الثلاثاء، 19 أبريل 2011

مقتطفات



كلام كتير جوايا نفسى اقوله ليك 
معرفش ايه بيجرالى قصاد عنيك 
مبقولش ليه وانا معااااااك 
وقولى انا اعمل ايه بقالى ليالى بدارى هوايا
انا معرفش ليه بقاسى فى بعادك ياريت معايا

بقطفلك بس هالمرة هالمرة عابكرة عبكرة بس 
شئ زهرة شئ زهرة حمرا وبس 
ولا بدى شئ بعد الا بداريك بيتى بيصير وعد لما بحاكيك
يا ويل عيونى كيف بتندهلك متل المجنونة وتصير تقولك
بحلم وبضل شهر بالى مشغول بيطلعلى قول شعر ما بعرف اقول

عامر منيب وفيروز مع النسكافية وشعر رومانسى جدا يبقى يوم مالوش حل طبعا
هو من بداية اليوم وهو غريب جدا بس لذيذ بجد يمكن علشان انا اساسا بحب يوم الثلاثاء اوى 
يمكن علشان جدولى يوم الثلاثاء بيبقى لذيذ اوى يمكن لما بنحب حاجة اوى بتخلينا نحس ان اى حاجة تحصل هتبقى حلوة 

شخصية جديدة كله لاحظ وجودها الايام القليلة اللى فاتت دى وهو دكتور ميدو 
وطبعا مع انهم ملاحظين انى مبسوطة وفى ناس بتجزم انى فى حالة حب فحصل ربط 
وانا من موقعى هذا بقول ان مفيش اى صلة بين الحالتين طبعا كلكم عارفين ميدو وهو شخصية لذيذة جدا 
بيعمل كومنت كتير عادى يعنى وبيكتب حاجات تستاهل انى اعمل كومنت عليها مش اكتر 
هذا بالاضافة انى قد اكون فى حالة حب لكن مش ارتباط ولا هيكون ابدا علشان ترتاحوا يعنى :P
وكان فى نظرية حبيت اثبتها ان مش اى حد يعمل كومنت كتير عند حد يبقى بيحبه ولا ان حد مش بيعمل كومنت او لايك 
عند حد يبقى الحد ده مش فارق معاه العكس جداااااااا هو الصحيح واللبيب بالاشارة يفهم ;)

علشان تصدقينى لما اقولك ان اسمه الفرح شفتى لما قولتلك اسمه خرجتى من حالتك وبقيتى مبسوطة ازاى 
يا بنتى ده مش اى حد ده الفرررررح بيغير الدنيا فى ثانية حتى لو مش موجود 
مش كنت هخليكى تكلميه اساسا علشان بغير اصلا :P

انتوا الاتنين وحشتونى جدا وكنت عايزة اقولكم على حاجة بس مش بتردوا
وانتوا اساسا مش بتسالوا اكيد هزهق فى يوم من الايام وابطل اسال انا كمان
ده تهديد على فكرة :P

اطهر انواع الحب 
ان تحب شخصا وانت تعلم انه لن يكون ملكك ولا من نصيبك ولكن تظل تحبه
وتحب ان تراه سعيدا فقط لانك تحب ان تراه سعيدا
الجملة دى فكرتنى بيكى لما قولتيلى انك بتحبيه اوى وانا قولتلك يا بنتى الحب من طرف واحد ده ماساه
فاكرة وقتها قولتيلى مش هتحسى بيا علشان مش جربتى 
انتى طيبة ومش تستاهلى اللى بيحصل ده ربنا معاكى

الحياة بدون حب مستحيلة وقد يخيل اليك انك تعيش بلا عواطف وانك لا تحب شيئا
ولكنك تحب دون ان تدرى
د/ مصطفى محمود
مش شرط يكون الحب اللى ليه هدف فى انواع كتير اوى من الحب من غير هدف 
حب الحياه وحب الناس وحب ابسط حاجة بتعملها واعمل كل حاجة بتحبها برومانسية وخلى طول الوقت 
فى جزء بتعمله وانت مستمتع بيه هتحس الدنيا بقت احلى كتيررررر

