الخميس، 7 فبراير 2013

مذكرات كاتبة ريفية 2




ونبدأ من حيث انتهينا 
الالتزام فى الريف مش مجرد لبس محتشم وحجاب 
الريف مش بياخد بالمظاهر يمكن فى المدن المظاهر  ليها دور مهم 
لكن الوضع عندنا مختلف تماما لان الناس كلها  عارفين بعض 
البلد كلها تعرف كل الناس اللى فيها وتعرف اهالى القرى المجاورة كمان
الالتزام عندنا اسلوب حياة بتعرفه بالصوت الواطى للبنات بالابتسامة الرقيقة 
اللى مستحيل تسمعلها صوت بالمشية المعتدلة اللى تخليك غصب عنك تبص فى الارض 
رغم انى اتحجبت فى ثانية ثانوى الا انى كنت اخر بنت اتحجبت فى مدرستى
واول بنت اتحجب فى عيلتىعلى اعتبار ان العائلات الارستقراطية مش بتحجب بناتها
كنوع من الانفتاح ومجاراة الواقع الحضرى
لكن انا وقتها كنت حابة الالتزام الدينى مش كان فارق معايا ان يكون باين عليا بنت عيلة وهاى كلس 
الالتزام كمان للولاد اصل عندنا الولد زى البنت وسمعة الولد تمام زى سمعة البنت 
علشان كدا احنا كمان بقى عندنا عنوسة وان كانت اكتر عنوسة ذكورية 
ايوة اصل الولد ممكن يلف على اكتر من بيت ويترفض لنفس الاسباب 
اصل الالتزام مش ولد رايح المسجد مع كل آذان ولا ان عمره ما عينه اترفعت فى بنت 
الالتزام ان الولد يكون متدين من جواه فيخرج ده فى صورة تعاملاته مع الناس 
فى التزامه الانسانى قبل مظاهر الالتزام الدينى 
ولان البيوت كلها عارفة كل حاجة عن بعضها بتلاقى ان حتى الولاد سهل اوى تعرف مين كويس ومين لا 
وده السبب الرئيسى اللى مخلى الكويس فى الريف اكتر من الوحش 
فى خوف من العادات والتقاليد حتى لو فى تحرر فكرى لكن بيكون بردو فى نطاق التزام نفسى 
من الافكار الغريبة جدا المنتشرة عندنا والخاصة بالجواز طبعا بالاضافة الى الالتزام اللى شرحناه فوق 
ان الدكتور مش يتجوز غير دكتورة او مهندسة والدكتورة استحالة تقبل باقل من دكتور ومهندس
اما بقى خريجى الكليات الاخرى بقى فيرضوا ببعض وطبعا الدبلومات لبعض وهكذا 
لذلك هتلاقى ان اهالى البلد بيستميتوا على دخول بناتهم كليات القمة حتى لو خاصة
علشان تضمن جوازه كويسة 
دى تقريبا النقطة الرئيسية فى الجواز تليها على طول نقطة العيلة 
والريف مقسم الطبقات الاجتماعية تبعا لترتيب العائلات مش الترتيب اللى انتوا عارفينه بتاع الدخل ده 
لالا خالص اول حاجة " اصل البلد " اللى هى كانت العائلة اللى كان منها العمدة
وولاده بيورثوا اللقب الى وقتنا هذا على فكرة وتغلب عليهم الطباع الارستقراطية 
وعائلات كبيرة اللى هما العائلات اللى كان عندها حيازات زراعية كبيرة واتجوزوا من عيلة العمدة 
اخر حاجة بقى بقية البلد ودول طبعا كانوا هما اللى بيخدموا العائلات اللى فى الاول 
والحكاية دى كانت معقدانى فى حياتى نظرا لان كل عريس كان يتقدملى
 " تيتا " تتنرفز وتقول هما نسوا نفسهم ولا ايه ده كان جده بيشتغل عندنا وابصلها بصة مش لذيذة 
واقولهم ما انا كدا مش هتجوز مهى البلد كلها كانت بتشتغل عندكم واسيبهم وامشى 
والسيناريو ده خلانى احب عبدالناصر جداااا
 واستغل اى فرصة علشان اقول ان عبدالناصر هو احسن رئيس حكم مصر 
كفايا انه وزع الاراضى على الفلاحين ويرد عليا اى حد سامعنى من اهلى ويقولى فرحانة علشان اخد ملكنا 
المهم انى فى الاخر اتخطبت لدكتور ودى كانت اكبر صدمة لكل الناس 
علشان انا آداب يبقى ازاى اتخطب لدكتور وتظهر الاقاويل
هى ازاى عرفت تجيبه ... معقول دكتور بجد ... اااااه صله غريب ...
يبقى اكيد عندهم الحكاية دى عادى ... ده كفايا ان جدها العمدة لازم تتجوز جوازة حلوة 
بس هى الحكاية كلها تتلخص فى " الحب " 
وعن الحب فى الارياف هقولكم بكرة بقى ان شاء الله


17 التعليقات:

موناليزا يقول...

