الأحد، 31 ديسمبر 2023

عام أغاث الله فيه قلبي 💜

 



أنهيت العام الماضي بدعوات طيبة وطمع بالغ في عطايا الله.. لذا سأحاول أن أدوّن أجمل ما حدث في العام.. 
منذ البداية حتى اليوم الأخير بالعام وعطايا الله لا تتوقف ونعمه تغمرني حتى أنساني الله ما قد فقدت وكم تأذيت.. 
كان جبر الله لي أعظم مما تصور عقلي وتمنى قلبي، كنت أدعو يارب أنت أعلم.. يارب قلبي 
حتى وقفت امام بيت الله الحرام ويدي على ستار الكعبة المشرفة وقلبي ينتفض رضيت يارب، كل ما مرّ قد هان حقًا..
رضيت يارب تمام الرضا...
الحمد لله الذي أذهب عني الحزن وعوضني خيرًا مما فقدت وأعظم مما تمنيت. 



اني اسافر برة مصر لأول مرة في حياتي مع مريم لوحدنا تمامًا كانت خطوة كبيرة جدا
قد ما كانت صعبه إلا اني واجهت خوفي وقدرت اسافر لاكتر من بلد واخوض تجارب جديدة
فكانت من أهم وأجمل الحاجات اللي عملتها السنة دي وإن شاء الله أسافر كتير السنين الجاية. 




دخول الروضة الشريفة واحساس اني قدامي النبي كان من أجمل الحاجات اللي حصلتلي السنة دي
وأننا قدرنا نقعد طول اليوم في المسجد النبوي ونفضل قاعدين فترة طويلة في الروضة حاجة كدا شبه الأحلام
في تفاصيل كتير كتير بقي في كل الفترة دي مفيش كلام يكفي لتدوينها ووصف احساسي وكل المشاعر اللي مريت بيها 
الحمد لله حمدًا كثيرًا طيبًا مباركًا فيه




اسكندرية في الشتا وتجربة دخول السيرك، سوبيا الرحماني المتلجة بالبلو بيري مع المطر، والبلكونة اللي اتملت زرع
المشي مع مريم في وسط البلد، الرسايل والدعوات والصحُبة الحلوة والخروجات الصباحية أيام الاجازة
اللايف على فيس بوك وحلقات لقاءات المدونين، الورش اللي أخدتها والاحتفاء اللي كنت بتقابل بيه 
دخولي لوكيشن تصوير لأول مرة في حياتي ومقابلة مخرج كبير زي الليث حجو وثنائه عليا 
ان تجيلي اصلا فرصة شغل زي دي في حد ذاتها نعمة ورزق كبير أوي حتى لو أنا اللي قلت مش هقدر أعمله
قابلت ممثلين كتير بحبهم في اللوكيشن واتعاملت معاهم تجربة مميزة وجميلة أوي
فرح حماد وخطوبة اسماعيل، لقاء المدونين ولقاء هن وصور كتير أوي أوي حلوة ما شاء الله بالموبايل الجديد الذي أحب 
تفاصيل كتير اوي عدت عليا في السنة كانت بتخليني في قمة السعادة 
الحمد لله يارب على كل النعم والجمال اللي أنعمت عليا بيه ورزقتني نعمة الاستمتاع بيه.




هذا العام أتطلع للمزيد من الكرم الإلهي ومزيد من المعجزات والأحلام المحققة والتفاصيل التي تبهج روحي، انتظر أن تكون كل الخطوات في هذا العام واقع ملموس بإذن الله ومشيئته
أتوقع أن أكون أكثر جرأه وثقة وتحقق في جميع جوانب حياتي..
كرم الله لا حدود له وأطمع في المزيد والمزيد من كرمه وفضله ورضاه، اللهم أجعله عام خير وأفتح علينا فيه من كل أبواب الخير والبركة والرزق، وارزقنا من العمل فيه ما يقرّبنا إليك وأبعد عنا فيه كل ما يشغلنا عنك سبحانك لك الحمد والفضل والمّنة 💜





الاثنين، 18 سبتمبر 2023

فضل الله 🤍



ولسوف يعطيك ربك فترضى، حقًا وصدقًا تمام الرضا يارب اللهم لك الحمد

عشت عمري كله بحب سبتمبر ومفيش أي مناسبة مرتبطة بيه، كنت دايمًا أقول اكيد هيكون في مناسبة 
أكيد في سر إني أحبه أوي كدا، لحد السنة دي لحد دلوقتي مش مصدقة كل التفاصيل اللي حصلت
من أول ما أتاكدت إني رايحة، لكل الصعوبات اللي قابلتني وكلمة رشا اللي طول الوقت في وداني "ربنا كتبهالك خلاص هتروحي" 

