Saturday, December 31, 2011

عام البدايات




أعشق البدايات وان كنت اخشاها

بس متفائلة جدا ويارب التفائل ده يدوم
فاكرة زى النهارده من سنة لما قلت وداعا 2010
انى توقعت تبقى 2011 سنة سعيدة وتبقى احلى من كل اللى قبلها
والحمد لله كانت كدا مع بعض الاستثناءات
بس الاكيد ان 2011 كانت سنة البدايات ويارب يارب 2012 تبقى نجاح لكل البدايات

بداية الحرية وتحقيق الحلم اللى بقاله سنين ونثبت اننا نقدر نقول لا للخوف
بداية تغيير من جوانا بداية اننا نحلم واحنا واثقين ان من حقنا نحلم ونسعى لتحققه
بداية مصر جديدة متعرفش خوف ولا استسلام
هى مش بداية مصر بس هى بداية للوطن العربى

كتابنا " أبجدية إبداع عفوى " واحلى بداية حصلتلى فى السنة دى
احساس انى بكتب حلو ده كان عادى انما الجديد
هو احساس ان فى ناس مش يعرفوا بيقولوا انى بكتب حلو
تجربة الكتاب كانت من اولها غريبة ولذيذة فى نفس الوقت
فرحانة بكل أصدقاء التدوين اللى اتعرفت عليهم من حملة التدوين ومن الكتاب
سعيدة باول خطوة فى حياتى وان كنت مش عارفة هيكون فى غيرها ولا لا
بس انا مبسوطة اووووى بيها
وشكر خاص جدااا لـــ آية علم الدين & لبنى أحمد نور

بداية فرحة يارب تكمل على خير
واحساس بحالة مش بقدر اوصفها
بتدينى حافز على الكتابة والسعادة والتغير والتطوير
وحاجات كتير اوقات بحس ان مش ليها علاقة ببعض
بس الاكيد انى بكون مبسوطة


حاجة بس ناقصه فى بداية السنة الجديدة وهى ريماس
نبض الرومانسية الحالم وزهرة الغاردينيا الرقيقة
وحشتينى اوى ويارب ترجعى بالف سلامة
فى اسرع وقت ان شاء الله


كل صحابى وكل زوار المدونة وكل شخص عرفنى وعرفته فى 2011
وكل اللى بيتبعونى وكل اللى زارونى ولو مرة
فرحانة اوى بيكم وسنة جديدة مليانه سعادة عليكم ياررررب


اللهم انى اسالك خير هذه السنة المقبلة
يمنها ويسرها وامنها وسلامتها ونورها وبركتها
واعوذ بك من شرورها وصدودها وعسرها وخوفها وهلكتها
اللهم احفظ لى فيها دينى الذى هو عصمة امرى ودنياى التى فيها معاشى
ووفقنى الى ما يرضيك عنى فى ميعادى
يا أكرم الاكرمين يا الله


Thursday, December 29, 2011

خارج النص



قد يكون بى شئ ما لا أعرف
وقد أكون حزينة للغاية حقا كما يقولون وان كنت لا أشعر بذلك
لكن أختفاء صوتى غريب للغاية
فبمجرد إستيقاظى وتفوهى بـ بسم الله الرحمن الرحيم ولم أجد صوتى كعادته
أخذت بتحسس حنجرتى وكأنى أسئلها ما بك وكانت الاجابة المقنعه ربما أصبت بالبرد
لكن كل من تحدث معى فى العمل أصر انى حزينة فأضحك وانا اردد انا بخير ما من شئ يحزننى
وبعد الكثير من المشروبات الساخنة التى تناولتها على مدار اليوم ولم يتحسن صوتى
مع عدم ظهور اى اعراض للانفلونزا فقد بدأت أقتنع بنظرية اختفاء الصوت نتيجة الحزن
رغم انى لست بحزينة وان كنت ايضا لا اشعر بسعادة
" نداء الى صوتى اما ان تعود كما كنت والا فلتخبرنى سبب تمردك على "

.................................

صاحبتى : صوتك مخنوق انتى عايزة تعيطى ؟
ماما : لو عيطتى هترتاحى

بما ان دموعى سريعة جدا ومش بقدر اتحكم ف نفسى فاكيد لو كنت زعلانة هعيط
بس انا فعلا مش زعلانة ومش فاهمة ليه مش قادرين تصدقوا
وعلشان اريحكم فضلت ادور على اسباب ممكن تكون زعلتنى وانا مش واخده بالى
مش لقيت بردو مش عارفة المشكلة فين طيب
بس انا كويسة صدقوووونى

.................................

أريد ان اجدد جميع خلايا عقلى
أن اوقف ذهنى عن التفكير وأقنعه ان ما كان قد كان
وان لا علاقة بين ما كان وما سيكون
فأطيل السجود وأكثر الدعاء
وأنام كثيراااااا

..................................

بتسمعى مزيكا ولا بترسمى
ولا ابتديتى تحلمى
وقررتى فجأة
تتمردى على الرتابة
لو كنتى راجعة تكتبى
بإحساسك المليان دفا
أرجوكى
اوعى تبطلى كتابة

لـ على سلامة

.........................................

انتهى كوب النسكافيه كما انتهت فيروز من سؤاله " كيفك انت "
وانتهيت من خروجى عن النص
شاعرة براحة وبأنى أفضل بكثير من بداية كتابتى لهذه التدوينة

تصبحون على احلام محققة


Tuesday, December 27, 2011

رسائل أعينهم




بريق عينيه يجذبنى لأتامله أكثر
حزن خفى يطغى على ملامحه البريئة
أشعر وكأنه يحتضننى ليستشعر الامان
شئ به يدفعنى تجاهه أكثر
فـ يهمس بقلبى بنظرة يملؤها الالم
قد تكون كل النساء أمى لكن لن يكون كل الرجال أبى


عميق هو خوفه من الوحدة
قويتان يداه وهى تمسك بأطراف أصابعى
ما من شئ يربطنى به انها الصدفة
التى جعلتنى معلمته
أطمئنه انه أباك ... أنه يحبك
فتقوى يداه أكثر و يرتعد خوفا أكثر
وينظر الى أباه نظرة غاضبة ليعود الاب من حيث جاء
ويرتمى باكيا بين ذراعاى فتصلنى دمعاته معلنة
مثلما أهان كبريائها جاء دورى لأقتص منه


نظرات الانكسار لا تفارق عينيه
اشعر به جيدا وهو يأتى كل يوم ليرى ابنته التى ترفض ملاقاته وبشدة
يخبرنى ان امها كانت السبب وانه تحمل الكثير من أجلها
فأواسيه بانها أصغر من ان تعى من كان السبب وأنها لا تدرك شئ مما حدث
وكل يوم قبل ان ياتى اجلس مع طفلته لأكسبها حنان لابيها
وفى اخر العام نجحت انا عندما وافقت ان تجالسه
وبعدما رحل عادت لتخبرنى عما حدث وهى سعيدة وعينيها تقول
أحبه كثيرا ليته ما تركنا نذهب


لم يدرى اى منهم ان لرضيعهم رسالة
فى البداية كان لهم حق التروى والاختيار
كانت لهم كافة الصلاحيات الممكنة لكنهم تعمدوا الاستغناء عنها
اغمضوا أعينهم بأسم الحب وصموا اذانهم بإسم الغد سيحمل التغيير
ليأتى هو ذلك الوليد رغما عنه ليجد بقايا أسرة
جميعا توقع له حياة مشتته بين أب وأم ارهقهم الخلاف و قضى عليهم الاختلاف
كان الخوف يحاصر القلوب ولعل قلوبكم تألمت من أجله
لكن رده كان أقسى من واقعه
فقد قرر الانسحاب بهدوء من الحياة كى تصلهم رسالته الاخيرة
قد جنبت كل منكما ثمن سوء الاختيار لتبدا من جديد ...



