Monday, December 31, 2012

بين عامين


فى نهاية السنة تلاقى كل الناس بتقول كانت سنة كبيسة 
يارب اللى بعدها تبقى احلى 
ويتكرر ده كل سنة بستغرب اوى وقتها هى تغيير ارقام السنين هو المشكلة 
ولا حياتنا هى اللى مش بتتغير ومش بنحاول نغيرها 
هو احنا عايزين السنة تبقى حلوة من تلقاء ذات نفسها كدا ازاى يعنى 
جربت تجيب ورقة فاضية وتكتب فيها كل الحاجات الحلوة اللى حصلتلك فى السنة اللى فاتت 
وقصادها ورقة تانية فيها الحاجات اللى مش حلوة او اللى كان نفسك تحصلك ومش حصلت 
وتشوف انهى ورقة اكتر 
لو الورقة اللى كلها فرح طلعت اكتر يبقى انت كدا ماشى صح 
لو بقى الورقة اللى فيها زعل طلعت اكتر يبقى عيد حساباتك تانى واكتب ورقة للامنيات 
وكل ما تحقق منها حاجة ف السنة الجديدة علم عليها 
كدا ان شاء الله هتكون سنة سعيدة عليك 

" جملوا أعوامك بالامنيات و استغلوها ف العمل " 

.........................

اتاخرت فى انى اكتب بوست السنة دى علشان حبتها اوى 
كنت عايزة استنى للساعات الاخيرة فيها 
السنة دى فرحتنى فى كل حاجة فى حياتى صالحتنى على نفسى وعلى الدنيا 
غيرت فيا حاجات كتير اووووى ضيعت اثر 2009 و تفوقت فى جمالها على 2010
وادتنى بداية قوية اكتر من 2011  كل يوم فيها كان مميز و جميل وكل شهر كان فيه مفاجات 
متفائلة بـ 2013 يمكن علشان انا اساسا بحب رقم 13 يمكن علشان رقم 3 بيمثلى حاجة مش عرفاها 
يمكن علشان بدايتها ثلاثاء كمان وانا من عشاق الثلاثاء اصلا مع ان مفيش حد بيحبه بس هو انا مجنونة كدا عادى 
يااااارب تكون سنة سعيدة على كل الناس وعليا يااااارب ودايما مع بعض واقوى ببعض 
ومصر تستقر وسوريا تنتصر و فلسطين تتحرر 
وكل المسلمين فى كل مكان يكونوا فى افضل حال 

.............................

مش هقول اللى زعلان منى ياريت مش يزعل لان انا عارفة انى مش مزعله حد اصلا ههههههههه
واللى زعلنى انا مسمحاه وعفا الله عما سلف 
بس اللى كانوا صحابوا ومش بقوا بمزاجهم فانا مش بعرف ارجع فى علاقات اتكسرت للاسف معلش 
حاولوا فى اتجاه تانى ربنا يكرمكم بصاحبة احسن منى مليوووووون مرة 
اى حد بقى عايز يطلب منى اى حاجة او يسالنى فى اى حاجة او يرغى لمجرد الرغى والفضفضة 
فانا بفرح جدااااا بالكلام معاكم 
اما بقى اللى عايز يكتب امنياته و يسيبها فى الامانات عندى فعلى الرحب والسعة هكون سعيدة جدااا 

...........................

مش تنسوا اهم حدث فى 2013 ان شاء الله 
وهو طبعا حفل توقيع كتابى عايزة اشوف كل المدونين وكل صحابى 
واعزموا كل اصحابكم ونجيب تورته شيكولاته ونسكافية و قهوة 
ونعمل قاعده عربى كدا ونرغى مع بعضينا :)))

استمتعوا باللحظات و تفائلوا واضحكوا استبشروا خير وان شاء الله ربنا هيكرمنا 



Thursday, December 27, 2012

حد الكفاية



البوست اللى فات وجعنى قبل ما يوجع اى حد 
اه هو فيه شوية منى بس والله العظيم ما كله ولا حاجة 
ومش قصدت بيه ان فعلا ماليش حد بالعكس 
انا استوحيت ماليش حد من هنزادا فى المسلسل 
وهى بتقوله انا قبلك مكنش ليا حد وبعدك مش هيكون ليا حد 

ليا حبيبى احلى حاجة فى دنيتى 
السعادة اللى عمرى ما كنت اعرف حاجة عنها غير بيه 
ضهرى وسندى ف الدنيا ابويا واخويا و صاحبى وجوزى وكل حاجة ليا 

ليا عمو اللى جابلى الجرنال ودايما يقولى انتى تأمرى بس 
وكل اللى عيزاه يكون عندك 

ليا صاحبتى اللى بوست اللى فات خلاها تعيط وهى مش كانت عايزة تعيط 
اسفة اووووى يا حبيبتى منها لله هنزادا الوحشة دى هى السبب 
والبوست ده علشان اصالحك :*
بحبك جدا على فكرة 

...........................

المفروض ان السنة قربت تنتهى بس انا مش عيزاها تخلص 
علشان كدا بكتب بوست كل يوم 
مستمتعة اوى بالسنة دى 
من اول شهر فيها وانت جنبى و انت قوتى و انت الفرحة اللى عمرى ما حستها قبلك
ولآخر العمر ان شاء الله هتفضل انت قوتى وفرحتى 
من اول ما عرفتك وانا بقول انك حد الكفاية بالنسبالى 
وصلتنى للمنتهى فى كل حاجة  الحلم والحب والسعادة 
ربنا يخليك ليا و يباركلى فيك يارب 

...............................

اتهموني بحبك .. 
وها أنا أقسم بأنني مذنبة بالتهمة بكل فخر ..
وأؤكد للمدعي العام أسوأ شكوكه .. 
وأشهر حبي لك على رماح القبيلة .. 
وليحكموا علي بالسجن المؤبد داخل شرايينك 
أو بالنفي إلى عينيك

غادة السمان 

..............................

تسألنى .... ما الذى احببته فيك
سوف تعجب اذا قلت لك انها تجاعيد جبهتك والخطوط الغائرة فى خديك 
وذلك الحزن القديم فى صوتك والارهاق المستمر فى عينيك وتلك الخطى الكدودة
والكلام القليل والشرود والصمت الحائر وكانك تحاول ان تمسك بحبال الاشئ 
انه الانسانية كلها فى رجل
وحينما اعطيتك يدى لتحتويها يدك واعطيتك اسرارى لتفرشها اسرارك 
 ادخلتك من لحظتها فى سواد العين واسكنتك المهجة 
واصبحت اتنفسك مع كل شهيق وزفير

مصطفى محمود

................................

أحبك لأنني عرفت معك شيئا جديدا غريبا عني
اسمه الفرح
معك التقيت الشمس صافحت الضحك راقصت البراءة
و قدمت اوراق اعتمادي الى الشروق ..
و اكتشفت كم همسك الازرق جميل عند الفجر

غادة السمان 

.........................................