في لحظة مستحيل انساها وانا في الطواف بأخر عمرة كنت حاسه قلبي هيتخلع من مكانه وبعيط جامد جدا وعيني متعلقة بالكعبة 
حطيت ايدي على قلبي وفضلت ادعي بحرقة جدا من غير صوت، كان في واحدة ماشية معايا فضلت تطبط على كتفي وانا مش حاسة هي بتقول ايه ومش قادرة اتكلم كانت لحظة بعمري كله استشعرت جدا "الحمد لله الذي أذهب عنا الحزن"..
وكان فضل الله عليّ عظيما الحمد لله يارب الحمد لله 




كنت فرحانة بوجود مريم معايا برغم كل المشقة والتعب، حسيت ان ربنا كرمنى الحمد لله فوق ما تخيلت ويسرلي كل عمرة وكل زيارة فوق ما كنت اتصور.. قعدتنا في مسجد قباء والراحة الرهيبة اللي حسيناها والمسجد النبوي والصلاة في الروضة والتيسير في الدخول يا الله كل ما افتكر ابقي مش مصدقة تفاصيل اليوم
 نفسي اسجل كل المشاعر والتفاصيل علشان بعد سنين لما اقراها افتكرها بس فعلا مفيش اي كلام يوصف عظمة التجربة

كنت أتمنى أرجع مصر على طول بعد أخر عمرة عملتها، التعب والارهاق اللي حصل في دبي كان ممتع لمريم اكتر
لكن بالنسبالي كنت حاسة اني لسه هناك، لسه كل تفاصيل مكة قدام عيني مش حبيت دبي خالص 
ودي فرصة اسجل لنفسي رسالة "مش هنروح دبي تاني ابدا :D) 




كنت بصور تقريبا كل الصور وانا مش شايفة بسبب الشمس،
بس لما برجع الأوتيل واشوف الصور بكون مبهورة قد ايه جميلة، كنت بحس اني لو لمست الشاشة هلمس ستار الكعبة..
 يا الله على جمالها وعلي الشعور بالراحة والفرحة اللي بيريح القلب مش مصدقة اني لمستها في الحقيقة
واني بكيت على ستارالكعبة وكنت بالقرب ده من ربنا..
 مش مصدقة ان ربنا بعتلي المنحة العظيمة دي ليا انا من غير حول لي ولا قوة
كل يوم قبل ما انام افضل ابص للصور، ولصوري انا ومريم مع الكعبة وفي الحرم وفي المسجد النبوي
مش مصدقة انه كان بجد وانه مش مجرد حلم وأمنية كنت بقول يارب معجزة علشان تحصل،
فرب المستحيلات يستجيب لقلبي الضعيف ويرزقني بالمعجزة ويكرمني من واسع فضله فوق ما خيالي يستوعب
الحمد لله حمدًا كثيرًا طيبًا مباركًا فيه

يارب اكتبهالي تاني يارب ويسرلي أمورى وارزقني حج وانا في صحتى يارب 

الأحد، 7 مايو 2023

اللهم قوة




 سنة جديدة سريعة جدًا، تقريبا مفيش وقت علشان اقدر اكتب بس في المجمل الحمد لله
على كل الأحداث الجميلة والتفاصيل المبهجة وعوض ربنا وجمال الرسائل اللي ربنا بيعبتهالنا. 

البيت الدافئ والتفاصيل اللي بتخليني طايرة من السعادة وانا قاعدة بشرب النسكافية
واقول لنفسي برافو يا صغنن عملتي كل ده لوحدك، وطبعا مريم واحنا بنرتب البيت أو بنشتري حاجة جديدة
ونفكر سوا نحطها فين وازاي، حضن مريم وفرحتها ببتنا بالدنيا ❤

من قبل رمضان بيومين وخبر تعب يوسف ابن عمتي لحد النهاردة وحاسة ان في 3 سنين عدت مش شهر بس 
يمكن المرة دي كمان علشان كنت موجودة وحاضره كل الأحداث كان اهون شوية 
لكن مش قادرين نستوعب مش بنبطل نعيط، مش قادرين نعيش عادي 
النهاردة حلمت بيه وصحيت على أذان الفجر ومن وقتها لدلوقتي مش قادرة ابطل اعيط 
المهم انه كويس في مكانه مبسوط ومرتاح، والله يا بني الدنيا دي بشعة ارتحت وربنا رحمك ربنا يغفرلك ويصبرنا يارب