وكأن الحديث معه بنكهة القهوة شهى للغاية 
يذيب اعماقك يحسن مزاجك ولكنك قد تدمن عليه 
الجملة دى فكرتنى بجملتك ده انا بقيت ادمان بقى 
تخيل بقى ان عدى كام يوم من غير كلامك وكويسة اهو وعادى جدا 
بس هو هيحصل حاجة لو قلت ....       ؟
كتبتها وبعدين مسحتها اصل افتكرت انك بتعاقبنى على احساسى !!!

ما احلى الكلمات التى لا نقولها عندما نحس ان الحروف عاجزة عن استيعاب انفعالاتنا 
غادة السمان 

بحب اسمعك وماتكلمش واراقبك وانت بتتكلم 
واخزن فى دماغى مليون البوم صور ليك 
سارة درويش 

هناك امنيات معلقة بين السماء والارض 
فيارب يارب بحق كلمة لا اله الا الله 
اكتب لكل هذه الامنيات الحياة

امنيتى  ..... ان اتسمى بك 


الاثنين، 11 أبريل 2011

i'm happyyy


من الاسبوع اللى فات عايزة اكتب بوست 
بس لظروف النت اللى كل دقيقتين بيفصل وكمان مشاكل الشغل 
المهم ان اخر تطورات الاوضاع زى ما انتوا عارفين بالظبط 
الاسعار غالية والحياة السياسية فى حراك دائم ومصر بين الجيش والشعب لم تستقر بعد
اما بقى عن الوظائف فربنا يدينا ويديكم طولة العمر يارب ونلحق نشوفها 
اما بقى عن عن انطباعى فانا بحب السنة دى جداااااا برغم اى حاجة فانا شيفاها احلى سنة فى حياتى كلهااااااااا
ومهما يحصل فيها فهى بردو سنة جامدة اخر مليون حاجة 

بالنسبة لصور الاطفال اللى عندى فى الفصل فانا هنزلهم على الفيس بوك بس 
علشان فى اعتراض انى انزلهم هنا واهى فرصة علشان تعملى اكونت يا لحظتى :P

انا تغيرت مش مصدقه نفسى طيب انتوا مصدقين 
بقيت بحب اتصور اوى كل شوية اقول لماما خدى صورينى وده طبعا مش طبيعى خاااالص
مش حكاية بقيت بحب شكلى بس بقيت مبسوطة بيا مش بقت فيا العقد بتاعت زمان دى 
مع ان فى ناس كتير اوى كانوا بيقولوا انى حلوة وانا مش كنت مقتنعه فانا مش بقت همانى حكاية حلوة دى اصلا 
بس مش عارفة ايه حصل وبقيت بحب الصور وال ايه كمان بنزلها على الجهاز وفرحانة بيها اوى 
وطبعا انتوا عارفين انا كنت عاملة ازاى فى موضوع الصور ده فاللى انا بقيت فيه دلوقتى يعتبر معجزة 

اجمل جمل اتقالتلى فى حياتى مش عارفة ليه بفتكرها اوى الايام دى كتير 
" حبى نفسك وافرحى بيها علشان هى تستاهل اوى انك تحبيها "
 " انا لو عملت حاجة فانا لافت نظرك لحاجات فيكى اصلا "
" بيعجبنى تفكيرك واحساسك انتى احساسك ملوش مثيل "
" انتى بتعملى ايه للاطفال علشان يحبوكى كدا بشتغل هنا بقالى 10 سنين عمرى ما شفت الاطفال بيحبو حد بالشكل ده "

بجد حب الاطفال ده احلى حاجة فى الدنيا واقوى حب فى الدنيا 
ببقى مبسوطة اوى بيهم وفرحانة اوى بحبهم ليا والسنة دى كمان بزيادة عن السنتين اللى فاتو 
يمكن علشان العدد السنة دى اكتر ربنا يخليهم ليا يارب ويخليلى  الحب ده ياااااارب

