الخميس، 25 ديسمبر 2014

في ديسمبر تولد الأحلام




20 ديسمبر 
يوم بالدنيا دى ولياليها 
وحياتى اللى بحلم بيها هعشهالك حبيبي
وعدت سنة ورغم كدا مش قادرة استوعب انها سنة 12 شهر 
كل اللى مصدقاه بس انها كانت 365 يوم سعادة  الحمد لله ^_^
سنة واحنا سوا بنهزر و نلعب ونتخانق زى الاطفال مش قادرين نستوعب فكرة الجواز التقليدي
سنة بنتفرج على الكارتون وبنشرب شاي بلبن وبنفطر على صوت فيروز
سنة كانت الـ "ن" هي سيدة الموقف
سنة عديت فيها بظروف أصعب ما يكون كنت بموت في كل لحظة كان حضنك هو الامان الوحيد
و جملة كفايا اننا سوا بتهون عليا كتيررر
ربنا يخليك ليا ياااارب



ديسمبر يمكن اكتر شهر كان فيه أحداث بس استمتعت بيه جدا 
والحمد لله على كل حاجة حصلت فيه
ويمكن من أكتر الحاجات اللى أحب أفتكرها في ديسمبر السنة دى
غير حفلة عيد جوازى يعنى المغامرة الفظيعة اللى عملتها يوم ما نزلت وسط البلد لوحدى
والخروجة اللى تقريبا لفينا فيها بداية من الدقي للسيدة زينب لمصر الجديدة
ومش ممكن انسي طبعا ان ده كان اكتر شهر مش عملت فيه أكل يا أما خروجات يا أما دليفري
ياااه لو كل الشهور تبقى كدا  :D
كمان اخيرا رحت بيت دون وأول حفلة توقيع أحضرها لحد كانت من نصيب أمل زيادة
ومش عارفة بقى الكام يوم اللى باقيين ممكن يحصل فيهم ذكريات حلوة اجي اكتبها تانى ^_^



بحب البرد جدا اكتر من الشعور بالدفا بحب أفضل طول الطريق فاتحة شباك العربية اللى جنبى
واحس طول الطريق بالهوا البارد على وشي وبستمتع جدا بالخروج في البرد
وبالمشي تحت المطر وأكل الايس كريم
اصلا انا حبيت عمرو دياب من أول ما قال أيس كريم في ديسمبر الراجل ده بيفهم والله
كل حاجة حلوة حصلتلى في حياتى كانت في الشتاء
أتولدت في الشتاء وحبيت في الشتاء واتخطبت واتجوزت في الشتاء
عشت أجن 3 ايام في حياتى واحلى أيام في حياتى في الشتاء
ده غير ان الشتاء يعنى مج النسكافية الساعه 2 بليل وصوت فيروز والمدونة
يعنى صلاة الفجر والدنيا بتمطر واحساس ان ربنا قريب منك جدا في اللحظة دى بالذات
هو فى أحلى من كدا


يمكن انا اتغيرت شوية كمان السنة دى عن اللى قبلها 
وجايز في ناس شايفة انى اتغيرت اوووى بس اللى واضح على الأقل لنفسى
انى بقيت افضل كتير من الاول بقيت واضحة اكتر محددة انا عايزة ايه
بقيت بحبنى وشايفة انى استاهل اى حاجة حلوة بتحصلى 
بقيت أحب اتصور وشايفه نفسي حلوة عادى 
 العقد النفسية الخاصة بالتصوير راحت الحمد لله 
في بعض الصداقات القديمة رجعت اقوى 
في علاقة صداقة واحدة انتهت غصب عنى 
ودى اول مرة تحصل حاجة زى كدا بس الحمد لله انها عدت على خير 
وبحاول اعمل صداقات جديدة وربنا يستر :D
تقريبا دي هتكون آخر تدوينة في 2014
وأحب اقولها انتى أحلى سنة عدت عليا لحد دلوقتى 
ويارب يارب السنة الجديدة تبقى أحلى كمان 
وكل الاحلام اللى اتولدت في الشهر ده تكمل على خير يارب 

الأحد، 30 نوفمبر 2014

Sweet November



إسعدي نفسك إنتي تقدري
هي المشكلة اللى بجد مش انك تكوني عارفة ايه بيسعدك فتعمليه
مش دايما وسائل سعادتك الذاتية بتجيب نتيجة أوقات بنكون محتاجين مساعدات خارجية
زى حلم حلو أوي نحلمه فنصحى مبسوطين جدا وناسيين اى حاجة تانية
زى خروجة مفاجاة يتغير معاها حاجات كتير اوى 
زى مكالمة معاكي مثلا وشوية رغي قد ساعتين كدا 
زى انى بحتاج دايما حد يعمل زيك ويفكرنى كل شوية انى أقدر أو إني استاهل السعادة دى

............................................

1 نوفمبر كان نهاية قلق وخوف ومسلسل الرعب اللى استمر8 شهور والوصول للاستقرار النفسي
واول مرة تروح معايا المنصورة كان نفسى يكون الوقت بدري شوية
علشان نروح كل الاماكن اللى كان نفسى اروحها معاك
بس متعوضة ان شاء كل ما نروح كفرالشيخ نبقى نروح من المنصورة :D

............................................

مشكلتى انى كلاسكية جدا وكائن شتوي بزيادة
وان بفكر ليه فى المشكلة دى وهل ممكن اغير من نفسي إذ فجأة الاقي الكلام ده على الفيس فى وشي كدا
المراة الكلاسيكية المغرية , هى المرأة التى تفيض بالعاطفة و القوة .
عيناها مليئة بالجاذبية المحرضة و يحيط بها جو من الغموض و كأنها ملمة بجميع اسرار القناعة .
و بالطبع ينظر اليها معظم الرجال على انها امرأة لا تقاوم كما انها تستخدم حيلها الانثوية لتنشر سحرها.
ليس هناك شك انها تعرف مبتغاها و طريقها الى السعادة.
و طبعا لازم اسيب النسكافية وازبهل وادخل فى هيسترية ضحك ^__^

.............................................

قائمة أحلامى بتاعت السنة الجديدة اتحققت منها 4 في نوفمبر الحمد لله 
يعنى احتمال على يناير اكون حققتها كلها ولا حاجة ومش عارفة هعمل ايه باقى السنة 
بس فى امنية غريبة كتبتها السنة دى يمكن تفضل عايشة معايا كتير 
على أمل انها تتحقق يوما ما 

................................................