أعشقك الى الحد الذى جعلنى اكتفى عن العالم بك
ولم ولن اكتفى منك

آية

Tuesday, December 25, 2012

ماليش حد




تغمض عيناها كى لا تتساقط دمعاتها امام عيناه
كثير من الامور الموجعة تسيطر على ذهنها ولا تفلح معها جميع المسكنات 
تترك للصمت مجالا كى تستجمع الاوجاع جميعها
و ببطئ تتسع عيناها لترمقه بنظرة دامعة
" هو انت هتصدقنى لو قولتلك
ان عمرى ما حسيت يعنى  ايه بابا غير وانا بقولهالك !! "


........................

كان نفسى تعرف يعنى ايه ماليش حد 
يعنى بتصعب عليا نفسى اوى لما احس انى ضعيفة
 ومش قادرة اعمل حاجة عايزاها حتى لو بسيطة 
ايوة انا ماليش حد مش بدلع على فكرة ولا بقولك كدا علشان اى حاجة
بس انت عمرك ما هتحس باحساس بنت من يوم ما اتولدت مفيش جنبها اى راجل 
هى بتعمل كل حاجة بنفسها وبتتحمل اى حاجة و بتجاهد كل حاجة 
شايفة فيك كل حد كان المفروض يكون موجود بس للاسف محصلش 
عنيها كانت بتقوله كل ده من غير كلام وفجاة دموعها صرخت " اتخليت عنى "
حاول يمسك اديها ويأكدلها انه مش هيسيبها لوحدها ف الدنيا هيبقى يطمن عليها 
بس هو مقدرش يفهم انه اتخلى عن روحها ورجعت تانى ملهاش حد 

.............................

 ابدو لك قوية أكثر مما يبدو ألا يكفيك هذا كى تعرف كم أنا ضعيفة 

..............................

متمسكة بحلم البقاء من أجلك او من أجل روحى التى تحبك 
ازعم انى احاول الوصول الى شئ ما لكنى الى الان لا أعرفه 
ربما ليقينى ان ذلك الشئ ينتظرنى وما بوسعى الا ان افعل ما اقوم به 
او بالأحرى احاول ان اكن على مستوى ثقتك بى 

.................................

هلا سمعت صوت ارتطام قلبى أمام قسوة عنيك 
ان لم تنحى انت لتجمع دقاته من جديد فلا حاجة لى به 


* تدوينة من وحى حلقة اليوم من مسلسل رماد الحب 

Monday, December 17, 2012

خارج النص 2





اختفاء صوتى .. حزن انا عارفة لانه اتكرر قبل كدا 
بس انا فعلا مش بكون عارفة انا حزينة ليه 
افتكرت لما حصلتلى قبل كدا وقولتيلى " بتقلقينى عليكِ "
لما حصلتلى المرة دى انتى اول حد جه ف بالى 
كان نفسى اقولك ينفع تحضنينى 

.........................

فاكرة لما كنا بنرغى لحد الفجر واقرالك الكلام اللى بكتبه 
وتقوليلى رايك وتشجعينى اكتب اكتر 
فاكرة لما كنا بنزعل ونتصل نحكى لبعض ونعيط ونرخم على بعض 
فاكرة التفاصيل بتاعتنا المجنونة اوى 
ورسالة عيد ميلادى اللى وجعتنى اوى انها مجتش السنة دى 
واتصالى اللى اتاخر يومين عن عيد ميلادك 
طب هو احنا ليه بقالنا كتير كدا بعيد ... وحشتينى 

.............................

نفسى كل البنات يفوقوا من وهم التضحية والحب الضعيف 
هو لو بيحبك بجد مش هيقبل انك تضحى 
لازم تكونى قوية خلى قلبك فى اديكى مش تتنزلى عن حقوقك 
لو اتنازلتى مرة علشانه هيتنازل عنك مع اول واحدة تقدمله عرض افضل 

...............................

الفراق اهون كتير اوى من الخيانة 
الفراق جرح لحظة والخيانة جرح عمر 
لما قولتلها فى اغنية لأنغام بتقول كدا .. دمعت 
فسمعتها انغام تانى بس وهى بتقول 
ما تفوق انا من غيرك او بيك مش واقفة حياتى عليك وبعيش وهعيش 
وهواك كان غلطة تمنها كبير انا جيت على نفسى كتير وخلاص مبجيش 
قالتلى هحب أنغام علشان انتى بتحبيها كدا 

.................................

هو انت لو مش جنبى انا كنت هقدر أعيش ؟
كان هينفع اكمل حياتى وابقى قوية كدا ؟
كنت هقدر اخف من كل الجروح اللى فى قلبى ويبقى عندى حد اثق فيه ؟
ولا حد اصلا كان مصدق انى هقدر اضحك تانى وان دموعى ممكن يجى يوم وتخاصمنى 
انت كلمة السر لكل حاجة حلوة ف حياتى 

..................................

السنة قربت تنتهى واحب اقول ان السنة دى احلى سنة فى حياتى 
على كل المستويات الحمد لله  " الشخصية طبعا "
بهرتنى بكمية الاحداث اللى فيها والمفاجات اللى حصلت 
فرحتنى بكل الناس اللى خسرتها وكل الارواح الجميلة اللى كسبتها 
بكل الهدايا اللى جاتلى واللى عمرى ما اتخيلت انها توصل 
اللهم لك الحمد كما ينبغى لجلال وجهك و عظم سلطانك 



Thursday, December 13, 2012

الى سيدة الحكايا الممنوعة




لا ادرى لما أصبحتى سيدة الحكايا الممنوعة لدى 
كلما أحسست انى بحاجة اللى البوح بما لا أعرفه 
تتجسد صورتك أمامى فأحكى بلا إنقطاع 
وعندما أتوجه لرسائلى كى أكتب ما قد حكيته فى مخيلتى لا أتذكر عما يتعلق الحكى 
التعلق .. متعلقة بأحلامى قد اكون وبتقاليدى التى كلما أردت الهروب منها زدت تعلقا بها 
او ان المثل كان صائب حينما جزم ان من شب على شئ شاب عليه 
لكنى فى محاولات دائمة للخروج من اى شئ كل ما اريده وحسب هو الخروج 
نعم ,, اريد الخروج من الدنيا بسلام 
لست مثالية فى معاملاتى لكنى احاول الا أترك بذهن أحدهم أثر سئ
أتدرين عزيزتى .. كم يكلفنى ذلك من ألم !! 
حينما يغلبنى البكاء على جراحهم و تجاوزاتهم المتعمدة التى أقابلها بابتسامة رضا .. 
كم تبكينى نظراتهم لى الساخرة من ضعفى كما يظنون 
كم يؤلمنى اهمالهم الذى اتغلب عليه بمباردة السؤال 
لست ضعيفة ...لكنى فقد اريد الخروج بسلام ... أتمنى الموت نقيه لا أحمل لاحد مثقال ذرة من كره 
اتصور انى كلما تمنيت شئ حدث ... ربما كان قدر حدوثه لامر آخر 
لكنى كنت اتمنى الشئ فى نفسى وانتظر حدوثه فيحدث 
حد اننى كثيرا ما كنت افعل ذلك عمدا ولدى يقين باى الله سيحقق ما بنفسى ... 
لم يسبق ان اخبرت احدا بهذا مطلقا ... ربما لاننى تمنيت من خلالك عدة امور فحدثت
مما دفعنى لاخبرك ربما لانى لم اتعمد الحكى معكِ يوما الا ان ذلك يحدث 
ربما لانك الوحيدة التى تستمعين دون ان تحكى 
اتذكر حديثنا السابق  لم تحكى لى شئ
الا انى تملكنى احساس بانك كنت تراقبين كل ما حدث قديما 
تعرفين جميع شخوص الحكاية تالمتى قديما معى 
لكنك تجاوزتى آلامك فجملتى موضع الجرح وتجاوزته انا الاخرى 
كثيرا ما اقف امامى متسائلة هل حقا على صواب أنا هل ما اقوم به الصواب 
هل استحق ان أكتب ويقرأون هل أفيد ؟
الكثير من هل .. التى لا تنتهى ولا أجد لها جواب 
ويينتابنى شعور بالاحتياج للخروج منى لأرانى بحيادية أكثر 
هل تستطيعين أنتِ ذلك ؟


