الخميس، 9 يونيو 2011

فاقد الشئ يعطيه .... أحيانا



فاقد الشئ لا يعطيه
مش مقتنعه ايوة ليه يعنى فاقد الشئ لا يعطيه
بالعكس ده اوقات فاقد الشئ هو اقدر الناس انه يعطيه
لو افترضنا ان الانسان هو الثابت وعندنا متغيرين المشاعر والظروف
العلاقة بين المشاعر والظروف علاقة طردية
ايه دخل الرياضة .... ثوانى بس هقولكم
فى اعتقادى الشخصى ان الانسان اللى محروم من الحنان هو اكتر حد جواه حنان اول ما تسمحله الظروف
هيدى حنان يكفى الدنيا كلها مع انه فاقد الشئ اهو
كمان الانسان اللى عايز فى بيت مش مستقر بيكون كل حلمه فى الحياه انه يعمل بيت مترابط
اللى شايف باباه ومامته منفصلين بيحاول انه يحافظ على بيته ويتجنب الاخطاء اللى شافها فى حياة اهله قبل كدا
هى نظرية بس مش صح دايما ..... ايوة ما انا عارفة
ما احنا لو طبقناها على كل حاجة فى الدنيا هتبقى غلط
بس انا بتكلم فى نقطة المشاعر والعواطف لان دايما جملة فاقد الشئ لا يعطيه مرتبطة بالحب والحنان والمشاعر
ودايما بردو الجملة دى بتيجى فى بالى لما بقابل شخصيات تدينى اهتمام وحب وحنان مفيش زيه فى الدنيا
مع انهم قد يكونوا فاقدين اللى يديهم الاحساس ده والعكس تماما
اللى عايشين وسط حب واهتمام وحياة نفسية سوية مش بيدوا غير قسوة وبس
مش عارفة انتوا متفقين معايا ولا ايه
بس مجازا ياريت تبقوا تفكروا شوية لان فاقد الشئ يعطيه .... احيانا




10 التعليقات:

Alone Spirit يقول...

انا اتفق معاكى جدا فى الوست دة

مصطفى سيف الدين يقول...

فاقد الشيء يعطيه في اغلب الاحيان فالاعمى ببصيرته يعوض افتقاد بصره ويمنح النور للاخرين
تحياتي

الحلم العربي يقول...

لا يا آية مش دايما ، في معظم الاحيان بتلاقى اللى جاي من بيت بيحترم المرأة مثلا و بيقدرها بيبقى هو كده و العكس صحيح
في مسألة المشاعر دي حاجة نسبية و بتختلف حسب طبيعة الشخص نفسه ، طبعا البيت له عوامل و ممكن لأن الشخص أصلا يميل للحنان و لأنه مالقهوش في بيته بيكون حريص جدا انه يلاقيه و يحافظ عليه بعد كده لكن دي مش قاعدة ابدا

و عموما الناس مختلفين و مش بالشرط الظروف المحيطة بيهم تكون هي المؤثرة في حياتهم و إلا ماكناش بنى آدمين :)

aya mohamed يقول...

توقعت ان مفيش حد هيتفق معايا
بس مبسوطة انك متفق معايا :)

aya mohamed يقول...

مصطفى
كلامك صح جدا هو ده اللى اقصده
ميرسى ليك

aya mohamed يقول...

انا مش بقول انها قاعده
قصدى نبص للشخص نفسه الاول قبل ما نحكم على حد ونقول فاقد الشئ لا يعطيه
افتكر اننا اتفقنا فى اخر كلامك ان مش شرط الظروف المحيطة تكون هى المؤثرة

nesma hatem يقول...

أكيد ... أتفق معك جدا
:)

aya mohamed يقول...

اكيد دى حاجة تسعدنى
نورتينى جدا (f)

M Magdi Albarqi يقول...

متفق جدا

aya mohamed يقول...

نورتنى جدا