتها كثيرا من هتافاتهم
انها المرة الاولى التى اشعر انى احب ذلك الرصيف أشعر به يبتسم ويفتخر بنا
أبيض .. أسود .. أبيض .. أسود .. احمر
الدماء تحاصرنى وكأن الرصيف أعلن الثورة على الابيض
او ان الثورة احتفظت لنفسها بالبياض كى تكفن موتاها
ومنحتنا كافة الالوان لنمرح قليلا و نحزن كثيرا فاليوم رحل خمسة من اشقائى
الذين كانوا يصفون لى الحرية كل ليلة و يبتهلون فى حب مصر حتى الصباح
وعندما جاء الصباح قررت الا أعود لرصيفى قبل ان أثأر لهم
لكن رجل كبير يرتدى زى اسود ممسك ببندقة كبيرة كالتى كنا نراها فى افلام الكارتون
استوقفنى وانا اهتف " يا نجيب حقهم يا نموت زيهم " كيف لأبناء الشوارع ان يطالبوا بالحقوق
ازحت يداه عنى وأكملت طريقى لأنضم للثائرين واهتف معهم بقوة
حتى بدأت الطلقات تتوالى حينها لمحت الابيض من جديد
أمى جاءت تستقبلنى مبتسمة .. انها الحرية يا أمى ..
لم اكن اعى من قبل ما رسختيه بداخلى فكنتى لى وطن صغير وها انا اموت من اجل وطنى
الان اشعر بالامان اشعر انى وصلت إليكى .. فخورة بى الان أليس كذلك ؟

الأربعاء، 7 أغسطس 2013

رمضانى وما فيه 3



وللعام الثالث على التوالى بكتب رمضانى وما فيه 
يمكن رمضانى السنة دى كان مزدحم بزيادة بس الحمد لله عدى 
والنهاردة اخر يوم " اعاده الله عليكم باليمن والبركات "

مش عندى اى وصف محدد لرمضان السنة دى بس انا مش حسيته شهر 
حسيت كل يوم فيه بكام شهر حسيت ان الشهر عدى بسنة كاملة 
حصلت فيه مناسبات كتيرررر اخويا خلص ثانوية عاملة و دخل طب اسكندرية 
وبنت خالتى اتخطيت و جوز خالتى اخد دبلومة وابن عمى نجح و بنت عمى خلصت اسنان 
كل المناسبات الحلوة اللى كان نفسنا تحصل حصلت الحمد لله 
وكمان اول مرة محمد يفطر معانا فى رمضان وده فى حد ذاته حدث يستاهل بوست لوحده 

قصرت السنة دى عن السنة اللى فاتت بس ربنا وحده العالم بحالى 
وبظروفى الملغبطة الشهر كله كل يوم بيكون فيه حاجة مختلفة 
واللى انتهت بحالة من عدم الاتزان طول اليوم 
يمكن الفترة دى متلغبطة فى كل حاجة حتى انا نفسى مفيش فيا اى حاجة مظبوطة 
بس الحمد لله فترة وهتعدى ان شا الله 

كل سنة وانتم طيبين وعيد سعيد عليكم يارب

رمضانى وما فيه 1
رمضانى وما فيه 2

الأربعاء، 31 يوليو 2013

استسلام



وطن

بالامس حلمت بك 
لم تحملنى إغفاءة إليك 
ولكن حملتنى نظراتى لعينيك الى احلام قلبك 
بالامس اهديتنى الامل 
البستنى الابيض 
وطوقت احلامى بذراعيك 
ومنحتنى نسخة منك
بالامس ادركت ان الوطن حلم يستقر داخلنا فقط

................

وجع

لم تعد الدموع شئ استنثائيا ولكنها اصبحت ملمح الجمال
فبريق عيناى بات سمتى الاساسية
سيل احزانى المختبئ خلف ابتسامتى الدائمة
صار ينتظر المساء كى ينهال بلا انقطاع
حتى اننى صرت استيقظ لأبكى و أغفو لأكمل كوابيسى و أعاود البكاء
لم يعد الوجع يمر صار يسكن الليالى والاحلام

...............

وحدة
ليست العبرة بأنهم حولك ولكن من منهم يقف ورائك
من سيحمى امنياتك من السهو فى الزحام

...............

فرق

الفروق بين القلوب
كالفرق بين احساسى بالألم حيال امر تافه بالنسبة لك
وبين احساسى بالألم المضاعف حيال امر جلل بالنسبة لك
وحدى من يدرك حجم الألم

.....................

معاناة

ان تشعر بالمعاناة حيال مشكلة
لا تستطيع ادراك ابعادها او التنبؤ بتوابعها امر منطقى مقبول 
لكن المعاناة الاكبر ان تحاول ترجمة صرخاتك
 الى كلمات فصحى تخفى اكثر مما تبوح



السبت، 13 يوليو 2013

غطسة منوعة



حبيبى قالى اتمنى انا قلت بيت على البحر 
بعتلى شوقه و خدنى بصيت لقيت البحر 
قالى هقولك سر بس انتى عارفة السر 
اللى فى بالك جالى وقالى عليكى شعر 
كلمات : رضا أمين 
انا من عشاق حنان ماضى 
من ايام اذاعة الاغانى فى الصيف واغانيها للبحر 
واسرح معاها ولما اروح للبحر احكيله واغنيله زيها 

.............................

فى ليلة عشق وخدانى على شط الهوى التانى 
قابلت البحر فى عيونك شربت عطشت من تانى 
هى دى حكايتك معايا شوف بقى قلبى و جنونه 
كلمات : أحمد فؤاد نجم 

الاغنية دى قمة الرومانسية والشجن 
اللى مش تبقى عارف هى بتعاتب حبيبها و بتحكيله 
ولا هى بتحبه لدرجة ان الكون كله متورط فى عشقها ليه 
حاجة كدا مش بالسهل حد يوصلها علشان كدا الاغنية دى هى انا 

............................

