Monday, February 17, 2014

blogger movies




كلنا عجبتنا فيديوهات مارك اللى بتلخص وجودنا على الفيس بوك فى صور و تواريخ
بالرغم انى بحس دايما ان الفيس بوك وقتى مينفعش يكون البوم للذكريات 
لكن مارك طلع ذكى جدا و عمل لكل واحد فيديو الذكريات 
بس بلوجر دقيق فى ذكرياته اى حاجة عايز ترجعلها هتلاقيها بمنتهى السهولة 
ولانى حبيت جدا المعلومات اللى عرفهالى فيديو الفيس بوك فحبيت كمان تكون عندى نفس المعلومات مع بلوجر 
اول ما عملت المدونة كان اسمها YoYo
اول بوست كتبته فى المدونة كان بتاريخ 5 مارس 2007 يعنى بقالى هنا 7 سنين :D
واول كومنت كان لـ أميرة حسن اللى اكتشفت من شوية انها نفسها اميرة الدسوقى صاحبه كتاب بس يا يوسف 
( ودى من الحاجات اللى استغربتها شوية و اخدتنى لتفكير طوووويل بتاع ساعه كدا )
فى 2008 مش كتبت اى تدوينة وده لان الاحداث اللى حصلتلى فى السنه دى كانت اكبر بكتير اووووى من انها تتدون
كمان فى حوالى 40 تدوينه كـ مسودات ودول اتنشروا فى الفترة ما بين 2007 لـ 2010 
اول حملة تدوين كانت 2011 ومعاها فتحت المشاركات اللى كانت مقفوله لمدة سنه 
اكتر سنه كتبت فيها تدوينات كانت " 2012" كتبت 79 تدوينه 
اعلى نسبه مشاهده 1077 كانت لبوست اسمه من ذاكرتى 
غيرت استايل المدونة كتير مع تغير حالاتى النفسيه اول استايل كان التقليدى بلون بينك
غيرت اسم المدونة فى 7 /7/ 2009 وبقت شئ سيبقى بيننا 
بحب مدونتى جدا هى الحاجة الوحيدة اللى فضلت معايا كل السنين اللى فاتت وقوتنى و سمعتنى 
عاصرت كل التفاصيل الحلوة و احتفظت بكل الاسرار الوحشه 
كتبت فيها وانا بعيط ووانا بضحك ووانا مش فاهمه بكتب ايه وانا فى بيت اهلى وحاليا وانا فى بيت جوزى 
وحبيت ابتدى حملة التدوين المره دى بفيلم مقروء يناسب بلوجر ^_^



6 التعليقات:

أحمد أحمد صالح said...

عدي ورايا التخيلات دي:
- تخيلي إني أنشأت المدونة زييك في 2007، لكن كان يوم 6 أكتوبر، يعني سبقاني بـحوالي 7 شهور!
- تخيلي إن عدد تدويناتي في 2012 كان 79 تدوينة برضو!!
- تخيلي إني برضو في 2008 ما كتبتش ولا تدوينة!. ولا 2009 ولا 2010 أما 2011 فكانت تدوينة واحدة، أما التدوين الجد فبدأ 2012 في حملة التدوين اليومي.
..
أما بخصوص إن الفيسبوك وقتي، فده أكيد وأنا هنا بأتذكر كلمة للأستاذ إبراهيم رزق كان قال فيها ما معناه إن الفيسبوك زي الجورنال إللي أخره يوم ويجي غيره، لكن المدونة زي الكتاب المجلد تجليد فاخر وكل حاجة فيه بتعيش.
..
طبعا يا رب بالتوفيق والتألق الدائم على كل مستويات، وربنا يسعدك في حياتك الشخصية ويجعل كل أيامك مع حبايبك سعادة وأفراح.
^_^

reemaas said...

عجبتنى الفكرة يا ايه جدا على فكرة
وزى ماحبيت فكرة مارك هحاول اعمل زيك

Aya Mohamed said...

احمد

بلوجر محظوظ بينا والله ^_^
حلو تشبيه خالو ابراهيم
ربنا يخليك يا احمد ولك بالمثل يارب :))

Aya Mohamed said...

ريماس

مبسوطه انها عجبتك
و هستنى تدوينتك :)

!!! عارفة ... مش عارف ليه said...

كان مفروض أدون أنا كمان في 2007 لكن على ما حسمت قرار وبدأت أدون فعلياً بقيت في الدفعة اللي بعدك 2008

التدوين أهم كتير من الفيس بوك وهو الذاكرة الحقيقية لكل من انضم لعالم للبلجرز

رصيدك بسم الله ماشاء الله هايل
وكمان لديك إنتاج وفير

ولولا التدوين ما نشرت كتابي الأول ولولاه أيضاً ما كان الثاني الذي سيصدر قريباً بإذن الله

وعلى المستوى الشخصي أعتبر إنتمائي للمدونين الحدث الأهم في العقد الأول لهذه الألفية

!!! عارفة ... مش عارف ليه said...

نسيت أقول إن لي صديق مدون وعينه حساسة جداً

ذكر لي مرة أن المدونين هم من زادوا من القيمة الأدبية والثقافية للفيس بوك

ولولا المدونين ما كان للفيس بوك هذا الشأن