" يبدو الامر استثنائيا فى ان أنشر الرسالة بعدما نشر ردها هنا  لكنه حدث "

Wednesday, December 12, 2012

لأنك حبيبى




المفروض انى اكتب البوست ده فى مدونتك 
بس انا فرحانة اوى بالبوست اللى انت كتبتهولى 
علشان كدا هكون شجاعة اكتب هنا وخلاص 
متفقه معاك ان كل حاجة بينا كانت غريبة جدا ومش منطقية 
بس احلى حاجة بتحصل ف حياتنا هى اللى بتكون عمرها ما خطرت ببالنا 
وجودك فى حياتى هى الصدفة اللى صالحتنى على الدنيا 
اصل فى اشخاص لما بتقابلهم حياتك بتتقلب حزن وتلاقى المشاكل حواليك من كل مكان 
مش شرط يكونوا هما السبب فيها بس ده دليل ان مش فيهم خير ليك 
انت بقى من النوع التانى اللى بمجرد قربهم من مدار حياتك بحركوه فى اتجاه الفرح 
كل الناس ملاحظة قد ايه بقيت بهتم بحاجات عمرى ما اهتميت بيها 
بقيت عايزة اعمل اى حاجة علشان تبقى فخور بيا بفرح اوى لما بتشجعنى 
وبفرح اكتر لما بتحسسنى انى من غير ما اعمل اى حاجة عجباك كدا وحبتنى كدا


المفروض ان النهارده يوم مميز وانا من زمان كان نفسى يحصلى حاجة مميزة فى اليوم ده 
يمكن فكرت اخطط علشان اى حاجة تحصل بس فى الاخر سيبتها لربنا 
ودعيت ربنا يبعتلى اشاارات مميزة والحمد لله كانت لحظة مميزة 
لما كلمتنى الساعه 12  واتمنيت انت ودعيت انا 
ولما كتابى نزل المكتبات ولما مسكت صندوق ورق بايدى اللى فيه بنفسجياتى
وكمان لما لقيتك بتتصل وتقولى على عرض انى انشر فى جريدة 
كل ده ف يوم واحد وكل ده مرتبط بيك 
على فكرة تاريخ خطوبتنا كمان مميز جداااا اكتشفت الحكاية دى النهاردة بالصدفة ههههههه
اساسا انا حافظة كل التواريخ اللى بينا مش لازم تكون متشابهة علشان تكون مميزة 
كفايا انك تكون معايا فيها 
كل لحظة معاك استثنائية ومميزة
انا كمان مميزة لانك حبيبى
واستثنائية لانى حبيبتك 
بحبك

Thursday, December 6, 2012

تخاريف


- انتى اخوان ؟
- اشمعنا 
- اصل متدينة اوى وكل كلامك لازم باسناد يا حديث يا قرآن 
- و هو مينفعش اكون مسلمة يعنى !!
" مش معنى انى ملتزمة ابقى اخوان ومش معنى ان الاخوان بيتكلموا بإسم الدين يبقوا ملتزمين بيه "

...................................

- ليه منفصله عن الاحداث و بتتكلمى ف حاجات تانية 
- مش بحب اتفرج على فيلم مرتين بحفظ تفاصيله من المرة الاولى 
واللى بيحصل زى ما تكونى بتتفرجى على نفس الفيلم اكتر من مرة 
يبقى على ايه بقى اتناقش مع حد وكل حد مقتنع برأيه والنهاية مش هتتغير 
" ممكن تدعو اللهم انك عفو كريم فأعفو عنا "

.....................................

عجبتنى جملة لـ ريم الماجد امبارح فى برنامج بلدنا بالمصرى 
وهى بترد على احد المعارضين اللى بيشرحلها ازاى الاخوان هجموا عليهم وبيضربوهم 
قالت " ليه نموت ببلاش "
ليه نقف قدام بعض ونموت ف بعض ليه بنعمل كدا 
ليه التعصب الاعمى ملئ القلوب بالشكل دا 
" إذا اراد الله بقوم سوء منحهم الجدل ومنعهم العمل ... عمر بن الخطاب "

.......................................

- على فكرة فى اهمال واضح ف الكتب شوفتى كتابك ؟
- لا لسه مش هشوفه دلوقتى 
" انا اصلا مش عايزة اشوفه بس بالله عليكم اللى يشوفه يقولى عامل ايه
سيبكم من الطبع والغلاف والفنيات دى ركزوا مع فنيات الكلام والموضوعات "

.....................................

انا كنت عايزة اكتب بوست رومانسى بس الاوضاع لا تسمح 
وبصراحة اول ما فتحت الفيس اكتئبت :(
بس هو انا بقالى كتير مش كتبت رومانسى وده يرجع لاسباب مش منطقية خالص 
نظرا لانى مجنونة طبعا 
فانا لاحظت ان كل ما كنت فرحانة اكتر و سعيدة اكتر فى علاقتى العاطفيه احم احم 
بكتب اكتر فى حاجات مختلفة تماما 
ولقيتنى مبسوطة كدا اكتر بحس ان حبى بيطلع فى نظرة مختلفة لكل حاجة حواليا 
" علشان كدا لما تلاقينى فضلت كتير مش بعبر عن حبى أتاكد انى بحبك اكتر واكتر واكترررررر "

.......................................

اللهم ان قومى لا يعلمون فأغفر لهم وارحمهم
واحفظ بلادنا و يسر امورنا وجنبنا الفتن ما ظهر منها وما بطن


هذه التدوينة تابعة لـ حملة التدوين الاسبوعى


Thursday, November 29, 2012

رسائل الى مجهول



الى ذلك المجهول الذى لم أصل إليه يوما
لا لسبب غير انى مقيدة بالا شئ

(1)
كنت أظنها مجدية عندما سعيت لتحقيقها
قد يكون رغبة منى ف الوصول اليك
وقد يكون محاولة للحاق بركب القادرين على الوصول
لكن ما ينتهى به الامر دوما هو مبتدئه
 وحدها الاحلام القادرة على تجسيدك لدى .. لا أكثر

(2)
لا داعى للتفكير كما انه لا داعى للصمت
فما من شئ يجعلك أكثر شفافية سوى الايمان
وما موقف يجعل منك رجل بحق
وما من رتوش تكسبك المزيد من الاحترام
عزيزى انها  امور فطرية لا تكتسب


