الخميس، 16 أغسطس 2012

رمضانى وما فيه 2



رمضان اللى فات لما كان حد بيقولى ان شاء الله ربنا يعوضك خير 
والحياة هتبقى احسن كنت بقول مش ده لو الايام عدت اصلا 
السنة اللى فاتت كنت متخيلة ان الايام مش هتعدى ومش هتيجى عليا سنة جديدة 
مش هقول كنت يائسة لا خالص كنت مؤمنة ان ربنا كاتبلى كدا والحمد لله على كل حال 
بس مش كنت شايفة بكرة ده هيكون عامل ازاى 
بالرغم من ان وقتها كنت دخلت فى كتاب أبجدية إبداع عفوى الا انى كنت شيفاه اول واخر تجربة ليا
لان حياتى نفسها مش كان بايلنها اى ملامح
كنت عاملة زى ريشة فى وسط صحراء وفجاة جت عاصفة 
بس عدت سنة مش عارفة هى عدت ازاى بالظبط بس الحمد لله عدت 
لا ومش بس عدت دى جابت معاها خير كتيرررر الحمد لله 

السنة دى رمضانى كان فيه تجهيز كتابى " حالات مفردة "
وكمان مشاركة فى كتاب " جراح الياسمين " الالكترونى 
وختاما مشاركة فى كتاب " صندوق ورق " 
ده بالاضافة الى تجديد حلم ال100 تدوينة بمشاركة فى الاصدار الثانى 

رمضانى كمان كان مختلف علشان اول رمضان وانا مخطوبة 
حسيت قد ايه رمضان السنة دى مختلف لما جابلى هدايا كتير وقعد يفرجنى عليها 
وأكتشفت لما رمضان قرب يخلص خلاص ان أول مرة فى حياتى رمضان يعدى كله حلو كدا الحمد لله 
أما بقى العيد فأكيد مستنية العيدية يعنى 

وحشتونى كلكم وحشتنى موضوعاتكم وكتابتكم وإبداعكم وتعلقاتكم وكل حاجة 
ووحشتنى الكتابة هنا والرغى وكل حاجة بردو 
يارب يكون رمضان كان جميل عليكم و يكون العيد كمان مليان سعادة وفرحة 
كل سنة وعيدكم أحلى وأسعد ان شاء الله 

الخميس، 2 أغسطس 2012

الفكرة فى الايمان




الفكرة فى الابتلاء مش إنك تتحمل 
الفكرة انك ترضى وتصبر وتتعلم 
ربنا مش بيبتليك علشان بس يختبرك 
ربنا عايز يقويك على الدنيا ويعلمك تتحداها أكتر
ويوصلك انه بيحبك علشان تقربله أكتر 

-----------------

الفكرة فى الصلاة مش بس طاعة 
الفكرة انك تستقيم فى حياتك بإلتزامك لمواعيدك 
و بإحتشامك فى لبسك وبطهارة حواسك 
وبالتركيز فى تصرفاتك
 و تدريب عينيك على الخضوع وقلبك على الخشوع 
فكر تانى هتلاقى  ان صلاتك إستقامة لحياتك 

--------------------

الفكرة فى الدعاء مش فـ الاجابة 
الفكرة فى إنك مؤمن بأن الله قريب 
مدرك بأنه سميع متيقن بأنه قادر 
تثق بأنه عليم فلا تشغلك الاجابة قدر أن تشملك رحمته 

---------------------

الفكرة فى رمضان مش بس الصيام
الفكرة فى الوحدة و إننا واحد قدام ربنا 
ان الاحسن هو اللى بيقرب لربنا اكتر مش اى حاجة تانية 
كلنا بنبدأ سوا ونفطر سوا بس مين بيسبق لربنا 

------------------------

الفكرة فى الخير مش التبرعات 
الفكرة فى الاحساس بالغير سواء كانوا بعيد او جنبك على طول 
إنك تحس بفضل ربنا عليهذك فتساعد اللى محتاج و سيبك من الاعلانات 
أعمل الخير اللى تحسه مش اللى يوجهوك ليه 
الخير مش بس تبرعات الخير أشكال كتير اوى قلبك هيحس بيها 

-------------------------

الفكرة فى أنك تحتاج من حد يدعيلك 
مش بس انك محتاج دعوة بظهر الغيب 
الفكرة انك عايزها دعوة خالصة لوجه الله مفيش فيها رياء 
دعوة من ناس كتير فى اوقات مختلفة علها تستجاب 
" اللهم إقضى حاجتى وفرج كربتى يا أرحم الراحمين "


ملحوظة 
فكرة البوست محاكاة لسلسلة الفكرة  لـ رنا على