فرحانة اووووى كمان بصفحتى على الفيس بوك كل يوم عددها بيزيد ناس بيعجبها حاجات كتير اوى فيها
بفرح اوى لما الاقى ناس معجبة بكلامى 
فرحانة اكتر ان كل كلمة بكتبها بتبقى نتاج احساس فعلا مش مجرد كلام وخلاص 

فرحانة انى شفتك يا هوبة اووووووى وكان نفسى اشوفك يا نونا كمان بس مفيش نصيب بقى 
وفرحانة بصحابك يا رانيا اوى وكان يوم تحفففففففة انتى عارفة طبعا كان ناقصه ايه بس ربنا ليه حكمه فى كدا
وان شاء الله يتكرر بنفس الناس تانى وفى نفس المكان علشان عجبنى 

بحبك يا اسماء اكيد مش لازم اكتب هنا يعنى بس كتبت اهو علشان مش تزعلى 
وانتى عسولة وهفتقدك جدا لما تسيبى المدرسة 

توتا من يومين اتكلمنا فيها سوا حبيتك اوى وكنت فرحانة اننا بقينا صحاب كدا 
ابقى طمنينى عليكى دايما كدا ويارب نفضل اصحاب على طول 

مونمون لما بتدخلى ومش بلاقى عامله لايك عندى ولا كومنت بحس ان فى حاجة ناقصة 
بس بلاقيكى بعدها عملتى اوقات بحس انى نفسى نبقى صحاب قريبين بس مش عارفة تيجى ازاى دى 
بس انتى من الناس اللى بحبها اوى وبحس ان قلبك ابيض وعلى طبيعتك دايما 

لوليتااااااا حبيبتى لما رنيتى قولت ياااااه انتى لسه فكرانى :P اشتقتلك كتيررررر على فكرة 
بس مش بلاقيكى وكمان اصلا مش بفتح ميل كتير بس  ان شاء الله هحاول نتكلم قريب 


الا تخبرنى 
لماذا امامك تضيع الحروف 
وتبدو ابتسامه وبعض التمنى 
لماذا اتوق لبعض السؤال 
وشئ من الخوف يوقف ظنى
لماذا كلما اردت الرحيل 
اعود ولا اذكر همسى 
الم تخبرنى 
 بان الحياة جزينة دوما 
وان الفرح شبيه الخيال 
فهل تخبرنى 
لماذا الفرح يصاحب خطاك 
وان اشتقت لبعض السعادة اذكر هواك 
الم تخبرنى 
بان القدر يحتمل القرار 
وكل ما فى القدر باختيارى 
فهل تخبرنى
لما معك فقط احببت اختيارى ؟


الخميس، 31 مارس 2011

فضفضة



هى : الحالة الحلوة قلبت حيرة وبعد شوية هتقلب دموع 
انا : لا يا بنتى مش هتوصل للدرجة دى 
هى : ربنا يسمع منك مع ان باين كدا 
( طول عمرك كلامك صح وخصوصا فى الحالة دى )

.................

هى : اكتر حاجة بتعجبنى فيكى دماغك وحسمك للامور 
انا : ده انا اللى بتعجبنى دماغك جدا على فكرة 
هى : لا انتى قوية اوى وليكى تفكير مميز وعندك صبر يكفى العالم كله
( بدات اصدق حكاية الصبر دى اما التفكير المميز من بعض ما عندكم اما بقى قوية فلا اعتقد ذلك )

.................

