السبت، 28 أبريل 2012

عن الخطوبة اتحدث


اول لما اتخطب هعمل حااجات كتير اوى وهكتب كلام كتير جدا 
بس بحاول افتكر ايه اللى كنت عايزه اعرف ولا فاكرة اى حاجة 
حتى الكلام مش راضى يجى مش عارفة بقى المشكلة فين بالظبط 
كنت بفضل اكتب لفارس احلامى احلى كلام رومانسى ولما جه الفارس ضاع الكلام :)
" لا لشئ سوى انك فوق الوصف والتصوير "
......................................................

هى : ده خطيبها متدين اول ما اتخطبوا قالها لازم تصلى ركعتين شكر ان ربنا كرمك بيا 
انا :  ههههههههه طيب والله كويس 
هى : وقالها ان هو كمان هيصلى يعنى 
انا :  لا كدا عداه العيب بصراحة 
 هى الصلاة مدعاه للتباهى ولما اكون بشكر ربنا على نعمة ازاى حد يجبرنى على كدا 
جميل ان خطيبك يكون متدين وعارف ربنا بس الاجمل ان الصلاة تكون باحساسك وقلبك وكل مشاعرك 
بتصلى شكر علشان حاسة من جواكى انه نعمة من ربنا وبتشكريه عليها 
" الصلاة مش ركعتين ونسلم الصلاة ان كل حواسك تسلم "

.............................................................

وانا ف الكلية لما كنت بشوف بنت وولد ماشيين مع بعض ويجيبلها ورده 
ويعزمها ف كافية ويشتريلها الدبدوب اللى بتحبه من المحل اللى قدام الكلية 
ويشبكوا ايديهم ويفضلوا ماشيين ف الطريق الطويل ده اللى مليان شجر لحد محطة القطر 
كنت بقول لنفسى ان شاء الله لما اتخطب ويبقى عندى الولد بتاعى هنعمل كدا
واهم حاجة يمشينى على الكورنيش ف المنصورة نظرا لان مفيش عندنا كورنيش 
بس لما اتخطبت وبقى عندى الراجل بتاعى مش نافع نخرج سوا ولا اى حاجة 
ومع ذلك مش زعلانة ان احلامى مش اتحققت بالعكس فى حاجات تانية لقيتها اجمل حصلت 
انى اعمله الاكل بايدى وافضل استناه يجى ويبقى مكسوف يسلم عليا ولا لا 
وقتها بقول هما ازاى بيبقى سايبين ايديهم ف ايدين بعض اذا كان احنا مكسوفين نسلم :)))
" ادق تفاصيلك معى اجمل من كل مراهقات الجب "
..........................................................

هى : هو انتى اتخطبتى بجد 
انا : اه هى دى فيها هزار 
هى : اصل مش حطيتى صورة اديكم بالدبل ولا باين ف صورة البروفيل ولا الكافير اى حاجة 
انا : مش بحب الحركات دى ما انا غيرت الريبليشن مش كفاية يعنى 
هى : فى ناس بتغيرها وبتكتب اسامى لاطفال قريبهم او اخوتهم او بباهم حاجات كدا يعنى 
انا : بس انا واضحة وصريحة واحيانا عاقلة 
مش علشان مش حابه احط صورة صوابعنا يبقى اللى بيعمل كدا مش بيعجبنى لا بالعكس 
وبحب جدا البروفيلات اللى كلها حب ورومانسية 
بس مش معنى ان كل اللى بيتخطبوا بيعملوا كدا يبقى انا اعمل كدا 
" مميزة بإختلافى "

.............................................................