بحاول أكتب التدوينة دي بقالي كتير، علشان اخرج كل الحزن اللي جوايا واقدر أكون احسن 
بس في حاجات مش بقيت عارفة اعملها، من وقت وفاة محمد زميلي في الشغل مش عارفة اروح أي مشوار واسيب مريم في الحضانة مش عارفة اخرج بره المنطقة خالص، دلوقتي مش قادرة اخرج من البيت حتى لو لعند السوبرماركت. 
عمري ما كنت بخاف اني اموت بالعكس ده انا كان نفسي وكنت بدعي بكدا 
دلوقتي انا خايفة من وجع اهلي وصحابي خايفة على مريم اوي 

الجزء الأول من السنة لحد دلوقتي صعب وفيه كم أحداث مرعب، سبحانه اللي بيدينا القوة نكمل ونضحك
أتمنى اقدر اتغلب على خوفي وانزل وسط البلد لوحدي، أتمنى أقدر أحقق أول 3 أمنيات كنت كتبتهم في بداية السنة ولحد دلوقتي مش اخدت خطوات فيهم، أتمنى أرجع للرياضة تاني ويارب الأوضاع تستقر ومفيش حاجة وحشه تحصل تاني يارب.

ممتنة جدا لصحابي اللي واقفين جنبي وبيدعموني طول الوقت
 واللي بيحاولوا يشدوني من حالة الحزن دي

هذه الندوب التي تحدقين مذعورة فيها لا شيء مقارنة بتلك التي في النهاية التأمت.
 عليكِ النهوض، حتى وإن توسل لكِ قلبك للبقاء بالأسفل.
 كان كدمة، لا وشمًا، تذكري هذا دائمًا.
ألفا هولدن 
 ترجمة ضي رحمي

السبت، 31 ديسمبر 2022

قفلنا الدفتر

 




تقول ضي " لا تبحثي عن الشفاء عند أقدام من حطموكِ" 
عزيزتي ضي..  لقد فعلت

مؤمنة أن الألم هو ما يحرر الإنسان من الخطايا، يُريد الله بنا خيرًا 
يبتلينا ليطهرنا، فاللهم لك الحمد حمدًا كثيرًا طيبًا ملئ الأرض والسماء 
اللهم لك الحمد حتى ترضى ولك الحمد إذا رضيت ولك الحمد دائمًا أبدًا



قفلنا كل الدفاتر القديمة، يمكن أتقفلت بأصعب الطرق الممكنة لكن أكيد هي الطرق المناسبة
والحمد لله على عوض ربنا لينا، على كل الجميل اللي جه بعدها... 
وعلي كل اللي جاي واللي هيكون إن شاء الله أحسن بكتير

نوت بوك جديدة، أوراق جديدة وتفاصيل مختلفة وجديدة وقائمة بأحلام قليلة بس متحددة 
علشان نقدر نحقق كل الاحلام بإذن الله، حاسة اني اتغيرت شوية في تحديد الأولويات وترتيب الأحلام
تفاصيل كتير في شخصيتي بقت أهدى وأروق، تفاصيل كتير في بيتي كنت مهتمة تكون أبسط
فرحانة بكلمة بيتي أوي اللي بقيت بكررها كتير الحمد لله، ربنا يديمه نعمة علينا ويبارك فيه يارب 

بوست متفائل مناسب لختام سنة أخدت جزء كبير من روحي، وسابت أثر عميق بقلبي
سنة هتفضل علامة كبيرة بالأسود في ذاكرتي، ربنا نجاني فيها بلطفه ورحمته
ربنا عارف ان ماليش حد فسخر ليا اللي يردوا عني ويقفوا في ضهري من حيث لا احتسب 
سنة هفضل ابص عليها العمر كله واقول شكرا يارب علي كرمك وسترك ورحمتك وواسع فضلك