هى : انتى محتاجة تعيشى تجارب كتير وتبقى اجتماعية علشان مش تتاثرى باى حاجة كدا
انا : لا انا عجبانى نفسى كدا وبعدين انا حساسة بزيادة اللى مش عاجبه مش يتعامل معايا
هى : مهى مشكلتك انك حساسة بزيادة 
انا : تفتكرى اصلا انى حساسة وبستحمل كتير عكس بعض ينفعوا مع بعض انتوا متناقضين اصلا 
هى : لا انتى اللى بتعرفى تبقى متناقضه فى مشاعرك مش عارفة ازاى 
( مش حكاية تناقض ولا حاجة حكاية ان مش لازم مشاعرى دايما تغلب عقلى فبعملها استوب وبس )

................

هى : ما انتى مش سالتى 
انا : لا سالتك عاملة ايه قولتيلى كويسة 
هى : ما انا كويسة دى حاجة بسيطة 
انا : لا مش كويسة ومش حاجة بسيطة انا بجد زعلانة اوى 
( مش ممكن تتخيلى انا زعلانة قد ايه والحكاية دى عاملة فيا ايه من وقت ما كلمتك بس خليكى فكراها )

..................

اللى بيحب حد بيعذره وبيسامحه ولو مش لاقيله عذر بيخترعله عذر ويسامحه بردو
مش كل يوم هنلاقى حد نحبه ولا كل يوم هنلاقى حد يحبنا بجد ولا حتى كل يوم هنلاقى حد محترم كدا
حاجة مش عارفة ليه مش مقتنعين بيها ان الولاد مش زى البنات 
ممكن يكون فاضى بس مش تيجى على باله التفاصيل الصغيرة اللى بنفكر فيها 
مش معناه انه مش بيحب بس اساليب التفكير والتعبير بتختلف 
لازم نعذر ونقدر ان فى شغل مرهق وفى تفكير طول الوقت فى المستقبل وده جزء من التفكير فينا 
لما بيكون مشغول لو حتى بيفكر فهو بيفكر فيكى بس باسلوب مختلف 
فرحانة اوى علشانكم بجد 
ربنا يوفقكم ويهديكم ويقدملكم الخير ياااارب 

..............

احنا مش بنحب احنا بنتعود 
امتى نكون بنحب بجد لما نتعدى حدود التعود 
بمعنى نغير فى التفاصيل اللى اتعودنا عليها ونبعد شوية بعقلنا عن المشاعر 
ونبص على الحكاية من بعيد ونقيمها 
يعنى وقت ما نحس اننا اتعلقنا بحد لمجرد انه قريب مننا فى الفترة دى 
نقرب اكتر من ربنا ونفكر فى حاجات غير الحد ده 
ونشوف مع الوقت بنحس بايه وهيحصل ايه 
الحب مش مجرد اتنين شافوا بعض وبيتكلموا كتير وخلاص 
الحب تفاصيل ملغبطة كل ما نحاول نهرب منها بتجمعنا 
حالة من اللاوعى المفاجاة وسط الوعى التام 
مش فلسفة لا بالعكس الحب ابسط من اى شئ فى الدنيا بس احنا اللى بنعقده 

 .....................

السعادة مش مشكلة اوى ومش حاجة مستحيلة 
ببقى سعيدة وانا بشرب نسكافية وبسمع انغام وبقرا شعر 
وببقى سعيدة وانا بكلم صحابى ونحكى ونضحك
وببقى سعيدة لما بلاقى حد بيحبنى ومرتاحلى من غير هدف 
وببقى سعيدة لما بروح المدرسة والاطفال يجروا عليا اول ما يشوفونى 
حاجات كتيرة اوى ممكن تبقى بسيطة بس تسعدنا 
ومع ان فى حياتنا حاجات كتير بتزعل لازم نخترع حاجات تبسطنا 
حتى لو بسيطة بس وقت ما نكون بنعملها مش نفكر فى اى حاجة تضايق 
زى فودافون كدا استمتع باللحظة 

.................