رسالة أخيرة

بسم الله الرحمن الرحيم

" وليخشى الذين لو تركوا من خلفهم ذرية ضعافا خافوا عليهم فليتقوا الله وليقولوا قولا سديدا "

صدق الله العظيم

سورة النساء آية 9

Friday, December 23, 2011

بعض من نبض ...مات



يتسألون من انا ..... وساخبركم

انا التى يوما أحبت على نغمات فيروز وكلمات نزار وغنت عشقا وحزنا وشوقا

انا التى علمها طقوس الحب وكيف تعامل الحياة والناس

انا التى فتحت لقلبها باب الرياح العاتية دون مبالاة لانها معه

انا التى تذوقت طعم السعادة من نظراته لها وكتبت فيه الشعر وغنت له مئات الكلمات

انا التى ظلت لسنوات تدعو وتصلى وتقترب من الله كى يجمعها به

انا التى برغم يقينها بحبه لم تتخيل ماذا يقول عنها لانه يقول للجميع الا هى

انا التى لم تتوقع انه احبها الى درجة انه بفقدها سيفقد اتزانه

انا التى لم تصدقه عندما اخبرها ان بفقدها سيكون ضياعه

انا التى لم تؤمن بنظريته فى الفراق اننا لابد ان يجرح اى منا الاخر حتى نستطيع النسيان

انا التى صدقت كذبته انه يجرحها ليحميها من نفسه فتمادى فى تمزيقها لا جرحها فقط

.................................................

فى شريعتنا ....

تعيش المرأة عمرا تهيئ نفسها لتكون أما .... وقد فعلت

وتظل تحيط جنينها بالحنان والحب بمجرد شعورها به داخلها ..... وقد فعلت

وبصبر تتحمل ألم مخاضها و تتناسى كل ما بها سعاده بقدومه ...... وقد فعلت

وتظل عمرا تطوقه حبا وقلقا وخوفا وشوقا ..... وقد فعلت

ورغم كل ما يفعل تبقى هى راحته وامانه ...... وقد فعلت

وعندما تشغله الدنيا عنها يظل هو ملئ عقلها وفؤادها ...... وقد فعلت

واذا ابتعد ونسى تصلى وتدعو من اجل سعادته ..... ويشهد الله أنى قد فعلت

وفى شريعتنا

لا تختار الأم طفلها وأنما يمنحها إياه الله ..... وقد كنت

وتتقبله بقبول حسن ايمانا بأنه تكليف من الله ....... وقد كنت

ولا تتحكم بصفاته وإنما ترضى بما قضاه لها الله ...... وقد كنت

وتحاول جاهدتا أن تقربه مما يرضى الله ...... وقد كنت

وتصلى وتدعو دوما رجاء فى ان يباركه الله ...... وقد كنت

و تظل عمرا تبتهل من أجل ان يكون اسعد خلق الله .....ويشهد الله أنى قد كنت

وفى شريعتنا

يغادر الجنين رحم أمه بعد فترة من الزمن ..... وقد نسيت

ويتمرد الطفل على حنان أمه بعد فترة من الزمن .... وقد نسيت

ويثور الصغير على خوف أمه بعد فترة من الزمن ..... وقد نسيت

ويحلم الشاب بفتاة غير أمة بعد فترة من الزمن ..... وقد نسيت

ويتزوج الرجل بإمراه غير أمه بعد فترة من الزمن ..... ويشهد الله أنى ما نسيت

ففى شريعتنا

لا تهتم الأم بأمرها فيكفيها أن يظل وليدها سعيد

ولست بأمك ....... لكنك كنت طفلى الوحيد !!!!

................................................
ويتسالون ألازلت أتمناك
ويستنكرون ألازلت أناجيك
ويغضبون ألازلت أحبك
ويثورون ألازلت أرجو من الله سعادتك

ولاننى ما تمنيت شئ من الله قدر ما تمنيتك فقد اعتاد لسانى ان يتمناك
ولاننى ما ناجيت من بشر الله قدر ما ناجيتك فقد اعتادت كلماتى ان تناجيك
ولاننى ما احببت من خلق الله قدر ما احببتك فقد اعتاد قلبى ان يحبك

أما رجائى من الله سعادتك لم يكن مجرد إعتياد وانما إيمان


ولازالت كل عاداتى معك كما هى
لا لشئ سوى أننا فى بعض الاحيان لا نقوى على تغيرها
وليس ضعفا وانما القوة ان تظل على وفائك رغم خيانة الاخرون

ولازالت كل صلاة أدعو الله ان تكون بخير
لا لشئ سوى أننا فى بعض الاحيان لا ننسى اناس أثروا فى ارواحنا
وليس ضعفا وانما القوة ان تظل رحيم رغم قسوة الاخرون

ولازلت كل دعاء ارجو من الله ان يمنحك السعادة
لا لشئ سوى أننا فى بعض الاحيان لا نتمكن من الدعاء بالشر
وليس ضعفا وانما القوة ان تظل على إيمانك رغم تحول الاخرون

ولازلت كل ليلة اناجى الله ان يمنحنى القوة
اللهم أنت القوى ولك القوة وحدك ولك الفضل وحدك ولك الشكر وحدك
اللهم أمنحنى قوة الثبات على إيمانى وقوة الثبات على عقيدتى
اللهم أمنحنى قوة الثبات على الحق وقوة الثبات على الشكر رغم تعاقب الهموم
منك وحدك يا إلهى أرجوها امنحنى القوة بك .....

.............................................
وكلما قرأت فى كتب السيرة النبوية
وتعرفت على مظاهر حب النبى صلى الله عليه وسلم للسيدة عائشة
احفظها جيدا وعندما تاتى افعلها معك
وكنت تعشق اختبائى ورائك لمشاهدة اى شئ
وتعشق اخد الطعام من فمى
ويستهويك ان تشرب من نفس موضعى
فعلتها انا لانها سنن نبوية فى الحب
فهل كان لمحبة مثلى ان تتدنى بمشاعرها يوما ؟

...........................................

ويسالونك عنى
فقل ما عدت اذكرها
ولم يعد فى القلب شئ من هواها
وابتسم مستنكرا انك ما عشقتنى يوما

ويسالونك عنى
فقل ما كنت اشتهيها
ولم ابحث يوما عن رحيقها
وابتسم مستنكرا انك ما تمنيتنى يوما

ويسالونك عنى
فقل ما كان يعنينى لقائها
ولم استمتع مطلقا بكلماتها
وابتسم مستنكرا انك ما احببتنى يوما

ويسالونك عنى
فقل هى طلبت الا اذكرها
ولم اذكرها وقد احببت غيرها
وابتسم مستنكرا انك ما جرحتنى يوما !!!

...............................

حيث ولد حبك فى دعاء
اللهم انك من قدرت لقائنا وألفت بين قلوبنا فاجمع بيننا برضى منك
فمنذ ان أحسست بحبك داخلى سارعت الى سجادة صلاتى وطلبت من الله الهداية
وتمنيتك فى دعائى وانتظرت بشارة انك خير
ولد حبك فى قلب لم يعرف قبلى نساء وكذلك قلبى حافظت عليه لتكون انت اول الرجال
فقد ولد حبك شرعيا
ومنذ ولد حبك اغلقنا قلوبنا وراعينا الله فيه
ولم اتعمد مطلقا المجاهرة بحبك فمرعاتى لله فيك تكفى ليعرف الجميع
ولم اتعمد مطلقا المجاهرة باسمك فقد كان اسمى ملتصق بك لدى الجميع
ولم أكن فى حاجة لابراز حبك لى فقد كان أطهر من كونه قصة تتناقل الالسن تفاصيلها
وعندما يقبل الليل كل يوم اسارع الله فاتحدث عنك
وادعوا ان تظل لى وانتظر البشارة انك لى
فقد عاش حبك شرعيا
ومرت سنوات وانت لى امام الله والجميع
وقد مرت تلك السنوات وانا فخورة بحبك
وانا ممتنة لله ولك .... فقد منحت حبا شرعيا
ألم تلاحظ أننى أكرر دوما (حبك) وليس حبنا
فقط لاننى احتاج الان المجاهرة بحبك
فمثلما ولد شرعيا كان لابد ان يموت شرعيا !!!!!