الخطوبة فترة مهمة جدا فى حياة اى اتنين بيقرروا يكونوا مع بعض لاخر العمر 
مينفعش تبقى اهم حاجة فيها ان صحابك يبقوا معجبين بخطيبك ولا ان الناس تقولك 
خطيبك امور وطيب ومتدين ومحصلش الاهم انك تصدقى انه محصلش 
وتحسى بجمال روحه وتقتنعى انه فعلا متدين و تكتشفى ف تصرفاته انه بجد طيب 
المهم انك تعرفى عيبوبه قبل مميزاته علشان تشوفى هتقدرى تستحمليها باقى عمرك ولا لا 
اختبريه واستفزيه وشوفى هتتصرفوا ازاى دققى فى كل تصرفاته وحلليها 
علشان مش تيجى بعد الجواز وتقولى انا اول مرة اعرف انه عصبى او غيور او او او 
وملحوظة صغيرة اوى كدا على الماشى كل الرجاله زى بعض المقولة دى صحيحة مليون المية 
زى بالظبط ما كل الستات زى بعض زى بردو ما كل البشر زى بعض بس فى شوية فروق فردية 
اهتمى بقراءة السيرة النبوية و اقرى عن الصحابة واقرى فقه المعاملات 
استغلى الفترة دى فى انك تتعرفى على خطيبك وانك تجمعى معلومات تفيدك ف حياتكم بعد كدا
يمكن الكلام ده مش بقوله لحد علشان مش تقولوا بتفلسف وشغاله نصايح 
بس بقوله لنفسى كمان علشان لما انسى اجى هنا افتكر ومش ابقى بناقض نفسى 
" يااااااااارب كل اللى مش اتخطبوا يتخطبوا واللى اتخطبوا يتجوزوا على خير باذن الله "

......................................................................

هى : دبلتك مش شفت حد لابسها قبل كدا 
انا " ولا انا بردو بقيت كل ما اسلم على واحدة اركز ف دبلتها علشان اشوف حد لابس زيها ولا ايه 
هى : بس جميلة اوى دبلتك هو انتى ليه مش بتلبسى اى حاجة من الشبكة 
انا : بحب الدبلة اكتر حاجة 
" علشان الدبلة هى الحاجة الوحيدة ف الشبكة اللى مكتوب جواها اسمه " 

........................................................................

مش بحب كلام الحب الكتير على الفيس والدلع الزيادة حتى لو متجوزين مش بس مخطوبين 
بحس ان دى اسرار مينفعش تبقى قدام كل الناس كدا 
لقيت بنات كتير متفقة معايا فى النقطة دى واللى سمتها " الدلال العلنى "
وحبيت بردو اسجل اعتراضى ليها هنا واعرف رايكم كمان 
" للقلوب حرمات كما للبيوت "

...........................................................................

نكتفى بهذا القدر وتصبحوا على امنيات محققة 
ان شاء الله


الخميس، 26 أبريل 2012

حالة




وحشنى انى اكتب اللى جوايا وبس 
زى قبل ما المدونة تتعرف ايام ما كنت بكتب لنفسى 
ومفيش حد بيشوف غيرى كنت بقول كل اللى جوايا 
من غير ما ابقى خايفة حد يشوفنى ضعيفة او يقولى كاتبه كدا ليه 
وحشنى اعيط براحتى من غير ما حد يمنعنى او يزعل منى حتى لو علشان بيحبنى 
وحشنى اصرح واقول تعبت ومحدش يسمعنى غير سكوتى 


زى ما كلكم بتزعقوا و بتتصعبوا وتضايقوا ويبقى المبرر الظروف و الضغوط 
والمفروض استحملكم انا ليه مفيش حد بيستحملنى ليه 


يمكن حاجات تافهة كلها بس التفاهات اللى انتوا شايفينها دى حياتى 
هو ليه محدش مصدق ان من حقى اختار حياتى من غير ما حد يفضل مركز طول الوقت ازاى ينكد عليا 
هو ليه مش من حقى احكى اللى جوايا لاى حد 
 ده انا وصلت لدرجة نفسى اقابل حد هيعرفنيش واتكلم واحكى بس مش اكتر من كدا 
عارفة انهم مش بيستحملوا يشوفنى مضايقة او زعلانة 
بس افتكر ان حد طبيعى كل الناس بتزعل وتضايق وبعدين تبقى كويسة وفرحانة عادى جدا 
ولا هو انا مش من ضمن الطبيعى ده يعنى 
مش مستنيه حد يعملى حاجة معينة ولا فى حد بالذات مزعلنى مجرد مواقف كلها جت مع بعض وبس 
فياريت محدش يزعل منى علشان قلت انى زعلانة يعنى 
ومحدش يسالنى زعلانة ليه علشان كدا قفلت التعليقات 
دى كانت مجرد فضفضة مع نفسى وخلاص 