فى اغنيات تانية كتير جدا زى شباك قديم كلمات ابراهيم عبدالفتاح 
و شدى الضفاير لـ كوثر مصطفى والاغنية اللى بموت فيها كان وكان لـ مدحت العدل 
والجدير بالذكر ان حنان ماضى كانت متجوزة الموسيقار الرائع ياسر عبدالرحمن 
فالاغنيات دى كلها تلحينه و توزيعه كمان 

ونختم بقى فقرة حنان ماضى بكلمات فؤاد حداد 

مفيش فى الاغانى كدا ومش كدا تفرقنا عن بعض بالشكل ده 
يا مصر اللى جايبه الشجر من زمان وشايله الضفاير على البرتقان 
و قبل الاوان اللى قبل الاوان بتحيينى انفاسك المسعده
عنيكى تغمض وتفتح بيبان سطوح الليالى عليه الامان 
و بحر الدره من ورق الامتحان وبتغنى موالى يا مولده 

........................

وانتقالا الى اذاعة القرآن الكريم اللى مش بينفع يومى من غيرها 
فانا عاشقة للابتهالات وصوت النقشبندى و نصر الدين طوبار 
و الابتهالات حاجة كدا تخليك عايش فى دنيا تانية خاااالص 
بتنقلنى لجو الحضرة اللى نفسى احضره بس اعتقد ده للولاد بس 
يمكن انا بقالى فترة طويلة مش مهتمه اسمع اغانى ولان دايما اذاعة القرآن مفتوحة 
فالابتهالات بقت هى اللى بفتكرها اكتر فى الفترة دى 

...........................

هقولكم الاول بعض الابتهالات اللى بحبها جدا لـ نصر الدين طوبار 

رمضان أشرق فالدنى تتطلع ظمئى لنور من كتابك يسطع 
ايقظت قلبى فاستفاق ميمما شطرات الهدى يرنو اليك و يسمع 
سأقوم ليلك داعيا متبتلا واظل يومك خاشعا اتضرع 
اول ما بسمع الابتهال ده يبقى رمضان جه خلاص مش جه فى التوقيت 
لا جه فى الاحساس والحالة بكون حاسه انى شايفه الهلال خلاص 
وان اجواء رمضان الروحانية ابتدت فعلا 

جل المنادى ينادى يا عبادى انا ماحى الذنوب والاوزار 
إلهى بنورك اهتدينا وبفضلك استعنا و بك اصبحنا وامسينا 
من الابتهالات القوية جدااااا واللى بتاثر فيا اوى 

بك استجير فمن يجير سواك 
فأجر ضعيف يحتمى بحماك 

..................................

وختامها مسك بقى مع النقشبندى استاذ المداحين 
صوته كدا اللى يهزك برقة و عذوبة 

رمضان أهلا مرحبا رمضان الذكر فيك يطيب والقرآن 
بالنور جئت وبالسرور ولم يزل لك فى نفوس الصالحين مكان 

سيدى يا رسول الله ... لغة الكلام كما رأيت على فمى خجلى 
ولولا الحب لم اتكلم 
يا مظهر التوحيد حسبى اننى احد الشداة الهائمين الحوم 
لما بدا فى الافق نور .. نور محمد كالبدر .. كالبدر فى الاشراق عند كماله 
نشر السلام على البرية كلها واعاد فيها الامن بعد زواله 

مولاى انى ببابك قد بسطت يدى من لى الوذ به الاك يا سندى 
اقوم بالليل والاسحار ساجية ادعو وهمس دعائى بالدموع ندى 
بنور وجهك انى عائذ وجل ومن يعذ بك لن يشقى الى الابد 
مهما لقيت فى الدنيا و عارضها فأنت لى شاغل عما يرى جسدى 



السبت، 6 يوليو 2013

مفيش




(1)

شوف شوف شوف 
إطلع فيا اسمعنى اسمعنى اسمع منى وشوف 
لا بدى تراضينى ولا بدى تحاكينى 

شوية هدوء بقى مش عايزة اتكلم مع حد فى اى حاجة 
مش عايزة سياسة ولا حتى حد يكلمنى عن الجواز مش عايزة افكر ... عايزة اناااااااام
انا بقالى شهر تقريبا مش بنام غير ساعة ونص ويوم ما بكون نمت كتير بيبقوا 3 ساعات
 وحتى الوقت اللى بنام فيه دماغى بتفضل شغاله بحلم بنفس الحاجات اللى بفكر فيها وانا صاحيه فكرت اخد منوم بس محمد مش راضى يكتبلى روشته والصيدليات مش بترضى تصرفه من غيرها
فقررت اعتمد على نفسى قفلت الاكونت و عملت الموبايل سيلنت وخبيته :D

بطلت تنام .. بطلت كلام .. بس مبطلتش تفكير
بطلت تعيش وجاوبت مفيش بس مبطلتش تدوير
هتلف تدور و تدوق فـ تضيق وتفوق على صوت اصلا ساكت 

(2)



عم تخلص الكلمات والقلب موجوع 
عم تغرق البسمات ببحر الدموع 
غنى لقلب مشتاق ناطر ع نار 
غنى لحلم ع وراق بعد ما صار 

فى بداية الحوليات كنت اخدت قرار انها تكون مبهجة
 والواضح ان القرارت السعيدة هى الاصعب و التحدى ابتدا بدرى اوى واحنا لسه فى الاول
 وفضلت وقت طويل اوى مش عارفة اجيب منين حاجة مبهجة 
وقررت اكتب لصحبتى اللى مستنيه هكتب ايه و لبنوتات بعتوا مسجات على الفيس
 شايفين انهم بيستمدوا من كلامى امل وتفاؤل وفرحانين بقرارى فى الحوليات
مش عارفة جابوا الكلام ده منين بس اهو لازم بردو اراعى اهتمامهم بمتابعتى و احاول  
وانطلاقا من قلوبهم بهديهم اى تدوينة بتنزل فى حوليات ستبقى بيننا 

أنا أكتر حاجه بتتكرر .. أنا وقت مبيعديش 
أنا عقل وكل ما بيفكر .. بيموت أكتر ما يعيش
أنا وش محدش يوم شافه .. انا يوم قرر ميجيش
وسؤال بيحير فـ إجابته .. وإجابته مفيش

(3)

يقول انى امراة يغار منها النهار 
واننى لؤلؤة تعدو اليها البحار 
ويحسب الازهار لونى و بسمتى نبع الصفاء 

مش لاقيه اجابة لـ مش بتضحكى ليه و فيكى ايه 
مفيش فيا حاجة بس لو ينفع حد يقولى اعمل ايه واعمله لكن بلاش اى كلام يوحى بسؤال 
لان معنديش اى اجابة بجد ولا لاقيه اى مبرر اقوله ولا سبب مقبول

البنت لو قالت مفيش يبقى
فى حاجات كتيرة مزعلاها بجد
قمة وجعها لو تقول " مالك "؟
وتكون " مفيش " هى ساعتها الرد !