لكن نوفمبر انتهى نهاية مأساوية كوميديه جدا ومبارك طلع براءة 
وان كان ده شيء كان متوقع اصلا بس بردو بس اى حد كان ياخد اى حاجة 
ده الواحد بدأ يشك فى قواه العقلية والله 
وبإستثناء الحكم ده فكل حاجة فى نوفمبر كانت جميييييلة جدا 
وفى انتظار ديسمبر حبيبى بقى ^_^



الثلاثاء، 11 نوفمبر 2014

تهييس وأشياء أخرى



 صديقاتى الجميلات اللى بيطالبوا انى أرجع أكتب رومانسي وكدا 
الرومانسية طلعت مش كلام وبس ابسلوتلى احنا كان مضحوك علينا 
الرومانسية مواقف حلوة اوى بتحصل من غير ما نتوقعها او نفكر فيها 
واكتشفت اننا بنكتب دايما عن الجانب اللى ناقصنا فى حياتنا 
ويمكن جانب الحب ده عندى بقى ممتلئ عن آخره مفيش إحساس نفسي أعيشه 
يمكن الفترة دى فى حياتى كمان بقت واقعية جدا شايفه الرومانسية فى أرض الواقع
عايشة الحب لحظة بلحظة فى كل يومى برتب لحياتى بشكل عملى وخطوات واقعية
مش زى زمان مقضياها أحلام وخلاص 
و تقريبا دى الفترة اللى لازم أترجم فيها أحلامى لواقع ولذلك فأنا بحاول وكدهون ^____^

...........................................

يمكن انا من الناس اللى بتوهم نفسها جدا
من فترة وانا مسيطر عليا فكرة انى مش بعرف اكتب روايات أو قصص
لدرجة انى اتوهمت فعلا ومش بقيت بكتب أي حاجة
لكن وانا بقرأ الجزء الوحيد اللى كتبته من الرواية اللى مس عايزة تخلص حسيت انى بقرأ لأثير عبدالله
وان عزيز وجومانة هما اللى بيقولوا الحوار
وإذا بعقلى الباطن بيسألني يعنى دى حاجة حلوة ولا وحشة بقى
الله أعلم يا كوكو ^_^

...............................................

شغلى فى البوسطجى بدأ يأخد شكل إحترافي أكتر مقالات بقى وتخصص 
وإحساس انى بقيت صحفية بجد وبحضر إجتماعات للمجلة 
ده بالإضافة إلى ناشرون وكتابهم الأول والثاني اللى انا موجودة فيه 
وحالة البهجة المستمرة اللى بينشروها مع الكتب بجد حالة أكتر من رائعة 
بحب إنتمائي للمجموعات المبهجة  وبكون فخورة انى واحدة منهم 
سواء كانوا مدونين أو مبدعين مما قرأت او بوسطجية أو ناشرون أو نون النسوة

...............................................

عايزة اروح الزقازيق جدااا وحشتنى الجامعة ودفعة تمهيدى ماجستير 
وأحلى سنة درست فيها وأسوء سنة على جميع الأصعدة الأخرى 
بس كنت مستمتعة وجدا كمان برغم كل حاجة حصلت انا كنت فخورة بنفسي 
نفسى السنة دى تتكرر تانى بس أعمل مونتاج الأول للحاجات الوحشة اللى كانت فيها :D

.................................................

عيد ميلادى السنة دى كان مميز لدرجة خلتنى مش عارفة أقول عنه إيه 
كنت فرحانة جدا بداية من حالة الذكريات اللى كانت مسيطرة على أكتوبر من بدايته
لحد آخر يوم فيه كل الشخصيات اللى مرت فى حياتى كل المواقف 

كل الأيام الحلوة والمشاعر القوية وحالات الاكتئاب العنيفة 
الفراق بكل أشكاله الوجع والفرحة وتعويض ربنا والنجاح والطموح 

الأمنيات اللى اتحققت واللى لسه والهدايا اللى من 1995 لما كنا لسه فى اعدادي 
والكروت الجميلة اللى بخط الأولاد فى المدرسة وهداياهم الرقيقة 
الجوايز وشهادات التقدير والبهجة اللى حستها من الـ " شلن" الدهبى بتاع استاذ الرياضة فى أولى اعدادى
وصولا للـ "الكتير من الشلنات والبرايز" اللى كنت مجمعاهم وانا فى الزقازيق
وختاما في الحسين والهدايا الكتير 
كان شهر رائع بكل حاجة حصلت فيه 

..................................................

وكنت حابة ان 2014 يبقى فيها من كل حاجات زمان 
حققت أمنية الشكمجية اللى من 1998
حققت أمنية عضوية نادى الزمالك علشان اقابل حازم إمام اللى كانت من سنة 2000
جبت قلم روترنج أحمر زى اللى كان معايا فى ثانوي 2004 
أتجوزت عن حب زى ما اتمنيت سنة 2006
بدأت كورسات إنجليزى اخيرا بعد توقف عن الدراسة من 2010
رجعت علاقتى بناس علاقتى بيهم كانت انتهت فى 2011
بدأت فى كتابة رواية كل تفاصيلها بعيدة عنى تماما زى ما كنت مقرره فى 2012

وكل ما افتكر انى خلصت قوائم أمنيات كل سنة وافكر أكتب ايه السنة اللى بعدها 
وايه أتاجل وبيتنقل زى ما هو كل سنة بفرح اوى والأمل جوايا بيكبر

 وحتى لو فى حاجات لسه مش أتحققت لكن الحمد لله على كل التفاصيل الصغيرة الحلوة اوى 
والنعم اللى عمرى ما أخيلت ان ربنا ينعم عليا بيها الحمد لله 
.....................................................

بتيجى فى بالى فكرة غريب من اول ما ركبت المترو انى ممكن اقابل حد اعرفه
هو ازاى ممكن ناس تتقابل فى المترو صدفة مش متخيلة الحكاية دى مطلقا
قد ايه الزحمة والسرعه اللى مش منطقى خالص انها تسيب مجال للصدفة 
ورغم اقتناعى ان ده صعب جدا يحصل الا إنى عندى أمل أقابل حد اعرفه فى المترو 
وبركز مع البنات اللى راكبين يمكن الاقى رنا او رحاب مش عارفة ليه هما الاتنين 
هما دايما اللى بيجوا فى بالى مع تلك الفكرة الغريبة :D

....................................................

واضح ان وحشنى التدوين لدرجة انى رغيت كتير جدا 
نكتفي بهذا القدر بقى وابقى اجى أكمل وقت تانى ^___^

الاثنين، 27 أكتوبر 2014

عن 25 أكتوبر



25 أكتوبر 2014
من الايام المميزة جدا فى حياتى
يوم ما اتقابلت مع مجموعة كبيرة من المدونين فى الاوبرا
وده كان تانى لقاء تدوينى احضره بعد حفلة توقيع الأبجدية في 5 فبراير 2012
وزى ما كان تجمعنا يوم الابجدية مبهج لانه كان حلم لكل واحد فينا
فبردو تجمعنا فى الأوبرا كان أكثر إبهاجاً لانه حلم عام كلنا كان عندنا نفس الحلم ونفس اليقين
فاتيما مش مجرد أم أبنها غاب عنها فترة من الزمن وربنا شاء أنه يرجعلها
فاتيما حلم اتجمعت عليه كل القلوب فلما الحلم اتحقق ويوسف رجع بعد كل السنين دى
كان طبيعي جدا كم الفرحة اللى ملت الدنيا وكم السعادة اللى مفيش حد قدر يوصفها بكلام

.......................................

