السبت، 9 فبراير 2013

عن مذكرات كاتبة أحدثكم




النهاردة اجازة مفيش مذكرات 
وكلمة اجازة فى حد ذاتها مدعاة للبهجة 
حبيت اوضح بعض النقاط الاساسية فى المذكرات دى 
نظرا لان اكتر من حد بعتلى كلام غريب اوى وكمان التعليقات هنا محتاجة بعض التوضيح 
انا من مركز بيلا محافظة كفرالشيخ من المدينة نفسها 
ومن الناس الفرافير اللى مش بيستحملوا ريحة الفلاحين وده عيب فيا اعترف 
لكن عمرى ما اتعاملت معاهم وحش او مش رضيت ادخل بيوتهم زى ما بعض الناس بتعمل 
مش نزلت المذكرات علشان اقول انى مقهورة فى بلدى بالعكس 
انا حبيت اوضح الفرق بين الريف والحضر من خلال نبذة صغيرة عنه 
وابين قد ايه الريف مهما كان فيه عادات سيئة فهتلاقوا فيه مليون حاجة احسن من المدن 
او يمكن حبيت اوصل رسالة لناس معينة 
واقولهم ايوة انا البنت الريفية اللى فضلت متمسكة بمبادئها رغم كل القرف اللى انتوا عملتوه معاها 
وبقت اقوى و احسن منكم قدام نفسها وقدام كل اللى عرفوا مش يعيبها انها مش قاهرية بالعكس يشرفها جدا 
او يمكن حبيت اوصل رسالة لنفسى 
واقولها برافو قدرتى تتحدى كل اللى حاولوا يوقفوكى مكانك ويحطولك عقبات المكان 
قدرتى تحققى حلمك وانتى فى مكانك وتثبتيلهم ان حتى لو قافلين عليكى مليون باب تقدرى توصلى 
او يمكن اكون بدون عن بلدى علشان لو حياة القاهرة حاولت تغيرنى ارجع هنا وافكرنى 
مش مهم تكون عايش فين المهم تكون من جواك عايش صح 
وبالنسبة لكل اللى فاكرين انى مش عارفة اعمل حفلات توقيع علشان من بلد بعيدة 
وان ده حال شباب الاقاليم بالعكس انا عمرى ما حسيت ان بلدى بعيدة ولا ان حلمى مرتبط بمكانى 
المشكلة عندى قيود عائلية ملهاش اى علاقة بالمكان اللى عايشة فيه ولا العادات والتقاليد 
كمان فكرة انى شخصية خجولة ومش ليا صحاب كتير مش ليها علاقة بالبيئة اللى عايشة فيها 
فكرة الصداقات وعلاقات الزمالة مش اللى قصدته بان البنت كويسة ولا لا
 ومش فاهمة انتوا فسرتوها كدا ازاى 
انا كنت بتكلم عن الحب والعلاقات العاطفية والارتباط وده حاجة تانية خالص 
والخروجات اللى من غير هدف كل يوم خارجة وخلاص باى حجة ولو كانت صغيرة 
وخروجات الشلة المشتركة ولاد وبنات هو ده اللى قصدته 
انما انا بكلم زملاء عادى فى الشغل و التدوين والادب مفيش اى مشكلة لكن فى حدود انما الصداقة 
اللى قصدتها اللى البنت بتكون فيها مع الولد صاحبها كأنها بتكلم بنت صاحبتها مفيش فرق 
هو ده اللى انا مش مقتنعه بيه ورفضاه

لكل الناس اللى شايفين ان الريفيين مهمشين ياريت تفوقوا احنا فى عصر ثورة المعلومات 
ولكل اللى زعلتهم المذكرات علشان حسستهم ان الريف اقل من المدينة انا مش آسفة خالص
انتوا اللى مش فهمتونى والمشكلة جواكم انتوا مش فى اى حد تانى ولا اى حاجة تانية 
ولكل الناس اللى منتظرين المذكرات بكرة ان اء الله هنكمل

14 التعليقات:

تاكاشى يقول...