اشترك فى هذه التدوينة بالترتيب 
ماجدة الرومى ... انا  .... محمد ابراهيم 

الأربعاء، 19 يونيو 2013

19/6 ♥




من اهم التواريخ فى حياتى 
يوم الاعترافات الطفوليلة و النتيجة اللى وصلتنا للمأذون 
وبما ان عدى علي الاعترافات دى سنتين
والسنة الجاية ان شاء الله نحتفل بيه فى بتنا بقى 
فانا قررت ان يكون احتفالى النهارده مختلف 
قررت اقول بحبك قدام كل الناس 
وعملتلك هدية من " ورق ملون "

كل سنة وانت حبيبى وجوزى واكتر ♥♥♥♥♥


الاثنين، 17 يونيو 2013

على شاطئ الذكريات



زمان كنت خجولة جدا استحالة اكلم حد 
دلوقتى بقيت مشهورة الى حد ما ناس كتير تعرفنى و بتقرألى 
عندى صحاب من بلاد كتيرررر زمان كان كل اللى بكلمهم لا يتجاوزوا 3 بنات 
كان وشى بيحمر لو حد بصلى يمكن دلوقتى لسه بتكسف بس مش بالرعب بتاع زمان 
بقيت اجتماعية اكتر لكن لازلت مش بثق فى اى ولد بالأخص ... شباب بلدنا 
وان كان فى شخصين كانوا بالنسبالى حاجة جامدة جدا 
محمد زميلنا فى ثانوى و عبدالله فى الكلية 
عبدالله شفته مره فى المدرسة عندنا واسغرب اوى لما شافنى قالى انتى بتشتغلى معقول 
" اصل البنوته الرقيقة الخجولة دى استحالة تشتغل يعنى " بس لما عرف انى بشتغل فى الـ kg تقبل الامر 
حسيت انه عايز يقولى اخرك كدا فعلا ههههههههههههه 
بعدين استغرب تانى وقالى مش انتى اعلام ايه اللى شغلك مُدرسة
وكان الرد الطبيعى هو حد لاقى شغل اصلا 
ودى كانت اول واخر مرة اكلم عبدالله 
اه نسيت اقولكم انى مش كنت بكلمه ايام الكلية 
بس كنت بطمنله كدا وبحس انه بيحمينا وبيحجزلنا مكان والحركات الجنتل دى 
اما بقى محمد عمرى ما كلمته ولا مرة بس كنت دايما اقول لاخويا ياريت تبقى زيه 
لدرجة ان ماما نفسها بقت بتقول لأخويا كدا 
ايام الكلية كنت اعرف هو دخل كلية ايه و حاجات كدا اخر مرة شفته كان من خمس سنين 
اما بقى البنوتات فكلهم علاقتى بيهم انتهت 
رغم ان البعد مبقاش يفرق مع الفيس بوك تقدر تدور على اى حد وتلاقيه 
اوقات بسال نفسى هما ممكن يكونوا بيقرولى على مما قرأت او مبدعون او المدونة 
طيب لو شافو اسمى هيعرفونى .. هيفتكرونى ؟؟

........................

حلمت النهارده انى راكبة عجلة و ماشية فى شوارع طويلة اوى 
لحد ما تهت ودخلت بلد مش عرفاها بس سااااحرة جميلة بشكل غريب حتى ألوانها مبهرة 
فضلت ماشية فيها ومبسوطة جدا بعدين ركبت قطر 
وانا بتمشى فى القطر لقيت واحد اعرفه من زمان بس معرفش عنه اى حاجة حاليا
سلمت عليه وقالى انتى جاية لوحدك لا معاكى حد قولتله معايا جوزى 
قالى انتى اتجوزتى بجد مبروك انا بقى لسه وحكالى حاجات عن حياته وبعدين سبته مشيت 
لما صحيت كان نفسى اعرف البلد اللى انا كنت فيها دى ايه 
وهل الشخص ده هناك فعلا ولا ده مجرد حلم مالوش اساس 
الغريب بقى انى لما دخلت على الفيس بكل بساطة لقيت صورته قدامى 
اتخضيت جدا و فضلت ابص للصور وانا خايفة ايوة هو ده المكان اللى شفته فى الحلم 
حتى المبنى ده شفته حتى الالوان دى شفتها نفس البلد اللى حلمت بيها 
ويطلع انه هو كمان عايش هناك 
ناقص انا ومحمد نتجوز ونروح  بقى ^____^

..........................

زمان كان نفسى اعمل فرحى فى نادى الشرطة او الدفاع الجوى 
بس يكون بالنهار وعريسى يخطفنى من كل الناس ونجرى و نركب العربية ونروح زى الافلام الرومانسية
كنت بتخيل كل حاجة فى الفرح الا انى هكون مبسوطة بعريسى ولا لا 
كمان كنت بحلم انى البس فستان من تصميم اشهر مصممى الازياء 
و اروح لأحسن كوافير بس اللى عمرى ما فكرت فيه هيكون شكلى حلو بعد كل ده ولا لا 
علشان انا زمان كنت برتب احلامى براحتى وقتها كنت متأكدة ان ده بعيد انه يتنفذ
دلوقتى جينا لمرحلة " متحلميش / أطلبى " الوضع بقى معقد جدا 
واطلب دى بالنسبالى اصعب حاجة فى الدنيا انا احلم بس لكن اطلب مستحيل 
وكل ما اقوله احلم معايا نعمل فرحنا ازاى يقولى يا حبيبتى انتى بس تطلبى وانا اعمل كل اللى انتى عيزاه 
بس الحمد لله استقريت انى هعمل فرح صعيدى بالنهار و فرح رومانسى بليل
و بما انى انا اللى صممت فستان خطوبتى وكمان فستان كتب الكتاب وكانوا مبهرين لكل الناس
 فمش هحتاج مصمم مشهور ان شاء الله انا كفايا :))

..........................