فى نفس هذا اليوم العظيم قابلت رنا على ورنا يعنى اقرب صاحبه ليا
بقالى كتير اوى مستنيه اليوم اللى هنتقابل فيه واخيراااا جه
كنت فرحانة جدا اننا هنروح سوا وكانت المفاجاة كمان هدية عيد ميلادى :D
وفرحت جدااا بالصور اللى لينا سوا وروحنا سوا واتكلمنا كتيررر بس مش اوى
كان نفسى نقعد اكتر مع بعض بس متعوضة ان شاء الله
بحبك يا رونى اووووووى

......................................

وقابلت لبنى كمان ولبنى قاسم مشترك فى التواريخ المهمة فى حياتي
مع لبني مش مهم نتكلم كتير بحس انى بمجرد ما ببصلها بتحس بيا
كلامنا القليل بيتقال فيه كلام كتيرررر بيلخص كل اللى عايزين نقوله
ومش عارفة ازاى حتى لو مش حكينا سوا وقت ما بتبعتلى بيكون هو الوقت الصح جدا
ربنا يخليكى ليا ياااارب

........................................

خالو ابراهيم فضل يشجعنى ويقولى لازم تيجى مينفعش تبقى قريبة ومش تحضرى
ويقولى لو رنا مش جت تعالى لوحدك هتعرفى دى المكان سهل وقريب
وهو اساسا رنا جت معايا وتهنا بردو ^____^

ساليناز الرقيقة بالفستان الموف كانت مصرة اخد بالونة وانا اخدها واديها لحد تانى 
فى الأخر جابتلى بالونة منفوخة ورغم انى فضلت مسكاها لمدة من الزمن الا انها ضاعت 
ربنا يخليكم لينا ودايما موجودين وتفرحونا كدا
........................................

سحر الاكتشاف اللى كان فى اليوم بنوتة عسولة لدرجة فظيعة حسيت اننا صحاب من زمان جدا
وطبعا اليوم بقى مميز اكتر لما عرفت انه يوم ميلادها كمان
ومحمود جوزها اللى صورنا فيديو لتوثيق اليوم 
ربنا يسعدكم يارب ونتقابل تانى قريب 

.....................................

شيرين الجميلة و مارو وكيكي و كارول و إيثارومنى واسامة ازهري و محمد متولي 
و فاطمة العبيدي وغادة محسن اللى فرحت جدااااا انها جت وانا موجودة 
ومدونين تانيين كتيررر مش فاكرة الاسماء اوى للاسف 
بس كان يوم جميل جداااا ومميز جدا 


السبت، 25 أكتوبر 2014

ذكريات أكتوبرية



كل سنة من اول ما اكتوبر ولحد يوم عيد ميلادى 
بفضل افكر هحتفل بيا ازاى وازاى اكتوبر هيكون مختلف عن السنة اللى قابله 
السنة دى حاسة ان مفيش وقت اكتوبر خلص بسرعه
 او يمكن انا مش بقيت فاضية ومركزة زى الأول 
السنة دى فى حاجات كتير حلوة وحاجات كتير مختلفة يمكن احساسى بالاستمتاع بيها 
هو اللى خلانى مركزة اكتر مع الذكريات وبتكلم بفرحة عن زمان 
والصحاب والحب و المدرسة و الماجستير و الطموح وكل الحاجات الحلوة اللى حصلت فى حياتى
وكل القرارات الحلوة جداااا بردو اللى اخدتها الشهر ده وكل البدايات الجميلة اوى اللى ابتديتها
بفتكر من اكتوبر2013 لحد اكتوبر 2014 ايه اتغير الاقى ان كل حاجة تقريبا اتغيرت 
كل حاجة بمعنى كل حاجة فعلا 
فاكرة اكتوبر 2013 كان كله ضغوط علشان الجواز هيتاجل وكمية الضغوط  اللى كنت فيها 
فى الشغل والبيت ومع فستان الفرح ومع باقى الجهاز اللى ناقص 
فاكرة محمد لما فرحنى اوى باحتفاله بعيد ميلادى ونسانى كل اللى حصل طول اكتوبر ده 
واكتوبر 2012 اللى كان حلو بطريقة مذهلة اول عيد ميلاد ليا وانا مخطوبة مع فرح ابن عمتى 
ومحمد معايا فى الفرح واول مرة نسافر سوا ونكون مع بعض فى مناسبة وسهرانين للصبح وبات عندنا 
اما اكتوبر 2011 فكان مرحلة الانتظار لحلم الكتابة فرحانة بأبجدية إبداع عفوي ومستنية حفلة التوقيع 
وبداية ان حياتى كلها تتغير 
اكتوبر 2010 اخر مرة كنت اروح الزقازيق واخر هدية تيجيلى من واحدة صاحبتى وقمة الاستمتاع والصدمة 
واللى كنت فاكرة ان الدنيا كلها هتقف عند الشهر ده فى السنة دى بالذات لكن الحمد لله كانت نهاية الحاجات الوحشة
وبداية التغيرات الحلوة واللى بعتبر ان بعد اكتوبر 2010 بدأت الدنيا تتصالح معايا 
اكتوبر 2014 بقيت زوجة وعندى بيتى وجوزى وبلد تانية عايشة فيها وحلم جميل مستمتعه بيه و شغل جديد بحبه
ورواية مش عايزة تتكتب و البوسطجى اللى بدات أثبت نفسي فيها و مجلتنا الحلم اللى فى طريقه انه يتنفذ
ودراستى اللى رجعالها بقوة ان شاء الله وبجهز نفسى ليها و صحابى اللى بقوا اقرب ليا من الاول
وخبر رجع يوسف لفاتيما اللى رجع الروح للمدونات كلها من تانى
واللى بعتبره رسالة من ربنا بيطبطب بيها على قلوبنا كلنا 
الحمد لله 2014 كانت سنة مميزة جدا بالنسبالى
ويارب يارب السنة الجديدة من عمرى تبقى سنة تحقيق كل الحاجات اللى نفسى فيها 

الخميس، 25 سبتمبر 2014

ابتسامة



انتى حددتى احلامك كدا و رتبتيها بشكل معين 
ورتبتيها بشكل حلو اوووووى 
انتى حلوة اصلا وتستاهلى كل حاجة تكون حلوة زيك 
ربنا يكتبلك عمرة معاه قريب ان شاء الله

.................................