ختمنا السنة بأجازه طويلة لأول مرة وده شيء عظيم الحقيقة
رنا جابت لي هدية فظيعة "ورد بلدي" ودي أعظم هدية بعد النعناع اللي هاديت نفسي بيه 
مجموعة كبيرة من الصداقات اللي تشبهني، والرسائل والدعوات اللي لمستني جدا واعتبرتها علامة
اتصالحت مع أحلامي ومش بقيت بضايق منها، بعديها ومش بفكر فيها خالص
بقيت بصور كتير أي حاجة وكل حاجة، وبتصور كتير بردو وده شيء عظيم جدا أوي خالص 
سنة جديدة بتبدا بيقين في كرم ربنا وطمع في القبول والتيسير والرزق طمع في عطاياه اللي ملهاش نهاية



الاثنين، 26 ديسمبر 2022

إلى من رحلوا

 



ينتهي العام بكثير من الدموع والدراما، مثلما بدأ تمامًا... 
العام الأصعب والأكثر ألمًا على الإطلاق أدعو الله ألا تتكرر على عام كهذا. 
عدة أيام وأنا أبكي لأسباب تبدو تافهه، سقوط الكوب من يدي.. كلمة قالتها أبنتي بغضب.. 
سقطت قطرات من المياه على ملابسي.. تأخرت في انجاز مهمة بالعمل.. صنعت القهوة بدون وش ثقيل
أضع يدي على وجهي لأمسح دموعي فأجدها كقطعة الجليد فأبكي أكثر.. 

أقول لن أسامح يا أبي وأبكي، ينتفض قلبي مع ذكر الموت أخاف وأدعو بالرحمة..
لم أفهم زيارتك الأخيرة لي لم أعّي مدلول زيارة جدي كذلك…
استيقظت حزينة أتذكر حياتي وما حدث معي تفصيلًا
كلما حاولت الهروب أجد الذكريات تضغط علي قلبي ولا أستطيع الفرار…
سامحت يا أبي من أجل مثل هذه الليلة.. من أجل كل من رحلوا..
لتشملنا رحمة الله ويغفر لكم جمعيًا ولنا ويلحقنا بكم علي خير

هذه الأيام كان مرض أبي، وفاة أحمد، أشعر بآلام شديدة وكأنني أُجهض مرة أخرى.. 
أختبئ بمريم فتشعر بأني مريضة، تطلب مني أن ارتاح وأنام.. فأفعل
تلك اللحظة التي شعرت بها أن هذا يكفي، ان لدي بهذا العالم من يحنو على قلبي 
في اليوم التالي استيقظت ممتنة لمريم ولبيتي، استمتعت بالمياه الساخنة لمدة طويلة وأنا افرغ رأسي من الأفكار
اليوم لدي بيت لدي شلال من المياه الساخنة ولدي وقت لأطيل الوقوف 
ولدى أبنة تنتظر أن نشاهد فيلم جديد وكل منا تختبئ بالأخرى.
لقد تحررت يا أبي... أحمل عبء قلبي وحدي وأعاقب نفسي وحدي.. وأمنحني الكثير والكثير من الحب

اليوم ليس مناسبًا لقائمة أمنيات جديدة فأخبار الموت تحيط بي من كل اتجاه 
بكيث اليوم من أجل وفاة فتاة شابه طيبة ضحوكة لا أدرى سبب وفاتها لكني صُدمت 
كنت أعمل بدون عقلي وأحاول أن ازيد من تركيزي فأشعر بتشتت وصداع أكثر
اليوم ليس مناسبًا لأي شيء، كنت أتمنى ان يكون لدي فرصة للحزن..
أن يكون لدي الوقت الكافِ لأحزن عندما أحتاج لذلك.. لكن ليس الأمر بهذه السهولة

اللهم ارحم من عز علينا فراقهم فلم يبقى شي يربطنا بهم غير الدعاء..
اللهم اروي قبورهم بالرحمة والمغفرة واجعلهم يا رب من المكرمين المُنعمين
اللهم اجعل قبورهم روضه من رياض الجنة وآنس وحشتهم فيها يا كريم
واجمعنا بهم في جنات النعيم يا ارحم الراحمين.