(3)
كثيرا ما انتابتنى رغبة شديدة ف الحكى 
خاصة فى تلك الاونة الاخيرة التى صرت ارفض فيها اى منكن 
قد اكون زهدت تلك الصداقات الهاتفية وقد اكون زهدت الحديث كذلك
لكن ما بين هذا وذاك تجدون انى ما عدت أثق بكن 
فلا داعى للمزيد من المجاملات وتجميل الآخر 
كونوا كما انتم فانا لن اكون الا ما انا عليه 

(4)
اشتاقك كثيرا فأفكر بك بلا انقطاع 
تشغلنى جميع تفاصيلك المبهمة تشغلنى أكثر صورتى بك 
هل سأكون سعيدة ام بائسة ام بلا ملامح محددة 
اعترف انى كنت مقبله عليك بقوة و ثقة وتفاؤل 
ولا ادرى لما أصبحت مأساوية حيالك 
فلتعذرنى قليلا فجميع الحكايات والشواهد لكل من حولى لا تبشر بخير 
لكن اطمئن فلا زال إيمانى بالله اقوى من حكاياهم 
فالله لا يكلف نفسا الا وسعها 

(5)
ان كنت تبحث عن رسالتك بين رسائلى السابقة 
فعليك أن تدرك بأنى لم أكتبها لك بعد او على الارجح لن أكتب إليك
يكفينى ما طبعته داخلى ومحاولاتى المستميته فى ازالة اى رواسب تتعلق بك 
قد لا تكون تستحق تلك الرسالة كونى عشتك سابقا 
الا انى الى الان لا أثق بما قد تحمله لى 

(6)
أعلم ان كل من يمر برسائلى السابقة سيدرك انها موجه الى شخوص 
ولكن الى ان يعرفنى جدا ويدرك انى أهوى تجسيد كل شئ لأتمكن من مخاطبته 
سيدرك ان رسائلى شملت " الطموح والاخلاق و الصداقة و المستقبل و الماضى "
لم أكن ارغب ف التوضيح للحفاظ على رمزية النص 
لكن وجب الوضيح حتى لا يسئ الفهم


هذه التدوينة تابعة لـ حملة التدوين الاسبوعى 

Saturday, November 24, 2012

فراشة أنا



أعشق المطر 
ذلك الصوت الذى يحث قلبى بلا وعى على الدعاء 
ويضفى طهره على الكون والقلوب 
أشعر و كأنه يسقط عنى غيوم الحياة و يجدد أحلامى باليقين 
لذا دوما ما أخبر أطفالى أن الله أرسل إلينا المطر كى يغسل العالم والقلوب ويجدد الحياة 
فلتغمضوا أعينكم وتتركوا قلوبكم تتعلق برحمة الله 

أعشق الرقص بالكلمات 
وحدها الكلمات هى من تمس القلب وتحتفظ بالاسرار 
ترغمنى على الحكى وأن أثرت الصمت فأجدها تتراقص بذهنى 
لتبدا رقصة هادئة تتناسب مع خطوات عقلى المستغرق ف التفكير 
وحينا تدفنى لرقصتى المفضلة لتغمرنى فى تفاصيل عشق لا تنتهى 
اشعر وكأن الراء حرية أن أتجرد ممن حولى لأصاحب الكلمات 
والقاف قليل من التفكير لاستمتع برشاقة الأسطر التى تداعب عيناى 
والصاد صدق فحينما أرقص أتجرد من كافة القيود الاجتماعية والذهنية
أكن أنا .. وفقط 

أعشق الصباح 
حيث الشروق ولوحة الطبيعة المبهرة 
حيث البدايات ومع كل بداية حياة وأمل وبهجة 
أعتنى كثيرا بالبدايات ربما لكونى لا أمتلك سوى ذلك 
او لثقتى دوما ان البدايات هى منح الله
 التى يكن بها  الكثير وكل يحصد منها قدر سعته 
مما يثير بداخلى سعادة كلما منحنى الله بداية جديدة 


هامش 
رغم أنى لم أخلف موعدا قط إلا أن قلمى خذلنى ليلة الخميس 
لتكن أولى تدويناتى بحملة التدوين الاسبوعى متأخرة 

Tuesday, November 20, 2012

افتكاسات واقعية


- هو اصلا كل اللى بيكتبوا بيكونوا واخدين نفس الفكرة
 بس الابداع فى انك تصغيها صح وتوصليها بأسلوبك مفيش حاجة اسمها دى فكرتى 
" يعنى انا طلعت بشتغل نفسى وانا اللى كنت فاكرة انى بفهم  :))) "

........................

- كتابى الوحيد اللى اتاخر اوى كدا هو فى سبب خاص بيا ؟
- كتابك خلص اصلا .... بس الغلاف هو اللى لسه بس متقلقيش 
" يا رااااااااجل يعنى الغلاف اللى بقاله 5 شهور جاهز هو اللى لسه 
والكتاب اللى راجعته 4 مرات من الملل ولسه مسلماه من يومين هو خلص سبحاااان الله "

........................

- حضرتك رتبت المشاركات على اساس ايه مش ده  الترتيب اللى متفق عليه 
- على اساس الاسبقيه فى الاشتراك وارسال الحوالة 
- طيب انا رقم 9 و اللى سبقونى كانوا فى الاخر 
- لا ما هى المشاركات اللى فى اول الكتاب مش بتخضع لقاعدة الترتيب 
" حسبى الله ونعم الوكيل يتبعها هستريا ضحك "

......................

- لو قولتى انك محبطة فى ناس هتفرح بكدا 
- طيب انا محبطة جدااااااا 
" يا أيها الناس اللى عايزين تفرحوا فيا اتفضلوا معانا :)))) "

.......................

- إنتى عمرك ما استسلمتى .... اكتبى 
- مش عارفة أفكارى خلصت 
- جدديها 
" حوار بينى وبين نفسى بيحصل كل يوم 
مع مج النسكافية وصوت أنغام وبردو مش عرفت اكتب "

.........................

- متزعليش 
- مش زعلانة ما انت عارفنى رخمة ومفيش حاجة بتقدر عليا 
" والله نظرة من عنيك بالدنيا واللى فيها
 ومش عايزة اوصل لحاجة غير انى اشوف دايما فرحتك بيا "

........................

- الكتابات الجيدة بتفرض نفسها 
- مش مقتنعه
" لقيت نفس الجملة وانا بقرا رسايل الفيس فى 7 رسايل "

......................