احنا كبرنا يا سعاد كلنا اتجوزنا و فى اللى بقى معاه اولاد
الدنيا نفسها اتغيرت وانا سافرت كلنا بنبعد عن بعض 
بس ابتسمت لما قولتى الفيس هيقربنا 
انتى بتحلمى يا سوسو ^_____^

................................

افتكرت ابلة سحر اللى كانت بتحفظنا قرآن 
لما قولتلها انا عايزة اتعلم التجويد واحكام التلاوة ابتسمتلى بفرحة كدا
بس مس أماني هي اللى ردت عليا وقالتلى مينفعش انتى لسه مخلصتيش المصحف
وقتها ابلة سحر قال خلاص هتبقى معانا مش لازم تخلصيه حفظ 
المهم انك تكونى قد مسئولية انك تكملى فى الحفظ بتاعك وكمان تزودى فى الحفظ بالتجويد
ابلة سحر لسه بتسال عليا لحد دلوقتى وبتدعيلى 

.................................

بقى نادر جدا انك تلاقى حد تثق فيه وتتكلم معاه زى ما تكون بتتكلم مع نفسك 
الثقة فى ان الكلام بينكم عمره ما هيتقلب عليك او يتحور ويبقى العكس
انك تكون مطمن ان العلاقة الجميلة دى حتى لو انتهت هتفضل جميلة بردو 
الاشخاص النادرين دول لما يكونوا في منهم اتنين فى حياتك 
يبقى انا من الناس الاكثر حظاً فى الدنيا 


..................................


انا بحب شهر أكتوبر جداااا وبستناه مخصوص علشان افرح نفسى 
والناس كلها متفقه على انى مجنونة اساسا 
يبقى ليه الاستغراب انى بحتفل بعيد ميلادى من اول يوم فى الشهر لحد يوم عيد ميلادى 
والسنة دى بالذات بقى هحتفل من اول 1 اكتوبر لحد 20 ديسمبر ان شاء الله ^____^



الأحد، 21 سبتمبر 2014

غيمة



أعشق الغيمات واتتبعها 
قلوبنا تشبهها كثيرا تولد ناصعة البياض 
تتحرك ببطء وبعضها يتجمع ويكون غيمة كبيرة 
وبعضها يتلوث ويصبح رمادياً
والبعض الاخر يحتفظ بالضوء خلفه فبمجرد ان يتحرك
يشع النور والبهجة 

اعشق الغيمات وتبهجني
اقترابها من السماء يجعلنى اتعلق بها اكثر
واشعر انها تحمل لى الكثير من الرسائل فأحبها اكثر
وادعو الله ان اكون مثلها نقية محملة بالخير متعلقة برحمته


السبت، 20 سبتمبر 2014

بلا معني



ليس من الضروري ان نبحث عن معني لكل ما يصادفنا
بعض الاشياء تكمن جاذبيتها فى غموضها
وبعض الامور تأسرنا بغموضها
 كهؤلاء الاشخاص الذين نلتقيهم عنوة ويتركوا بارواحنا أثاراً عميقة
 دون ان يدرك اى منا ان ذلك حدث للآخر 

الجمعة، 19 سبتمبر 2014

التنورة



يأسرني ببهجة الالوان ويحملني فوق تلك الخيمة
 اشعر وكأن الكون يبتهج ويغمرنى بسعادة 
وادور وادور حتى اصل حدود السماء
ينبهني التصفيق الى انه انهى العرض ولكني لازلت هناك
شاخصة ببصري تجاه السماء مغمضة العينين
ابتهل وادور 


الخميس، 18 سبتمبر 2014

إزدواج



انا وانت وتلك الاشياء التي لا تبدو روعتها الا عند حافة النهاية
تتداخل صورنا على صفحة الدمع الصافية وتبدو وكأنها أكثر نقاءً
جسدان بدون وجوه
 تداخل المشاعر بين ذكريات رائعة ووداع قاس
 مما يجعل للمشهد بريق آخاذ 
ونذوب أكثر... ونتحد أكثر... وننتهي



الأربعاء، 17 سبتمبر 2014

يس


 استوقفتنى حركة شفاهها وهي تتمتم بالاستغفار منذ لحظة رأيتها
تبدو وكأنها فى عالم مغاير لا تشعر بمن حولها وماذا يقولون او يفعلون
فقط تبتسم لمن حولها دون ان تتوقف شفافهها
وبعد مضي ساعه فتحت حقيبتها و اخرجت مصحف صغير وبحركة عفوية
انفتح المصحف على سورة يس وكانها تحفظ مكانها تحديدا
وشرعت فى القراءة تارة وهى ناظرة فى مصحفها وتارة وهي ناظرة للسماء
وكانها تناجى الله بآياته وترجوه شئ يستقر بروحها
وما ان وصلت الى قوله " إنما امره إذا أراد شئ أن يقول له كن فيكون"
فاضت عيناها بالدمع واخذت فى تكرارها حتى توهمت اني سمعت دقات قلبها ترددها كذلك

الخميس، 24 يوليو 2014

رمضانى وما فيه 4




يااااه 4 سنين بكتب رمضانى وما فيه 
السنين بتجرى بسرعه اوى لدرجة انى مش بقيت حاسة انها سنين
رجعت اقرا البوستات بتاعت رمضانى 1 و2 و 3 واكنهم كانوا الشهر اللى فات اساسا
بس السنة دى رمضانى مختلف شكلا و موضوعا 


اول رمضان فى بيتى وانا المسؤولة رسميا عن السحور والفطار والعزومات 
اول رمضان وانا حاسة براحة نفسية انى حققت جزء كبير من احلامى وطموحى 


كنت بستعد لرمضان من قبلها بفترة وعايزة يكون رمضان فاصل فى مشاعرى 
عايزة اخرج منه بتفكير مختلف و قرارات مختلفة ورؤية واضحة 
ورمضان قرب يخلص والحمد لله ربنا بعتلى رسايل حلوة اووووى طبطبت على قلبى  
فرحة الفوانيس اللى محمد جبهالى و الزينة اللى مليت بيها البيت 
لسفرنا علشان نفطر عن بابا وماما ليوم الخروجة الجميل اللى يطلع نهائي كاس العالم 
لكل حاجة حلوة حصلت فى رمضان وكل لحظة صعبة عدت عليا كل حاجة كنت حساها بشكل مختلف 
اما بقى عن العزومات فهى احساس رائع 
كل الشخصيات المعزومة عندنا شخصيات عامة وواحد منهم عنده تسجيل فى ماسبيروا بعد ما يمشى من عندنا 
واسمعه بيتكلم معاهم على اعتبار ان انا كمان شخصية عامة و مشهورة وبتاع وانا فى قمة السعادة بقى 
وان كانت العزومات دى مرهقة جدا بس نحن لها الحمد لله :D
يارب تكون الايام الجاية احلى واحلى من كل اللى فات علينا وعليكم يارب 