طبعا كلكم سمعتوا عن الحوليات 
وتجربة التدوين اليومى لمدة سنة ان شاء الله 
وكانت حاجة لذيذة جدا فكرة توحيد اللينك واختيار رقم ليك 
اول ما شقت كدا قلت هكتب 6 رقم مميز بالنسبالى بعدين لقيته غير متاح 
قلت يبقى 365 بوست فى 365 يوم وقد كان لينك مدونتى 
لتكن " حوليات ستبقى بيننا "




الثلاثاء، 11 يونيو 2013

رسالة بتوقيع المرسل إليه



إطمئن يا حبيبى فالامر ليس خطيرا الى ذلك الحد 
فلتغفو قليلا ولا تفكر وسأظل مستيقظه الى جوارك أدعو لك 
أرعبته الفحوصات الاخيرة حد انه غفا بالفعل او تظاهر بذلك ليذهب حيث " هى "
وضعت يدى على رأسه فى محاولة للسيطرة على تفكيره بحنانى آآآآآه كم أتمنى ألا تذهب 
مشفقة على قلبك بحجم حبى لك و بحجم خذلانك لى 
ظل يحتفظ بحبها طوال تسع سنوات حتى أضناه الشوق و أعياه العشق 
أتظن انى طوال تلك السنوات لم أكن أعلم 
أتتوقع ان محاولاتك اسعادى والمبالغة فى حبى كانت ناجحة بل على العكس 
كنت تقترب منى مغمض العينين وكأنك تتلمسها من خلالى وكانت انفاسك تبحث عن رائحتها بى 
هل ظننت أنى سأخطأ فى شفتيك و هى تطبع على يداى قبلة بعدما كادت تنادينى بإسمها  
مثلما خنتها معى فى البداية فإنك تخوننى معها فى كل لحظة 
أتذكر قبل زواجنا بأيام عندما أخبرتنى انك فقدت بعض أوراقك
وعليك ان تتصل بها علها تعرف اين وضعتهم 
حينها لم انزعج كثيرا فهى كانت يوما ما حبيبتك اما انا فلم يبقى سوى أيام وأصبح زوجتك
كنت أقف بعيدا وانت تعبر الطريق وتمسك بهاتفك و السعادة تغمر وجهك 
ابتسامتك كانت حافزا لى كى اتتبع شفتيك وهما تتحدثان 
أخبرتها انك وجدت الاوراق وورقة منهم كنت قد كتبت عليها أحبك 
فتعلو ضحكاتك و ينير وجهك أكثر لتخبرها كم كنت مجنون بها 
                                                           عندها أدرت وجهى للجهة المقابلة
حتى أقنع قلبى بأن الجملة أنتهت عند ذلك وبأنك لم تعد مجنون بها 
لكنى كنت مخطأه فالجملة لم تنتهى بعد
تسع سنوات لم تكن كافية لتنهى جملة قلتها وانت فى قمة سعادتك 
كنت احاول دوما ان اغمرك بالحب و بمسببات السعادة
كى ارى وجهك مبتهجا مثلما رأيته وانت تحادثها 
لكن لم يحدث مطلقا فابتسامتك لم تكن حقيقية كانت عيناك تراوغ الدمع
وكأنها لا ترغب فى سعادة بدونها 
اليوم عندما أخبرنا الطبيب ضرورة إجراء عملية قلب مفتوح
 لم أتمالك دموعى فى حين تقبلت انت الأمر بإبتسامه 
فأنت ترغب فى الإطمئنان عليها و انا اخشى ان ينفضح أمرى
عندما يجدون اسم إخرى فى قلب زوجى 

" غدا عندما يدخلون قلبك الجريح يا حبيبى أتراهم يقرأون فيه إسمى ؟؟ "
ماجدة الرومى 

الجمعة، 7 يونيو 2013

رسالة غير معنونة




اليوم أعادونى إليك 
وكم كنت فى أمس الحاجة إلى ذراعيك أحتمى بهما ... مثلها تماما 
أتذكر بالامس البعيد أخبرتك انها تريد خمس جنيهات 
فالغد هو الجمعة و ما لديها من مسحوق لن يكفى كل هذا الكم من الغسيل المتراكم 
وغفت الى جوارنا انت من اليمين وانا من اليسار 
لم تكن تدرى ان الخمس جنيهات سيحرموها من تلك الغفوة إلى الأبد 
وجاء الصباح حاملا ثلاثتنا الى مصائر مختلفة 
ذهبت انت الى عملك بعد الافطار و اجلستنى هى الى جانب جدتى لتبدا فى مهمتها 
مع تنظيف الثياب المتسخة حتى نفذ المسحوق 
أرادت ان تتركنى مع جدتى وتذهب لتشترى غيره لكنى أبيت ان تذهب دونى و بادرت بالصراخ 
فإستسلمت لبكائى و حملتنى على ذراعيها و مضت 
لكن ذلك الفتى لم يمهلنا لنصل نزعنى من بين يديها و فر واثبا تجاه عربته و تبعته مهرولة هى الأخرى 
وبعد ان ألقانى داخل السيارة نظرت فى اتجاها والبكاء لا ينقطع حينها دفعها جوارى 
و حملنى على رجليه و بين يديه سكينا زاد رعبى وبكائى فحاولت تهدئتى
ودموعها لا تجف لكنه ازاح يديها وانطلق الى حيث لا ندرى ....
توسلت اليه ان يتركنا لكنه لا يجيب 
قبلت يداه متسائلة ماذا يريد منا لكنه لم يجب 
هددها ان لم تصمت حتى نصل فسيذبحنى امام عينها ولن تصل لشئ كذلك 
فصمتت لكن دموعها لم تجف ... حتى وصلنا 
المكان يبدو عاديا شئ من الرهبة فقط تسيطر على الأجواء دفعها بقدمه حتى تنزل 
وحملنى بين ذراعيه حتى يظل السكين فى اتجاه رقبتى 
دخل الى منزل يقابله البحر وليس بجواره منازل أخرى ولا كائنات اخرى ... نحن وفقط 
فتح الباب و دفعها الى الداخل ثم دفعنى بقوة الى الارض 
أتعلم شعرت انى ألفظ أنفاسى الأخيرة لولا صرختها القوية التى أفاقتنى 
لا أعلم ماذا فعل بها فصراخنا قد إمتزج ثم شعرت بدماء بجانبى 
مرت ساعات لا أعلم عددها لكن ضوء جديد قد أتى ويداها عادتا لتحتضننى وخرجنا 
مشينا لمسافة طويلة اعتقد ذلك .. فحرارة الشمس كانت قوية
واستمرت لوقت كاف لنومى واستيقاظى عدة مرات 
ثم ركبنا عربة ودفعنا بها الخمس جنيهات التى كانت ستشترى بها المسحوق 
ترى ما مصير الثياب المتسخة و الغسالة التى تركنها تعمل ؟
هل إنزعجت عند عودتك من العمل ولم تجدنا ؟
لابأس فإننا عائدون الأن و ستكون كل الامور على ما يرام 
لكن كلما أمررت يدى على وجه أمى أجد دموعها لا تزال تنزف حتى وهى تقبل يداى شفتاها ترتعد 
فأتثبث بها أكثر علها تهدأ لكن النزف يزداد و الارتجاف كذلك 
ها قد وصلنا الى منزل جدى لا أعلم لما لم نعود الى منزلنا 
بعد قليل علمت اننا لن نعود الا انهم فى الصباح حملونى الى تلك المحكمة لأراك 
او كما لمحت فى عينيك انك ستأخدنى معك و ترحل 
سمعتهم هنا يتحدثون عن عشاق و هرب و امور لم افهمها 
لكنى أريد العودة الى أمى فهى تحتاجنى جوارها فعندما تركتها كانت لا تزال ترتجف 
الاصوات حولى تتزايد الجميع لا يفهم شئ او يحاول ألا يفهم 
أريد أن أعود الى امى فلايزال دمعها ينزف
لما لا تسمعوا منى ما حدث...  لما تقولون عنها ذلك 
إصمتوووووووا ولتسمعنى انت كذلك 
أريد ان أعود الى امى لأخبرها انى وحدى سأحميها 