.............................

كنت حريصة على تدوين لحظاتى معك
وكنت سعيد انت بذلك
كنت انوى ان اقدمها لابنائى منك
وكنت تعلم انت ذلك
كنت اود ان يفخروا معى بحبك
وكنت فخور انت بذلك
كنت ولازلت فخورة بك مدونة للحظاتى معك
وبكلماتى اوصيك

عندما يكبر ابنائك من اخرى اخبرهم ان على الجانب الاخر من عالمك

إمراه عشقتك بجنون

..........................................

يجب ان تتذكرى انه تعمد جرحك وتفنن فى تمزيق قلبك
يجب ان تتذكرى انه تعمد خيانتك واصطحب معه صديقتك
يجب ان تتذكرى ان كل ما قاله لكى يقوله لها وبنفس الاسلوب الذى أحببتيه
يجب ان تتذكرى ان كل ما فعله معكى يفعله معها وبنفس الاحساس الذى عشقتيه
يجب الا تهتز مشاعرك عندما تعلمين ان ما ارتداه خصيصا لكى ايضا سوف يرتديه
وان العطر الذى انتقاه خصيصا لكى ايضا سوف ينتقيه
يجب ان تتفهمى انه اختار التنازل عن ذاته العظيمة التى صنعتيها ليرتدى ذاتها الحقيرة
ويجب ان تتعقلى فمن ارتضى ان يتدنى مع اخرى لا يستحق ان يعلو معك
ويجب الا تتسائلى فثمة رجال يقبلون بالمراة سهلة المنال وقد كنتى مثل النجوم عليه
فلم يكن خطأه مطلقا فقد حاول الصعود اليكى ولكن من يقوى على صعود السماء ؟
ويكفيكى فخرا انك كنتى المرأة الاولى فى حياته
وان كل حكاياته التاليه ما هى الا محاولات فاشلة لتكرار حبه الاول

...............................

تنويه ......
البوست ده جمعت فيه حاجات كنت كتباها من فترة طويلة
على الفيس قبل ما احس ان فى حد بيهتم يقرا البلوج
كمان البوست إهداء لـ تيسير الحسينى اللى اوحتلى بفكرة البوست ده 
ولمزيد من النبض هتلاقوا هنا نبضات قلب


Monday, December 5, 2011

أدون وطنى ..... وجه الوطن




أمسكت بالالوان وبدأت أرسم وجه الوطن
عنين ثائرتين ووجه مبتسم
الانف نه ر النيل والفم دلتاه
وعلى الجبين شهيد أمتد بضياه
ليضع بطابع حسن لا يمحى ذكراه
ووضعت خلف الوجه جنود وبعض نيران 
أختلفت الالوان صرخت بلون الدم هتفت بصوت واحد
لو مهما بكرة يكون وجه الوطن باقى 
ومع جمال الوجه وثورة الالوان 
أدركت ان لمصر بسمة صعيدية


Saturday, December 3, 2011

ذكـريات الغــد




صادفته ذات حلم جالسا الى جوارى
مصغى بإهتمام لحديثى مستمتع بثرثرتى
لا تفارقه ابتسامة ساحرة ولا تتحول عينيه عنى
حملته داخلى ذكرى لقاء أنتظره فى نافذة شرفتى كل غذ

ما أجمل أسمى وأنت جواره فمنذ مولدى وذاك أسمى
لكن سحرا ما بات واضحا فيه بعدما أعدت أكتشافه ووجدتك
ذلك السحر الذى جعل أناملى تتفنن فى تجميلى بحروفك
فأصبحت كلما همتت بكتابه أسمى اتذكر كم اشتاق لـ غد يلصقه بك

يضع رأسه بين يداى وأهدهده كطفلى
أمسح على جبينه وأعيذه بكلمات الله التامات من كل أنثى سواى
وأظل أتمتم بالدعاء حتى يغفو وأحمد الله على كل لحظاته جوارى
ذكرى أمنية تحملنى لان أطيل السجود وأرجو من الله غــد يجمعنى به

اليوم أعلن أنى أمتلكتك
مجنونة أنتى فقد صرت ملكك منذ ان أحببتك
لا اليوم فقط صرت أمتلكك داخلى
وهل أحببتينى اليوم فقط !!
لا اليوم فقط صرت امتلك نبضك داخلى ... هنا
لا لن يكون الحوار هكذا وأظل أتفنن فى كيفية اخبارك
وأتوقع ردت فعلك تجاه خبر مولدنا الاول
ليحمل أجمل أخبار حياتى ذكرى حوار أودعته دعاء لكل غــد
" اللهم هب لى من لدنك ذرية طيبة منه انك سميع الدعاء "

يا من حملته فى ذكـــرى حلم
ومن ثم أصبح أسمى ذكـــرى إشتياقى له
ورجوته فى ذكـــرى أمنية
وجسدته فى ذكـــــرى حوار
وأختتمته بدعاء
إن كانت ذكــــريات غــــدى لا تدرك ســـواك
فهل لــغدى ان يأتى بدونك ؟


اللهم أكتبه لى خيرا وأكتبنى له عمرا
اللهم آمـــــــيـــــن



Tuesday, November 29, 2011

عن انتخابات مدينتى أحدثكم



انتخابات .... إسلاميين ..... إخوان ..... فردى
دين وسياسة ولا سياسة ودين
طيب احنا بنختار احزاب ولا اشخاص
وعلى مدار يومى 28 و 29 كانت تلك هى الاسئلة المتداولة فى مدينتى
وامام مقار اللجان الانتخابية احتشدت الاعداد فى حظر
والجملة التى سمعتها كثيرا " الانتخابات اللى فاتت ولعوا ف الصناديق المرة دى هيحصل ايه "
والرد كان ربنا يستر بس المرة دى فى حرية مع اننا مش فاهمين حاجة
واتدخل سريعا بدورى لاوضح ان ما خدث مسبقا لن يتكرر
فلن نشعر مجددا بان اصواتنا تسرق ولن نحتاج لاضرام النار بها يخبرونا بفعلتهم
ملحوطة ( مدينتى هى مركز بيلا محافظة كفرالشيخ ... الدائرة الوحيدة التى لم تعلن بها نتيجة انتخابات الدورة الماضية
والتى الغيت بفعل ثورة يناير وذلك لحرق أهلها صناديق الانتخاب احتجاجا على نتيجة أعلنها الحزب ف الدائرة قبل البدء الفعلى
فى فرز نتيجة الاصوات )
شعور بالفخر امام اللجان الانتخابية وثقة بان اصواتنا هى الوحيدة التى ستحسم النتيجة
ذاك الشئ الذى يبدو للوهلة الاولى على وجوه المنتخبين

ولكن كان لى بعض الملاحظات
* رغم انى لست مع الاسلاميين ف المسمى والتصنيف ورفضى لمبدى من لم يكن معنا فهو علينا
الا انى احترم تواجدهم وانهم الحزب الوحيد الذى اعتمد على الشرح والتبسيط
فانا لم اجد اى تواجد لحزب اخر مثلما وجدت تواجد " حزب النور " فلم نعرف وجوه مرشحين غيرهم
فكيف نعطى لمن لم نعلم وكان ذلك من الاسباب الرئيسية التى جعلت الكثيرين ينتخبون حزب النور