الأربعاء، 23 أبريل 2014

شتات




عايزة اعمل حاجة مش عارفة هى ايه 
بس حاسه انى هعمل حاجة مهمة ومش فاهمه ليه متخيله انها قربت 

انا قررت انى مش هخلص رواية قواعد العشق الاربعون 
عايزة اعيش تفاصيلها مش مجرد انى اقراها وتتحول لذكريات 
اول مرة اقرا رواية وابقى عايزاها تعيش معايا كل يوم صفحة وارجع من الاول تانى 

لكل الجميلات اللى بيسالوا بطلتى تكتبى ليه - خواطر يعنى - والله انا فعلا مش عارفة 
بس انا مش حابه اكتب خواطر اصلا حاسة انها بقت مستنزفه اكتر من اللازم
ان شاء الله يوما ما هتلاقونى بكتب تانى زى ما انتوا عايزين 

 احساس فظيع بانى مشتته شغل المجلة بقى ملغبط جدا الادارة بقت سيئة 
بعدت عن الادب واتجهت للفن بداية من المقال اللى اتنشر فى العدد الالكترونى 
واللى بيتكلم عن الدجل والقنوات الفضائية مرورا بحوارى مع الفنانة هبه عبدالغنى واللى نظرا
لانى مش عارفة هينزل فين مش عايزة ابعته وقفا عند حوار مع الفنان حسام داغر اللى مش عايزة اكمله
انا بقيت مش لقيانى ومش عارفة الخطوة الجاية ايه ولا فين 

كنت فاكرة ان فى  الافلام بس ممكن الراجل يقف يشترى لحبيبته غزل البنات 
وكل غزل البنات اللى اشتراه و يستمتع بفرحتها وهى بتاكله فى  الشارع 
و يغلف استمتاعه بابتسامه فتبصله بمنتهى الحب وتمسك ايديه جامد وتقوله ربنا يخليك ليا 
صدقت لما حصل معايا كدا 

احلى حاجة فى الدنيا الصحاب والرسائل اللى ربنا بيبعتهالنا عن طريقهم 
الشهر ده كان صعب عليا اوى والحمد لله لقيت احلى صحاب فى الدنيا واقفين جنبى 
خايفين عليا ومهتمين و بيتابعونى بالتليفون فى كل تفصيله بتحصل 
على قد ما كانت نفسيتى زفت على قد ما كنت مطمنة انهم معايا 


هذه التدوينة المتباينه المشاعر كتبت تحت تأثير صوت " أنغام "
و اللوحة للفنان توماس.م.تومسون


الأحد، 13 أبريل 2014

أحلام مؤجله



هل جربت يوما ان تضع قائمة لأحلامك التى تتمنى تحقيقها
الواقع يقول ان جميعنا فعل ذلك نرتب احلامنا تبعا لقيمتها لدينا 
الاهم يحصل على 1 الى ان نصل الى 100
قد تكون قائمة احلامك اقل من الـ 100 التى افترضتها انا وربما تزيد 
فقائمة احلامنا تتناسب عكسيا مع قدرتنا على تحقيقيها 

لكن عندما تصل الى تلك النقطة التى تجد معها 
ان رغما عن كون قائمة احلامك اصبحت تتناسب طرديا مع قدرتك
 فعليك ان تعيد ترتيبها تبعا لقدرتها- هى - على الانتظار
 حينها ستجد ان اهم احلام لديك قد تتذيل القائمة فهى احلام المدى الطويل
 لن تتاثر ان انتظرت لعام مقبل او عامين ماذا سيحدث .. لا شئ 
وبعد اعدادك للقائمة ستجد انها اصبحت تتساوى فى العمر الافتراضى
 فجميعها اصبحت لديه القدرة على الانتظار 
اطوى القائمة واتركها فى ابعد الاماكن عن يدك وعد مرة اخرى الى سباق الحياة
 ولا تخشى من احلامك فانها لن تلح عليك مجددا ستتركها لاعوام 
وعندما تصادفها ستجدها كما هى لازالت قيد التأجيل


اللوحة للفنان شهراد ملك فاضلى

الاثنين، 7 أبريل 2014

رسائل مجهولة الهوية



اثبتت التجربة الواقعيه انك بتبعتيلى دايما فى الوقت الصح اوى 
بتجيلى رسالتك وقت لما بكون محتاجة حد يطبطب عليا 
وكل مرة بقولك انا بخير وكله تمام بس اانا مش بكون كدا خالص
بحبك اوى ربنا يخليكى ليا :*

مفيش حاجة اسمها انا عندى حلم وقت ما قولتلى كدا اتحديتك 
وقلتلك لا انا عندى حلم وكل ما  بحقق واحد بحلم بواحد تانى اكبر 
الغريبة انى فضلت امبارح افتكر كان هو ايه الحلم مش فاكرة 
بس الاكيد انى بحققه مش شرط لما يتحقق اكون سعيده 
بس يكفى انى بحقق الاحلام مش بفضل احلم وخلاص

بكره احسن حتى لو مفيش اى حاجة منطقيه تخليه احسن 
كفايا اننا بنصحى بكره نلاقى الدنيا منورة بتفائل غريب
ونلاقى نفسنا لسه قادرين نفكر ونبتسم لصوت العصفافير على الشباك
حتى لو بكره بقى بيخلص مع غروب الشمس لان النور قاطع
هتلاقى ان بكره اللى جاى بعده فيه مميزات احسن 


انك تفقدى ايمانك بنفسك ده اصعب احساس فى الدنيا 
خليكى دايما مؤمنة انك - تقدرى -اى حاجة هتقدرى عليها بس خليكى واثقه من كدا
مشكلتك معايا انى عرفتك فى فترة ايمانى بنفسى بيقل تدريجيا 
مش عارفة افكر معاكى ومش باقى عندى تفائل وامل اديهوملك استفذت كله 
بس بالشوية اللى باقيين من ايمانى بنفسى اوعدك انى هقدر


امبارح كان 6/4 من اهم التواريخ فى حياتى علشان كدا اسعدتنى 
صحيت بدرى اوى علشان الحق اليوم من اوله وعملت عيش 
ومش عارفة ليه بقيت بحس بسعادة وانا بخبز عيش 
يمكن فكرة ان كل الفطار انا اللى عملاه بايدى او يمكن لان شكله محفز للسعادة 
المهم اليوم كان مقسم بين انغام و فيروز وختمت اليوم مع شيكولاته كيت كات 
واتعلمت من اليوم ده انى ارجع زى زمان وحسيت قد ايه مفتقده الهاند فرى 


