Thursday, February 14, 2013

رسائل حب





كل يوم فى حياتى حب بيكم بوجودكم دايما معايا 
بوجودى دايما وسطيكم واحساس الحب والاهتمام فى حروفكم 

(1) 
رغم اى حاجة فرحت اوى لما قولتلى ايوة انا حاسس ان فى حاجة غلط 
فرحت علشان اخيرا اقتنعت باحساسى و صدقتنى 
فرحت بس علشان كل ما احساسنا ببعض بيقوى بحس برضا ربنا عننا 
فى مسافات كتير اوى بنختصرها بإحساسنا 
وبقيت حاسة ان المسافة بنا تلاشت 
هو انت ازاى كدا اصلا 

(2) 
لما بتكلم معاكى مش بكون عايزة اقفل ابدا 
بحس انى نفسى احكيلك حاجات كتير اوى 
اوقات بحس انك امى بحس انى هتجوز علشان اجيلك 
كلامى معاكى النهاردة فرحنى انا عارفة انك مش هتفهمينى غلط 
بحسك شايفه اللى ورا كلامى حسانى زى ما انا حتى من غير ما اقول 
انا بحبك اوى 

(3)
صدمتينى خلتينى اقف وافكر تانى 
رجعتينى لنقطة مش كان نفسى ارجعلها ابدا 
ثقتى فى اللى حوليا رجعت تتهز رجعت افكر فى القلوب اللى بتعرف تغير وشها 
مبحبش حد يستهون بذكائى فى حاجات بتبان من رعشة الصوت 
وفى حاجات بتبان من غير كلام 
لو بتحبينى بجد هتعرفى انى مش عندى مشكلة مع حد 
ومتصالحة اوى مع نفسى ومع كل اللى جرحنى قبل كدا 
وبحبكم بردو 
" الرسالة مش لواحدة الرسالة دى لـ 3 "

(4)
انا كنت زعلانة منك علشان فكرت انك اتغيرت فى معاملتك معايا 
احساس انك صديق وزميل بعتز بيه جدا و بثق فى رايه اوى 
و تغيير مفاجئ وكمان مش بقيت بتعلق عندى رغم انك كنت اكتر حد بيتابعنى 
كنت فاكرة ان فى سبب وبعدين لقيت مفيش اى سبب وكلمتنى عادى ففرحت بقى 
ربنا يسعدك ويوفقك علشان انت تستاهل كل خير 

(5)
من اكتر الشخصيات اللى نفسى اقابلها 
وكمان نفسى اعرف شايفنى ازاى من يوم ما قولت انك شايفنى مختلفة 
وبتابعنى علشان تشوفنى صح اكتر وانا نفسى اعرف بقى شايفنى دلوقتى ازاى 
وبفرح اوى لما حد بيقولى انك اتكلمت معاه عنى 
وكنت فى منتهى البراءة كدا وانا بقول لمحمد ولماما بحس انه بيحبنى هههههههه 
بحس انك خالوا بجد نظرا لانى مش عندى خال وكدا 
يارب كل لحظاتك حب وسعادة و كل حاجة حلوة 

(6)
انتوا عيلتى طبعا انتوا عارفين الكلام ده 
مش بقيت بحس انى هكون غريبة فى القاهرة الكبيرة دى 
حاسة ان بقى ليا اهلى كتير اوى فى كل المناطق مش بقى عندى الخوف اللى كان فى الاول 
عايزة اجى بقى علشان اشوفكم كتير واكون جنبكم 
ربنا يخليكم ليا وميحرمنيش من وجودكم فى حياتى ياااارب 

(7)
فى بنوتات حلوين كدا بحبهم اوى اوى يعنى 
بحس انهم بيطبطبوا على روحى كدا طول الوقت 
الحب اللى هو غريب كدا بحس انى بحبهم اوى بردو من غير سبب 
حتى لو مش بكلمهم على طول بس بحس فى تعليقاتهم و دعواتهم 
ربنا يسعد قلوبكم ياااارب 

(8)
الاصدقاء الصامتون اللى بكتشف بالصدفة انهم بيتابعوا المدونة 
بتفرحنى الصدفة جدا وبفرح بردود افعالكم اوى
يارب دايما كلامى بيعجبكم كدا 

ملحوظة 
اللى هيعرف رسالته يبلغنى برقمها ولو الاجابة صح هتكون ليه هدية بمناسبة الفلانتين 
واللى مش هيعرف يقولى وانا اقوله وامرى لله 
واى اسئلة او استفسارات يرجى الاتصال عبر اى حاجة تحبوها 
وكل يوم وانتوا فـ حب

3 التعليقات:

Lobna Ahmed said...

وأنا كمان يا آية <3

ربنا يخليكي ويحميكي

ابراهيم رزق said...

بسم الله الرحمن الرحيم

الاجابه تونس
ههههههههههه

(5)

شيرين سامي said...

أنا عرفت رسالة أستاذ إبراهيم :)

أنا يمكن مبعلقش كتير و كده
بس ده مع الجميع لظروف نفسية وقتيه بحته :)

بس أتمنى أكون من نمره 7

ربنا يكرمك يا أيويه و تملي مدونتك رسايل حُب :)