الثلاثاء، 24 أبريل 2012

حوارات بلوجية (2)







حوارنا النهارده حوار بنانيتى 
شقى شوية حاد شويتين بس لذيذ كل الاوقات 
ضيفتنا صريحة جريئة ثائرة 
علشان كدا عرفنا منها كام سبق صحفى 
وده كان اول لقاء حوارى ليها مع الجمهور 
وده كان نص الحوار




آية : رحاب احلى فتفوته فى بلوجر بتختفى فترات طويلة بتروحى فين 
رحاب : اولا أنتي الأحلى


ثانيا،، بكون على الفيسبوك،، لأنه أسرع في التواصل،،
بس الحاجة اللي بلاقيها مميزة أوي،، بنزلها على المدونة لأن المدونة بحس إنها بيتي

العزيز جدا
آية بتوحشينى على البلوج بجد على الاقل ابقى تعالى فترات قريبة يعنى
رحاب والله أنا كمان بيوحشني وبتوحشوني جدا
وبحاول على قد ما أقدر أبقى موجودة باستمرار على قدر الإمكان
رنا رحاب الخضري صحافيه في الاساس ياتري قصه الصحافه بدات معاكى ازاى ؟
رحاب هو أنا دراستي في الأساس إعلام إذاعة وتليفزيون،،
بس أنا بحب الكتابة أوي،، من وأنا في الدراسة كنت بكتب مقالات عن الأسرة ونسائية،،
وبعدين بعد كده دخلت مجال الإرشادر النفسي والإجتماعي وبدأت مقالاتي تكون شوية

واخدة المجال ده،، وبعدين تطور بيا الأمر وبقيت بكتب في السياسة على ركن الهواة في

المصري اليوم ورياضة على استاد الأهلي،،طبعا فتافيت معايا على طول في كل

المراحل إلا مرحلة المقالات النسائية

رنا وحاليا رحاب الخضري فين وبتعمل إيه؟
رحاب فى بيتنا وبرد عليكي 

دلوقتي ما فيش شغل بشكل رسمي،، لأني مركزة في الكتابة،،
 لأني كسولة جدا ولحد النهاردة معنديش مادة تكفي تنزل في كتاب،، نفسي أخلص

الكتاب بقى السياسة واكلة دماغي،، من حوالي 3 سنين

وطبعا جت الثورة،، خلت السياسة أهم ما في حياتي العملية دلوقتى
آية نفهم من كدا اننا نستنى كتاب ليكى قريب ؟
رحاب والله نفسي،،،
بس المشكلة اللي بتقابلني،، إن الكتابة حالة عندي
مش على طول متوافرة،، بس أكيد أول ما يكون عندي مادة تكفي كتاب،،
سواء مقالات أو قصص أو خواطر،، هانزله فورا إن شاء الله
رنا هل دة معناه ان الكتاب سيكون ميكس من افكار رحاب والحياه والقصص التى 

تعيشها ؟؟
رحاب الخواطر والمقالات وطبعا،، هي فعلا بتكون من واقع الحياة واللي بشوفه،،
لكن القصص بتكون حاجة كده زي حلم بحلمه وأنا صاحية،، عشان كده اغلبها خيالية

لدرجة بعيدة

آية بردو مش عرفنا ناوية مادة الكتاب تكون ايه بالظبط ؟
رحاباللى هايتوفر له مادة هاينزل،،،
مقالات او قصص او خواطر،، اللي هايكفي كتاب هابدأ في خطوات طباعته على طول
رنا جميل جدا بالتوفيق ان شاء الله
رحاب :)
آية : هنرجع للسياسة اللى واكلة دماغك زى ما قولتى