اللوحة للفنان فريد فاضل

السبت، 15 مارس 2014

بهجة الحلم




وحشتنى المدونة جدا ووحشنى الرغى ووالكتابه 
بس هى الفكرة اننا اوقات بنوصل لمرحلة ان مفيش كلام يتقال 
حالتين معاهم مش بعرف ادون لما بوصل لكامل استقرارى النفسى او كامل الشتات 
مش بعرف اكتب غير وانا بين حالتين 
وقرار انى مش هكتب تانى خواطر و الكلام الفظيع اللى كنت بكتبه زمان صادم شويتين انا عارفة 
بس فعلا انا وصلت لمرحلة استيعابى فيها بقى اكبر من اتنين بيحبوا بعض فى قصه
وبقى اعمق من انى اغرق فى تفاصيل ممله لرواية 
بقيت بدور على الهدف مهو مش هنفضل كلنا نكتب كلام حلو ده العالم العربى كله بقى كتاب اساسا 
بس كام واحد بيهتم انه يوصل بالقارئ لهدف حتى لو الهدف اللى هيوصله هو التفكير
انك تقرا لحد و يخليك تفكر بعد ما تخلص كلامه هو ازاى فكر فى الموضوع ده وقدر يصيغه بالطريقه دى 
انك تربط بين كتاب قريته و الحياه اللى انت عايشها من منظور الكاتب فتبدا تبص للدنيا بنظرة مختلفه 
علشان كدا حسيت ان اللى بكتبه مالوش قيمه فقررت اقول لنفسى كفايا كدا بقى اعملى حاجة مفيده 
ودى تبقى تانى نقطه تحول فى حياتى الادبيه 
وابتديت احلم تانى وارجع اذاكر احلامى زى زمان بالورقه والقلم 
وانا بذاكر و بخطط كدا افتكرت حلمى القديم ان يكون عندى مكتبه 
وحسيت ان هو ده الحلم اللى المفروض يتحقق الاول وبمناقشه طويله مع محمد استمرت اسبوع 
فى الوقت نفسه اللى كنت بجمع اراء صحابى و لقيت اجماع على الفكرة وعجبت الجميع 
اذ بالصدفه كدا الاقى مسج على بيدج شئ سيبقى بيننا واحد اقترح يعملى ديزاين لكلماتى 
قلتله انا عندى مشروع وكنت محتاجة حد يعمله الديزاين وحسيت ان الشخص ده اشارة من ربنا علشان ابدا بقى
والغريبة انه عشر دقايق بالظبط ولقيته باعتلى التصميم وكانه كان مجهزه ومستني اطلبه منه

وده حمسنى اكتر و عملت الصفحة و ابتديت انزل الاغلفه وابتدى الحلم يتحقق 
واللى يفرح اكتر ان اول اوردر يكون " انا عايزه اشترى كل الكتب اللى نزلتوها " 
والبنوته صاحبة الاوردر مش اعرفها ولا اعرف هى عرفت المكتبه من فين بس فرحت جدا بيها
وبعدها توالت الاوردرات بقى ومع كل اوردر بتتجدد البهجة و ريحة الكتب و وواقعيه الحلم 
والنهاردة يبقى عدى على انشاء المكتبه 20 يوم ووصلنا لـ 770 حتى هذه اللحظه و 10 دور نشر 
وعندى امل ان قبل ما نكمل اول شهر هنوصل للالف ان شاء الله 
اما بقى هكتب ايه تانى فهكتب كدا لنفسى واشتغل على احلامى حتى اشعار اخر 

الخميس، 20 فبراير 2014

البنات و البنات




بقالى فترة ملاحظة حاجة غريبة اوى حاصله على الفيس بوك 
الا وهى انتقاد البنات لبعض 
هى واحدة بس تفتح موضوع انتقاد تلاقى باقى البنات ما صدقت وكل واحدة تكتب استاتيس فيه رايها 
ابتداء من موضوع هل يجوز للبنت تنشر صورها ولا لا 
والحقيقه انا مش شايفه ان فى داعى لكل الانتقاد ده مش عاجبك انها بتحط صورتها اعملى نفسك مش شفتيها 
الحياه فيها حاجات كتير قوى اهم من واحدة منزله صورتها على الفيس يعنى 
انتى مقتنعه ان كدا غلط طيب مش تعملى انتى كدا فميش حد هيجبرك تعملى زيها 
ومتخافيش هى مش عدوه فانتى بتحاربيها علشان مش يجيلك الفيرس ولا حاجة 
خليكى متحضرة و خلى عندك مبدأ وافكار مقتنعه بيها بس فى الوقت نفسه متحاوليش تفرضى مبادئك على حد 
انتقالا لموضوع نجيب نيش ولا مكتبه 
طيب ما تجيبى الاتنين او مش تجيبى خالص او جيبى حاجة واحدة 
ايه لازمه انك تنتقدى اللى هتعمل عكس اللى انتى عيزاه
وبلاش احساس البطولة اللى كل مصر عايشه فيه ده المجتمع مش هيتغير لما تعملى مكتبه ومش تجيبى نيش 
ولا كل البيوت المصرية هتبقى مثقفه لو كل بيت بقى فيه مكتبه على فكرة 
فى ناس لا عندها نيش ولا مكتبه و مثقفين وفى ناس عندها كميات رهيبه من الكتب " ورثاها " وعمرها ما فتحتها 
مرورا بقى بظاهرة خلع الحجاب 
اه بتزعلى ان بنت تعرفيها خلعت الحجاب حقك طبعا 
بس مش تحاولى تقنعينى ان غيرتك على دينك و حبك ليها هما الدافع انك تنتقديها بان شكلها بالحجاب احلى 
اصل انا مثلا شكلى من غير الحجاب احلى يبقى اخلع الحجاب بقى مدام الاحلى هو اللى بيحكم الموضوع 
سلوكك كـ محجبه هو اللى يخلى اى واحدة خلعت الحجاب تفكر تانى 
لكن لما تنتقديها بالشكل ده تخليها متاكده ان تفكيرك سطحى والحجاب بتاعك مجرد شكل مش عقيدة 
واسهابا فى تاخر سن الجواز اسبابه و تداعياته ومعاه تحس ان كلهم وصلوا لمرحلة متقدمه من النضج الفكرى 
اللى مخليهم " اساسا مش عايزين " متحررات للدرجة اللى مخلياهم كلهم هدى شعرواى فى مواجهه لتحطيم " قيود المجتمع "
موضوع الجواز ده فى الاساس " رزق " اه والله يعنى لما يجيلك رزقك مش هتعترضى ولا حاجة هتلاقي ربنا يسرلك كل حاجة 
رزق ربنا مش مرتبط بسن ولا بشكل ولا مواصفات هتلاقى نفسك ادبستى كدا من غير ازاى وليه 
قبل ما تنتقدوا حد اتعلموا ثقافة الاخنلاف الاول 
فكروا فى دوركم الايجابى فى الدنيا انتوا مش كل تصرفاتكم صح علشان تنتقدوا اللى بيتصرفوا غلط 
انتوا احلى وارق من انكم تعملوا مع بعض كدا :))