مؤمنة جدا ان ربنا بيبعتلنا ناس فى اوقات معينة فى حياتنا علشان ياثروا فيها 
بشكل او باخر وبالسلب او الايجاب المهم ان بيكون ليهم تاثير حتى لو بسيط
علشان كدا كل ما بتعرف على حد بفرح اوى واحس ان فى رسالة ربنا باعتهالى 
وبفكر فى السبب القدرى للمعرفة دى 
حتى لو مجرد واحدة قاعدة جنبى فى الطريق واتكلمت معايا كتير بخرج من الكلام بحاجة 
حتى لو ان الكلام ممكن يلفت انتباهى لحاجة مش كنت واخده بالى منها قبل كدا
كمان مؤمنة ان الانسان الصبور اى حاجة محتاجة صبر هيلاقيها قدامه والانسان اللى دايما زعلان 
هيلاقى كل الحاجات اللى بتزعل قدامه كمان الانسان المتفائل هيلاقى كل حاجة تدعو للتفائل 
علشان كدا مقتنعه انى بتعرف على الناس اللى شبهى حتى لو طلع فيهم صفة مش كويسة 
فاكيد انا فيا جزء من الصفة اللى مش كويسة دى ان لم يكن كلها بس بيكون وجه الشبه عادتا كبير 

..................


الحوارات اللى فى الاول دى حقيقية علشان فى كتير مفكرينى انى بالفها 
وطبعا اللى حصل معاهم الحوار بيعرفوا نفسهم 
ومفيش ولد فى اى حوارات علشان ناس فاكرين انى بعمل تمويه
لو فى هقول هو عادى يعنى هو انا هخاف مثلا 
كمان الكلام مش موجه لحد معين
علشان متاكده ان فى ناس كتيرهتحس ان الكلام ليها
المهم ان اى حد يحس ان الكلام يتفق معاه يعتبره ليه 

وفى النهاية 

( هذه الفضفضة لا تعبر الا عن وجهات نظر كاتبها واى تشابه فى التفاصيل لا يتصل باى شخص على الاطلاق )




السبت، 26 مارس 2011

يوم لذيذ


 اليوم ده مش كان النهارده ده كان يوم الاتنين
اتاخرت فى انى اكتب عنه علشان كنت ناوية ان البوست ده يبقى فى فيديوهات حفلة عيد الام 
بس للاسف الشديد مروة اللى كانت بتصور مش صورت ولا فيديو حلو 
حتى الفيديو اللى انا بتكلم فيه مش باين غير وانا بضحك فضحانى مروة ههههههه
ومش صورت الاطفال وهما بيغنوا مع ان كان نفسى تشوفوا ثمرة مجهودى 
بس ان شاء الله هبقى انزل صور الاطفال هنا للذكرى يعنى وعلشان تقولولى رايكم

انا حلمت بعمر يوم الحفلة بليل وعمر ده طفل معاق ذهنيا عندى فى الفصل بحبه جدا وبفرح لما بيضحك 
وكل يوم بغنى معاهم علشان هو بيبقى مبسوط لما بغنى وبحكيلهم الحكاية اللى هو بيحبها 
ونتيجة انه بيبقى مبسوط انه مش بيرضى يروح ويقولى اقعد معاكى بس يوم الحفلة عمر روح على طول 
وكان مستعجل اوى ومش سلم عليا وهو ماشى الملاحظات دى مش جت فى بالى غير بعد الحلم
حاسة انى يوم الحفلة قصرت معاه انا فعلا يومها كنت مش مركزة خالص وكنت بعمل مليون حاجة فى وقت واحد
المشكلة ان عمر من يومها مش جه المدرسة ...... انا اسفة يا عمر 

احلى حاجة فى الحفلة امهات الاطفال لما بيدخلوا ويسالوا عليا ويحكولى ولادهم بيقولولهم ايه عنى 
كنت مبسوطة اوى بالاضافة الى انى سمعت احلى تعليقات فى حياتى فى الحفلة دى
وكمان اجمل هدايا بالذات هدية احمد وهو مكسوف وحبيبة وهو بتقولى انا بحبك اوى 
واغبى موقف بقى بليل وحوار مع نورا ضيع فرحة اليوم اللى انتهى باحلى ضحكة فى الدنيا قبل ما انام 

