Thursday, February 14, 2013

مذكرات كاتبة ريفية 6




كل عين تعشق حليوة وانتى حلوة فى كل عين 
يا حبيبتى انا قلبى عاشق واسمحيلى بكلمتين 

" اختصار الحب فيكى لون وحيد مرة دم ومرة تين
واحنا جينا نغنى ليكى وكلنا متفلتنين " 

الفلانتين فى الارياف زى كل مكان فى مصر شوارع مليها الاحمر 
سواء فى المحلات او البنات اللى ماشيين كله احمر 
اما بالنسبة للهدايا والكابلز وكدا فده بينحصر فى المخطوبين وطبعا المتزوجون يمتنعون 
والمخطوبين اللى زى حالاتى بيمتنعون بردو 
الحاجة الاجمل بقى ان وانت رايح الشغل تلاقى كل الناس بتقولك " صباح الحب ... كل سنة وانت طيب 
عملت ايه امبارح واللى بتصحبها ضحكات متتالية من الجميع وده لان ولا اى حد عمل اى حاجة طبعا 
احساس جميل لما تكون ماشى فى الشارع وكل حاجة تدعو للبهجة وكمان تروح الشغل تلاقى بهجة 
وقتها تقول لنفسك طيب هما ليه مش يخلوا الفلانتين طول السنة بس من غير هدايا 
كلام فاضى طبعا ال فلانتين ال وعلى رأى الخال ... بلد فلانتين صحيح 
لو ركزنا شوية هنلاقى ان بلدنا متميزة فى الحب عن اى بلد تانية 
ركز فى وشوش الفلاحين هتلاقى ابنسامة ورضا بشكل غريب 
هتلاقى طبيعية ساحرة وسما صافية و عصافير بتغنى من حواليك 
هو ده الجو الصحى للحب والطاقة الايجابية اللى تخليك عايز توزع الحب على كل سكان الارض 
فى الارياف مش هتلاقى تحرش علشان كدا هتلاقى الزحمة أمان 
ارمى نفسك جوه عيونهم و شوف كمية الحب والإيثار ولو حسوا انك غريب هيحبوك اكتر 
المصريين عموما الحب عندهم ملوش عنوان الحب فى قلوبهم بالفطرة 
بس فى حد بيحاول يغيرنا لكن طبعا مش هيقدر فترة وتعدى 
وكل نهار وانتوا أكثر سعادة وحب يااااارب 


8 التعليقات:

ليلى الصباحى.. lolocat said...

ركز فى وشوش الفلاحين هتلاقى ابنسامة ورضا بشكل غريب هتلاقى طبيعية ساحرة وسما صافية و عصافير بتغنى من حواليك هو ده الجو الصحى للحب والطاقة الايجابية اللى تخليك عايز توزع الحب على كل سكان الارض


من اجمل الكلمات اللى كتبتيها يا اية

البوست النهارة كله حب وجمال :)
احسنت حبيبتى وسلم حرفك الراقى

تحياتى بحجم السماء

ومتاااااابعة باستمرار

ابراهيم رزق said...

مش قادر اعلق من بساطة و جمال البوست

لكن انتى مسيتى شىء اساسى الغريب

مش ممكن لو عرفوا انك غريب و تايه و بتسأل على عنوان يسبوك ابدا

تحياتى

reemaas said...

المقطع الاخير من البوست خلانى ارجع احس اننا لسا زى ماحنا انا كنت نسيت الحب اللى من النوع ده من كتر اللى بيعدى على البلد ومش قصدى سياسة ان ماهو حال كنت فكراه بقى طبيعة بس كلامك حسسنى انه حالة عارضه وهتعدى

كل وقت وانتى ديما فى حب

Nelly Aly said...

دايماً بحس أن في الريف سحر خاص وطيبة خاصة بأهلها وفرحة مميزة.. أنتي اعزميني عندك بقي:)

Aya Mohamed said...

ليلى الصباحى

سعيدة جدا بمتابعتك
ومبسوطة ان الكلام عجبك
دمت بالف خير و سعادة يارب

Aya Mohamed said...

ابراهيم رزق

فعلا المصريين بيكرموا الغريب جدا
علشان كدا مفيش حد بيحس انه غريب فى مصر
احنا شعب طيب اصلا

Aya Mohamed said...

reemaas

هتعدى ان شاء الله :)

Aya Mohamed said...

نيللى

بس كدا ده انتى تنورينا
وبجد لو تقدرى تيجى تزورينا هكون سعيدة جدااااا