الثلاثاء، 18 فبراير 2014

مكان فى القلب



" أجمل مكان روحته فى حياتى هو البراح اللى فى عنيك "
التدوينة اللى فاتت من وحى مارك والتدوينة دى من وحى أنغام ^_^
و مش عارفة ليه الحملة دى مديه معايا على ذكريات
فجه فى بالى اجمل الاماكن اللى روحتها و حبتها
ومن اكتر الاماكن اللى بحبها ميدان التحرير لما رحته وانا فى آخر سنه من الكليه
و قعدت اكل كشرى على تلتوار و كان جمبنا ولد بيعزف جيتار ومعاه صحابه
كنت حاسه بدفا و فرحة غريبه
المكان اللى حبيته اوى كمان المسجد اللى جنب الموقف فى الزقازيق
كنت دايما بقعد فيه استنى معاد المحاضرات او اراجع قبل ما اروح الامتحان
والمسجد اللى كنت فرحانة جدا انى صليت فيه كان مسجد النور فـ العباسيه
اما بقى الجامع الأزهر فيومها كنت طايره من الفرحه ودخلت المكتبه ومش كنت عايزة اخرج منها تانى
نرجع بقى لوجه بحرى و نقول بلطيم والمشى على البلاج و اخر مرة كنت هناك قابلت رحاب صالح
هو احنا مش اتمشينا كتير بس كفايا انها كانت المرة الاخيرة اللى اروح وان المرة دى ارتبطت بيها
اكتر مكان بستمتع فيه بقى هو دمياط الجديدة البلد دى هاديه وملهمه بشكل فظيع
نيجى بقى على احلى تجربة حصلتلى فى حياتى كلها ( لحد دلوقتى يعنى :D )
شرم الشيخ حيث روعه الجبال و جمال الطبيعه سبحان الله 
اما بقى الغطس والشعاب المرجانيه قريبه مننا و السمك من حوالينا 
انك تندمج مع الطبيعه وتحس بكل حواسك وهى بتسبح احساس مالوش وصف
الاماكن اللى فى قلبى بقى ونفسى اروحها جداااا
اسكندرية بحبها اوووى مع انى مش رحتها غير مرة واحدة
وكنا رايحين مطار برج العرب فمش تحسب طبعا المره دى :D
مكه طبعا بعتبرها رزق ودايما بدعى ربنا يرزقنى بزيارتها
القدس ودى بقى حلم حياتى ان اصلى فى المسجد الاقصى قبل ما اموت
اخيرا بقى اسبانيا الاندلس العربى بعشقها
ودى كانت كل الاماكن اللى فى قلبى رحتها او نفسى اروحها

صباحكم احلى من الاحلام :))

هامش : الصور الموجودة من تصويرى ^___^

الاثنين، 17 فبراير 2014

blogger movies




كلنا عجبتنا فيديوهات مارك اللى بتلخص وجودنا على الفيس بوك فى صور و تواريخ
بالرغم انى بحس دايما ان الفيس بوك وقتى مينفعش يكون البوم للذكريات 
لكن مارك طلع ذكى جدا و عمل لكل واحد فيديو الذكريات 
بس بلوجر دقيق فى ذكرياته اى حاجة عايز ترجعلها هتلاقيها بمنتهى السهولة 
ولانى حبيت جدا المعلومات اللى عرفهالى فيديو الفيس بوك فحبيت كمان تكون عندى نفس المعلومات مع بلوجر 
اول ما عملت المدونة كان اسمها YoYo
اول بوست كتبته فى المدونة كان بتاريخ 5 مارس 2007 يعنى بقالى هنا 7 سنين :D
واول كومنت كان لـ أميرة حسن اللى اكتشفت من شوية انها نفسها اميرة الدسوقى صاحبه كتاب بس يا يوسف 
( ودى من الحاجات اللى استغربتها شوية و اخدتنى لتفكير طوووويل بتاع ساعه كدا )
فى 2008 مش كتبت اى تدوينة وده لان الاحداث اللى حصلتلى فى السنه دى كانت اكبر بكتير اووووى من انها تتدون
كمان فى حوالى 40 تدوينه كـ مسودات ودول اتنشروا فى الفترة ما بين 2007 لـ 2010 
اول حملة تدوين كانت 2011 ومعاها فتحت المشاركات اللى كانت مقفوله لمدة سنه 
اكتر سنه كتبت فيها تدوينات كانت " 2012" كتبت 79 تدوينه 
اعلى نسبه مشاهده 1077 كانت لبوست اسمه من ذاكرتى 
غيرت استايل المدونة كتير مع تغير حالاتى النفسيه اول استايل كان التقليدى بلون بينك
غيرت اسم المدونة فى 7 /7/ 2009 وبقت شئ سيبقى بيننا 
بحب مدونتى جدا هى الحاجة الوحيدة اللى فضلت معايا كل السنين اللى فاتت وقوتنى و سمعتنى 
عاصرت كل التفاصيل الحلوة و احتفظت بكل الاسرار الوحشه 
كتبت فيها وانا بعيط ووانا بضحك ووانا مش فاهمه بكتب ايه وانا فى بيت اهلى وحاليا وانا فى بيت جوزى 
وحبيت ابتدى حملة التدوين المره دى بفيلم مقروء يناسب بلوجر ^_^



