الأحد، 5 يونيو 2011

تاج العزة

عجبنى جدا تاج الثورة ورغم انى مش كان جنبى اى مظاهرات
الا انى تقريبا كنت عاملة مظاهرات وقلق فى البيت :D
وفرصة انى اشارك فى تاج الثورة اى حاجة ليها علاقة بالثورة بدى احساس بالفخر
ونبتدى التاج

اين كنت اثناء مظاهرات 25 يناير ؟
فى بتنا عادى مش كنت حاسة اوى بالمظاهرات غير يومها بليل
كنت فكراه هيبقى يوم عادى شوية شباب هيخرج فى مظاهرة ويروح عادى جدا
لكن بليل بقى حسيت ان الموضوع المرة دى مختلف فبقيت بتابع على الفيس والجزيرة طول الوقت

هل كنت تتوقع ان تؤدى هذه المظاهرات لثورة ؟
كنت حاسة ان فى حاجة جامدة هتحصل بس مش اتخيلت انها توصل للتنحى
وكل ما حد يقولى مش هيحصل حاجة كالعادة اقول لا المرة دى غير اى مرة تانية
لازم يحصل حاجة المرة دى حياة او موت مش باقى حاجة هنخاف عليها
ماذا فعلت وقت انقطاع الاتصالات والانترنت ؟
اولا انا كنت حاسة انى مش من مصر لان كان عندى شبكة فى الموبايل وبتصل عادى
هو يوم واحد بس اللى مش كان بيجمع معايا لما بتصل بخارج محافظتى
غير كدا كنت بتصل بكل اصحابى اطمن عليهم عادى
بس طبعا كنت مضايقة جدا من قطع الانترنت وفى نفس الوقت كنت حاسة ان ده معناه انهم مرعوبين من الشعب
وغباء منهم اللى عملوه اللى نزل كان نزل خلاص واللى مش كان هينزل مش بقى عنده حاجة يعملها
فنزل هو كمان وده حسسنى اننا مينفعش حد يعاملنا بغباء ولا يفرض علينا قيود زمان او مكان او طريقة
ماذا كان رد فعلك بعد اعلان تنحى مبارك ؟
كنت فرحانة جدا طبعا رغم ان كان جالى خبر من مطار الماظه الظهر ان مبارك ركب الطيارة ومشى
فكنت متوقعه انه يولى مسؤلياته لعمر سليمان وخلاص انما التنحى مش جه فى بالى
فلما حصل مش صدقت نفسى وكنت فرحانة جدااااا
ما شعورك تجاه استمرار وجود مبارك فى شرم الشيخ ؟
فى حاجة مش مريحة فى الموضوع ده
وجاسة ان فى مصيبة هتحصل بسبب كدا
هل اتفاجئت بحجم فساد النظام السابق ؟
لا .... بما انى ارياف المفروض فعندنا واضح جدا فساد النظام فى كل حاجة واقل حاجة
ويمكن الارياف اكتر ناس كانوا عايشين مع الفساد
اتفاجئت بس بكمية الفلوس اللى سرقوها هى البلد كان فيها كل ده واحنا مش حاسين معقول
طيب عايزين ياخدوا ماشى بس على الاقل يسمحولنا نعيش كويس
هل غيرت مصر شيئا ما فى داخلك ؟
اه بقيت حاسة بفخر اكتر من الاول بمراحل
عندى احساس قوى ان فعلا مصر عظيمة
الاول كنا بنقول مصر ام الدنيا ومصر الحضارة وكان بيضايقنى ان مصر زمان بس
دلوقتى عندنا مصر الثورة مصر احنا مش مصر الفراعنة مصر الشباب
هل لديك تفسير للانفلات الامنى ؟
كان جوانا كبت تجاه الشرطة وحاسين بالقهر من الامن
فلما جت الفرصة اختلط الحابل بالنابل
محتاجين الشرطة تعامل الناس باحترام علشان نقدر نحترمهم احنا كمان
وعلشان يغيروا صورتهم جوانا وعلشان احنا نكون نرجع نديهم هيبتهم ده محتاج وقت
مصر رايحة على فين ؟
مصر حاليا واقفة لسه مش قررت
يارب تروح للعمل والتطوير عايزين نوصل بمصر لبر الامان
كان ايه شعورك لما الجيش نزل يوم جمعة الغضب ؟
اطمنت جدا وقتها حسيت ان الامان هيرجع تانى
وفى نفس الوقت كنت خايفة على الحدود وان هيبقى سهل حدودنا تنضرب
ايه اكتر صورة شايفها بتعبر عن الثورة ؟



ايه اكتر اغنية بتفكرك ب 18 يوم بتوع الثورة ؟
ازاى منير و يا بلادى رامى جمال وعزيز الشافعى

0 التعليقات: