الاثنين، 11 فبراير 2013

مذكرات كاتبة ريفية 4






اسعد الله اوقاتكم و دام عليكم نعمة الابتسام 
فى حاجات كدا اول ما تسمعها تفضل تضحك  و تستغرب 
واحنا اصلا شعب كل حاجة فى حياته غريبة 
لكن من الحاجات اللى محيرانى انا شخصيا وبدأت افكر فيها فى الفترة الاخيرة 
ان لو نمت بالشراب عينى هتوجعنى 
وان اللى ياخد شاور بعد الاكل هيتعب
وان مينفعش أكل فلفل بليل ولا بصل 
بس مش مهم البصل علشان مش بحبه اصلا بس الفلفل ليه ده طيب والله 
واحب  بهذه المناسبة السعيدة اللى هى الفلفل يعنى اقولكم اننا معندناش فلفل الوان 
علشان الفلفل الالوان ده عملى عقدة من كل برامج الاكل اللى بتيجى فى التليفزيون 
ماله الفلفل الاخضر والشطه الحمرا حلوين وزى الفل 
وطبعا خطيبى عمال يقولى قوليلهم على الخرشوف قوليلهم على الخرشوف 
ايه المشكلة اننا مش عندنا خرشوف عايشين اهو الحمد لله وعندنا انواع اكل مش عندكم أصلا ترلالا 
نتكلم جد شوية  بقى 
من الحاجات المستفزة جدا ان الولد مش بيعمل اى حاجة اطلاقا فى البيت
معتمد فى الاول على ماما وبعدين اخواته البنات وبعدين مراته طبعا 
عيب اوى تكونى موجودة واخوكى عايز يأكل ومش تقومى جرى تعمليله الاكل وتوديه مكان ما هيقعد 
ولو عايز يشرب ممكن ينادى عليكى وهو قدام التليفزيون وانتى مشغوله فى ابعد مكان فى البيت
علشان تجيبيله يشرب واساسى ان الولد ضعف البنت حتى فى الاكل
" مش نظام ان الست تاكل بعد الراجل علشان الناس اللى بتفسر غلط كله بياكل سوا هو بس بيريح بزيادة "
لكن احب اقولكم فى نفس ذات الوقت احنا بنطلع عينه فى مصارف الجواز بقى بيجيب الشقة ويفرشها كمان 
وهو ده السبب فى انه بعد الجواز يفضل يقوم امال انا جبت كل ده ليه مش علشان ارتاح 
اما بقى عن الخروج بالولد زى البنت زى مقولنا قبل كدا لازم تقرير مفصل رايح فين لما يرجع عمل ايه 
وفى نفس ذات الوقت الجملة المعتادة هو حر يخرج براحته المهم ميتاخرش اوى يعنى 
تبقى مش فاهم طيب لما هو حر امال التقرير ده الداخلية هى اللى طلباه مثلا 
وفى هذا الاطار لازم نشكر الداخلية ورجالها طبعا اللى فى خدمة اى حد غيرنا 
ما عدا فى الارياف بقى احب اقولكم انهم مظبطنا نفسى اشوف ظابط فى بلدنا غلطة كدا ولا حاجة 
هو مش بيخرج من مكتبه اطلاقا لان طبعا الامن عندنا مستتب ولله الحمد 
انا اوقات كتير بحس انى مش فى مصر بس المصرية للاتصالات قربت كل المحافظات وبقيت تتصل 
على اى محافظة فى اى وقت بسعر الدقيقة العادية اللى هى مش عادية اوى بردو 
التناقض فى الريف هو نفسه التناقض فى مصر مفيش فرق وان كانت الفروق كتيرة اوى بردو 
انا بقول كفايا كدا علشان انا مش عارفة انا بقول ايه 
واعذرونى علشان تعبانة جدا بس اصريت انزل التدوينة علشان لو التعب زاد تلاقوا حاجة تقروها 
وان كنتوا مش هتهونا عليا وهرجع ارخم عليكم تانى 
واحتمال تكون دى الحلقة الاخيرة كمان بقى علشان شكلكم زهقتوا منى  :))))))))

17 التعليقات:

Alone Spirit يقول...

هجيبلك خرشوف هديه الفلانتين

aya mohamed يقول...

ان شاء الله هرد على تعليقات التدوينة اللى فاتت بكرة
علشان تعبانة جداااا
مع انى عارفة انكم مش بتقروها اصلا
بس انا بحب ارد ^_^

aya mohamed يقول...

وتتعب نفسك وتجيبه كل المسافة دى
نتجوز بس وانا هعملك كل يوم خرشوف
ان شاء الله :D

ابراهيم رزق يقول...

هههههههههههه

هى جت على الخرشوف و الفلفل الالوان

انا كده كده مش بحب الخرشوف و الفلفل كله طعم واحد بس هما بيستخدموه فى Presentation

اما بقى انتى عايزانى ابقى قاعد قدام التلفزيون و التلاجة بينها و بينى خطوتين و اقوم اجيب ميه امال الستات و البنات اتخلقوا ليه
ناقص كمان تقولى رد على التليفون او لما الباب يخبط اقوم افتح الباب
و مش بعيد تسوقوا فيها و تقولوا لما اكل اغسل ايدى بنفسى
لا بقى انتوا زودتوها خالص

مستمتع بمذاكراتك جدا
تحياتى

على جنب كده
اهو جت على دماغك و هتجيلك هدية الفالنتين خرشوف
بس انتى لازم تشترطى يبقى خرشوف احمر و على شكل دبدوب و مزروع فى الصين
بلد فالنتين صحيح
اهو جت على دماغك

أسماء فتحي يقول...