رنا : وننتقل لرحاب من الناحية السياسية وارائها حاليا في ما يحدث ؟

رحاب بصراحة حاسة إننا أخدنا أكبر قفا من المجلس العسكري،، والبرلمان،،
ولازم الثورة ترجع تاني للميدان وإلا هايكون شعار الفترة اللي جاية،، معتقل واحد
يجمعنا كلنا
آيةعلى وجه التحديد ليه رحاب حازمية ؟
رحاب  : انا حازمية .. كنت ولازلت 

رنالماذا تعتقدى ان حازم صلاح ابو اسماعيل هو الاصلح؟
رحابأراءه وموافقه كلها من أول يوم في الثورة لحد النهاردة بتأكد لي إنه كان الأصلح،، وحضرت له مؤتمر كان أكتر من رائع،، وفي أي إنترفيو أو مناظرة كنت

بشوف فيه اللي بتمناه لمصر،،، 
غير البرنامج الإنتخابي بتاعه ومرجعيته الإسلامية اللي

بتوافق أيدلوجيتي،، لكن ما باليد حيلة بقى
 بس طبعا بالطريقة دي هانتخب أبو الفتوح في

الغالب 
لاني ضد فكرة إبطال الأصوات في الإنتخابات 

رناتمام جدا لكن الا تري معى انه بالفعل كذب في قصه والدته ام ماذا ؟
رحابوالله أنا اثق في كذب الطرف الثاني لأنها عادته،، وشوفت كل المستندات اللي

بيستندوا عليها،،
 وكلها وأنا غير خبيرة أصلا وبالبحث الذاتي أكتشفت إنها ساذجة للغاية

وهو أقسم بالله ثلاث مرات إنها مصرية لا تحمل الجنسية الأمريكية،، وطبعا زي ما كلنا

عارفين البينة على من أدعى 
وبينتهم كانت واهية بالنسبة ليا،، واليمين على من أنكر

وهو أقسم،، كده المسألة محسومة عندي،،
 وأي حاجة تانية هاتظهر بالنسبة ليا كاذيبة إلا

لو هو أعترف بكذبه،، ده شيء تاني
 

آيةويتحمل قسمه ان كان صادق ام كاذب فبعده استبعاده الامر رفع الى الله
اما عن مؤيديه فماذا ترين فى اعتصامتهم ؟ 
رحاب
: والله هم بيسلكوا الطريق اللى فى إيدهم
  • مما لا شك فيه إن اللجنة الرئاسية اصلا مصدر قلق لنا جميعا،، ولا نثق فيها وخاصة

    بحصانتها بالمادة 28،،
     هم قالوا ينزلوا يطلبوا تنحيها وتكوين لجنة تانية تكون فوق

    الشبوهات،،، وأهو ده اللي في إديهم،،
     لكن رغم إني من أنصاره ودعمته بكل اللي أقدر 

    عليه،، إلا إني ضد الفتنة في الوقت ده،، 
    هو لسه صغير في السن يقدر يثبت براءته

    الفترة اللي جاية،، وينزل الدورة القادمة،،
     دي وجهة نظري عشان كده مش هاشارك في

    أي اعتصام او مظاهرة خاصة بهذا الشأن

    رنا : اذا لن تشاركى فى مليونيات التحرير ؟
    رحاب أنا أخدت قرار من أيام أحداث مجلس الوزراء إني لن أشارك في أي مظاهرة