الثلاثاء، 21 مايو 2013

كلام كدا



انتى اخر واحدة فى الدنيا كنت اتخيل انها ........
بصرف النظر عن ان باقى الجملة " تلعب المزرعة السعيدة "
 الا ان الجملة فى حد ذاتها حلوة اوى 


البوست ده بيتكتب تحت تضغط نفسى " انا ارغمتنى اكتبه "
علشان مينفعش ابقى عايزة اكتب 

و بسبب مش عارفاه افضل كل يوم افتح البلوج واقفله من غير ما اكتب ولا كلمة



انا فعلا مش بقيت عارفة اكتب ده واقع مش قادرة اتعامل معاه

و الاكيد ان فى حاجة جوايا رافضة فكرة " لازم اكتب "
الازم ده ليييه الكتابة بالنسبالى كلام جوايا وبطلعه فى رسالة فسى توصل لكل الناس
ومش كل اللى اكتبه يبقى يتنشر عادى انا مش كاتبه محترفة ولا متوقعه انى فى يوم من الايام اكتب رواية
بس بيقولوا عليا بعرف اكتب حلو وهى دى كل الحكاية



لازم  تبقى قوية علشان هو ميستاهلش تضعفى علشانه 


مش عارفة ليه اليومين دول بفتكر حاجات غريبة 
وكأن الذاكرة كانت واخدة اجازة ورجعت تانى 
بس فى سنين من عمرى مش فكرانى فيها فاكرة كل حاجة حصلت بالتفصيل الا انا 
مش فاكرة انا كنت عاملة ازاى ولا شكلى ولا كنت بعمل ايه فى وقتها 
" سقطت سهوا من ذاكرتى "



اللى بيخرج من حياتى مينفعش يرجعلها تانى 
بس اكيد بيكون ليه معزة السنين اللى جمعتنا ببعض 
علشان كدا لما واحدة منكم تكلمنى هتلاقينى زى زمان 
بس استحالة علاقتنا ترجع زى زمان ولا حتى هقبل بالمحاولة 




19 /6 / 2013
هيصدر كتابى الثانى ان شاء الله 

الكترونى علشان عايزة كل الناس تقراه 
علشان مش شايفه اى فايدة من الكتب المطبوعة غير التوثيق
وانا خلاص وثقت فى كتابى الاول و فى الكتب الجماعية
 
اسم الكتاب وكل التفاصيل هتعرفوها قريب ان شاء الله 

استنونى بقى 


الأربعاء، 8 مايو 2013

تخاريف عاقلة جدا



استغربت انى حلمت بيكِ 
بس الاغرب لما اصحى من النوم الاقى ان اليوم ده عيد ميلادك 
طيب ليه ؟ انتِ كنتى قاصدة بجد الكلام اللى قولتهولى فى الحلم 
على فكرة انتِ كمان وحشتينى اوى مع انى مش عارفة ليه !!!

......................

الحلم كان أبيض وأسود مع اننا فى زمن الالوان 
بس علشان المكان كان حقيقى زيادة عن اللزوم
لفيت فى نفس الشارع مرتين 
كنت بسال نفسى انا ايه جابنى هنا 
او يمكن كنت بتأكد ان الشارع والبيوت ووشوش الناس حقيقية
انا فاكرة كل ملامح الحلم حتى انه كان من غير ناس اصلا !!!!

.........................

انا مش هقدر اعمل حاجة علشان انا مش عايزة اعمل حاجة 
 بلاش نظرات الحزن اللى بتيجى مخصوص علشان تبصهالى 
مهو انا حتى لو وجودى مؤثر مش هتصرف اى حاجة هقف اتفرج بس 
مش علشان انا بقيت نادلة ولا فقدت احساسى باللى حواليا 
علشان ده مجرد حللللللم !!!

.........................

على قدر حلمك تتسع الأرض
محمود درويش 

..........................

بكلمك لما بكون محتاجة حد يحللنى نفسيا يشوف اللى بين الحقائق 
ويقولى التفسيرات النفسية لمشاعرى حد يقرأنى بشكل مختلف 
كل مرة بتبهرينى هو انتى ازاى بتقدرى تعملى كدا 
بس المهم انى برتاح جداااا 

............................