السبت، 8 فبراير 2014

معرض الكتاب ٢٠١٤




البوست ده اتاخر شويتين لاني كنت تعبانه اليومين اللي فاتوا 
واول ما بقيت كويسه الحمد لله جيت احكي بقي :))
كنت مستنيه معرض الكتاب من اول ما اتجوزت وعماله اكتب ايه الكتب اللي عايزه اجيبها 
وعملت قائمه طويله وقسمتها اصدارات اصحابي مع بعضها والاعمال الكامله مع بعضها 
وروايه قواعد العشق الاربعون لوحدها ( سبحان الله الوحيده اللي مش لقيتها :D )
وجه شهر فبراير وكنت زي الطفله اللي كانت مستنيه العيد واخيرا جه 
وعماله اجهز هلبس ايه وقلبت الدولاب الحمد لله وفي الاخر الكهرباء قطعت وبوظت كل الخطط 
المهم اني طبعا مش جالي نوم اطلاقا لحد ما رحنا المعرض بقي^_^ 
كنت في قمه السعاده واحنا في الطريق كانت حاجه ابعد من خيالي انا ومحمد ورايحين معرض الكتاب يااااه 
بعد ما وصلنا واتمشينا شويه كانت مكالمه الجميله " رشا نعمان " بعدين دخلنا بقي صاله ٢ 
واول ما لمحت فلومستر ابيض وناس كافيه رحت بسرعه اشتريتهم وانا في قمه السعاده بقي 
وقتها اتصلت عليا الرقيقه جدااا " لبني أحمد " ولبني من الاشخاص اللي وجودهم بيطمني جدا و بيقويني 
وبعد كدا جه معاد حفله دينا عماد وكنت من اوائل الناس اللي وصلت سلمت عليها وواقعتلي علي الروايه
كنت فرحانه انها فكراني من يوم ما عملت معاها الحوار في البوسطجي
بعد كدا رحنا عند جناح دار روعه علشان " عيل عجوز " لأحمد فرج الديوان اللي عندي نسخته الاصليه 
وعليها اهداء خاص وكان وقتها من الحاجات اللي فرحتني جدا ان احمد يطبع عشر نسخ من شعره كله 
ويبعتلي نسخه علشان اقيمها و يشوف هينشر منها ايه في الديوان اللي بقي اسمه عيل عجوز 
علشان كدا كنت حاسه وكأن الديوان ده بتاعتي انا
 نفس الاحساس حسيته مع نوافذ مواربه لما لقيت اسمي مكتوب ضمن لجنه التحكيم في بدايه الكتاب
 كانت مفاجاه بالنسبالي لان كنت فاكره ان اسمائنا هتكون في النسخه الالكترونيه بس مش الورق كمان 
وصلنا بقي لدار ليلي وصورت كل الكتب لصحابي و اشتريت بعض الكتب
وهنا جت مكالمه " آيه عبدالكريم " اللي اديتني حماس و طمنتني جدا بصوتها المبهج
اول ما رديت عليها ولقيتها بتقولي انا جايه استنيني هو الطريق اللي زحمه 
وفرحت جدا انها جت وجابت جوزها واخته بس نسينا نتصور سوا  للاسف 
بعد كدا جت " نهي ناصر " بعد ما لفت عليا صاله ٣ و صاله ٢ لان دار ليلي عامله جناحين 
و بإبتسامه جميله عرفتني بنفسها واتفقنا نتقابل تاني في حفل توقيع كتاب " ترام هليوبوليس " 
اما بقي احلي شباب في الدنيا اللي مش كنت متخيله انهم يحضروا حفل التوقيع فعلا هما جروب التولتميه 
واللي مش لحقني للاسف البراء حسن وبعد ما روحت لقيته باعتلي علي الفيس اعتذار انه اتاخر 
والاجمل في اليوم ده بقي هو خالو ابراهيم رزق و الجميلان ساليناز و زياد 
اللي قضوا معانا باقي اليوم و حضروا معايا حفله توقيع كتاب ترام هليوبوليس وبعدين رحنا سور الازبكيه 
وكان طول الوقت خالو ابراهيم و محمد عمالين يرغوا وتخلل هذا الرغي مكالمه الفراشه "شيرين سامي "
وانا استغليت فرصه الحوار المستمر و فضلت الف في سور الازبكيه لوحدي وبعد ما اشتريت اللي عيزاه روحنا كلنا سوا 
ومن محطه المترو اشترينا مجله الشباب اللي اتنشرلي فيها " شهرزاد تحكي عن نفسها "
كان نفسي اوي اروح المعرض تاني يوم ٤ واقابل كل المدونين و مبدعين مما قرأت بس محصلش نصيب بقي 
لكن ان شاء الله هقابل المبدعين يوم السبت الجاي بس يارب حد يبقي فاكر يصورنا ^_^

الأربعاء، 22 يناير 2014

حبة رغى


بقالى يومين عايزة اكتب تدوينة وافضل طول اليوم اكتب فى خيالى
كلام كتير اوووى كنت بفكر انى اكتبه وذكريات كتير اوى بتيجى فى بالى طول الوقت 

يوم فرحى واحنا مسافرين فى الطريق مش عرفت انام ومش كنت عايزة حد يكلمنى 
لان كان فى ناس كتير اوى بتتكلم جوايا 
نفسى اسافر معاك / بحب الزحمة / لما بتفكرى لوحدك بتغلطى 
 انتى احلى حاجة حصلت فى حياتى / اوعى تدعى عليها علشان خاطرى / بو / كورنيش قصر النيل 
احنا لسه داخلين البيت قلت اطمنك عليا صاحبتى اهم من عريسى يا بنتى /  / انا هقفل موبايلك يوم الفرح علشان متعمليش زيها
 هقابلك فى يوم من الايام وهعرفك لوحدى / انتى ارق بنت شفتها فى حياتى / فرحان علشان هتتجوزى هتبقى طفلة اكتر من ولادك  
انا شخصية مينفعش تتجوز غير عن حب / انتى عكس الناس من قريب كل صفاتك بتبقى احلى / جمالك مريمى / نفسى كشرى من التحرير سمعنى اغانى / تاكلى تفاح ولا جزر /  حاسة اننا اول ما ندخل بتنا هنتخانق
بس رغم كل الزحمة اللى جوايا دى كنت اول ما تمسك ايدى الدوشة تختفى و انسى الدنيا واحلم ببكره معاك
وصلنا الساعه 9 وبعد نص ساعه الناس مشيت وفعلا اتخانقنا هوانا ليه لما بحس بحاجة بتحصل بقيت بخاف منى 

فى الايام الاولى من الجواز كنت نشيطه جدااا عدلت فى كل الشقة غيرت اماكن كل الحاجات وبعدها سافرنا 
مع اول خطوة بره البيت حسيت انه وحشنى اوى بس كنت طايره من الفرحة حاجات كتير كان نفسى فيها اتحققت 
مش حسيت بالغربة فى شرم الشيخ زى ما حسيتها فى القاهرة كنت حاسة انى فرحانة بزيادة بتحرك بحرية 
وبصور كل حاجة تقابلنى بس فى الوقت نفسه كنت عايزة ارجع بيتى 
ورجعنا القاهرة ورجعت احس نفس الاحساس تانى كل حاجة فى الشوارع مش مريحه كل الناس مرعبه 
نفس احساسى لما كنت بروح طنطا كنت افضل قاعده فى الموقف لحد ما حد يجى ياخدنى 
مع انى لما رحت الزقازيق كنت بتحرك فى اى مكان عادى وكانها بلدى وحفظاها 
ومع انى جيت القاهرة قبل كدا عمرى ما خفت منها ولا حسيت بالرهبة من الشوارع زى دلوقتى 
بس طول ما انا جوه البيت بكون حاسة بأمان وده مرات قليلة فى حياتى اللى حسيته

مستنيه بقى اشوف كل صحابى اللى عمرى ما شفتهم فى معرض الكتاب 
واعمل اول حفلة توقيع لكتابى بعد سنه من صدوره 
وارجع ادون تانى كل يوم ان شاء الله