Thursday, February 20, 2014

البنات و البنات




بقالى فترة ملاحظة حاجة غريبة اوى حاصله على الفيس بوك 
الا وهى انتقاد البنات لبعض 
هى واحدة بس تفتح موضوع انتقاد تلاقى باقى البنات ما صدقت وكل واحدة تكتب استاتيس فيه رايها 
ابتداء من موضوع هل يجوز للبنت تنشر صورها ولا لا 
والحقيقه انا مش شايفه ان فى داعى لكل الانتقاد ده مش عاجبك انها بتحط صورتها اعملى نفسك مش شفتيها 
الحياه فيها حاجات كتير قوى اهم من واحدة منزله صورتها على الفيس يعنى 
انتى مقتنعه ان كدا غلط طيب مش تعملى انتى كدا فميش حد هيجبرك تعملى زيها 
ومتخافيش هى مش عدوه فانتى بتحاربيها علشان مش يجيلك الفيرس ولا حاجة 
خليكى متحضرة و خلى عندك مبدأ وافكار مقتنعه بيها بس فى الوقت نفسه متحاوليش تفرضى مبادئك على حد 
انتقالا لموضوع نجيب نيش ولا مكتبه 
طيب ما تجيبى الاتنين او مش تجيبى خالص او جيبى حاجة واحدة 
ايه لازمه انك تنتقدى اللى هتعمل عكس اللى انتى عيزاه
وبلاش احساس البطولة اللى كل مصر عايشه فيه ده المجتمع مش هيتغير لما تعملى مكتبه ومش تجيبى نيش 
ولا كل البيوت المصرية هتبقى مثقفه لو كل بيت بقى فيه مكتبه على فكرة 
فى ناس لا عندها نيش ولا مكتبه و مثقفين وفى ناس عندها كميات رهيبه من الكتب " ورثاها " وعمرها ما فتحتها 
مرورا بقى بظاهرة خلع الحجاب 
اه بتزعلى ان بنت تعرفيها خلعت الحجاب حقك طبعا 
بس مش تحاولى تقنعينى ان غيرتك على دينك و حبك ليها هما الدافع انك تنتقديها بان شكلها بالحجاب احلى 
اصل انا مثلا شكلى من غير الحجاب احلى يبقى اخلع الحجاب بقى مدام الاحلى هو اللى بيحكم الموضوع 
سلوكك كـ محجبه هو اللى يخلى اى واحدة خلعت الحجاب تفكر تانى 
لكن لما تنتقديها بالشكل ده تخليها متاكده ان تفكيرك سطحى والحجاب بتاعك مجرد شكل مش عقيدة 
واسهابا فى تاخر سن الجواز اسبابه و تداعياته ومعاه تحس ان كلهم وصلوا لمرحلة متقدمه من النضج الفكرى 
اللى مخليهم " اساسا مش عايزين " متحررات للدرجة اللى مخلياهم كلهم هدى شعرواى فى مواجهه لتحطيم " قيود المجتمع "
موضوع الجواز ده فى الاساس " رزق " اه والله يعنى لما يجيلك رزقك مش هتعترضى ولا حاجة هتلاقي ربنا يسرلك كل حاجة 
رزق ربنا مش مرتبط بسن ولا بشكل ولا مواصفات هتلاقى نفسك ادبستى كدا من غير ازاى وليه 
قبل ما تنتقدوا حد اتعلموا ثقافة الاخنلاف الاول 
فكروا فى دوركم الايجابى فى الدنيا انتوا مش كل تصرفاتكم صح علشان تنتقدوا اللى بيتصرفوا غلط 
انتوا احلى وارق من انكم تعملوا مع بعض كدا :))

3 التعليقات:

!!! عارفة ... مش عارف ليه said...

من كان منكم بلا خطيئة فليقيها بحجر

قمر وليل وغيوم said...

انا مش من الناس المشتركه فى الفيس لكن انا ملاحظه عموما فى مجتمعنا بقت الناس واخده بالها اوى من بعض والنقد بقى شىء اساسى حتى فى الاعلام
وبصراحه الناس بقى كلامها كتير اوى وبترغى عالفاضى
معاكى حق فى كل كلامك
تحياتى ليكى
اتمنى التواصل

Carmen said...

فى ناس بتبقى واقفة للناس على غلطة وفى ناس بيبقى الموضوع بالنسبة لها مجرد اسقاط لانها نفسها تعمل ده وعليها ضغوط مانعها وفى ناس بتبقى عاوزة تقول كده لنفسها قبل ماتقوله لحد وبتقوله يمكن فى يوم تسمعه :)
موضوع مهم فعلا واى ان كان الغرض ربنا يبعدنا عن اللى قال ربنا فيهم لما تقولون مالا تفعلون كبر مقتا عند الله ان تقولوا مالا تفعلون :)
تحياتى