الاثنين، 19 ديسمبر 2022

في ديسمبر تبدأ الأحلام

 




ديسمبر الحبيب.. شكرًا 💜

مُمتنة لنفسي على كل اللحظات الصعبة اللي عديت بيها، على اللخبطة والبهدلة والمشاوير
على المشي الكتير ولوسط البلد ولرنا، مُمتنة لكل حد قالي كلمة تقويني ولكل حد قالي هتقدرى
مُمتنة لنهال على وقفتها جنبي خلال السنة اللي فاتت الأصعب في حياتي كلها لحد دلوقتي
واللي بتمني اكتر حاجة اني مش تعدي عليا سنة زيها ابدا يارب 


نفتكر الصعب في السنة ولا نعديه.... حقيقي مش عارفة المفروض اسجله ولا لا 
بس انا بعترف انهم قدروا يخلوني مش أتمنى اشوفك ولا اسمع اسمك تاني
بعد 17 سنة قدروا يحققوا اللي كل السنين والظروف والمواقف مش قدرت تعمله
فحقيقي برافو، كنت بقول دايما ان عادي علاقات تنتهي بس كفايا اننا محافظين على انها تنتهي بشكل كويس 
عادي نرضي ونتقبل والدنيا بتمشي واحنا محتفظين بصورة حلوة للي بنحبهم
صورتك الحلوة اللي كانت جوايا ادمرت، علشان دي أصعب حاجة كان ممكن تحصل
ومش مستوعبة لحد اللحظة دي ازاى حصلت، ازاى البني آدم ده بالذات يقبل حد يعمل فيا كدا
عديت اني مش مستوعبة علشان صح ممكن أي حاجة تحصل عادي بعد اللي حصل ده ممكن أي حاجة تحصل عادي
ودي كانت أكبر صدمة في عمري.. فأي حاجة ممكن تعدي بقي خلاص

النهاردة الارجنتين اخدت كأس العالم.. ميسي عملها 
ميسي بالنسبالي مش مجرد لاعب كدا وخلاص، ده قصة وحكاية.. راجل مختلف 
عظيم في قصة حياته، عظيم في قصة حبه، عظيم في الإصرار على الوصول لحلمه اللي النهارده اتحقق
فكل الأحلام ممكن تتحقق في النهاية


إحنا والقمر جيران 💜💜
 شاي بالنعناع ف البلكونه وريحة النعناع اللي لسه روياه والقمر وانا والهدوء نعمة كبيرة أوي
الشهر ده حققت انجازات كتير اوي الحمد لله، وأي حاجة بجيبها في البيت ببقي فرحانة بيها اوي 
كمية الدعوات والكلام الحلو اللي وصلني الشهر ده من ناس مش اعرفها كان مًبهر اداني طاقة اني اقدر اعمل أي حاجة في الدنيا
كل الناس اللي قالت عني مُلهمة واني اديتهم أمل وشجعتهم خلاني حاسة بلطف ربنا ورسائله الجميلة
كل خطوة باخدها في حياة مريم بتخليني أحس اني بقرب للحياة اللي نفسي فيها
الشهر ده ابتدينا خطوات كبيرة ومهمة يارب يارب توفقنا وتقربنا من حلمنا وترزقنا التيسير والقوة
الحمد لله يارب على نعمك على البيت والهدوء والراحة على كرمك وفضلك عليا يارب 

وددتُ لو مَسَحَ رسولُ الله ﷺ على صدري
ودعا لي وقال: إنَّمَا هي دُنيا، والمُلتقى الجنة بإذنِ اللّٰه ، فلا تحزنٍ

مش عارفة هعرف أجي تاني اسجل أمنيات للسنة الجديدة ولا لا
بس أتمنى يارب تكون سنة اكتمال تحقيق الأحلام 💜


الخميس، 17 نوفمبر 2022

طاقة حب



ايه ده أكتوبر خلص من غير ما اسجل اي حاجة وكمان عدينا نص نوفمبر
الحقيقة الاحداث السريعة والزحمة وكل الحاجات اللي شغلاني وجت ورا بعضها خلتني مش لاحقه اقعد مع نفسي

عيد ميلادي في وسط البلد ف ايتوال تحديداً وشوارع وسط البلد وشنط هدايا وكتير كتير من الحب
من الأيام المميزة في حياتي، دمعت من الفرحة وعيطت من الألم عملت حاجات مختلفة وحسيت مشاعر مختلفة
انتصرت على خوفي وقلقي واتعرفت على ناس كتير جديدة 
كنت طايرة بجملة حاولت اجيب هدية شبهك اللي كل واحدة من البنات قالتها وكأنهم متفقين
كنت ظايرة بالهدايا فعلا حسيتها فعلا فعلا شبهي 
يوم جميل لبداية مرحلة جديدة من حياتي، بداية أتمنى تكون خير وجمال وراحة زي ما بحلم يارب 
يارب قويني وتبقي حياة حلوة يارب


