Saturday, July 13, 2013

غطسة منوعة



حبيبى قالى اتمنى انا قلت بيت على البحر 
بعتلى شوقه و خدنى بصيت لقيت البحر 
قالى هقولك سر بس انتى عارفة السر 
اللى فى بالك جالى وقالى عليكى شعر 
كلمات : رضا أمين 
انا من عشاق حنان ماضى 
من ايام اذاعة الاغانى فى الصيف واغانيها للبحر 
واسرح معاها ولما اروح للبحر احكيله واغنيله زيها 

.............................

فى ليلة عشق وخدانى على شط الهوى التانى 
قابلت البحر فى عيونك شربت عطشت من تانى 
هى دى حكايتك معايا شوف بقى قلبى و جنونه 
كلمات : أحمد فؤاد نجم 

الاغنية دى قمة الرومانسية والشجن 
اللى مش تبقى عارف هى بتعاتب حبيبها و بتحكيله 
ولا هى بتحبه لدرجة ان الكون كله متورط فى عشقها ليه 
حاجة كدا مش بالسهل حد يوصلها علشان كدا الاغنية دى هى انا 

............................

فى اغنيات تانية كتير جدا زى شباك قديم كلمات ابراهيم عبدالفتاح 
و شدى الضفاير لـ كوثر مصطفى والاغنية اللى بموت فيها كان وكان لـ مدحت العدل 
والجدير بالذكر ان حنان ماضى كانت متجوزة الموسيقار الرائع ياسر عبدالرحمن 
فالاغنيات دى كلها تلحينه و توزيعه كمان 

ونختم بقى فقرة حنان ماضى بكلمات فؤاد حداد 

مفيش فى الاغانى كدا ومش كدا تفرقنا عن بعض بالشكل ده 
يا مصر اللى جايبه الشجر من زمان وشايله الضفاير على البرتقان 
و قبل الاوان اللى قبل الاوان بتحيينى انفاسك المسعده
عنيكى تغمض وتفتح بيبان سطوح الليالى عليه الامان 
و بحر الدره من ورق الامتحان وبتغنى موالى يا مولده 

........................

وانتقالا الى اذاعة القرآن الكريم اللى مش بينفع يومى من غيرها 
فانا عاشقة للابتهالات وصوت النقشبندى و نصر الدين طوبار 
و الابتهالات حاجة كدا تخليك عايش فى دنيا تانية خاااالص 
بتنقلنى لجو الحضرة اللى نفسى احضره بس اعتقد ده للولاد بس 
يمكن انا بقالى فترة طويلة مش مهتمه اسمع اغانى ولان دايما اذاعة القرآن مفتوحة 
فالابتهالات بقت هى اللى بفتكرها اكتر فى الفترة دى 

...........................

هقولكم الاول بعض الابتهالات اللى بحبها جدا لـ نصر الدين طوبار 

رمضان أشرق فالدنى تتطلع ظمئى لنور من كتابك يسطع 
ايقظت قلبى فاستفاق ميمما شطرات الهدى يرنو اليك و يسمع 
سأقوم ليلك داعيا متبتلا واظل يومك خاشعا اتضرع 
اول ما بسمع الابتهال ده يبقى رمضان جه خلاص مش جه فى التوقيت 
لا جه فى الاحساس والحالة بكون حاسه انى شايفه الهلال خلاص 
وان اجواء رمضان الروحانية ابتدت فعلا 

جل المنادى ينادى يا عبادى انا ماحى الذنوب والاوزار 
إلهى بنورك اهتدينا وبفضلك استعنا و بك اصبحنا وامسينا 
من الابتهالات القوية جدااااا واللى بتاثر فيا اوى 

بك استجير فمن يجير سواك 
فأجر ضعيف يحتمى بحماك 

..................................

وختامها مسك بقى مع النقشبندى استاذ المداحين 
صوته كدا اللى يهزك برقة و عذوبة 

رمضان أهلا مرحبا رمضان الذكر فيك يطيب والقرآن 
بالنور جئت وبالسرور ولم يزل لك فى نفوس الصالحين مكان 

سيدى يا رسول الله ... لغة الكلام كما رأيت على فمى خجلى 
ولولا الحب لم اتكلم 
يا مظهر التوحيد حسبى اننى احد الشداة الهائمين الحوم 
لما بدا فى الافق نور .. نور محمد كالبدر .. كالبدر فى الاشراق عند كماله 
نشر السلام على البرية كلها واعاد فيها الامن بعد زواله 

مولاى انى ببابك قد بسطت يدى من لى الوذ به الاك يا سندى 
اقوم بالليل والاسحار ساجية ادعو وهمس دعائى بالدموع ندى 
بنور وجهك انى عائذ وجل ومن يعذ بك لن يشقى الى الابد 
مهما لقيت فى الدنيا و عارضها فأنت لى شاغل عما يرى جسدى 



4 التعليقات:

ابراهيم رزق said...

الله الله الله الله اللاااااااااااااااه

على غطساتك
حنان ماضى دى مطربة جيلنا هى صوت كله احساس طبعا انتى نسيتى اغنية من اجمل اغانيها عصفور فى ليلة مطر

حنان دى حكاية حتى فى تترات المسلسلات البحار مندى و الوسية و اللقاء الثانى و غيرها

اما ابتهال مولاى انى ببابك فده متعرفيش بيعمل فيا ايه
و متعرفيش فرحتى ايه عندما بداو يحطوه على الموبايلات

يا جمال غطساتك
انا كده هبطل غطسات خلاص كده و اقعد فى البيت اعمل قطايف

تحياتى

Aya Mohamed said...

مبسوطة انها عجبتك حضرتك جدا
بس انا كتبته ماليش فى الغطسات اصلا
عملته بس هدية ليك :)

أحمد أحمد صالح said...

أيام الدنيا أحلى من احلام الأغاني
فيها الشارع وبيتنا والحب الأولاني
...
مش عارف هي كلمات مين، بس دي - مع بعض الاغاني اللي ذكرتيها-من أحب أغاني حنان ماضي لفلبي.
أما حنان ماضي نفسها فكانت- ومعاها منى عبد الغني وشيرين وجدي مع الفوارق بين أساليبهم،من أكتر المطربين اللي في الفترة الأخيرة وجدت فيهم حاجات كتير رجعتني لفترة من حياتي مشتاق لها جدا. فعشان كدة بيني وبينهم عشق غامض.
..
أماالمشايخ نصر الدين طوبار والنقشبدني وغيرهم من المبتهلين العظام فصعب أن يصف الشخص وقع كلماتهم وأدائهم على روحه وقلبه، حتى اننا حتى اليوم وبعد رحيلهم لا يهز وجداننا إلا هم بأصواتهم وبإبتهالاتهم الشجية العذبة.
..
في إنتظار غطسة جديد. وكل سنة وانتي يا أية وكل الأسرة بخير وصحة وسعادة، ورمضان كريم.

Aya Mohamed said...

احمد صالح

اغنية ايام الدنيا كلمات احمد فؤاد نجم

انا مش بتاعت غطسات اصلا يا احمد
كانت غطسة طلبها خالوا ابراهيم و علشان كدا كتبتها
كل سنة وانت طيب وبالف خير يارب
ورمضان كريم عليك :)