فى ناس مهمين جدا فى حياتك حتى لو بتتكلم معاهم بس ليهم مكانة خاصة 
وفى كلام بيحسسك من حروفه قد ايه المكانة دى بتبان فى مواقف بسيطة خالص 
وفى ضحكة بتبان فى اول المكالمة وكانها بتحضنك وتقولك وحشتنى 
 فى ناس حلوة اوى فى حياتى اعرفهم شخصيا او يعرفونى بس 
يستاهلوا انى أحمد ربنا انه بعتهم ليا 

............................

نظرا لان جاتلى اكتر من رسالة على صفحتى و صفحة الكتاب على الفيس بوك 
بتسالنى فى حاجات ودايما الرسالة بتبدا بالتبرير و التردد فى السؤل و تنتهى بالاعتذار 
و يتبع ردى عليها استغراب انا مش مصدقه انك ترد عليا هو انتى ممكن تساعدينى فعلا 
بصراحة انا مش فاهمة بيكونوا مستغربين ليه
بس انا حبيت اقول لكل اللى عايزين يسالوا فى اى حاجة 
ليها علاقة بالكتب او المدونات او ما شابه 
ابعتوا عادى جدا استغلونى انا بفرح اوى بالاستغلال  ده 
ولو اقدر اساعد اى حد هساعده مش هتأخر ابدااااا



الثلاثاء، 30 أبريل 2013

رومانسية ولكن





بدأت فى كتابة قصة ما لكن بطلتها فاجأتنى عندما استدارت فجأة لتخبر البطل 
انها لم تتمنى يوما ان تصبح أم 
تركت قلمى و نظرت إليها بدهشة تلاقت نظراتى مع نظرات البطل 
نظرات الدهشة لكلانا تحمل فى طياتها استنكار هل لأنثى ان تتمرد على غريزة الامومة
جلست فى مواجهتنا و اكملت حديثها
" أيوة انا عشت عمرى خايفة اتجوز علشان خايفة اجيب طفل يحاسبنى بعد كدا عن اختيارى لأبوه 
خايفة اشوف نظرات عنيه تلومنى انى اخترتله اب ميستهلوش
 او احس انى خذلته لو مقدرتش اكونله ام تستاهله "
جلس جوارها دون ان يقل شيئا فالكلمات امامه واهنه لا تصف ما ادركه عقله 
لا تريد ان تنجب منه بعد كل ذلك الحب !! هل  حقا تراه لا يستحق ان يكون أبا لوليدها !!
تتلاعب الافكار فى ذهنه وتتدافع لحظات الحب المتبادل أمام عيناه والصمت يعترى الجميع 
حتى امسكت بيداه ووضعتها حيث تمنى ان يسمع ذات يوم دقات قلب طفله 
فنظر اليها وقد زادت دهشته وتحفزه لما ستقول 
" بس بقى عندى مليون حكاية احكيهاله عنك 
كل يوم هوصفك ليه هكلمه عنك وعن كل حاجة حبتها فيك 
هقوله انى فرحااااااانة اوى انه جوايا وانه جزء منك "
فسحب يداه من بين يديها و نظر فى اتجاهى قائلا
 " كملى قصتك يا بنتى دى واحدة فاضية "

بلد مجانين صحيح .... كما قال الخال :D


الأربعاء، 24 أبريل 2013

حياتى و حبى " هو "