    تانية،،
     لأن بصراحة بدأت أحس إن التجموعات صيد سهل للمخربين والفلول إنهم

    يخربوا ويلزقوا اللي عمله في الثوار
     وفعلا ما شاركتش غير في جنازة شهداء

    الالترس اللي من عندنا في الزقازيق،، وعن التحرير بكره هتابع بس، 
    ومعاهم بقلبي،،
    ويارب بقى نرجع نتجمع تاني زي الــ 18 يوم الأوائل في الثورة،، 
    رغم إنه مش باين بعدد المنصات اللي موجودة حاليا في التحرير،، واحدة إخوان وواحدة ابو إسماعيل وواحدة 6 إبريل،،
     وكله يغني على ليلاه
    رنا فعلا هل تري ان التقسمات هذه حدثت لركوب الجامعات الاسلاميه للموجه ام 
    ان الشباب هم من اعطو الفرصه لهم بعدم وجود قائد معين للثورة  ؟

    رحابممممممم،،، بصي أنا إسلامية وسطية اصلا
  • وأعرف إخوان وسلفين من أول يوم 25 وهم في الشارع معانا عادي،، وأنا وغيري كتير جدااااااااا من التيار ضمن شباب الثورة،،
     فبحس إن الإسلامين ركبوا الثورة دي فيها إهانة لنا،، لأننا فصيل كان موجود أصلا،، لأن كل تيار فيه السيء والجيد،، 
    عامة أنا شايفة إن اللي خلى التيار الإسلامي يكون أقوى على الأرض وتأثيرا على الشعب هو إنه منظم وله قائد معروف،، 
    وقراراته بتطلع بعد تفكير،، لكن إحنا كشباب كل واحد فينا برأي،، وده ما ينفيش إني غير راضية على أداء الإخوان والسلف في البرلمان،،
     لكن مثلا شخص زي عصام سلطان،، حد رائع جدا وإسلامي،، وما فيش إتنين في مصر يختلوا عليه،، إلا لو كانوا إخوان :)
    رنا نسيبنا من السياسه ونسئل اسئله شخصيه بقى 
     ما اخبار رحاب مع الرومانسيه ؟
    رحاب : زى الفل :$
    يمكن أكون عايشة دلوقتي أجمل أيام حياتي،، وأكثرها نضوج عاطفي كمان،، وممكن جدا في أي وقت أعلن خبر حلو
    رناالله خبر حصري يا آيه مسكى بايدكوسنانك هههههههههههههه
    رحاب : ههههههههههههههههه
    آية : ههههههههههه ماشى
    ( شوية تصريحات تم حذفها ف المونتاج بعد ذلك هههههههه )
    آيةرحاب ايه مواصفات فارس احلامك ؟
    رحاب بكل بساطة ووضوح،، رجل استثنائي :) بس كدا
    آية زمان انا كنت دايما بكتب كونى إمراة استثنائية جعلت منك رجل استثنائى كى يليق بحب استثنائى هههههههههه
    رنا هل هذا يعنى ان الخبر القادم عن رجل رحاب رات فيه الاستثنائيه ؟
    البس يا معلم هههههههههههه

  • رحاب : اكيــــــد طبعا،، هو استثنائي في كل شيء بصي هاقولك حاجة
    أنا اصلا كإنسانة ميكس عجيب جدا كلي تناقضات اصلا ،، وفي اليوم الواحد يكون أكتر من 100 شخصية،، ودماغي مش سهل السيطرة عليها،، وشخصتي قوية،، فالراجل اللي قدر يروض كل ده ويحركه كمان ويجذبه لناحيته،،
     مؤكد رجل استثنائي
    آية الله الله
    رنا : بسم الله ما شاء الله نمسك الخشب بقى 

  • آيةعطر الموت تدوينتك المشاركة ف ابجدية ابداع عفوى ماذا تمثلك التدوينة والتجربة ككل ؟
    رحاب عطر الموت من أقرب القصص لقلبي اصلا،، بحبها جدا وبحس إنها مأساة مجتمع اصلا ،، 
    النظرة السلبية للمطلقة بتقتلني اصلا،، وكل اللي قراها أثنى عليها عشان كده كانت ضمن اختياراتي للكتب،، 
    وكانت واخدة أعلى نسبة في التصويت كجمهور ولجنة حكمههههههههههههههههه
    اما عن تجربة الكتاب كانت تجربة اكثر من رائعة بصراحة قوة علاقتى بالمدونين وخلتنى اعرف ناس اكتر
    واتعرف على مدوناتهم وبصراحة الكتاب شئ يدعو للفخر ماسورة إبداع وانفجرت فيه :)