اولا الف سلامة عليكي ياقمر

تاني حاجة اولا الفلفل الالوان في الاكل منظر بس مش اكتر بيبقى شكله حلو

ميزة المدينةان اي حاجة تحتاجيها في اي وقت بتلاقيها

يعني لو نزلتى الفجر تشتري خضار هتلاقي
حتةانهم الرجاله مش بيعملوا حاجة جوا البيت فهم فعلا اتكاليين بطريقة تحرق الدم في اي مكان مش بس في الريف

هو شايف ان البيت للراحة ياكل ويشرب وهو مكانه ويقوم ينااااااااااااام راحه بقولك

وفعلا الغالب في الارياف قبلي وبحري ان الراجل هو اللي بيجيب الشقة وبيفرشها
علشان كده كنت مستغربة اووووي ان البنت بتجيب اوض في المدينة او في القاهره بالتحديد هو هياخد عروسه وفرش

مع ان واللهالاجهزة الكهربائية وحجات النيش والمطبخ والدولاب والستاير والسجاد بقيت بتعدي

يالله عديت والحمد لله هههههههههه

بس انتى اتجوزي علي تقاليدكم متجيبيش فرش ههههههههههههه

تحيـــــــــاتي ياقمر وفي انتظار المزيد


Asmaa Fathy

reemaas يقول...

:) احنا اكتر تطورا عندنا فلفل الوان
بالنوسبة للخرشوف ده فمش عارفة اى هو بالظببط ماعلينا

الولاد دول اصلا مستفذين جداااااا والاهل اكتر منهم بصراحة

نداء الاسلام يقول...

والله يا بنتي عندك حق في كل كلمة قولتيها .. وانا برده بكره الفلفل الالوان ماله الاخضر دا حتى لونه يدي علي انتعاش كدا

nesma hatem يقول...

هههههههه
طيب انا مش لاقية غزل بنات ينفع ينضم للقائمة وليكى حتة لو لقيته متخافيش :)
والله انا مستفزنى موضوع الاخ ده برضه بس انا حتى لو هو عادى هقوم اعمله كل حاجة برضه
ألف سلامة وانا اصلا عمرى ما ازهق من اى حاجة بتقوليها

ليلى الصباحى.. lolocat يقول...

مليون سلامة عليك حبيبة قلبى
لابأس طهور ان شاء الله

شوفى... كله كوم وموضوع الولد فى الارياف كوم تانى ده بالنسبة انه مش بيعمل حاجة فى البيت ولا بيساعد فى شغل البيت
انا لمست ده بنفسى لانى اسافر للريف فى الاجازات ومش الريف اللى هو القرى كمان دى الزقازيق يعنى المفروض يكون فيه ثقافة ووعى اكتر من القرية

انا بزعل اوى من الموضوع ده لانى بحس ان البنت بتتظلم كتير ولو اصبحت زوجة شوفت بنفسى انها بتكون مرهقة جدا جدا وفى النهاية كل حاجة عليها :)

تعرفى ان حكاياتك دى ويومياتك رائعة انت بتلمسى ايجابيات وسلبيات كتير وبتعقدى مقارنة بين القرية والمدينة والطبائع المختلفة بينهم

احسنت يا يااية وبارك الله فيك حبيبة قلبى

وياريت ماتكون الجزء الاخير وتحاولى تبحثى عن امور اخرى تناقشيها عن الريف وممكن تتكلمى على المحيط الاكبر عن الادارات والهيئات واساليب التعامل مع المواطن هناك

تحياتى لك بحجم السماء

aya mohamed يقول...

ابراهيم رزق


الفلانتين هنقضيه فى التليفون
على ما يجى عندنا هيكون نسى اصلا ههههه
وانا مستمتعة بتعليقات حضرتك جدا :)

aya mohamed يقول...

اسماء

الله يسلمك يا حبيبتى يارب
اه طبعا هو اللى جاى يتجوز من عندنا
يستحمل بقى ههههههههه
سعيدة بوجودك بجد

aya mohamed يقول...

ريماس

الخرشوف نبات صحراوى كدا شبه الصبار
بس هبيتعمل محشى لحمة مفرومة
شوفيه فى جوجل ^_^

aya mohamed يقول...

نداء الاسلام

ربنا يخليكى يا جميلة
نورتينى :)

aya mohamed يقول...

نسمة

انا فى يوم وانا راجعة من المدرسة
لقيت راجل بيبع غزل بنات فاشتريت كتير
وصحابى وماما و خطيبى فضلوا يقولوا عليا طفلة
لو لقيت الراجل تانى هجيبلك <3
ربنا يخليكى ليا يارب

aya mohamed يقول...

ليلى الصباحى

تسلميلى ربنا يخليكى يارب
وانا رجعت اكمل تانى
ومتفقة معاكى جدا فى موضوع الولاد فى الريف
معاناة وتربية غلط واحنا اللى بنتحملها فى الاخر
بيسعدنى وجودك <3

ظلالي البيضاء يقول...

التدوينة جميلة ..
لكن واضح إنك تعبانة ألف سلامة على حضرتك
.. الكلام فيها بعضه من الشرق والبعض الآخر من الغرب ..
متابع ..
مع التحية الطيبة ..

ظلالي البيضاء يقول...
أزال المؤلف هذا التعليق.