وقفت تنظر اليها بدهشة 
" كيف لها ان تتحدث هكذا عنهم هل حقا هم أناس حقيقيون مثلنا ...
 لالا انهم كما يحدث فى المسلسلات مجرد اسماء مستعارة حقيقتهم تختلف تماما عما تتحدث هى عنه "
لكن نظرات الدهشة تلك لم تدعها تتوقف عن الحكى 
هناك " 010 " و " سازمند " و " سمسم " ووووو 
زادت دهشتى هل الجميع أولاد فأجابتنى بلا فهناك سادبيرد و ناريوما و باربى الكثير والكثير 
ومين صاحب ذلك المنتدى سألتها ولم تفارقنى دهشتى و ملايين الافكار عن هؤلاء الشباب 
اجابتنى دكتور سمسم و دكتور ميدو واستفاضت فى وصف الشخصيتين 
مضينا الترم الاول من الجامعة نتحدث يوميا عن هذا المنتدى 
كانت صديقتى " حدوتة مصرية " تأتى لى يوميا بكل جديد عنهم فشعرت وكأنى اعرفهم جميعا
كنت انتظرها كل صباح امام شباك التذاكر كى لا نضيع الوقت فى قطع التذكرة 
مر الترم الاول و تلاه الثانى و جاءت الاجازة
وكنت اتصل بها كل بضعة ايام لتحكى لى عما يكتبه هؤلاء الشباب 
حيث ان النت لم يكن دخل بيتنا نظرا لان ما من سبب لدخوله 
حتى بدأت الدراسة من جديد وعدنا الى الجامعة وقررت ان ادخل الى عالم الانترنت
من خلال مركز التكنولوجيا الذى كان يبدا فى اتاحة ساعات حرة للطلبة بعد الساعه الثانية عشر ظهرا 
و قمت بعمل ايميل ياهو و دخلت الى ذلك المنتدى الذى عشقته و ألفت عليه قبل انا اراه 
ولكنى لم اكن بالجرئة التى تجعلنى اشارك واكتب به فكنت اقرا واتابع وانقل تعليقاتى وانفعالاتى لـ حدوته 
اتأمل الموضوعات وكأنى أأوكد لنفسى انها كانت محقة فى وصفها للشخصيات 
وانى اذا ما شاركت معهم فلن يعرفنى احدا وان عرفنى احدهم فماذا سيحدث لا شئ 
ولكن المجتمع لازال يرفض تلك التكنولوجيا و يهابها 
ظلت حيرتى فى المشاركة الى ان قرر أبى إدخال النت الى البيت كى انجز ابحاثى 
وما كان هذا القرار الا بعد ان اجتزت سنة اولى بتقدير جيد و الترم الاولى من السنة الثانية بتقدير جيد جدا 
فجمعت ما لدى من شجاعة و قررت اشارك فى المنتدى فى قسم الالعاب 
ولا اتذكر اللعبة على وجه التحديد ولكنى اتذكر انى كتبت بيت شعر 
" مودته تدوم لكل هول وهل كل مودته تدوم "
وهو بيت شعر بيتقرى من اوله زى ما اخره ورحبوا بيا وابتديت اشارك وانطلقت بقى 
ومن يومها و- بيبسى -  كانت زى روح المنتدى 
احساس ان المنتدى ده بتاعى كان قوى جدا خصوصا ان تقريبا كل اللى فى المنتدى كانوا بيحبونى 
رغم انى مش كلمت منهم ولا ولد غير " M " اللى هو ارتبط بيه اصلا 
وفضلنا على الحال ده اربع سنين اتخرجنا والدنيا غيرت مننا كتير واتغيرنا 
وجينا على السنة الاخيرة اللى قضت على كل حاجة حتى المنتدى نفسه وقع 
السنة اللى مش ممكن انساها ابدا 2009 اسوء سنة فى حياتى 
مريت بظروف فى البيت صعبة جداااا نفسيا كنت مدمرة وعائليا كمان 
و " M" اهله واهلى عملوا مشكلة هو كل الاطراف مش عارفة ايه اللى حصل بس الحمد لله انه حصل 
فاول خطوة عملتها اول ما بدات ارجع لصحتى تانى انى اندمج اكتر من صحابى من المنتدى 
 كنا بنسهر كتير اوى نعمل " انفيت جماعى بنات وولاد " ونتكلم كلنا سوا 
وطبعا ده كان غير طبيعتى اصلا بس كل الحكاية اخدت شهر تتقريبا 
كان " باد بوى حب ناريوما " وعملوا معايا مشكلة مش فاهمة ليه بس المهم انى علقتى بيهم باظت 
ومنها الى انى مش بقيت بدخل المنتدى غير قليل جدا وخلصت السنة ودخلنا فى 2010 
وانشغلت اكتر فى الدراسات العليا و نسيت المنتدى لحد ما رجع " M " تانى 
ومحاولات اننا نرجع مع اهلى واهله فى نفس الوقت اللى هو كان على علاقة بصاحبتى 
وبعد فترة وجيزة فشلت المحاولات وارتبطوا بعدها بكام يوم  
فى الفترة اللى بعدت عن المنتدى كنت بكتب على المدونة 
بس مفيش حد كان بيقرالى غير صاحبتى كانت فوق من سطرين 
الموضوع كان كتابة يوميات ومواقف عدت عليا مش اكتر وصف حالاتى ممكن وميمنعش شوية شعر 
وخرجت من موضوع المنتدى ده كله بصديقة وحيدة اللى هى " ساد بيرد " 
وعدت سنة كان دكتور ميدو بيبعتلى اضافة على الفيس اضيفه يومين واحذفه تانى 
وفى يوم من الايام الفيس بوكية كانت ساد بيرد بتكلمنى
 وعمالين نرخم على بعض فدخل دكتور ميدو فى النص 
بعتلى تانى  فقبلته وكلمته لقيته بيسالنى عن " M " بحكم ان الحكاية كانت معروفة طبعا 
قولتله مش عايزة اتكلم فى الموضوع ده تانى وخلصنا وحكيتله اللى حصل 
ومش عارفة ليه حكيتله اصلا وانا كنت ملتزمة الصمت سنة بحالها الا ان ده اللى حصل بقى وكدهون 
واكتشفت انه بيتابع مدونتى اساسا وفضل يناقشنى فى كل الحاجات اللى بكتبها المهم زهقنى بصراحة 
قفمت قفلت الاكونت وقفلت المدونة 
وعملت ايميل على الجميل واديتهوله هو بس هههههههههههه ومش فاهمة عملت ليه كدا بردو 
وبعد اعتراف صريح انه بيحب يقرالى وانه زعلان انى قفلت المدونة فتحتها وفتحت الفيس 
ودخل فى مسابقة على صفحة " مما قرأت " فضل يشجعنى فيها و خلانى ادخل فى مسابقات تانية كتير 
على بيدجات فى الفيس بردو كان مؤمن اوى بموهبتى " انا كنت بقول لنفسى كدا يعنى " 
انما بقى كل الناس حتى اهلى كانوا شايفين انه بيحبنى وانا اقول لا طبعا ده بس مؤمن بيا مش اكتر 
لحد ما قولتله فى يوم ... اوعى تكون حبتنى .... قالى لا طبعا هو احنا مراهقين لو حبيتك هقولك 
قولتله طيب الحمد لله اوعى تحبنى بقى 
وبعدها بكام شهر كدا واذ فجأة كتبتله تدوينة بس مش نشرتها وقولتله قالى طيب ما تنشريها قولتله لا طبعا 
قام ادانى باسورد البلوج بتاعه ودخلت كتبتها عنده مسودة وبعدين دخل قراها ورد عليها بتدوينة منشورة 
والتدونتين اعتراف بالحب بس بشكل طفولى جداااااااااااا يومها كان 19/6/2011 
وكانت حملة التدوين وكانت تدوينة " من فيض إحساسه " اللى كتبتهاله قبل ما اعرف انه بيحبنى
بناء على تدوينة كان كاتبها لبنت بيحبها اللى هى انا وانا معرفش
واللى دخلت بيها مسابقة المية تدوينة واللى اتنشرت فى أبجدية إبداع عفوى 
ويوم حفل توقيع الابجدية فى معرض الكتاب مامته واخته حضروا الحفلة واتعرفوا على اهلى 
ويوم 2 مارس اتقدملى وكانت اول مرة اشوفه 
ويوم 6 أبريل 2012 لبسنى الدبلة اللى مكتوب عليها اسمه 
ويوم 6 أبريل 2013 كتب كتابى وادانى اسمه كله 
اكتشفت انه حياتى من زمان اوى هو عمل المنتدى علشان اعيش حياتى فيه 
ولما مبقاش فى منتدى قرر انه يدينى حياته اعيشها معاه 
بحب المنتدى و بحب البلوج والكتابة و الابجدية وكل حاجة اسمه مرتبط بيها 
اصلا بحب اسمى علشان هو جزء منه 

" ملحوطة هو انا ابتديت الكتابة بالفصحى بس هوالكلام اللى قلب لوحده " 

السبت، 20 أبريل 2013

قصاقيص ملونة



لما الارقام تتفق انها تكون مصحوبة بالبهجة 
يبقى انا من حقى اقول انى بحب الارقام اوووووووى 

.................