* فى مدينتى لا يتم الاختيار تبعا لحزب ولا قايمة بل تبعا لاشخاص يعرفونهم مسبقا
فاذا كان شخص ما محبوب فسوف يمنحونه اصواتهم بغض النظر عن كونه سلفي او اخوان او حتى فلول
فالاحزاب لدينا ليست معيار وهذا عن الفردى او القائمة
فاذا سألت اى فرد ينوى التصويت " هتختار حزب ايه " فسوف يجيبك بمنتهى البراءة " حزب الشيخ عبدالفتاح "
وبما انه لايهتم بالمسمى الحزبى فان الشيخ عبدالفتاح رغم كونه رقم 4 فى قائمة حزب الحرية والعدالة الا ان
الحزب خصل على نسبة اصوات لا باس بها بفضل حب الناس لهذا الرجل

* كنت انوى ان ارشح حزب الوفد ولكنى الى الان لا أعلم شئ عن قائمة الوفد عن دائرتى
لذا لم ادفع بصوتى لمن لم يهتم بإعلامى عن نفسه

* مع احترامى لكل من ادان حزبى النور والحرية والعدالة فى تواجدهم امام اللجان الانتخابية
و شرحهم لكيفية اختيار الحزب وتذكير الحضور بالرمز فمن منع باقى الاحزاب بالتواجد
وعما رايته فى مدينتى فاهم كانوا الافضل والارقى فى التعامل ولم يكن هناك اى تجاوزات منهم

دامت انتخابات مصر نزيهه ودمتم بخير


Sunday, November 27, 2011

يــــارب وطـــنى



اللهم ان مصر هي كنانتك في أرضك
وأهلها هم خير أجناد الأرض
ومايجري فيها يسري أثره في الأمة
فأسألك بنور وجهك الذي أشرقت له الظلمات
ويقدرتك التي لايعجزها شيء، وبتدبيرك الذي لا يبطله مكر
وبرحمتك المحيطة بالخلق وبوصية نبيك بأهلها الخير
وبمحبة أهلها لنبيك ولأهل بيته إلا ما نظرت إليها نظرة رحمة
تفرج بها الكرب وتدفع بها الضر وتوحد بها الكلمة وتنصر بها الحق
يا حق .. ياذا الجلال والاكرام .. ياحي قيوم.. يا حنان يا منان

الحبيب على الجعفرى


Friday, November 18, 2011

إحتضار الكلمات




أخطئ نزار عندما ظن أن الحروف تموت حين تقال
فبعض الكلمات تحتضر ف القلب وتموت حروفها قبل ان تقال

اشتقتك حد الوجع
حد أنى كلما اردت ان أخبرك كم أشتاقك
تقف كلماتى فى مواجهة دفاع القلب عن كثرت أعمالك
فتحترق حروفى شوقا ويستقبلك شذاها
ممثلا فى ابتسامتى الحزينة الدافئة


أدركته متأخرا
كم كان يعشقها فى صمت
وكم كانت تهواه فى ذات الصمت
وعندما ارادت الكلمات عبور حدود صمتهما
اصطدمت بجدار القلب بفعل الظروف


عناق الاعين يدفئنى
ليته يطيل النظر إلى
وما كنت لأخبره بدفء نظراته
وما كان ليبقى أطول
وما وجدنا حروف تستوعب كلماتنا


هداياه التى أهدانى إياها
وأشيائه التى أعشق رؤياها
لم تغنى قلبى يوما عن - كلمة - ما كان بقائلها



Tuesday, November 15, 2011

رسائل حب منسية



شئ ما جذبه إليها
أرغمه على أن يغمض عٍيناه ليستجمعها داخله
وخط إليها رسالة بدمعه لم تصلها بعد
" أحببتك قدر الحياة ومازلت ...... "
و غلبه حبها فلم يفق!!!!


لم يكن يوما خائنا ولن يكون
رددت كلماتها على مسامعهن ومضت
رغم يقينها انه فعل ... لم تكن لتسئ إليه !!
فبادر بالاساءة وأرسل لها
" سأتزوج صديقتك فلا تحزنى حبيبتى " !!!


مرا كأن لم يكن شئ
رغم ان ما حدث كان كل شئ
تاركان خلفهما رسالة لم يقرأها اى منهما
خوفا من ان تجرحهما كلماتها
لم يتوقع اى منهما ان الاخر قد كتب
" أحبك .... وكفى " !!!


أحبته الى قدر لم تتحمل شوقها إليه
فرتبت دفاتره وأدارت اغنيتهما المفضلة
وكتبت بجوار قائمة مواعيده
" أشتقتك حد .... الالم "
ورحلت !!!

لعلمها انه لم يعتد منها ان تغيب عنه ليوم
وسيسرع الى هاتفه ليطمئن عليها
وسيزداد قلقه عندما لا تجيب
ارادت ان تخبره مسبقا فارسلت إليه
" انا بخير - فقط - أشتقت لـ صمتى "


أرسلت له ف الصلاة دعوات
وكتبت له على الغيم أمنيات
واستودعت الله ما فى قلبها
ورغم انه لا يعلم .... فهى تنظره
فثقتها بالله تكفيها



Saturday, November 12, 2011

عن سحر الهاء


عــنه

عن ملامحـ "ــه "
التى كلما أغمضت عينى أعشقها أكثر فعين قلبى لم تتأمل سواها
وان كانت عينى بعد لم تراها

عن أشيائـ " ــه "
عن هاتف يحمل صوته ونظارة وحدها تحدق بعنيه
و قلم يلامس يداه و عن أسمه وانتمائى إليه

عن هائـــ " ــه "
عن روعة حرف أضيف الى دنياى فألبسها رداء الفرح
لينهى ارق الكلمات بـ " ـه " كى تبدأ الحياة معـ " ـه "

ولى معه أدعو
" اللهم ارزقنى بــــه "



* العنوان مقتبس من بوست الحكاية لـــ لبنى أحمد نور 


Monday, November 7, 2011

نبضات خاصة




بعض النبض يتوارى خجلا منه
والبعض الاخر يستتر خلف الضمائر حتى لا يتسألون عنه
ووحده يعلم ان القلب ينبض به


كانت تعشق الاحلام ودائما ما تردد 
كيف لا احلم وقد قال ربى ادعونى استجب لكم
فمنحها الله - سببا- لم يدع لها حلما الا واجتهد لتحقيقه
فقد كان - هو - استجابة الله لها


لم يختلط عليه الامر يوما فهو من البداية يعلم يقينا انها له
يعلم ان قدرا ما يجمعها به
فلم يحاول افتعال الظروف ولم يعترض على قدر
تمناها فى صمت ورجاها خيرا فى دعاء


كلاهما كان هنا عند نقطة المنتصف
فى ذات اللحظة نهارا
جمعتهما فرحة مبهمة
لم يدرى اى منهما لما
ولكن قلب كلاهما اجاب
" أحبك "

كلما أرهقه التعب يذكر اسمها فيغفو
ويتمتم بها كثيرا فى نومه
حتى ظنت انه يهذى
فأخبرها كم يعشق ان يهذى بها

تشتاقه حد البكاء
فتسقط دمعاتها على جدار قلبه تألمه
قوى هو ضعيف بها فلا يتحمل بكائها
ورغم انه يمنحها حضورا قويا ف الغياب
بعثت إليه " ما بين طرفة عينى وانتباهتها أشتاقك اكثر "


اعتدت على تكرار - أحبك - على مسامعك
ليتك تدرى ان كل واحدة من أحبك
تختلف عن نظائرها
فكل - أحبك - تحمل احساس اعمق مما سبقتها


