Wednesday, February 6, 2013

مذكرات كاتبة ريفية 1



احساسك بالانتماء بيقوى لما تبدا تبعد 
كنت دايما بستغرب لما اسمع حد مصرى عايش فى دول تانية 
بيتكلم عن انتمائه لمصر وحبه ليها اللى محسش بيه غير وهو بعيد عنها 
انا كمان حسيت اوى بانتمائى لمدينتى اللى عمرى ما حبتها الايام دى 
بقيت بقول وبمنتهى الفخر انى كفراوية مع انى كنت مخنوقه من اى حاجة فيها كاف بسببها اساسا 
كل ده بسبب احساس انى خلاص بقى كل اللى يربطنى بيها كام شهر وهبقى قاهرية ان شاء الله 
هو انا يعتبر مش ريفيه اوى علشان من مدينة مش قرية وبلدنا شبه المدن جدا 
نظرا للعمارات الفارهة والفيلات اللى بقت اكتر من الناس اللى عايشين اصلا 
ومظاهر الترف على شباب القهاوى فى بلدنا اللى بيلبسوا سنييه و كل واحد قاعد بالاب توب بتاعه 
وصف العربيات اللى قدام القهوة وكلها احدث موديلات 
ولو سمحتم محدش يقولى الثورة علشان احنا مش بنسمع عنها غير فى التليفزيون بس 
ولا حد يقولى بطالة وازمة اسكان الكلام ده مش موجود عندنا اصلا 
وده لان الحيازات الزراعية و جوازات السفر لجميع الدول العربية خلت بلدنا فى نعيم 
علشان كدا شباب بلدنا ملهمش فى السياسة ولا ليهم علاقة بسلفيين و اخوان 
مع استثناء قلة من السلفيين الرافضين لمظاهر الترف الفاحشة 
وطبعا الشباب اللى عندنا دول مش هيكونوا مختلفين عن البنات يعنى 
وطبقا لتصنيف الشباب ففى بنات عندها ظروف وبنات محترمة 
والظروف تبعا لقول احد الشباب ان البنت تكون مرتبطه مثلا مقضياها خروجات مثلا 
متحررة فى الكلام واللبس مثلا مع التشديد على مثلا دى فتحس ان مثلا لوحدها جريمة 
اما البنت المحترمة دى فهى البنت اللى مش بتخرج من البيت فمفيش حد يعرفها فتبقى بكدا محترمة بقى 
وطبعا التصنيف ده ظالم جدا للبنات لان واحدة زيى كدا اتخنقت من قعده البيت
ومفيش مكان تخرج فيه ومفيش صحاب تخرج معاهم اساسا 
وكلمة عيب اللى الناس بتقولها اكتر ما بتقول بسم الله الرحمن الرحيم هى الدستور اللى بيربوا عليه البنات 
ايوة انا كنت شايفة كدا وكنت مخنوقه جدا من التزمت فى كل حاجة 
بس اكتشفت ان التربية دى احسن كتير مليون مرة من التحرر والانفتاح
وان كلمة ريفية صفة جميلة جدا لما تكون مرادفه للإلتزام
عايزين تعرفوا ليه هقولكم بكرة بقى ان شاء الله :)

18 التعليقات:

ابراهيم رزق said...

هههههههههههههههه

فكرتينى بفيلم ليلى بنت الريف
هاسميكى ايه بنت الريف

تعرفى ان رؤى كانت بتتكلم عن الموضوع ده و كانت بتقول نفس الكلام

واضح ان الموضوع ده مأثر شوية
لكن فى النهاية الانسان ابن مجتمعه
وفى النهاية لا يعيب الانسان مجتمعه
لان زى شاهين ما قال
يهمنى الانسان
و لو مالوش عنوان

تحياتى

Aya Mohamed said...

ههههههههه
ايوة احنا معقدين الى حد ما
ان شاء الله هبقى اعرضلكم شوية من ثقافتنا
الغريبة جدا ههههههه
اللى اختفت الى حد ما بفعل الانفتاح بردو
نورتنى بافتتاح التعليقات :)

ظلالي البيضاء said...

أخذت أبحث في دفتر زياراتي فوجدت أن فيه افتقاد لأخت كريمةٍ لم أزرها منذ زمن ..
متابع لمذكراتك إن شاء الله ..
مع التحية الطيبة ..

Aya Mohamed said...

والله فرحت جدا لما لقيت حضرتك دلوقتى
عودا حميدا :)

ظلالي البيضاء said...
This comment has been removed by the author.
محمد البرقي said...