الاربعاء 21 نوفمبر 
 إصدار النسخة الالكترونية من كتاب نوافذ مواربة 
وطبعا اسمى مكتوب بس ضمن اسماء اعضاء لجنة التحكيم 
تجربة مميزة جدا ليا وبعتبرها الخطوة التانية فى حياتى الادبية 
الكتاب يستاهل انك تقروه اكتر من مرة 
ويستاهل تحضروا حفلة الاصدار لو انتوا من القاهرة هتلاقوا التفاصيل هنا 
ولو انتوا من المنصوة او قريبين منها تقدروا تعرفوا التفاصيل من هنا 
اما لو انتوا مش هتقدروا تحضروا فممكن تحضروا اليكترونيا من خلال الحساب ده 

Sunday, November 11, 2012

إليكِ


إنى قد رُزقت حبها

مع خالص الاعتذار والشوق لحرفك ...
فلا أمتلك موهبتك كى أحكى عنكِ او لكِ
فلا أملك سوى 
أن أُهديكِ قلب وحياة و كلماتهم

لها اسمى .. خاتم سيضئ 
حين يحيط اصبعها 
وأن أصغى إلى قلبى 
إذا صمتت لأسمعها 
لها أن تبدأ الأحلام بى 
لأتممها معها 
(أحمد بخيت)


كُل النساء كلمات عابرة وأنتِ وحدك نَصُ القصيدة
(محمود درويش)

هو انتى ليه مش زيهم
اقصد عشان مبتوجعيش
دايما برئيه وطيبه
دايما مسامحه فـ اللى فات
مش زى غيرك مـ البنات

(محمد إبراهيم)


فرحان وبس وده كفاية
اجرى اخلص كل اللى ورايا .. علشان اشوفك
اكلمك ... المسك
ساعتها احس انى ماكنش ورايا حاجة
غير انى ادخل قلبك وارتاح
هو ده معنى البراح
(على سلامة)

أجمل ما فيكى إنك
مابتشبهيش سنك
ولا يشبهك ولا حد
ولا حتى فى الحواديت
أنا سندباد رحال
لفيت كتير ما لقيت
أنا لو لقيت زيك
كان من زمان حبيت

(د/على جلال الكاشف)



Sunday, November 4, 2012

فاصل جنان




4/ 11 
تم أختياره عيد الحب فى مصر وذلك لانه ... العيد القومى لمحافظة كفرالشيخ 
محافظتى أحبك 


فرحانة بيا علشان كسبت فى مسابقة القلم الحر للابداع العربى 
علشان كدا كافأتنى واشتريت هيدفون وشيكولا و شيبسى 
وفضلت اسمع " صدفة لـ يارا " طول الوقت بصوت عالى جدااااااا

اى بنوته بتعملى ميشن او تهدينى صورة لمجرد انها افتكرتنى اول ما شافت بنفسج 
بفرح بيها اووووووى 
احساس رائع كدا لما تبقى فى بال كل الناس طول الوقت 
اصل البنفسج ده مش بس لون ولا  وردة ده حياة متجسدة فى كل الالوان 

كومنت لرضوى اشرف عن الموف بحبه اوووى
الموف هو بنت راقية جميلة بتلبس فساتين دايما كده
و محبوبة أوى من أصحابها
دى انا على فكرة :))) ايوة انا مغرورة وبعترف 

مبدعون مما قرأت خطوة فارقة فى حياتى 
انا بكتب حلو حاجة وبرائ اللى حواليا حاجة 
وتقييم ملايين القراء دى حاجة مختلفة خااااالص 
احساس رهيب بالمسؤلية عن كل كلمة و فرحة بكل لايك وكل شير وكل كومنت 


ولما اتنشرلى على مما قرات الرئيسية 
ولقيت ان البوست عمل 648 لايك و 357 شير و 47 كومنت 
حسيت ولاول مرة انى مصدقانى اوى انا فعلا بكتب حلو :))))

ناس كتير اوى دخلت حياتى فى الفترة الاخيرة علشان بكتب حلو 
علشان احساسنا متشابه وكلامى لمسهم 
هو فى حد بالطيبة دى يهتم بيك كدا من غير اى مصلحة 
هى الناس دى بجد حقيقية يعنى ولا خداع بصرى 
يارب لو حقيقيين يفضلوا كدا على طول ياااارب 

لو افتكرت حاجة تانية هبقى اجى اكتبها بقى 
كان عندى كلام كتير بس تقريبا وراه شغل الصبح فسبقنى وراح ينام 

مساءكم هنا وصباحكم سعادة 



Saturday, November 3, 2012

فاصلة وفواصل




حدثتنى صديقتى عن الفاصلة وأهميتها فى كتاباتى 
استوقفتنى بسؤال لما تخلو كتاباتك منها ؟
لم أجيب ....
يبدو ان السؤال أخذنى كليا منها للحد الذى جعلنى أتركها تتحدث وأتجه للمطبخ 
وقفت لبرهة اتطلع حولى فى محاولة لاكتشاف ماذا أريد أن أفعل 
قهوة ... قد لا أجيد صنعها ولكن لا يهم فأنا اريد الكثير من القهوة 
علِ استجمعنى بعد تلك - الفاصلة - 
لو ان فيروز أستخدمت الفاصلة يوما وهى تبحث عن شادى لوجدته فى الجملة التالية ينتظرها 
وقد اتعبته المسافات التى لا تنتهى ففى الجانب الاخر للجملة حياة أخرى قد نغفلها بإغفال تلك الفاصلة 
أعود لاجد صديقتى لاتزال تنتظر إجابتى 
- تلك الواو التى تقلب لتباعد بين الاطراف ....
- وقد تكون لانتقال هادئ وتغيير واقع سئ ...
- لا أحبها مطلقا فعلى عكس العشاق أنا أعشق القدر ... تلك التفاصيل الصغيرة التى تبرزها النقاط 
سلاسة الاحداث رغم حزنها توحدنى مع الله فى دعاء ... فما حاجتى لفاصل ؟
- تكتبين موقف وليست حياة لما الربط 
- أسطر إحساسى بحروف ونقاط ولست طرفا فى مبارزة أدبية 
أغمض عيناى وارتشف قهوتى فى صمت فقد ملت فيروز من عودة شادى 
فتركت له نقاط شوق على الطريق وغفلت فاصلة للربط 
يبدو انى بدأت أتاثر بمناقشة صديقتى والتخلى عن موقفى 
حقيقة الامر انى رفضى للفاصلة ينبع من رغبتى فى الالتصاق بك 
الالتصاق بكل ما يبوح به قلبى للورق ومن ثم استعطاف الجمل برفق مستخدمة " و " حنونة 
تاركة لك كل دروب الكلمات مباحة بنقاط تنهيها أنت ...

.................................................................................

جميع الروايات درامية حزينة 
أريد رواية تبدأ بـ أحبك وتنتهى بإبتسامة عينيك 
هكذا كتبت ذات يوم فطرق بريدى برسالة 
" أريد رواية أتوحد فيها معك ... أكتبينى " 
اختصر رواية كاملة فى كلمة جمعنى به فيها 
" أكتبينى " يا الله 
أعلن أنى أكتفيت 

..................................................................................

ذلك العيد الذى أضاف بمقتضاه عام جديد لعمرى 
كان مميزا بك 
حافلا بهن 
محملا بـ هداياك وهداياهم والكثير من " منح الله "
فالحمد لله حمدا كثيرا 

.................................................................................