زى النهارده من سنة كانت حفلة توقيع أبجدية إبداع عفوى فى المنصورة 
واول مرة اتكلم قدام الناس واول مرة احس حاجات حلوة اوى 
كنت مع احلى صحاب فى الدنيا كنت طايرة من الفرح 
وكانت اخر حفلة توقيع حضرتها 

..................

حد الوجع مش مجرد كتاب من صفحات ورق 
هو اكتر من كدا بكتير اوى 
اول ما تبتدى تقراه هتعيشه هتحس انك جزء من المخيمات تعرف جميع الاجئين 
أب لتلك الفتاة التى كانت طائرة اسرائلية تتبع حلمها لتغتاله قبل ان تصل به 
شعرت مثلهم بالاختناق خوفا داخل الشاحنة 
وبانك لا تستطيع ان تفعل شئ فتنطق صمتا 
لذا فلتفكر معه فى العلمانية والادب الاسلامى والتدوين 
امتياز النحال ... ابدعتى فأجدتى فأمتعتينى 

.............................

لبنى هتنزل كتاب الكترونى 
ولما لبنى تعمل كتاب يعنى فرحة الدنيا بالنسبالى 
كنت مستنيه الكتاب ده من زمان اووووى وبمنتهى الصراحة 
كنت شايفه ان لو لبنى معملتش كتاب يبقى مفيش حد يستاهل يعمل 
عن / إلى 
الحلم لا يؤلم 
لـ الرائعة لبنى أحمد نور 
بكرة 
كتاب يستاهل نستنى بكرة يجى بسرعه علشانه 

......................

صديقاتى العزيزات فى حد اتهمنى على آسك انى بقيت باردة معاكم 
هو فى حد منكم زعلان منى ولا حاجة 
اللى زعلانة تقول عادى على فكرة يمكن انا مش واخدة بالى 
طيب انتوا شايفين ان كتابى غيرنى ؟ على اساس انى مشهورة يعنى " اشتغاله دى اساسا "
المهم يعنى اللى زعلانة تقولى انا اهو وانا هتصل بيها على طول 
هو انا عندى اغلى منكم يعنى (( ضحكات شريرة متقطعة ))

...................

فى ناس سألتنى عن منتدى ركز او نجوم اف ام كما احب انه اناديه 
وناس سالتنى عن ازاى يبقى دكتور ميدو صاحب المنتدى اللى فضلتى فيه 6 سنين
وفى نفس ذات الوقت بتقولى انك ارتبطتى بيه عن طريق بلوجر
احب اقول انى هبقى احكلكم الحكاية دى كاملة بكل تفاصلها وبالاسماء والتواريخ 
ان شاء الله قريب كى يخلدها التاريخ ويشهد المجتمع والناس 
مع ان فى شخصية شرير جوايا بتقولكم وانتوا مالكم اساسا يعنى :P

....................

مساءكم سعادة و حب و تهييس
مساءكم ملون بالفرحة 



الثلاثاء، 16 أبريل 2013

حدث اليوم .. إلى لبنى




دامت ساعاتك بالخير لا أعلم بأى الاوقات ستصلك رسالتى 
لكن قد يكون بها ما يصلح للقراءة فى اى وقت 

ذلك الصبى الذى كان يتحدث فى الصباح الباكر عن " التخته " التى يجلس عليها 
وكانها مسرح حياته الذى يقوم من خلاله بجميع الادوار 
والنافذة المجاورة له والتى يطل منها على الحياة والاحلام والمستحيل 
وكأنهم فروع لتلك الشجرة المتكأة على حائط الفصل 
كان يبتسم بزهو وهو يسرد على والدته تفاصيل مغامراته عبر تخته ونافذته و شجرة التوت
لكنها لم تجبه بأى شئ لم تلتفت إليه مطلقا إلا انه تابع الحكى وازدادت ضحكاته براءة
وهو يخبرها ان " سلمى " هى الأخرى كانت صامته عندما أهداها ما جمعه من التوت
حماسه فى الحديث ينم عن ثقته ان شخصا ما يسمعه ويجيبه بما لا نسمعه نحن هكذا خَيل لى 
أغرانى التوت ان أكتب عنه و أغرتنى ابتسامته ان أكتب إليكِ

هلا أخبرتينى كيف أنتِ ؟ كيف أنا من خلالك ؟
وكيف لهم أن يكونوا كذلك ؟ 
ان دفعتك التساؤلات للمزيد من التفكير فلا تجيبى 
دعى كل شئ ولتبقى ابتسامتك تمنح القلب رقى وحياة 



السبت، 13 أبريل 2013

فى عشق نيسان





لا شئ يستحق العناء 
فلا تمضى  عمرا تبحث عنى 
فان كنت قدرك سيقتحم الحب قلبينا 
أثر تلك النظرة التى لم نتوقعها مطلقا 
..................

أراغب انت فى مراقصتى ؟
لكنى اعشق الحرية 
اعشق الرقص منفردة 
فلتغمض عينيك و دع خطواتك تعانقنى 

......................

نيسان والياسمين 
ليست الاحرف وحدها من افتعل كل تلك الرقة والتشابه 
فالرابط الوحيد فى نظرى هو " أنتى " 

.......................

 أعشق كلماتك التى يكمل بعضها بعضا 
فأظل العمر ألملم العبارات واحفظها بالقلب 
فلا هى تفقد رونقها ولا القلب يمل 

......................

راحت ليالى رجعت ليالى 
أجمل ليالى فى العمر معاك 
انت ملكت حياتى قلبى وعمرى الآتى 
انت فى بالى ليلاتى وانا عايشة بهواك 
ياللى معاك أحلامى انت فى كل كلامى 
حبك ملأ ايامى ولا بتمنى سواك 
انا ايه يا عمرى يا ضى قمرى من غير هواك 
انا ايه يا قدرى 
راحت ليالى رجعت ليالى 
اجمل ليالى فى العمر معاك 

" أنغام "