يبدو يا اية ان الحاجة بتخلق بعض المشاعر جوانا...الانتماء بيتخلق من الحاجة لارض اساسية ترجع لها بعد دوران كتير

سعيد بزيارتي للتدوينة

إبـراهيم ... معـايــا said...

حديثك ذو شجون يا آيـة ..
الغربة والانتماء من الحاجات اللي الواحد عاوز يكتب فيها دراسات
.
في انتظار البقية :)

EL pRiNcEssA said...

صح انا فاهماكي انا صعيدية برضه ومؤمنة بكده

ليلى الصباحى.. lolocat said...

مش عارفة يا اية انا لى رأى مخالف لناس كتير

موضوع قاهرية وريفية مش بحبه انا مولودة بالقاهرة ومن اصل مش مصرى ولى اقارب كتير فى الشرقية الزقازيق وما حولها يعنى مش هتلاقى ابدا انسان خالص كده من مكان واحد

تعرفى ان احب الاوقات بأقضيها فى الريف :)

والله يا ايه الريف اجمل اماكن على الارض فى كل البلاد كفاية هواؤه النقى والقلوب الطيبة اللى ماتعرف نفاق ولا رياء

سلمت اناملك حبيبتى وفى انتظار يوميات الحكيم :) قصدى اية الجميلة

تحياتى بحجم السماء


asmaa fathy said...

مين قال ان عكس الإلتزام الإنفتاح

مش معنى ان البنت بتخرج مع اصحابها او انها عايشه حياتها وسنها في حدود اخلاقها وتربيتها تبقى مش كويسه او العكس

يعنى اكيد شوفتى وانا كما شوفت في الريف بنات مش كويسين رغم الكمية اللي بيتقال بيها كلمة عيب ورغم انها مسلوب منها كتير من حريتها او مرسوم لها حدود ضيقة جدا لتحركتها

عموما منقدرش نقصر الالتزام علي الريف او الانفتاح علي المدينة كل مكان فيه الكويس واللي مش كويس بس العبرة بالغالبية معاكي ان نسبة كبيره من الريفيين كويسين علي عكس المدينة بس زي ما قولت شفت الكويس بنات وشباب وشفت الوحش بنات وشباب هناك

تحياتي

وفي انتظار باقى مذكراتك

nesma hatem said...

زقازيقية وافتخر
:)بحبها جدا بجد
بتحتوينى بحس القاهرة واسعة عليا اوى
الأحترام اصلا فى العموم بمفهومه الصحيح يعنى و مع انى مش عايزة اعترف بده بس
بصراحة بقه عملة نادرة اوى
ريفية او غير بقه مش فارقة
مستنية الباقى

Aya Mohamed said...

محمد البرقي

مش لازم نرجعلها المهم انها تفضل جوانا
تفضل سايبه اثر فى تصرفاتنا
نورتنى جدااا :)

Aya Mohamed said...

إبراهيم

اسعدتنى :)

Aya Mohamed said...

EL pRiNcEssA

مبسوطة ان حد مشاركنى
لو عندك اى حاجات تحبى تضيفيها
ابقى ابعتيلى وانا هنشرها معايا
نوتينى يا اجمل صعيدية :)

Aya Mohamed said...

ليلى الصباحى

الفكرة اللى عايزة اوصلها
مش اننا قليلين وبنحاول نبرر
بالعكس انا عاية اوضح الاختلافات
اللى ناس كتير اوى بتكون مش واخده بالها منها

Aya Mohamed said...

asmaa fathy

كل مكان فيه الكويس والوحش
اصلا مبقاش فى ريف زى زمان
بقى فى افتاح يمكن اكتر من المدن
بس لسه فى قيود حتى لو نفسيه

Aya Mohamed said...

nesma hatem

بحس ان الريفيين بيبان عليهم
لما بيكونوا فى مكان واسع
بيحسوا انهم هيتوهوا
نورتينى يا شرقاوية :)

شمس النهار said...

الريف ماعدش زي الاول
والقري بقت متمدينه
وده الطور الطبيعي للأنفتاح علي العالم بالتلفزيون وبعده الدش والان الانترنت
ودول بيغيروا اللي مابيتغيرش
بس انا بحب الريف بتاع زمان :))
اللي المفروض بقا مايتغيرش هي البنوته والاخلاق مش معني التحرر ان البنت كل شهر ليها شاب بتخرج معاه
والصح فعلا الاخلاق زي ماقلتي
البنت ممكن تخرج وتروح وتيجي وتفرض احترمها علي الجميع :))
عجبتني المذكرات هقراها كلها :)