عندى كلام كتير اوووووى لكل الناس نبدا بمين نبدا بمين 

رانيا : انا عرفت اجيب اللعبة ازاى ومستنياكى علشان اغلبك علشان تعرفى اننا جامدين زى الاسكندرانية واكتر شوية 
وحشانى جدااااا والاغانى تحفة تسلم ايدك يا باشا

نورا : اه على فكرة كان فى حاجة المرة دى والمفروض انك عارفة انى كنت زعلانة بدليل كلامك يعنى 
بس اول ما بعتى المسج نسيت اصلا كل حاجة وعملتلك اللى عيزاه هو انا ليا غيرك يا بت طلباتك اوامر يا قمر 
والمفروض ان اللى معاكى دلوقتى خط الرغى اللى كان مخصوص ليا بس انا عدتها بمزاجى

هوبااااااا : مش اتكلمنا من زمان ووحشتينى جدااا والفيس بوك بيسال عليكى اتصرفى بقى 
وسورى يا حبيبتى انى مش عرفت ارد عليكى كنت نايمة وتقريبا مش انا بس اللى مجنونة 19 ميسد فى ربع ساعه
لما معايا كدا امال بتعملى مع احمد ايه ليه حق يقفل الموبايل :P ربنا يكون فى عونك يا بنى 

فى بالى دلوقتى اغنية ذكرى عارف انا نفسى فى ايه 
الاغنية دى كلامها حلو بس لما سمعتها لقيتها مش بتغنيها حلو مش عارفة ليه 

عارف ... انا نفسى فى ايه 
انا نفسى ف بيت بيطل عليك 
تبقى انت الشارع والناس تبقى انت الصاحب والجار 
تبقى الشمساية اللى بتطلع مع كل نهار 
وعارف انا نفسى فى ايه 
زى البنات زى البنات
من صغرى برسم بيت معاك 
قلبى يادوب ورقة نبات 
بتهزنى كل الحاجات المحتاجين حضنك ساعات 
وساعات كتير بهرب بعيد معاك
واغرق فى ليل الذكريات
وعارف انا نفسى فى ايه 
انا نفسى فى بيت بيطل عليك




الجمعة، 18 مارس 2011

to meee



اوقات بنكون مبسوطين من غير اسباب واضحة مبسوطين وخلاص 
بس انا بقى النهاردة مبسوطة باسباب كتيررررررر
بالرغم من ان اليوم مشحون جدا ولاول مرة اتعصب جدا بالشكل ده فى الشغل
بس كان يوم جامد اخر مليون حاجة واكتر كمان 

من اول الايس كريم اللى كنت حاسة ان ليه طعم مميز النهارده ايس كريم بطعم السعادة 
لحد ما مشينا كتير اوى وسط اراضى زراعية واللون الاخضر مالى المكان والشمس تحفة والسماء تحفة اكتر 
من زمان جدااا مش مشيت فى مكان زى كدا ولا حسيت انى مبسوطة كدا
انطلاقا الى الى الى عدوها دى وصولنا الى تصدقوا نسيت :$

فى حاجات حلوة بقى جدا جدا الاوهى 
امبارح بليل وصلتنى رسالة من ائتلاف ثورة الاعلام ومطلوب اختيار وسيلة او برنامج لمتابعتها وعمل تقرير اسبوعى 
لمحاربة فساد الانظمة الاعلامية والقيام بدور رقابى يعنى والتقرير هيتبعت للجهة اللى بنقوم بتغطيتها 
وبعت طبعا واوافقوا طبعا بردو وبذلك حسيت ان بقى ليا دور كاعلامية الحمد لله يعنى 
كمان هما عاملين بيان وبيجمعوا توقيعات علشان النقابة ودى حاجة فرحتنى جدااااااا 
بالاضافة الى ذلك مكالمة هبة امبارح اللى فرحتنى جدا جدا جدا خالص ربنا يهديكم يارب ويفرحنى بيكم دايما يااااارب 
وانتى المفروض يا هوبة حفظتينى هو فى حد مجنون قدى اتعودى بقى بس هو اللى انا فيه ده جنان اساسا:P

