Tuesday, May 21, 2013

كلام كدا



انتى اخر واحدة فى الدنيا كنت اتخيل انها ........
بصرف النظر عن ان باقى الجملة " تلعب المزرعة السعيدة "
 الا ان الجملة فى حد ذاتها حلوة اوى 


البوست ده بيتكتب تحت تضغط نفسى " انا ارغمتنى اكتبه "
علشان مينفعش ابقى عايزة اكتب 

و بسبب مش عارفاه افضل كل يوم افتح البلوج واقفله من غير ما اكتب ولا كلمة



انا فعلا مش بقيت عارفة اكتب ده واقع مش قادرة اتعامل معاه

و الاكيد ان فى حاجة جوايا رافضة فكرة " لازم اكتب "
الازم ده ليييه الكتابة بالنسبالى كلام جوايا وبطلعه فى رسالة فسى توصل لكل الناس
ومش كل اللى اكتبه يبقى يتنشر عادى انا مش كاتبه محترفة ولا متوقعه انى فى يوم من الايام اكتب رواية
بس بيقولوا عليا بعرف اكتب حلو وهى دى كل الحكاية



لازم  تبقى قوية علشان هو ميستاهلش تضعفى علشانه 


مش عارفة ليه اليومين دول بفتكر حاجات غريبة 
وكأن الذاكرة كانت واخدة اجازة ورجعت تانى 
بس فى سنين من عمرى مش فكرانى فيها فاكرة كل حاجة حصلت بالتفصيل الا انا 
مش فاكرة انا كنت عاملة ازاى ولا شكلى ولا كنت بعمل ايه فى وقتها 
" سقطت سهوا من ذاكرتى "



اللى بيخرج من حياتى مينفعش يرجعلها تانى 
بس اكيد بيكون ليه معزة السنين اللى جمعتنا ببعض 
علشان كدا لما واحدة منكم تكلمنى هتلاقينى زى زمان 
بس استحالة علاقتنا ترجع زى زمان ولا حتى هقبل بالمحاولة 




19 /6 / 2013
هيصدر كتابى الثانى ان شاء الله 

الكترونى علشان عايزة كل الناس تقراه 
علشان مش شايفه اى فايدة من الكتب المطبوعة غير التوثيق
وانا خلاص وثقت فى كتابى الاول و فى الكتب الجماعية
 
اسم الكتاب وكل التفاصيل هتعرفوها قريب ان شاء الله 

استنونى بقى 


8 التعليقات:

rona ali said...

امممممممممممممم

بييبقي حلو الكلام اللى مش مترتب دة على فكرة

موضوع المزرعه السعيده انا كمان استغربت لما شوفت الجمله اعتقد هتوقفي ومش هتكرريها تانى دى بتجيب اذي نفسي لجهاز حتى :))))))

و انا مستنيه الكتاب المفاجئ دة وانتى يايويو مش محتاجه توثقي كتاباتك من زمان من قبل ما تطبع حتى :)

لان افكارك وكلامك بيوثق نفسه بنفسه في عقولنا :)

دومتى مبدعه

ابراهيم رزق said...

المذرعة السعيدة يا ايه
طب الحق نفسك
ممكن تلعبى السلم و التعبان


اكتبى وقت ما تحبى تكتبى
بس حاولى متغبيش
لان الكتابة بتحتاج دائما لتنشيط و رياضة
لان لما بنتركها كتير بتخمل و بتكسل و وزنها بيزيد و مبتتحركش من مكانها الا بصعوبة

فى انتظار كتابك

تحياتى

Amira Ahmed said...

الحقيقة انا إتفأجت لما لقيتك بعتيلى ريكوست تنحت كده
إلحقى نفسى لأن اللى بيدمنها بيبقى مش طبيعى :D
كلامك جميل أوى وبحب طريقتك دى لما بتتكلمى فى كذا حاجة كده مش مرتبطين ببعض لكنهم بيكونوا حدوتة جميلة اوى

مش عارفة ليه اليومين دول بفتكر حاجات غريبة
وكأن الذاكرة كانت واخدة أجازة ورجعت تانى
بس فى سنين من عمرى مش فاكرانى فيها
فاكرة كل حاجة حصلت فيها بالتفصيل إلا أنا
مش فاكرة انا كنت عاملة إزاى ولا شكلى ولا كنت بعمل ايه فى وقتها
"سقطت سهواً من ذاكرتى"

عجبنى أوووووى الكلام ده لإن نفس الحالة الغريبة دى بتنتابنى أوى دلوقتى وبرضه فاكرة كل حاجة لكن أنا لا

بحب دايما كلامك
وإحساسك مش محتاج توثيق انتى فنانة فعلا
مبروك على الكتاب ومستنياه بفارغ الصبر
دمتى متألقة كالعادة :)

رؤى عليوة said...

الف مبرووووووووووك وان شاء الله يكون جميل

ثانيا عن حالة لازم اكتب وانا مش عارفه مالى
والله كأنك بتكتبى عن حالتى معرفش فيه ايه
كل يوم افتح بلوجر واقفله تانى

حتى القراءة مش عارفه مالى بعيد عنها ليه

يمكن شوية ونرجع تانى


عن الناس اللى بيخرجوا
هما نفسهم خرجوا لانهم اتغيروا



دمت بخير

Aya Mohamed said...

رنا

تسلميلى يا حبيبتى
المزرعة بالنسبالى تغيير وافراغ شحنة سلبية مش اكتر
مفيش حاجة تقدر تسيطر عليا متقلقيش :)

Aya Mohamed said...

ابراهيم رزق

هههههههه
لا مش لدرجة السلم والثعبان
بلعب بازل اوقات بس ههههه

Aya Mohamed said...

اميرة

انا تعليقاتك بتفرحنى اوى
يارب دايما تحسى ان كلامى بيعبر عنك
وانتى كمان فنانة اساسا ربنا يوفقك دايما يارب

Aya Mohamed said...

رؤى

ربنا يبارك فيكى يا جميلة
ان شاء الله ترجعى تقرأى وتكتبى اقوى من الاول كمان
نورتينى يا حبيبتى :)