  • رنا
    بس الكتاب كان ناقصه حاجه مهمه يا رحاب اعترف

    رحاب ايه ها ها ايه؟
    آيةناقصه انك تكونى معانا يا رنا ههههههههههه
    رحاب ههههههههههههههههههههههههه طبعاااااااااااااااا
    رنا : ههههههههههه ربنا يخليكم متواضعه انا دائما
    آية : طيب نكتفى بهذا القدر بقى
     وفرحانة علشانك جداااا ربنا يتمملك على خير 

    رنا ومبروك مقدما بس قبل ما تمشي تحب رحاب تنهى حوارها لناس اللي بتابعها وغايبه عنهم بايه ؟
    آية : ايوة الكاميرا زووووم عليكى والجمهور مركز
    رحاب أقولهم،، عارفة إن فترات غيابي بتجيب نتيجة عكسية،، وبفقد متابعين كتير،، بس لو أنتم حسبتوها زي ما بحسبها محدش هايزعل من غيابي،،، أنا بحسبها عشان أنتم ناس مميزة جدا،، لازم أقدم لكم حاجة مميزة جدا زيكم،، وفي الغالب الغياب بيجي بحاجة تليق بيكم،،، وطبعا بشكر آية ورنا جدا جدا،، هم بنوتين زي السكر،، وبحب خفة دمهم وإبداعم جدا جدا
    رناهيفتكرونا راشناكى ههههههههههه
    آية كنت لسه هقولها هههههههههه
    رحاب ده شكر غير مدفوع الأجر ههههههههههههههههههههههههه
    آية : واحنا كمان بنحبك اوى جدا خالص يعنى واستمتعنا بالحوار معاكى جدا
    رنا وانا من متابعينك دائما وفعلا غيابك دائما يثمر بشئ جميل بعده 
    وانا كمان بحبك اوى


    الى هنا نكون قد وصلنا الى نهاية حوار فتفوتة ربع قرن وفى انتظار القرون القادمة يووووه قصدى الحلقات القادمة 
    انتظروناااااااااااا 
    مع خالص تمنياتنا بمتابعة ممتعة 
    فريق العمل 
    آية محمد & رنا على
  • الأحد، 22 أبريل 2012

    حالات 2



    " ثقة "
    لا تحزن عندما اخبرك بإن طفلتك عديمة الثقة بذاتها 
    فليتهم يبتاعون الثقة لكنت ادخرت الكثير من أجلك 

    " استحضار "
    يستحضرون الكلمات والاشخاص والمواقف 
    واستحضر الصمت 

    " تفاؤل "
    على الجانب الاخر منى
    توجد انا تدعو لها وتبتسم 

    " جزن "
    لا تحزن فإن الله لا يترك الحزن يطول 
    فرحمة الله اوسع من دنيا تشغلك 
    فقط ارفع يديك للسماء وسأل الله رحمته 
    حتما ستبتهج 

    " صفاء "
    عندما يسيطر الابيض على نفسى 
    وتكون حواسى فى وضع استرخاء تام 
    يردد قلبى قوله تعالى " وأبيضت عيناه من الدمع "
    فابكى 

    ..............................................