صدر مؤخرا كتاب " جراح الياسمين " الالكترونى 
ولى به خاطرة بعنوان " براءة الموت " صـ 9 




Wednesday, October 31, 2012

48 ساعة سعادة




فى الساعات الاولى لوهج اللقاء 
يبدو لى وجهك اكثر جاذبية من القمر 
فأظل أتاملك وكأنى اعيد أكتشاف تلك الملامح المطبوعة على القلب منذ امد
فى محاولة لسد فراغات الاشتياق بالروح


فى الساعات الاولى للتعود
أظل اتحسس أنفاسك بين نسمات الهواء حولى 
حتى تكن أنت المتنفس الوحيد لى 
حينها استسلم لملمس الهواء على وجهى فى نشوى لا تقاوم 

ثم تتوقف الساعات 
وتبقى السعادة لساعات تمتد بإمتداد إحساسى بك 
فيفقد الوقت كل ما لديه من إمكانيات على العد 
ويفشل اليوم فى محاولاته للانتهاء ... ونتواصل 

فى الساعات الاولى للحلم 
تتجسد أمامى عيناك وهى تغفو فأقبلها بعيناى وأغفو كذلك
فتصحبنى فى الكثير من الاحلام حيث تكون 
لتكن طقوس عشقى بك من وحى أحلامى معك وبفعل إحساسك بى 

فى الساعات الاولى للاستيقاظ 
يداعبنى صوتك فأشعر بالبهجة تجتاح روحى 
و أستعد لوهج لقاء جديد 

ثم تتوقف الساعات 
فى إعادة لكل تلك الساعات مرات ومرات فى نفس الدقيقة الواحدة 
تتجدد بنبضى الذى لا يكف عن الاشتياق لك وان كنت جوارى 
فتكن ساعاتى معك سعادة لا تنتهى وان كانت فى واقع الامر 48 ساعة لا أكثر 




Thursday, October 25, 2012

الكثير من الحب




الكثير من " هم "

دون أدنى تخطيط مسبق يرمقونك بكلماتهم العابرة على طريق الحياة المكتظ بالمتاعب
فتشعر وكأنك أنتقلت الى إحدى رياض الاندلس القديم تتأمل الطبيعة الهادئة 
وتداعب نسمات الربيع فرحا بجمال قلوبهم ثم تستدير لتتأكد ان كل ذلك لم يكن خيال 
فتجد انك حقا امام لوحة طبيعية من المشاعر النادرة 

الكثير من " نحن "
تلك الانحناءة التى تجتذب الجميع لتحول النون فى أنا وأنت الى استدارة تتسع لجميعهم 
بفعل الحب الذى يستوطن الحاء 

الكثير من " الحب "
هو ذلك الاحساس المتناهى فى الصدق حينما تتأمل كلمات الله وينبض قلبك 
بالكثير من الشوق وتتبعه عيناك بالكثير من الدمع 
هو ان تتأمل السماء نهارا لتتفائل و تتأملها مساءا لتدعو وفى الحالتين 
  تفيض الروح بالجلال لخالقها 
هو شئ من النقاء ف ابتسامة دائمة لوجه الله وصلاة فى جوف الليل و فى دعاء بظهر الغيب 
و إقتناع دائم بالرضا و يقين صادق بالجزاء و تطلع قوى للجنة 
فكلما صدق إحساسك ويقينك زادت قدرتك على الحب 
أحبكم فى الله

..................................

كل عام وانتم بألف خير
عيدكم مغفرة

Saturday, October 20, 2012

تهييس



تهييس لسببين 
اولا انى بقالى كتير اوى وكل دموعى كانت فرح النهارده غيرت رايها وبقت حزن 
ثانيا فى حاجات كتير حاسة انى عايزة ادونها علشان ابقى ارجع اقراها تانى 
يمكن كونها تخاريف فاللى حابب يهيس يكمل باقى البوست 
واللى حابب ينكد على نفسه يكمل بردو اما بقى اللى محتاج يضحك فطبيعى لازم يكمل يعنى

حفل توقيع خبايا نسائية لمنى ياسين " موناليزا " يوم بستناه بقالى كتير اوى 
يمكن فرحانة بالكتاب ده ومستنياه اكتر ما مستنيه كتابى " دى حقيقة والله ومش عارفة ليه "
حاسه انى هلاقينى جوه مش عارفة ازاى بردو 
يمكن لانى لما قابلت منى فى حفلة توقيع ابجدية ابداع عفوى فى المنصورة
كانت هى خلاص اتقبل كتابها وانا وقتها كنت شيلت فكرة الكتاب من بالى
فاكرة كويس اوى وانا ماشية سلمت عليها
وقولتلها ان شاء الله يوم حفلة توقيع كتابك هتلاقينى اول حد احضر
 قالتلى عقبال كتابك انتى كمان قولتلها يارب ونعمل حفلة التوقيع هنا بردو ومشيت 
بعدها اشتغلت على كتابى جامد لحد ما بعته واتقبل فرحت اوى اننا هنكون فى مرحلة واحدة 
وفضلت احلم باليوم اللى هيكون فيه حفلة توقعها وبعديه حفلة توقيعى واننا نكون سوا 
بس للاسف مش عرفت احضر وفضلت اعيط بطريقة غريبة يمكن بقالى كتير اووووى مش عيطت كدا
كنت بعيط بحرقة بجد احساس بشع انك تبقى نفسك فى حاجة وعمال تحلم بيها وتعد الايام لحد ما تجيلك 
وفى الاخر حد يقولك لا 
اسفة اوى يا منى انى خذلتك اسفة لنفسى انى بوعدها بحاجات وبخذلها بس والله مش بإيدى 
ومبروووووك يا حبيبتى وان شاء الله كتابك هيكسر الدنيا انا متاكدة

بقالى فترة كدا عايزة ارقص تانجو مع انى مجربتش ارقص قبل كدا بس حاسة انى بعرف ارقصها 
كمان بردو الفترة دى مسيطرة عليا فكرة انى اسافر الهند
علشان اجرى فى المساحات الخضراء الكتيرة اوى 
اللى بتكون موجودة فى الافلام الهندى واشترى لبس هندى كتيررررر 
وبما ان عيد ميلادى كمان عشر ايام وبعد ما احتفلت بيا واشتريت فستان بنفسجى لها اليوم العظيم 
 فانا عايزة هدايا كتير اوى بقى عايزة مصحف بالخط العثمانى 
و قلم حبر اسود دهبى وناعم وكام رواية كدا على كام ديوان شعر
 ويا سلام بقى لو المجموعة الكاملة لمحمود درويش معاهم 
عايزة احس انى جميلة ليدى كدا زى ما كانوا بيقولوا فى جمالك مع فيت ههههههههههههههه 
بس فى حاجات معينة مثلا اسيب ضوافرى طويلة كدا من غير ما اكون مضايقة من نفسى 
اعمل ميك اب كدا زى البنات الطبيعيين من غير ما افضل اقول ايه القرف ده الطبيعة احلى 
كدا يعنى بس بجد بجد يعنى نفسى يوم فرحى ان شاء الله
يكون فستانى من ابداعات مصمم مشهور اى حد مش هعترض 
وتعملى الميك اب والطرحة نانيس سليم متواضعة جدا انا اصلا
عايزة اروح اسكندرية واقعد على البحر الفجر واجرى وانط فى المية من فوق مكان عالى
عايزة الشتا يجى بقى علشان اجرى تحت المطر واجيب ايس كريم
عايزة اقابل كل صحابى ونفضل نتكلم ونضحك وقت طويل 
اول مرة احس انى عايزة حاجات كتير علشان كدا قلت اكتبها
علشان افتكر ان فى يوم من الايام كان عندى مطالب و حاجات عيزاها
بدال ما طول الوقت عمالين يقولولى انتى عمرك ما قولتى عايزة حاجة 
اهو قلت اما نشوف هيحصل ايه يعنى بعد ما قلت عايزة :)))