يعنى طلعتى بنت العمدة ومكناش عارفين ^_^

عجبنى اوى ردك على تيتة
" مش هتجوز مهى البلد كلها كانت بتشتغل عندكم "

فكرتينى بموقف مشابه..كنت بزور جارتى اللى فى الطابق اللى تحت مننا على طول فلقيت زمايلها فى الشغل عندها فبتعرفنا على بعض وكده وفى الآخر خالص مش فاكرة عرفوا منين انى بنت صاحب العمارة وعلى دى بقى كأنى عجبة :)


حلوة أوى على فكرة :)
الطرح والسرد والمغزى بين السطور رائع

أسماء فتحي يقول...

هههههههههههههههههه

دكتور مره واحده

اه اصل اللي ليه ضهر ميضربش علي بطنه

وانتى ضهرك العمده بحاله

بس كويس انها جات في دكتور مجاتش في ابن الجنايني

ومعاكي حق في عادات الجواز المخصوصه بالعيل ده فعلا كان بيحصل ومازال علي فكره

رغم ان التعليم والشهادات الكويسه ظبطت الدنيا الي حد ما

بس مش 100% لسه في العقلايات بتاع كان بيخدم عندنا وجده كان بيزرع عندنا

ومامته كانت بتيجي تخبزلنا ههههه

والفيلم ده

في انتظار باقى مذكراتك

تحيــاتي

Asmaa Fathy

ظلالي البيضاء يقول...

كلماتك تعرفني أكثر على الريف المصري ..
حتى الريف السوري أجهل عنه الكثير لأنني ابن المدينة أباً عن جد .. هههه
انطباعي عن الريف المصري أن القيل والقال فيه إذا خرج من بيت عم كل البيوت فاصبحت السيرة على كل لسان ..
وبهذه الطريقة يكاد يكره المرء حياته إن أشيعت عنه قصة مزعجة له ..
متابع وسعيد بهذه التدوينات
مع التحية الطيبة

aya abd elkarim يقول...

عجبنى الحوار ده يا بنفسجية الريف :)
كملى علشان شاددنى جدا عايزه اعرف عن الحب فى الريف
دومتى بكل ود :)

aya mohamed يقول...

موناليزا

انتى كمان طلعتى بنت صاحب العمارة ^_^
انتى احلى يا حبيبتى :)

aya mohamed يقول...

asmaa fathy

مهى احنا عندنا العيلة وبعدين الشهادة
لكن العكس لا هههههههه
ايوه الفيلم ده مش عايز يخلص عندنا
مش عارفة ليه ^_^

aya mohamed يقول...

ظلالى البيضاء

مهى دى من عيوب الريف
ان كل حاجة معروفة لكل الناس فى الاخبار الكويسة والوحشة
سعيدة بالمتابعة :)

aya mohamed يقول...

آية

يويتى ربنا يخليكى ليا يارب
حاضر ان شاء الله بكرة هقولك :)

M Magdi Albarqi يقول...

عجبني شرحك للوضع الارستقراطي , و كمان الالتزام وصفك ليه مشوق

ابراهيم رزق يقول...

هههههههههههههه

واحده بنت عمده و التانيه ارستقراطية بنت صاحب العمارة

تعرفى يا ايه ان كلامك ده مدخل لحاجات كتير لازم تتغير
و حاجات كتير لازم نمسك فيها بايدنا و سناننا
ننسف العادات الباليه و نتمسك بكل جميل فيها

موضوع الشهادات ده مش بشوفه غير فى مصر
الرجل لا يقيم بشهادته و لكن بفكره و تعليمه و التعليم مش شهاده
لان للاسف 90% من خريجى الجامعة فى مصر اميون
ماشى يا بنت العمدة و عقبال ما اشوفك فى الكوشة

تحياتى

reemaas يقول...

حلو اوى اوى سردك ليها يا بنت العمده :)

عندى منها حاجات كتيييييييير ورغم ان البلد مدينة ومركز من زمااااااااااااااااان بس لسه عادات الريف موجودة

aya mohamed يقول...

محمد البرقي

عجتنى متابعتك يا محمد
ميرسى جدا :)

aya mohamed يقول...

ابراهيم رزق

ياريت الحاجات السيئة دى تتغير فعلا
عقبال ما تحضر فرحى يارب
^_^

aya mohamed يقول...

reemaas

نورتينى يا قمر
وميرسى جدا ليكِ :)

nesma hatem يقول...

هههههه فكرتينى بواحدة صحبتى صيدلة
وأتجوزت واحد تجارة والسؤال الغير منطقى بالمرة طب ليه كده ؟
زى ما يكون ده بقى عرف اجتماعى مثلا عجبنى أسلوب البوست أوى
بحس ان الريف زى ما بيقولو كده لسه بخيره حجات كتير فيه صعب تغييرها وهو ده اللى مخلينى احبه اكتر من القاهرة مثلا
مبسوطة انى قريته
:)

aya mohamed يقول...

نسمة

انا مبسوطة بوجودك اكتر :)

ياسمين خليفة يقول...

للأسف العادات والتقاليد اللي انتي بتتكلمي عنها دي موجودة في المدن أنا بصراحة مش عارفة ليه الناس بتتعامل مع الدكاترة والمهندسين كأنهم أذكي وأحسن ناس ايه علاقة الجوار بنوع الشهادة اللي واحد واخدها أنا أعرف دكتور اتجوز دكتورة والجوازة فشلت عموما تدوينت جميلة تحياتي ليكي
http://hekaty.blogspot.com/