    تنويــــــه

    فتفوته من ربع قرن هتكلمنا فى حاجات كتير 
    سياسية و رومانسية و ادب 
    و مفاجات كتيرررررررررر وحصريات كمان 
    انتظرونا ف " حوارات بلوجية الحلقة التانية "
    مع رحاب الخضرى 
    وهنا الحلقة الاولى " حوارات بلوجية 1 د/ مصطفى سيف "


    الخميس، 19 أبريل 2012

    خارج حدود الدمع



    مجرد من الحلم عالق بذاكرتى
    لا مستقبل لديك ولا ماضى
    شفاف حد الالم بلورى تحوى الكثير 
    أيا دمعى ما بالك لا تنتهى 
    تتوج دعائى وتعانق الفرح
     و مع امتداد الحزن يمتد نهرك دون اكتفاء
    ويبقى خارج حدودك 

    " إبتسامة "
    تلوح بأطرافها امامى تشير إتجاه السماء وتعلو 
    تضمد جراح المساكين حولى و تنظر تجاهى 
    تحاول ان تمسك ببعضى لأترك لها كلى 
    فتستعمرنى 

    " راحة "
    مغمضة العينين هائمة الخطى تتحرك ببطئ وان بدت ساكنة 
    تفكر كثيرا فلا تستوعبها الكلمات ليطول الصمت 
    وتبقى معلقة الذهن لا بين هذا ولا بين ذاك 
    لكنها سابحة الخيال قريرة القلب 
    محلقة بى 

    " رضاء "
    بهى الملامح عميق الاثر دائم الحمد
    قليله كثير وكثيره كثير ولنظرته سحر خاص 
    يتجول معى فى ربوع الحزن حاملا ابتسامته وبعض الدعاء 
    يذكرنى دوما بما نسيت وينسينى ما علق من الدمع 
    و يطوقنى 

    " بعضهم "
    اولئلك الذين يأتوننا دوما بالبهجة 
    يستقبلهم القلب دون ان يطرقون الابواب 
    فيهنأ بهم و يستمتعون به 
    قد تظنهم يرحلون لكن ثق بانهم سيعودون يوما 
    لقدر اسعادنا 

    فان عز علينا الفرح وتكابلت الهموم 
    فدوما سيظل خارج حدود الدمع الكثير

    تذييل 
     عارف يعنى ايه ربنا بيحبك
    يعنى يبتليك باحزان كثير ورا بعض وبعدها يكافئ صبرك بفرحة كبيرة :) 




    السبت، 14 أبريل 2012

    مدونتى أحبك




    مدونتى وحشتنى اوووووى واول ما اكتشفت انى هحذفتها فضلت اعيط كتير
    كنت عارفة انى بحبها بس مش كنت متخيلة ان اوى كدا
    فرحانة انها رجعت زى ما كانت بالظبط مفيش اى حاجة حصلتلها
    فرحانة انها سبب الاحساس اللى حساه دلوقتى
    فرحانة انك كنت مصمم ترجعها علشان تفرحنى
    مينفعش اقولك ميرسى
    بس ينفع اقولك بحبك :$

    بالمناسبة السعيدة دى أحب من موقعى هذا 
    أشكر كل الايام الوحشة اللى فى حياتى والمواقف اللى زعلتنى واى حاجة حصلت ضايقتنى
    وكل كلمة فهمتها غلط وكل موقف حد اخده ضدى
    بشكركم اوووووووى كنتوا سبب لحاجة حلوة اوى حصلت بعد كدا

    اللهم لك الحمد كله ولك الشكر كله علانيته وسره 

    الأحد، 8 أبريل 2012

    لون الفرح



    كثيرا ما تسألت ما لون الفرح 
    أخبروها ان الفرح أبيض فظلت عمرا تعشق الابيض
    وتحلم بفارسها على حصاته الابيض ليحملها بعيدا
    ومن ثم ترتدى فستان زفافها الابيض لتبدا حياة يملأها الفرح 
    ثم أخبروها بان الفرح هو الحب ولون الحب زهرى 
    فكانت تمسك بفرشاة الوانها وتضيف الى تفاصيل حياتها رتوش بمبى 
    تحب الجميع كى يمنحا البمبى بعض الفرح 
    ثم استشعرت الفرح  ف الصفاء فأحبت السماء والبحر 
    وقررت ان تمنح الفرح اللون الازرق 
    لكن فأجأها بفيض إحساسه وطوق يديها بإسمه 
    ومنحها ألوانا متعددة للفرح