مش بتصل بحد ف الموبايل ومش عارفة هعيد على حد ولا لا 
مش لسبب غير انى مش عايزة حد يسالنى عن اى حاجة اصلا هو ليه كل كلامنا اسئلة 
مفيش فى المكالمات غير الاسئلة ولا مجال للجمل الخبرية 
كمان الرسايل النمطية بكرها بحب الرسايل اللى مكتوبة لحد معين باحساس خاص كدا
والفترة دى كنت ببعت رسايل نمطية لان مش كان عندى حاجة اقولها 
الرسايل الخاصة بعتها على الفيس لناس معيين طلبوها وفرحونى لما بعتلهم 
بمناسبة الرسايل وكم البهجة اللى بقت بتشع من انبوكس الفيس بتاعى كل شوية 
تقريبا فى اليوم الواحد بتوصلى اكتر من 7 رسايل دايما فيها ما بين رسالتين و 3 من اشخاص مش اعرفهم 
بقيت بفرح اوى لما بلاقى ناس مهتمه بالكلام والقراءة فى ناس عايزة تقرا بجد حاجة تفرح 
الحمد لله الفترة دى من اكتر فترات حياتى بهجة ربنا يكملها على خير يارب 
ويسعد كل الناس اللى بتسعدنى يارب

وفى نهاية الفقرة الرائعة دى نحب نغنى واهدى الاغنية الجاية لكل ضيفونا اللى منورنا 
واللى لسه هينورونا واللى ممكن مش ينورونا بس هما منورينا بردو 
ايه اللى انا بقوله ده ... ما علينا 
اسيبكم مع الاغنية بقى وتصبحوا على أمنيات محققة

طل و سألني اذا نيسان دق الباب خبيت وجيي و طار البيت في و غاب 
حبيت افتحلو عالحب اشرحلو طليت ما لقيت غير الورد عند الباب 
بعدك على بالي يا قمر الحلوين يا زهرة بتشرين يا دهبي الغالي 
بعدك على بابي يا حلو يا مغرور يا حبق و منتور على سطح العالي 
مرق الصيف بمواعيدو و الهوى لملم عناقيدو 
و ما عرفنا خبر عنك يا قمر و لا حدا لوحلنا بإيدو 
بتطل الليالي و بتروح الليالي و بعدك على بالي





Saturday, October 13, 2012

هذيان الانتظار



كل الرجال مخادعون ... ( حقيقة )
فلن يشعر بخيابات الحب الا إمرأة عانت ما عانيتيه 
فلا تصدقيه عندما يخبرك انه يشعر بك أكثر منك 
كيف وقد يكون هو سبب ما تشعرين 
فلو كان يشعر بك حقا لن يدعك تتألمين سيتألم هو قبل ان يفعل 

كل النساء مبالغات ... ( حقيقة أيضا )
فجميعهن يبالغن فى الفرح  لذا عند طرقة الحزن الاولى 
يفقدن ما قمن بجمعه من السعادة على مدار العام فيكون محصول ما جنينه ألم مبالغ 

كتبت اليه ذات ليلة .... 
عزيزى انتظرتك من الليالى ما قد عجزت عن إحصائه 
حتى أخبرك أمرا بات هام للغاية 
وفى كل ليلة يذيب الشوق مقلتى و انهار على وسادتى بعد ان يصفعنى الصباح بغيابك 
حقا تكن بالجوار لكنك منهمك بالعمل حتى فى أيام عطلتك 
ولم أجد سبيلا سوى الكتابه إليك علك تجد متسعا من الوقت لتقرا سطورى 
فقد انتهت تلك الليلة ايضا وبدأت أفقد مقاومتى ولا أريد ان انقض وعدى كما حدث بالامس
 فقد وعدتك بالانتظار وغفوت دون وعى منى فلتسامحنى فى ذلك وليعينك الله 
ولتغفر لى فقد نسيت ما كنت أود أخبارك به ...... 

هى لم تكن مبالغة فى ألم الانتظار 
هو لم يشعر انها تتألم 

يتصل بها ليخبرها انه عاد سريعا من أجلها و الا تغفو حتى يصل 
وتنتظر وتنتظر ويمر الوقت ثقيلا فى الانتظار ولا يجيب الهاتف نداءات قلبها 
تنظر فى الثانية الواحدة آلاف المرات تسترجى شاشته ان تضئ ولا تفعل 
وبعد مضى ساعه او ربما أكثر بكثير تتصل به ليخبرها انه ظنها قد غفت منذ ان هاتفها 
فهى تحتل لحظات من يومه اما هى فتقضى يومها انتظارا وليلها شوقا لتلك اللحظات 

هى ظنت انها تستحق بعض الوقت 
هو لم يدرك انها تنتظر كل الوقت 

لكل حواء 
لا تعلقى يومك على معطف رجل تتكاثر على أكتافه أتربه الاعباء اليومية فينساكى 
إجعلى ليومك غايات أكثر وأرتدى معطفه فقط عند الحاجة 
ليكن يومك لكِ وليبحث هو عن الاوقات التى تناسبك 
فلا يتعبك الانتظار ولا ترهقه المبالغة 

لكل آدم 
تذكر انها خلقت من أجلك فعقلها وفؤادها معلقان بك 
ليس بإختيارها ولكنها المهة التى خلقت لها 
فلتراعى انها تمضى يومها تفكر بك فهى لن تنسى تفاصيلك ولا كلماتك 
وان زعمت انها نسيت اتفاق بينكما فلتتيقن انها مراوغة او ربما تجنبك خطئ النسيان 


" صباحكم سعادة "


Friday, October 12, 2012

قالو لى



- انتى مش هترتاحى غير لما توصلى للى انتى عيزاه 
" دينا " صديقتى 

وقتها مش كنت عارفة انا عايزة اوصل لأيه 
يمكن كنت زعلانة علشان مش هكمل تمهيدى ماجستير 
يمكن كان نفسى ففرصة للظهور فى الشعر 
كنت عايزة اوصل ليا والحمد لله وصلت :)

......................................

- هو انتى فاكرة انك لما توصلى هتفتكرى حد ولا هتساعدى حد
اللى بيوصل مش بيفكر غير فـ نفسه 
" دكتور محمد " رفيق طريق العودة ذات يوم فى ميكروباص المنصورة 

لما قال كدا وعدته انى مش هتغير مهما كان وهساعد اى حد يحتاجلى 
يومها قالى ابحاثك دى تستاهل ماجستير مش تمهيدى متزعليش لما مش ينجحوكى 
فى بلدنا اللى بيستاهل لازم يتعبوه ويزهقوه وبعد حوار طويل وعند انتهاء الطريق 
قالى خليكى زى ما انتى اوعى تتغيرى وانا متأكد ان يوم من الايام هسمع أسمك واعرف انك نجحتى 
انا نفسى اوى اقابله تانى واعرف هو اخد الدكتوراه ولا لا واقوله
 انا فاكره وعد الطريق جدا وبنفذه الحمد لله :)

.....................................