والحلو أقوله يا حلو في عيونه يا ملاك يا جنية يا ست الحسن 
يعجبني توهانك ف احلامك يعجبني شد الخصر بحزامك يعجبني أخدك للكتب بالحضن
ازاي مها قدرت توصل لأن الأغنيه دي "أنا" ازاى قالتها في الوقت اللي كنت بغنيها فيه اصلا
فرحت أووووي لما قالتلي الاغنية دي أنتي بكل برائتها وتفاصيلها، فرحت أوي بكل كلمة اتقالتلي في اليوم ده حقيقي
كان في بوست اننا نوجه رسالة شكر لنفسنا، فأنا كتبت رسالة شكر لنفسي وفعلا مُمتنة لنفسي جدا اني لسه قادرة احلم
هسيب الرسالة هنا علشان كل ما أحس بإحباط أجي اشوفها وأقول لنفسي برافو يا صغنن 


من المواقف اللي عمري ما هنساها لما قلت لرحمة انا عايزة اروح دار الإفتاء وقالتلي يلا بينا. 

ووقت ما كتبت اني حزينة وبعيط من وقت ما صحيت من النوم 

ولقيت رشا بتتصل بيا وفضلت تحكي معايا كتيروالاقي رنا بعتالي انا جيالك عايزة حاجة اجيبها وانا جاية

 من غير ما حد يحب يعرف أي سبب من غير ما يطلبوا أحكي حاجة، ما هذا الجمال والله

ربنا يبارك فيهم ويخليهم ليا يارب 



رجعت الصورة الموف التي تُشبهني، بعد رسائل من ناس كتير بقالنا سنين مش بنتكلم بعض داخلين يقولوا

 الصورة وحشتهم - انتي بالنسبالنا الصورة دي - الصورة دي فيها من روحك 

الرسائل دي فرحتني اوي كنت مستغرباها في الاول وبعدين قلت ما عادي دى رحمة ربنا ليه مستكترة ربنا يبعتلك رسايل حلوة

ف عًدنا بقي وكدا، وكل الناس بقت مبسوطة وانا بقيت مبسوطة والحياة بقي لونها بنفسج خالص الحمد لله

مبسوطة بكل الدعوات الحلوة المخصوصه اللي وصلتني وبكل الرسائل الأمنيات والهدايا وكل كل حاجة 




لسه بقول انا موجوعة أوي يارب، انا حاسة بلطفك وكرمك معايا حاسة أوي بحبك ليا 

بس انا ضعيفة أوي غصب عني لسه موجوعة غصب عني لسه بعيط وبقول ليه 

سامحني يارب علي ضعفي ده، سامحني على إني لسه بدعي عليهم ومش قادرة أبطل 

لكن أنا وصلتني حكمتك واستوعبت الحمد لله، فاللهم لك الحمد حتى ترضي ولك الحمد إذا رضيت



طيب نقول بقي إن نوفمبر كمان مبهج وفيه حاجات حلوة، وإن كرم ربنا أكبر بكتير من أي توقعات

وإن زي ما آية قالتلي "اللي ربنا بيحبه بيسخرله الدنيا وما عليها، كل حاجة حصلت بتقول ربنا بيحبك يا آية بيحبك أوي" 

بعيط أهو كالعادة علشان فعلا بجد كمية المواقف والدعوات والكلام اللي اتقالي الفترة دي يكفي افتكره العمر كله وأقول الحمد لله

لما آية بردو دعت وقت الفجر " ربنا يساعدك ويقويكي وإيد النبي تكون في إيدك إن شاء الله" مش قدرت أوقف دموعي 

ودعوة استاذة إيمان "ربنا يرزقك تطييب خاطرك بالصدف والعمد ومن غير قصد" 
لما صفاء قالت "إنتي مرتبطة في دماغي بدعاء معين كل ما بقوله بدعيلك طول رمضان في القيام بدعيلك
مع كل قيام من رمضان لدلوقتي بدعيلك مش بقيتي بتفارقي دعائي سبحان من ألهمني أدعيلك" 
الله بجد الله على جمال الدعوات والطريقة اللي اتقالت فيها والوقت اللي اتقالت فيه 

فإزاي ازعل بقي بعد كل ده مفيش حاجة في الدنيا تستاهل الزعل قدام كرم وفضل ربنا عليا 

لسه طمعانه في كرمك وفضلك يارب، لسه صغيره قوي قدام رحمتك ومغفرتك ولطفك