لانه " هو " كل ما لى اطوق لحمل راية اسعاده
ولانه " هو " وهو فقظ نبض قلبى اتمنى قربا من الله
ليدمه على ويديمنى عليه

Friday, October 28, 2011

أكتوبرى




مش بحبه بس علشان اتولدت فيه
بحبه علشان جميل هو ف حد ذاته كدا جميل
ريحة المطر ورعشة البرد الخفيفة وصوت الهواء وهو بيوشوش الشجر
والاشتياق للدفا وبسمة جواها استمتاع حزين
اكتوبر مش بس شهر. اكتوبر حالة مش هتلاقيها ف اى شهر 

مبسوطة جدا ان عيد ميلادى اخر اكتوبر
لان ده مدينى فرصة انى احتفل بالشهر من اوله لحد اخره
واكتوبر بينتهى عندى يوم 29 لان بكون عيد ميلادى جه خلاص
يمكن اكون مجنونة بس بحبه بقى اعمل ايه

عيد ميلادى السنة دى مختلف تماماااااا
مختلف علشان معاكم مختلف علشان مبسوطة بنفسي
مختلف علشان فيه حاجات جديدة والحمد لله كلها حلوة

احساس رائع ان فى ناس بتتسابق علشان تبقى اول حد قالى
كل سنة وانتى طيبة
احساس جميل انك تبقى حد مهم للدرجة دى
احساس بالسعادة ان (.......) هى اول حد يقولى
ربنا يخليكم ليا ياااارب
وكل سنة تكونوا معايا ونكون بقينا مع بعض ونحتفل براحتنا

اللهم اكفنى شر طول العمر وبارك اللهم لى فى ايامى
اللهم اهدنى للخير حيثما كان وارضنى به
انك على كل شئ قدير

Sunday, October 16, 2011

عن أبجدية الابداع



لانه مهم جدا بالنسبالى اخدت وقت كبير على ما انتتهيت من قراته
اصله مش ينفع يتقرى وخلاص لا لازم كل حاجة تتحس
حسيت وانا بقرا انى بتعلم القرأة من اول وجديد بصراحة احساس مختلف تماما

هقولكم ليه بقى

اولا احساسي ان اللى بقرالهم دول انا عرفاهم وبكلمهم مش مجرد كتاب لاى كاتب عجبنى كلامه
لا دول صحابى اللى كنت بدخل اقرالهم كمان احساس بان كل موضوع ف الكتاب هو كتاب لوحده
حتى اللى اول مرة اقرالهم من تكرار الاسماء فى الجروب فضلت ادور على موضوعاتهم فى الكتاب
واركز اكتر فيها واتعرف عليهم اكتر
الحمد لله على فرصة المشاركة وكمان شكرا جدا لـ آية علم الدين السبب فى معرفتى بالحملة

ندخل فى الكتاب بقى

التصمبم تحفة جداااا جهاد نجيب ابدعتى حقا

وهبدأ من معبر إبرز لان مشاعرى كانت محددة لكن لما وصلت عند المفلوبة ومعبر رفح 
وقفت شوية وقلت هو ده بجد وحسيت انى مش فاهمة حاجة بس كان الرد مع
لهذا اكره السفر فهمت اكتر واضايقت اكتر
بس لما قريت كوكاكولا طعمها مختلف فى غزة حسيت بالم فيه بهجة
وان كانت فلسطين اكبر من غزة فعندنا بردو مش كل مصر القاهرة
القلوب لا تميز الاسماء وانما لكل وطن رمز لا يقلل منه بل يعمق اثره

نبذة مختصرة عن حاجات عجبتنى جدا لدرجة قريتها اربع او خمس مرات كدا
خبايا نسائية موناليزا ودى حسيت انى عايزة اتكلم معاها كتير واقولها انا كمان الخبايا بتاعتى
حسيت كلام كتير اوى بين السطور خلانى احب اقراها كل مرة افتح فيها الكتاب

اليها لـ عدنان احمد دى بقى قريتها وحفظتها وفيها احساس راااااائع
واوقات بقعد اسمعها لنفسي واهديها ليا :)

المقالات كلها عجبتنى بس  خايفة انسي حاجة لو قلت بالاسماء
كمان القصص رائعة جدا

بصراحة من اول الكتاب مش قريت الابجدية مش كنت حباها خالص
لحد حرف الظاء حسيت انى لازم اقراها
وده كان بسيبب التضاد الرائع بين عن الظلام اتحدث وتعرف تبقى لمبة

الكتاب كله محتاج شهرين ولا حاجة على ما اكلمكم عن كل موضوع فيه
بس دى كانت نبذة مختثصرة

وشكرا لكل قريق الاعداد بجد مجهود رائع وكتاب تحفة تسلم اديكم
وأخص لبنى تعبت معانا جامد جدا خاصة فى المرحلة النهائية
ربنا ييسر الامور وتخلص ان شاء الله على خير



Wednesday, October 5, 2011

و - لهم - بقية



نذكرهم جيدا نسترجع اسمائهم , صفاتهم , اصواتهم وبعض من حسن ظنهم بنا
كلما مر بنا طيف نقائهم


عثرنا عليهم لنعيد اكتشاف انفسنا لا لنكتشفهم
ليس قدرنا ان نصادفهم لنفارقهم
ولكنه قدر ان نرانا فيهم


جديرون هم بالثقة لكن ثقتنا بانفسنا ليست جديرة بهم
فلا نشعر بايذائهم ولكن نتألم لقلة سؤالهم





 رائعون هم كالاستيقاظ على عبير الازهار

صادقون هم كضوء النهار
وعندما نسقطهم من ذاكرتنا فانهم يشبهون قطرات الندى
لا نلحظ سقوطهم ولكننا نلمس آثارهم علينا





نتسأل من - هم - وقد يكون كل - هم - انا

فلا نشعر بقدرنا الا اذا صاغنا احدهم بـــ هم





اقف امامى لاتسال هى لى بعض منـ-هم
وقد يكون ولم اعلم بعد بذلك وقد لا يكون
وقد اكون انا لاناس اخرون بعض من - هم !!
وبين انا وهم حكايا لم تنتهى بعد
ودوما لــ هم بقية .......... !!!!!






Friday, September 23, 2011

رسائل إليهم





كان ياما كان كان فى بنت تدعى " أنا "
وكان اللى كان واتغير الزمان وصارت " أنا أجمل بك "



البعض يخلط الاوراق احيانا والبعض الاخر يجيد اللعب دائما
لكن طرق اللعب تختلف والبدايات تختلف وكذلك الشخصيات والادوار
فلا يوجد رابح دائم ولا خاسر دائم فلا اجد نصائح محددة سوى
" اصدقوا نياتكم مع الله "



اشتاق طريق ينتهى بمحاضرة ممتعه وسفر مرهق ينتهى بنوم عميق
اشتاق دفاترى واقلامى وبعض من الاستعراض بموضوعات بحثية متميزة
سعيدة لانى قد افرغ اشتياقى " معك  "



بعض الحب يمنحنا حبا أكبر
فالحمد لله الذى منحنى حبكما


يعلمون انك بعيدة ولا يدركون ان ما من قريب مثلك 
صديقتى ....... أحبك 



ليس كل ما يتمناه المرء يدركه 
حقا اعلم ذلك ولكن بداخلى يقين ان كلما تمنينا الخير وجدناه 
فرجاء امنياتى كونوا بخير لاجلى فخير الله آت لا محالة



ملحوظة 
قد لا اكون انهيت رسائلى فهناك رسائل لا تستوعبها الكلمات ...... 
وهناك رسائل لم يحن وقتها بعد .....
ولرسائلى بقية ......!!!!