- فرحانة بيكِ اوى وبكلم كل الناس عنك وبيستغربوا ايه جاب كفرالشيخ للشرقية 
نفسى افرجهم كتابك علشان يبقى اثبات على كل كلامى عنك 
" ألحاظ " صديقتى ولمزيد من الدقة مرآتى 

انا فرحانة بيكِ اكتر ودايما بحب اقول لكل الناس انك لحظتى المفضلة :))
واول ما استلم الكتاب هعمل حفلة فى المنصورة علشان اشوفكم كلكم 
وحشتينى اوى ووحشنى تحليلك ليا 

......................................

- سيدة البنفسج 
" رحاب الخضرى " حبيبتى 

أحلى لقب حصلت عليه علشان انتى مش اى حد 
انا بحبك جداااا وفرحنى اللقب جدا ربنا يخليكِ ليا يارب 

.....................................

- عايز اعملك مكتبة لوحدك فى بتنا نجمع فيها كتبك 
والهدايا كمان عايز افرح بيكِ أكتر 
" دكتور محمد " خطيبى وكدا يعنى :$

كل ما بفتكر كلامك ده وكل ما تعيده لما بنتكلم عن شقتنا بفرح اوى 
نفسى افرحك اكتر واكتر نفسى تفضل فرحان بيا كدا على طول 
فاكر بقى لما قولتلك ان اى حد بيكون مبسوط فى حالة الحب بس بتفرق فى الابواب 
انت دخلتى الحب من باب الحلم والحلم مالوش حدود ولا فيه حواجز 
انت اجمل حقيقة فى حلم حياتى 

.....................................

- متاكد/ة انك هتنجحى ان شاء الله 
" مصطفى سيف الدين & لبنى أحمد نور & نشوى عبدالمقصود " 

أنتم نقاط الضوء على طريق الحلم 

....................................

- يدوم عليكِ الخير يارب 
" ميسى سلطان " صاحبة رسالة متسائلة عن المئة تدوينة 

من فترة طويلة مش حد دعالى دعوة حلوة كدا 
يدوم عليكم الخير كلكم ياااااااااارب


" الصورة إهداء من حنان بتقول حستها انا  " 


Saturday, October 6, 2012

طفلة فـ العشرين



رغم تخطيها للعشرين الا انها مازالت طفلة فى كل تفاصيلها 
تبتهج دون مقدمات وترسم لليوم ملامح ابتسامة لتمضى الساعات مغمرة فـ السعادة
وكثيرا ما تسبق دموعها الكلمات اذا احست بالحزن يقترب منها
 فقلبها وردة نقية لا يجيد التعبير الا بالندى 
حتى وان علا صوت أحدهم معاتبا او غاضبا وان لم تكن هى سبب اى شئ 
 يوجعها إحساس الالم اذا ما أحسته يقترب من احدهم 
تجيد انتقاء الاشياء رغم عدم ادراكها للقيم المادية 
فآلاف الجنيهات تتساوى لديها مع بضعه نقود فضية مادام ما سيشعرها بالسعادة 
هو كوب من النسكافية يصحبه موسيقاها المفضلة 
والاماكن لديها سواء الفرق يتبين بالصحبة 
لا تتطلع للكثير فأقصى ما تفضله أن تسير لساعات متأملة آلاف النجمات وهن يقبلن وجه النيل 
عندما تصادق تخلص بلا حدود وحينما تحب يكن هو محور حياتها 
فلتتقبل سذاجتها  حينما تسألك فى ما قد تظنه توافه الامور 
وجنونها اذا طلبت منك شرح لصفات البشر ووصف لضحكات القمر 
قادرة على إصطحابك الى سماوات الاحلام الوردية وإهدائك زهرتها البنفسجية
كى تخبرك انها احتفظت بطفولتها فقط " لك "



Thursday, October 4, 2012

هو



هو ... حياة 
لذا تستمتع بأن تعيشه دون إضافات سعادة صناعية 

هو ... بهجة تجتاح الروح
حد عشقها لعزف شفاهه لحروف تشبه إسمها 

هو ... سرى للغاية حتى عنها 
فلم يكن هناك حين بحثت عنه بل كان داخلها يجمع أحلام قلبها 

هو ... تفاصيل 
لا يستوعبها العقل لكنها تستقر بالروح 

هو .... دائرة مفرغة 
تحتويها وفقط 

هو .. أنت 
ومنك أستمدت - أنا - هائها 

Saturday, September 22, 2012

حالات مفردة .. قريبا





حالات مفردة مش كتاب رومانسى 
ولا خواطر نسائية ولا مشاكل اجتماعية 
ولو حاولت تصنفه مش هتلاقي معنى شامل لمحتواه 
حالات مفردة زى شخصيتنا كل وقت وليه الحالة بتاعته 
مفيش حد بحالة واحدة طول العمر ولا يقدر يكون شهر بحالة واحدة 
علشان كدا هتلاقى حالات مفردة هو - انت - فيه كل حالاتك او حالات اللى حواليك 
هتلاقيه مصرى اوى بيحب مصر ورسملها " وجه الوطن "
وهتلاقيه رومانسى اوى فى " سحر البدايات
وهتلاقيه ثائر اوى وهو بيقول " التهمة...أنثى "
وكمان حزين لدرجة السخرية من شخصيات فى حياتنا كلها بتمثل الـ " بلياتشو "
بس هيديك جرعة تفاؤل لما تلاقيه بيثبتلك ان " فاقد الشئ قد يعطيه أحيانا " ويأكدلك على " لذة الفقد "
حنون اوى وهو بيوصف " رسائل أعينهم " و جرئ اوى وهو بيوجه رسائل من " بين الثنايا "
حالة من الشقاوة هتلاقيها فى " لوغرتمات هو وهى
مع شوية وجع فى " بعض من نبض مات "
وهيأخدك لـ " لحظات فيروزية " هتلاقى فيها شجن بيعرفك " لماذا أحب الشتاء "
بس لما تقلب فـ " ألبوم صور " هتكتشف " لون الفرح
ولو أستغربت من " الارهاب المقنع " فأكيد هتلاقى " تأملات " و " حالات " لـ " نبضات خاصة "
انما لو هنتكلم " عن أشياء ستبقى " فـ دايما حواء بتوجه " الى رجل " " رسائل لن تصل
زى ما آدم هيعرفها ازاى " يريدها " و هيتفقوا على ان بينهم " رسائل حب منسية "
رغم تعدد الحالات اللى بنعيشها والصراعات اللى فى حياتنا فاحنا كلنا بنبحث عن السعادة 
يمكن اللى خلى حالاتى مفردة انها بتدور عن ازاى تسعدك وانت بتقراها 
علشان كدا هتاخدك " خارج حدود الدمع " و تأخد بس " لحظة من قلبك "
وتدعى معاك فى " منتصف حياة
لو عجبتك الحالات هتلاقى اننا زى بعض " قدريون " مشتركين فى " حلم "
لكن مين فينا عنده " ذكريات الغد " ؟؟

هامش 

اللى بين الاقواس بالموف عناوين خواطر يحتويها الكتاب 
نظرا لانى مش عرفت اعمل برومو للكتاب بالصور والموسيقى فحاولت اعمله بالكلمات 
لو عجبتك العناوين او عايز تعرف اكتر من باب الفضول 
ممكن تتابع صفحة الكتاب  من هنا  " حالات مفردة "
لو مش عجبتك ممكن  تنتقدنى علشان تفيدنى واكيد اكيد بنقدك هتسعدنى