افتكر النهارده اليوم المناسب للاعلان انى صاحبة صفحة قلب ينبض بك سابقا نبضات قلب حاليا 
السبب فى انى ارجع اكتب فيها واغير اسمها يرجع الى هبة ربنا يخليهالى يارب 
الصفحة اتعملت علشان انا كان جوايا حاجات عايزة اقولها فى فترة ما ولما عديت نفسيا الفترة دى بطلت اكتب فيها
بس نظرا لان المشاعر مش ملك حد ونظرا لانى نضفت كل البقايا اللى كانت جوه قلبى وممكن افتح صفحة جديدة مع نفسى 
قررت انى اغير اسمها واكتب تانى واكتب اكتر واكتب احلى بكتير من قبل كدا 
وكمان قررت انى اقول انها بتاعتى لانى المرة دى فخورة جدا باحساسى 
واول ما دخلت النهارده وشفت ان فعلا اللى قروا الجديد عجبهم اكتر من اللى كنت بكتبه قبل كدا فرحت جداااااا
حسيت انى بقيت احلى من الاول واحساسى احلى بكتير اوى اوى من الاول 

بقالى كام يوم بسمع على غير العادة نانسى والاغنية دى بحبها اوى 
لسه جاية اقوله على اللى جوايا
سبقنى قالى انتى جوايا 
وقالى على اللى بيدرايه
رحت راميه نفسى جوه احضانه
وقلت عمرى كله علشانه
ماده اللى كنت  نفسى فيه
لا عملت حساب للناس ولا حتى لاى كلام
احساس واتساب يطلع بطبيعته وصله اوام
مجنونة انا بيه وهخاف من ايه
فى حد يشوف احلامه قصاده وميلمسهاش 
ده انا عشت سنين علشان الاقيه
ده ساعات الخوف بيضيع لحظة ما بنعشهاش
كل كلمة قالها لسه فكراها وكل لامسه منه حساها
حياتى احلى بين ايديه
هو ده اللى حبه خدنى فى ثوانى
وهو ده اللى قربه خلانى احب عمرى باللى فيه

الاثنين، 14 مارس 2011

صباح مختلف


اول مرة اكتب بوست الصبح
واول مرة مش اروح الشغل لمجرد انى مش عايزة اروح
واول مرة احس ان النوم فعلا وسيلة للهروب من التفكير مش كنت عايزة اصحى خالص
واول مرة مش ابقى عايزة افكر اصلا
واول مرة ابقى عايزة اشوفكم كلكم فى وقت واحد

هوبة بجد شعر اللى كتبتيه تحفة طبعا هو مش شعر اوى بس احساسك حلو اوى
انا مبسوطة اكتر اننا اصحاب وبفرح جدا لما بنتكلم
ربنا يخليكى ليا يارب ونفضل صحاب طول العمر ان شاء الله

نونا : هحاول اجيلك ان شاء الله وهرجع النظام علشان نرغى لانى بفكر مش ادخل نت الفترة الجاية
ومبسوطة جدااااااا اننا رجعنا نرغى زى الاول

لوليتا : طبعا انتى عارفة انك مصيبة من غير ما اقول بس اول مرة اتكلم معاكى ومش اقولك كل حاجة :P
بس اكيد هيجى يوم من الايام واقولك

مونمون : مبسوطة جدا انى اتعرفت عليكى وزى ما كنت عارفة عنك انتى رقيقة جدا وعسولة وذوق اوى
ميرسى على رايك فيا وفى الشعر وفى البيدج انا كمان حبيبتك بجد