Saturday, September 3, 2011

كتابنااااا



اخيراااا الكتاب نزل
فرحانة اوووووى اول مرة حاجة ليا تتنشر
ومش منشورة فى اى مكان كمان
ده كتاب فيه 84 مدون ومدونة من دول مختلفة
مجهود رائع وكتاب تحفة
ممكن تقروه من هنا وتشتروه كمان
من هنا
و فى النسخه الالكترونيه انا موجودة فى صفحه 108 وصفحه 199
ابجدية ابداع عفوى

Tuesday, August 2, 2011

رمضانى وما فيه



كل سنة وكل المسلمين فى جال اجسن من السنة اللى قبلها
وكلكم بألف خير يارب

ميرسى اوى لكل اللى بعتولى مسجات واللى اتصلوا كمان
يمكن اغرب رمضان يعدى عليا بس علشان انتوا كانت اغرب حاجة حصلت فيه
بس والله اسعدتنى كل المكالمات وكل الرسايل احلى حاجة فيها انى مش كنت متوقعاها
رمضان كريم عليكم كلكم يااااارب

علشان انت احلى حاجة حصلتلى فى حياتى وعلشان فخورة اوى اوى اوى بيك
وعلشان فرحاااااانة انك معايا فى كل لحظة
اول مرة احس ان السحور احلى وان الفطار احلى وان التراويح احلى
وان حياتى رغم كل اللى بيحصل فيها وجودك فيها مخليها احلى
علشان كدا انت نعمة من ربنا ليا كل لحظة بشكر ربنا عليها

اول مرة فى حياتى ابقى حاسمة كل مواقفى ومستغربانى انى قادرة اعمل ده
يمكن علشان بقيت حاسة انى قوية وزى ما مش كنت هامة حد
حبيت بردو اوصلهم ان انا كمان اقدر ابين ان مفيش حد هامننى

مبروك لكل التدوينات اللى كسبت فى مشروع الكتاب
وكمان مبروك علينا كتاب اختارنا اللى نقراه فيه وقبل ما نكون ضمن التدوينات المنشورة فيه
فاحنا حسينا انه كتابنا اللى عشنا كل التفاصيل اللى مكتوبة فيه
من اول ما كان بوست عجبنا وبنعمل عليه كومنت لحد ما هيكون كتاب ان شاء الله

بقالى فترة طويلة بكتب علشان انت عايز تقرا اللى هكتبه
واول مرة احس انك عايز تقول حاجة فتقمصت احساسك وكتبتها
يومها انت قريت وعلقت على كل كلمة من غير ما تقول ان احساسى صح
ولا انت تقصد مين باحساسك ده
بعد ما كتبتها لغبطتها من غير قصد علشان يبقى فى تناسق ف شكل الكلام مش اكتر
بعدين اشتركت بيها فى الكتاب وكنت عيزاها تكسب اوى والحمد لله كسبت
من فيض احساسه مش بس كلام اتكتب دى حكاية عمرى اللى يارب يقدرنى انى احافظ عليها

اللهم دم على حبه وبارك لى فيه وارزقه سعادة بقدر سعادتى به

Friday, July 22, 2011

كلام كدا



يمكن كانت عايزة تضمك ضمة وجع
بس وجعها كان من قوة ضمتك !!!


استنى هيقولك انه راجع
بس المشكلة راجع فى انهى اتجاه اذا كان هو ميعرفش !!!


تفتكر انى بحبك
لا خالص انا محتاجة حب يكفيك !!!


انا مش زعلانة ولا  خايفة
هو بس احساس ان بكرة بعيد !!!

عايزة اقولك  حاجة مش قادرة اعبر عنها
طيب حاسس انت بيها ؟!!!


انتى كل الدنيا عنده
حاجة كدا من غير ازاى وليه !!!


هو انا ليه كل ما اكتب حاجة تطلع اسمك
ولما اغمض عينى وانام بسمع صوتك ؟!!!

 

ممكن اتنفسك ؟!!!

ايوة سؤالى ده ليك انت بس ياريت مش تجاوبه بسرعه
اقف عنده كتير علشان لما ارجع اشم ريحتك فيه !!!






Thursday, July 21, 2011

حلم يتحقق




حلم باقى على تحقيقه خطوات بسيطة اوى
وحقيقة مجسدة افكار ومشاعر ناس كتير اوى
ناس كتير اوى نفسى تدويناتها تكون فى الكتاب وبجد هتكسبوا كتير اوى
لما تقروا التدوينات المشاركة لان فى حاجات كتير منها تحف فنيه مجسداها الكلمات


ودول بقى تدويناتى اللى مشتركة بيهم

ياريت مش نعمل فوت غير لو لقينا الكلام يستاهل
علشان فى حاجات جامدة جدا لناس كتير جدا تستاهل انها تكون موجودة فى الكتاب
مش معنى ان حد بيقول دى تدويناتى يبقى نعملها ومش معنى حد مش قال يبقى مش نعمل
خلينا نحلم لبعض ونختار الاحلى وبس
وعن نفسى حلمى ان الاقى التدوينة دى ضمن ال 100


صوتك رائ بيحقق حلم
خليه حقيقة لحلم حد يستاهل

Friday, July 15, 2011

لحظة حزن



 لانه كل رجال الكون امامى اغار عليه منى
نعم فان امام غيرتى افقد السيطرة على فليته يعلم كم مجنونة انا به
ليغفر لى ذلاتى ويحتوينى اكثر

يمكن انا من الناس اللى بتغير بزيادة اوى ولما حد بيستفزنى مش بعرف بقول ايه
بس والله بجد حاولت ابقى عادى يمكن بقى عقدة نفسية مثلا احساس بعدم الامان لاى حد مثلا
كل حاجة فى الدنيا مش مضمونة وخصوصا الاحساس
علشان كدا خايفة اوى

يغضب ثم يمضى
يحتاج ان يضمد اوجاعه بعيدا فيزيد آلامها كثيرا
فعندما تخطأ يوجعها خطأها قبل ما يصله ويدوى بوصوله اليه
فلا تنتظر منه ان يعاقبها به
ليته يحتضنها ليتفاديا أنين الآلم على حافة القلب

جملة اتقالت علشان اقنع نفسى ان ده مش هيحصل وهى مش هتفكر
كنت برد بيها على نفسى مش اكتر
جملة رخمة انا عارفة بس والله ما كنت اقصد بيها حاجة ولا تستاهل كل ده
علشان مش هينفع كل كلمة نبقى حساسين من بعض كدا
مش مجرد كلمة تخلينا ننسى كل الكلام الكويس اللى عكسه واتقال مليون مرة قبل كدا

ان كان الامر يحتم ان نتألم
فلا تتركنى معه بدونك

Wednesday, July 13, 2011

جنون



واحيانا ينتابنى شعور بالجنون
فاريد ان اصرخ باعلى صوتى
بحبببببببببببببببببببببببببببك

لحظات جنون اقتقدها معكى
عندما كنا نسير لمسافات طويلة نغنى سويا
جميع كلمات الحب  بصوت مرتفع وليشهد الطريق والسماء والاشجار بأنى 
فرحاااااااااااااااانة 

اعلم انه من الجنون ان ابادر بالحديث معها وعندما اخاطبها ارتجف
فأتلعثم احيانا واصمت كثيرا ولا يظهر منى سوى ضحكة صوتى
وبعدما تغلق استجمع قواى .. اه لو تعلم كم فاجاتنى وانى 
بحبهااااااااااااااا

تحت مسمى الجنون اريد ان اخبركم سرا
لقد أحببت لحظات عمرى السيئة وكل شخص اساء لى
احببت احزانى السابقة وتجاربى الحزينة ودفاترى القديمة
احببت كل ما مضى لانه كان سبب فى تعثرى بحاضرى
وفوجب على ان اقول لكل ذلك امامكم 
شكراااااااااااااا