هو انا معرفش ايه موضوع المذكرات دا
لكن حابب أحييكي على موقفك

اعتزازنا بوطنا اللى هو البيت اللى اتربينا فيه وما جاوره هو اكبر دليل على الأصاله :)

أسماء فتحي يقول...


هههههههههههههههه

جامدة جدااااااا حتة انك مش اسفه خالص دي

أعتقد ان اللي فسر مذاكراتك بانها ذم للريف قليلين جدااا

ويمكن اتفهم كلامك عن الصداقات المرفوضه انك بترفضي الصداقة بين الجنسين بشكل عام دون تحديد لنوعيتها او مجالها لانك فعلا مش حددتي وسيبتى الموضوع عايم

عموما نعتذر عن عدم الفهم الصحيح لمذكراتك

وفي انتظار البقية

تحيـــــــــــــاتي


Asmaa Fathy

Somaia يقول...

أيوه حقيقة بيعاني منها ناس كتير

ابراهيم رزق يقول...

ههههههههههههههه

انتى قلباها دراما ليه كده يا بنت العمده
اه الجينات اشتغلت
سيبى كل واحد يعبر عن رايه
و اللى خد انطباع غلط صحيحه

على فكرة
انا مصمم نعملك حفلة توقيع حتى لو بعد الزواج
هتقوللنا بنت عمده مش بنت عمده مش علينا ياماما
فى حاجه بعيد عن البوست
فى الغالب محدش عاجبه حالى
القاهرى نفسه يبقى فى الريف
والعكس صحيح
كل بيئة بتملى حاجات جوانا
وبتسيب حاجات فاضيه
و الانسان بطبعه لازم بيدور على الجزء الفاضى

تحياتى

الكاتبة والإعلامية فاطمة العبيدي يقول...

أنا معاكي قلبا وقالبا في كلمة كلمة قولتيها يا آية
ولو اني شايفة انك وضعتي نفسك في محل الاتهام ووقفتي تدافعي عن نفسك
وانا شايفة انك معملتيش حاجة
تستحق انك تحطي نفسك في المكان ده
عبري عن نفسك وسيبي الآخر يعبر عن نفسه
وفي الآخر لا يصح إلا الصحيح
انتي انسانة محترمة جدا
واللي مش عاجبه
خلي يشد ف حواجبه هههههههههه

reemaas يقول...

بالعكس انا شايفة ان الريفى متصالح مع نفسه اكتر وبيتمتع بالتحضر والاصاله اكتر من ابن المدينة كمان

نيللي علي يقول...

هو أنا لسه مقرتش موضوع المدكرات, بس عجبني جداً إنك أثرتي الموضوع ده وكمان سعيدة أنك فخورة بهويتك وإنتماؤك لموطنك:)

aya mohamed يقول...

تاكاشى

المذكرات دى حكايتها حكاية اصلا
هى موجودة فى المدونة من اول 1 لحد 5
نورتنى :)

aya mohamed يقول...

اسماء

مهو انتوا المفروض تفهمونى صح
من غير ما اوضح اصلا
هو انا هحكى واوضح كمان ههههههه
سعيدة بمتابعتك جدا

aya mohamed يقول...

Somaia Husain

نورتينى يا جميلة :)

aya mohamed يقول...

ابراهيم رزق

طبعا ان شاء الله
هعملكم كل اسبوع حفلة توقيع
هو انا جاية القاهرة غير علشان ازهقكم اساسا
هههههههههه

aya mohamed يقول...

الكاتبة فاطمة العبيدي

انا بس حبيت اوضح مش اكتر
يمكن كان المفروض انى امهد للمذكرات دى
بس هى جت كدا
وميرسى جدا لمتابعتك :)

aya mohamed يقول...

ريماس

وده اللى حبيت اوضحه فعلا :)

aya mohamed يقول...

نيللى

سيبك انتى من كل ده
وحشتينى <3