رانيا : بالرغم من ان كلنا صحاب بس انتى اقرب واحدة فيهم ليا انا كويسة جدا مش تقلقى
اوقات الواحد بيحب يقعد مع نفسه شوية ومفيش اى جديد ولا هيبقى فى بردو حتى اشعار اخر

الحاظ : هشوفك قريب ان شاء الله وعايزة تقرير مفصل عنى جهزى نفسك بقى

هى : انتى مش ملاحظة انك بتقولى اسم ........ كتير الايام دى
انا : لا خالص على فكرة عادى
هى : لا ابقى خلى بالك كدا انتى بتنادى على كل الولاد باسامى دلع الا هو وبتنادى عليه كتير جدا
واوقات بتنادى عليه وبعديها تنسى عيزاه فى ايه
انا : يا سلام كل ده هههههه لا طبعا عادى

هى : عنيكى بتلمع ليه وانتى بتبصى على الموبايل
انا : عادى يمكن الشمس
هى : وانتى اصلا بتبصى فى الموبايل ليه وهو مش رن ولا حاجة
انا : بشوف الساعه
هى : انتى بتبصى فى ساعه اديكى وبعدين تبصى فى الموبايل
انا : بتاكد ان ساعه الموبايل مظبوطه زى ساعه ايدى

مقتنعه انى لازم احب اللى قدامى علشان اقدر اتعامل معاه ولو مش حبيته يبقى مش هتعامل خالص
ومقتنعه ان فى ناس بتحب علشان تتجوز وناس بتحب علشان نفسها اللى بتحبه يبقى مبسوط وخلاص
وانا بحبك من غير هدف نفسى بس اشوفك على طول مبسوط


الجمعة، 11 مارس 2011

لحظة من فضلك



هل يمكنك منحى دقيقة من وقتك
هل يمكننى ان اطب منك طلب اخير
اعد قرأة تفاصيلى
حاول ان تنظر الى محتواها نظرة جيدة
فهلا ادركت انى حاولت اقناعك بجمال ذاتك ولم تقتنع
هل استوعبت انى حاولت اصطحابك فى جولة داخلك كى اخفف حملك فقط لاننى استمتع بك
هل تيقنت بعد اننى لم اتعمد التسلط قدر ما تمنيت القرب ام لازلت لم تطمئن لى بعد
مهلا .... توقف عند تلك الجملة .... اقراها مرة اخرى
ألم تلاحظ انها تكررت كثيرا فى حديثى بمختلف الصيغ الممكنة والغير ممكنة
حتى اننى فى صمتى تماديت فى تفسيرها
حسنا .... فلتقراها بصوت مرتفع حتى تلتصق بمسامعك حتى يطرق صداها باب قلبك
لعل قرائتك السريعة لها لم تمهلها الفرصة كى تصلك
ما بك ؟
قد يبدو سؤال تقليدى لا يحتاج منى كل ذلك المجهود لكنك لم تعى ما اقصد
ما بك ؟
قد يكون ما بى لا يعنيك لكن ما بك يعنينى
فهل ادركت ذات سؤال حجم معاناتى فى معرفة ما بك
وحجم المعاناة الاكبر لاستدراجك كى تخبرنى ما بك
ما بك ؟
صيغة كاذبة لرجاء ان تمنحنى فرصة القرب منك
صيغة تستتر خلفها امنية ان اكون وحدى من يعلم ما بك
صيغة لسؤال اعدته عليك كثيرا وجاوبت عليه بلامباة متناهية
ولم يكن تكرار السؤال هينا على لكن ما دفعنى لتكراره الامل فى ان تعيه
وكلما فكرت بك اردد
اللهم انك تراه ولا اراه فاحفظه لى
اللهم انك اعلم به منى فامنحه الصبر على ما به
اللهم خفف عنه وارزقه سعادة بقدر سعادتى به
فسامحنى ان لم اسالك مجددا ما بك
حتى لا افقد سعادتى بالدعاء لك