يخبرنى دوما انه يريدنى جواره
اما انا فاريده حولى
مجنون هو بى ومفتونة انا به
حد انى اصبحت اخجل ان اطلب من الله شئ فلم اعد اقول سوى
ياااااااااااااااارب

Sunday, July 10, 2011

الى رجل




الى رجل ....  ارهقتنى السنين بحثا عنه
وعندما وجدته اصر ان اضيعه منى

الى رجل .... علمنى ان المثالية المفرطة سيئة احيانا
فرغم انه " افضل " الرجال الا انه اقساهم

الى رجل ..... اتهمنى بالتسرع وغفر لنفسه ذات التهمة
فظننت اننا عند نقطة البداية واذا بنا عند حافة الهاوية

الى رجل .... لم يفهم منطقى فحيرته كلماتى ورفضها
ثم عاد يبحث عن نفسه بها

الى رجل ..... صادفنى مرة وصادقنى مرة واوجعنى مرة
وعلمنى الف مرة

الى رجل .... منحنى قناعات عديدة وقناعات عديدة
وارغمنى على الكذب عليه فقط

الى رجل ..... اقسم انه انقى مما يتصور هو
وان حاول تزييف حقيقته دائما

الى رجل ..... نسى وعد قطعته على ذاتى يوما
وتذكر ان لا شئ يدوم سوى الفراق

الى رجل .... عاقبنى به كثيرا
فعاقبت نفسى به الى الابد

الى كل " رجل " لم يشعر يوما بحبهن
ان لم تستطع حبها فلا تتعمد جرحها
فهى لن تخرجك من مدارها اذا لم تحبها ما دامت تحبك
لكنك بجراحها لا تخسر حبيبة فقط
وانما قلب صديقة كان على استعداد ان بتحملك رغم ما قد يكون !!!

واضافة جميلة جدا عجبنتى وحستها اوى من الجميلة ريماس
بس اللى رجل أحببته

الى رجل أريدك كلك فجميعك أنا
الى رجل زرعت روحي في صدره فتنفسته
الى رجل قال لي أحبكِ فعلمت أنه أحياني
الى رجل سـ أحبك وأحبك لأنك أنا ..

Thursday, July 7, 2011

فقط ... انت





اعتدت ان اخلد مشاعرى تجاه كل من مروا بى
دون ان ادرى انهم تعمدوا المرور لتخلدهم كلماتى
فلتلمس لى العذر فلا اريد ان تخلدك اشعارى 
فقط .. اريد ان تظل لى 



Monday, July 4, 2011

yes




yes.... i'm in love
ومن وقتها وانا بقول yes لكل حاجة فى الدنيا
للضحك والفرح وراحة البال و للاحلام والواقع ولكل الدنيا بكل اللى فيها
مش فاهمة ليه ولا هو فى ايه اساسا ولا عمر كان يخطر على بالى التجربة العجيبة دى
حاسة براحة غريبة مش ليها اى مبرر اطلاقااااا
واكتر كلمة بقيت بحبها أيوووووووووة

yes ..... that's enough
زمان كنت بقول انى راضية ومش عايزة حاجة من الدنيا
اكتشفت انى مش كنت راضية ولا اى حاجة وكنت عايزة حاجات كتير اوى
دلوقتى بقى عندى حد كفاية بالرغم من انى مش متخيلة اى ملامح لمستقبلى بس كفاية عليا حاضر جميل
وبدعى اللهم اغننى بك واكفنى به

yes ..... i'm happy
عارفة ان سعادتى مش بتدوم كتير شوية وبتقلب
مقتنعه ان اول ما بحس انى مبسوطة بزيادة يبقى فى حاجة هتحصل مش كويسة
بس انا مش بفكر المرة دى ولو حتى فى بعد كدا حاجة مش كويسة فانا مستمتعة بسعادتى

yes ..... i love me
كان معاهم حق كل اللى كانوا بيقولولى اتصورى حلو اوى احساس ان عندى صور ليا
مش لازم حد يشوفها بس مبسوطة بيها انا
كمان بقرا كلامى ومبسوطة بيه ومبسوطة بالكومنتات وبكل اللى كانوا حريصين على متابعة البلوج
فى حاجات كتير فيها اتغيرت مبسوطة بيها اوى ويارب اتغير دايما للاحسن




Sunday, July 3, 2011

كتاب الـ 100 تدوينة


حملة التدوين خلصت
كنت مبسوطة جدا طول الشهر واستمتعت جدا بكل اللى قريته
وحبيت جدا الفكرة وكتبت على قد ما قدرت
بس للاسف على اخر الشهر سافرت ومش عرفت انزل بوستات كل يوم
لكن لقيت فكرة كتاب الـ 100 تدوينة امتداد للحملة عجبتنى الفكرة جدا
وبما ان الكتاب هيجمع احلى ابداعات المدونين فدى فـ حد ذاتها فايدة عامة
مستنيه بشغف التدوينات المشتركة والترشيحات وطبعا الكتاب فى النهاية
وان شاء الله نستمتع كلنا بالكتاب 



Sunday, June 26, 2011

Quotations


اقتباسات بحبها جدا جبتها من الفيس بوك لـ هنا
 
اذا اتعبتك آلام الدنيا فلا تحزن .. فربما اشتاق ربك لسماع صوتك وانت تدعو .. 
ولماذا تدمن التفكير والله ولي التدبير . ولماذا القلق من المجهول وكل شئ عند الله معلوم. لذلك اطمئن . 
فأنت في عين الله الحفيظ وقل بقلبك قبل لسانك .. فوضت امري الي الله .... وابتسم
جَميل أن يخصك احدهم بأشيَاء دُون الآخرينْ . .!
كلمة ، أو اسم ، أو فعل ، أو حتى أس...ْلوب حَديث ، أو أي شئ ..!
ليثبت لك شئ واحد ، أنك بالنسبة له  "مُختلف"

يا الله لست أطلب الكثير ..
أريده بشرياً / رومانسياً ..
يحبني / يحسّني / يشعرني ..
أ...ريده ان يجثو على ركبته اليسرى ويفتح علبة مخملية ..
ويفاجئني بلوحة إعلانات مضيئة كتب عليها ..
.........أحبك / أحتاجك / تزوجي بي ..
و ليس أكثر من ذلك

ضعوا أمنياتكَم في سَجده ثمَ آنسـوها 
والله لاينسى أمنياتنـَا بل يؤجلها  ليمنَحنـا إياها لاحقاً 
ربِ هِبْ لنا فرحةً بتحقيـق آمانينـآ

إلهي ~
إني لا آريده فتنة ,
ولا آريده ذنب ,
آريده آن يكون في روحي كامـل كرفيق درب ,
......ككل الاشياء التي تحبها نفسي و نفسه .,
فلا تجعل عمري يمضي بدونه !
يـــــــــــآآآرب
آحسدهمّ بِ قووهَ !!
يجلسوَن ويأكلونُ معك ..
وتضحِك لهّم , يُصآفحونك ‘ وآلبعّض يُقبلك ! وأنآآ هنآ ..
- لآ آستطيّع حتى [ تأمُلك ].

