الجمعة، 22 فبراير 2013

مذكرات كاتبة ريفية 7




قالوا مركزية الهيئات الحكومية قولنا ماشى 
قالوا مركزية الاعلام قولنا طبيعى 
لكن كمان مركزية الثقافة كدا كتير اوى بقى 
عقبات كتير اوى بتقابل سكان الارياف وهى المركزية فى اى حاجة وكل حاجة 
بصراحة مش عارفة الحل فى الحكاية دى ايه 
الوظائف عندنا تنحصر فى وزارة التربية والتعليم واول ما يقولوا فى تعينات 
كله يجرى على الادارة التعليمية جميع التخصصات واى مؤهل كله بيشتغل عادى المهم الوسطة 
اللى هتوصل ورقك من اول واحد  بيستلمه قبل ما يرميه فى الزبالة
 لحد اخر واحد فى الادارة التعليمية بالمحافظة 
وطبعا قبل اى حاجة توفيق ربنا لان بعد كل ده ممكن يخلوك تشتغل شوية ويوقفوك عن العمل 
علشان اكتشفوا فجاة ان ميزانية المحافظة لا تسمح 
 بتشتغل مدرس مجبر لان مفيش حاجة تانية تشتغلها هنا وطبعا النسبة الاكبر مش بتعرف تشتغلها كمان 
وطبعا مركزية الاعلام بتتلخص ان سكان القاهرة هما اكتر ناس بيطلعوا فى وسائل الاعلام 
نظرا لسهولة الانتقال طبعا حتى لو مستواهم بالنسبة لعلماء وفقهاء وكتاب الاقاليم لا يذكر 
ولو هنتكلم عن الثقافة بقى هتلاقى مليون سبب يخليك تكره الادب والكتابة والكتب 
المحافظة بيكون فيها 3 او 4 مكتبات بالكتير اوى وفى محافظات مش فيها غير مكتبة واحدة
 ومحافظات تانية متعرفش حاجة عن المكتبات غير انها بتبيع مستلزمات مدرسية ما بالكم بقى بالمراكز 
طبعا فى قصور ثقافة بس مهجورة اه هى فيها موظفين و مسابقات و شباب بيشتركوا
بس هى شكلها كدا مهجور واصلا ملهاش اى تاثير على المكان اللى حوليها 
بس مش هنكر انى كنت بروح قصر الثقافة وانا صغيرة 
واقرا كتب اللى هى اصلا مش كان موجود غير شوية كتب مقطعة وكام كتاب سليم لحسن حظى انهم كانوا 
" رباعيات جاهين - ديوان لـ محمود سامى البارودى ( من اروع ما قرات ) - مجلات ميكى ماوس "
اما بقى علشان تعمل كتاب ويكون عندك طموح فدار النشر هتجيبلك احباط بانها مش هتعملك دعايا 
وعن استلام نسخك فجهودهم مشكورة فى انهم يطلعوا عينك وروحك واى حاجة ممكن يطلعوها عادى
ولو هتكلمنى عن الارباح والتفاصيل او انك تعرف اى معلومة فاحسن انك تنسى خااااااالص
بس احنا ولا بيفرق معانا كل ده برغم اى احباطات فدايما فى نقطة رجوع اقوى 
صباحكم تحدى بقى :)

11 التعليقات:

ابراهيم رزق يقول...

مفيش شك ان الاقاليم مظلومة
لكن اعتقد ان قصور الثقافة فى الاقاليم انشط من القاهرة
لانها تكاد تكون المتنفس الوحيد للمبدعين واصحاب المواهب

لكن هناك فرص لبروز الموهوبين و هى الصحافة الاقليمية

اكثر شىء ممكن يوجع ان يكون جواكى شىء
و لا تستطيعين التمكن من خروجه

حينها فقط
شىء سيبقى داخلنا لا بيننا

تحياتى

ظلالي البيضاء يقول...

إداراتنا وقياداتنا وحكوماتنا تحتاج إلى إدارة وقيادة وحكومة ..
فرغم كل ما يجري في بلدي إلا أن الأيام أثبتت أن القيادة التي تحكم سوريا قيادة واعية ومنظمة وقوية ..
مع التحفظ طبعاً على فسادها وإجرامها ..
ليت قياداتنا تتعلم من الآخرين لتنطلق من النهاية التي انتهوا إليها بدل الانطلاق من الصفر ..
الأمر كله يحتاج لنظرة سوية وقيادة حكيمة وإدارة صالحة ..
كل التحية لك أختي آية ..
كم نحن بحاجة لإظهار هذه الجوانب للرأي العام وجمع الطاقات للوصول إلى حلول مفيدة للمجتمع والدولة ..
أمنياتي لك بالتوفيق .. متابع إن شاء الله رغم كل الظروف

reemaas يقول...

جيتى على الجرح والله لا ورد الاستاذ ابراهيم زودها قصورة ثقافة ؟
اعيط ولا اعمل ايه انا دلوقتى ده انا متشحتفة يبقى عندنا فرع من معرض الكتاب فى المنصورة حتى ولا الهوا ولا ساقية زى بتاعة الصاوى دى مثلا حاجة تفقع والله

أسماء فتحي يقول...

معاكى حق هى فعلا مظلومة وناقصها حجات كتير
تعتبر ابسط حقوقها
بس في حاجة استاذ ابراهيم بيتكلم عن الصحافة الاقليمية
هو في حد بيقراها ؟؟؟؟
انا اشتغلت في جريدة اقليمية ونشرت حجات ليه فيه
بس كنت شبه متأكده ان الجرايد دي مش بيقرئها غير اهالي الناس اللي بيكتبوا فيها ههههههههههه اللي هم اهلي واهالي اصحابي

عموما بوستاتك جميلة كالعادة

تحيـــــــــــــاتي
كانت هنا ورحلت
Amaa Fathy

الازهرى يقول...

المركزية أم اللامركزية
تلك هى المشكلة

سيبك إنتى
التفكير هو المشكلة الحقيقية اللى بتقابلنا

لما نتعلم نفكر ونخطط صح
كل المشاكل دى هتتحل

صباحك ثكر

أسماء فتحي يقول...

ادعوكِ لزيارة مدونتي المتواضعة
وذكر رأيك في ( في دار المسنين )
آخر كتاباتي حالة عشتها للأسف
وتأثرت بها ولم أستطع نسيانها فقررت أن أكتبها
علي هذا الرابط
http://asmaafathy.blogspot.com/


تحيــــــــــاتي
كانت هنا ورحلت
Asmaa Fathy

aya mohamed يقول...

ابراهيم رزق

مش عارفة ليه حسيت فى الكومنت ده حاجة غريبة
وكلام كتير اوى بين السطور

aya mohamed يقول...

ظلالى البيضاء

ربنا ينصركم يارب ويهون عليكم
و سعيدة جدا بمتابعة حضرتك

aya mohamed يقول...

ريماس

رغم ان المنصورة مركز ثقافى كمان
نسبة المكتبات والاهتمام بالقراءة كبيرة
الا ان فى امية فى التعامل مع المثقفين اصلا

aya mohamed يقول...

اسماء

انا كمان اشتغلت فى جريدة كفرالشيخ سنة
ومحتفظة بالاعداد اللى اتنشرلى فيها
بس انا اللى كنت بصرف علي شغلى ده
وفى الاخر كمان محدش يقرا ومفيش مقابل
حاجة كدا تخليكى تحلفى ما تشترى جريدة ابدا ههههههههه

aya mohamed يقول...

الازهرى

صباحك بيضحك يارب
متفقة معاك جدا
بس اهم حاجة انك نورتنى والله :)