قال لها : هل دعيت لى..؟!
قالت : دعيت لك
قال : و ماذا كان دعاؤك..؟!
قالت : قلت يا رب... إن لم تجعلنى لقلبه سعادة فلا تجعلنى له وجعًا
فسكت هو و لم يقل شيئا !!
......فقالت له : لماذا لم تقل آمين؟

رجوتــك ربـــــي ان تحفـظه لــــي وحـــدي بقـدر حفــظك لكتــابك الكـريـم !!~
واجـ...عله نصيــبي مـن هـذه الحــــياه بمشيئـتك !!~
فـ انــا لا اتمنــــى منــك سـواااه !!~
ولا احــــد يعلـم كــم احبــــــــه سـواك يا الله
هو يوم كتب كتابها قبل جبينها .. ثم ج...ذبه أصدقاءه للتصوير معه ..
و بينما هو بين المعازيم ..
اقتربت منه و دون أن يراها لمست يده ..
كان يظنها يد أخته لذلك أمسكها برفق و استمر في الحديث مع ضيوفه ..
لم يتخيل أنها هي ..
فابتسمت ..
فقرصته في يديه ..
فنظر إليها ..
و انبهر ..
نظر مرة أخرى إلى يديه و هي بداخل يديها ..
ثم نظر لها .. ابتسمت و أنارت الأرض بعينيها ..
و لأنه أطول منها قليلاً ..
نزل إلى مستوى رأسها و قال :- يخرب بيت جمالك يا شيخة .. أنا أول مرة بنت تمسك إيدي بالرقة دي ..
كانت بذلك قد عرفت تماماً نقطة ضعفه ..
فكانت مع كل خلاف بينهما تذهب إليه و تجلس و تلمس يده ..
كان هو يفهم معني هذا التصرف ..
كانت بعينيها تقول له :- فلنبدأ من جديد .. من يوم كُتِبَ كتابنا ..
فكان يخضع لها بكل حواسه ..
حتى أنه كان عندما يخاصمها بشدة و تقترب منه لتلمس أصابعه كان يقول لها :- حرام عليكِ ..
كان يعلم أنها إذا لمست أصابعه سيصمت و يرضي ..
كان يرضي سريعاً ..
كان حقاً يرضي بداخله ..
كانت لمسة يديها تنتزع من قلبه كل سوء ..
كانت تصيبه بالخدر ..
كان يقبل جبينها عندما يخطأ في حقها ..
و كانت تلمس يديه عندما تخطأ في حقه ..
و كانا يرددان ..
فَلَا جُنَاحَ عَلَيْهِمَا أَنْ يُصْلِحَا بَيْنَهُمَا صُلْحًا وَالصُّلْحُ خَيْرٌ


Saturday, June 25, 2011

الاكتفاء الروحى



اى حد فى الدنيا بيكون عنده شوية اهداف كدا مرتبهم حسب الاهمية
وبيحاول بكل الطرق انه يوصل لاهدافه
الاستفادة المعنوية بتكون اهم لما بنحاول نوصل لاهدافنا هقولكم ليه
لان اوقات بتكون محدد لنفسك هدف وانت فى نص الطريق ليه يظهرلك هدف تانى

او تغير هدفك الاول اصلا واوقات تلاقى ان السعادة اللى حسيت بيها خلت عندك اكتفاء
حتى لو مش وصلت لهدفك فانت سعيد بالمحاولة دى
عمرك حسيت بقى ان روحك قالتلك كفايا كدا مش عايزة اكتر
فى حاجات بتعمل اشباع لروحك عمرك فكرت ايه هى الحاجات دى

احساس انك مظلوم وعايز تاخد حقك واى حاجة تحصل فى اللى ظلمك مش كفايا
ومع ذلك مش تاخد حقك مع انك تقدر وتوكل ربنا وتحس ان روحك اكتفت بكدا
فتلاقى ربنا اخد بحقك مرات كتير اوى مش مرة واحدة بس 


 ممكن يبقى عندك عشر صحاب بس مش حاسس انهم كفايا وان عايز تصاحب ناس اكتر 
وممكن يبقوا اتنين بس وعندك احساس انهم كفايا اوى حتى لو مش بتكلمهم غير قليل


سالها انتى ليه مش بقيتى متحمسة تكملى مشوراك قالتله
وانا فى وسط طموحاتى وعايزة ابقى واوصل واحقق فجاة وقفت لما شفتك وقلت كفايا عليا " انت "


Wednesday, June 22, 2011

just smile




ويرحل الدمع منا ويبقى السؤال
لما سكبنا الحزن دما عبر ساحات القتال
وطوينا العمر بحثا خلف انقاض الجبال
واهمون اننا يوما سنلقى من سيوصف بالكمال
لم نفكر ان كل عيوبهم قد شابها رمز الجمال
و رافضون عيوبنا وكانها شئ محال
فلتبستم وتذكر كلنا الى زوال

Sunday, June 19, 2011

عارف يعنى ايه ؟




عارف يعنى ايه بحبك
يعنى تبقى راجع من الشغل مبهدل وانا شيفاك احلى راجل فى الدنيا
يعنى لما تبقى مضايق يبقى نفسى تحكيلى اكتر ما بتحكيلى وانت مبسوط
يعنى لما تقولى كلام يزعلنى و ازعل بس علشان تقولى حقك عليا
يعنى لما تغنى قدامى وانت عارف ان صوتك مش حلو و ابقى سمعاه انا احلى صوت
يعنى لما تبقى تعبان ويبقى انى اسمع صوتك هو الامان
يعنى ابقى خايفة عليك من غير سبب وقلقانة من غير لزوم
يعنى كلمة منك تخلينى المس السماء و احساس انك زعلان يقلبها غيوم
يعنى احتياج لصوتك لحنانك ولشوية دلع لما اقولك علشان خاطرى وتقولى حاضر
يعنى ابقى مالكة الدنيا لما بتهتم بيا وتحسسنى انى اهم واحدة فى دنيتك
يعنى تضحك معايا على حاجات بسيطة وانت عارف انى بموت فى ضحكتك 



Saturday, June 18, 2011

to u






عندما تشرق شمس ايمانى بك ابتسم واستقبل الحياة بمزيد من التفاؤل
عندما تستيقظ احلامى بداخلى بعد ثبات عميق فلابد ان قلبى جدد دقاته
عندما تكون انا بكل قيودها حرة فما ذلك الا نتيجة جرعات مكثفة من السعادة
عندما تسيطر على رغبة التحليق والابحار والرقض فى آن واحد
فان شئ ما يحدث
شئ ما يدفعنى ..... تجاهك



Friday, June 17, 2011

خايفة




عارف يعنى ايه اقولك خايفة ولما تقولى اطمنى اخاف اكتر ؟!!

سارة درويش




Thursday, June 16, 2011

من فيض احساسه



انها المرة الاولى التى اكتب كأننى " هو "
فقد كان " احساسه " ملهمى تلك الليلة 

قال لها تمنيتك كثيرا حتى خشيت ان يعاقبنى الله بان تظلى امنية
فقالت وانا دعوت الله بالخير كثيرا حتى وجدتك

يسعد بالوقت معها
ويسعدها الوقت به 

يخاطبها بصمت 
فتريحها جمال العبارات وتجيبه بالصمت ذاته
 
تشغل فكره  كثيرا حتى دون ان يفكر
 فكل شئ اصبح يحمل احساسه بها

 السادسة بتوقيت القلب
حان موعد سماع صوتها
يمسك بهاتفه لا يبحث عن رقمها
فهو الاوحد فى ذاكرة يده
و قبل ان يتصل بها .... تجيبه   

يغمض عيناه فيراها يبتسم لتحيتها فتجيب بابتسامة
تجلس بمحاذاة قلبه فيصبح وجهها ملئ عينيه
يريد ان يحادثها وتخجل كلماته
يتسع اطار حلمه لزهرتها المفضلة
يقطفها ويتجه على استحياء ليهديها إياها
يفصله عنها بعض الذكريات العالقة فى منتصف الطريق
تضئ ابتسامتها بالامل فيستعيد طاقته
يمضى نحوها بخطى اسرع ولا يكترث بما قد يعيق المسير
وها قد وصل
يسجد شكرا لله عليها وعندما يرفع جبينه ينتبه لمغادرتها
فيفتح عينه اذ بها توقظه
فقد اختارها الله له واقعا يضاهى جمال احلامه