مذكرات كاتبة ريفية 7

قالوا مركزية الهيئات الحكومية قولنا ماشى 

قالوا مركزية الاعلام قولنا طبيعى 

لكن كمان مركزية الثقافة كدا كتير اوى بقى 

عقبات كتير اوى بتقابل سكان الارياف وهى المركزية فى اى حاجة وكل حاجة 

بصراحة مش عارفة الحل فى الحكاية دى ايه 

الوظائف عندنا تنحصر فى وزارة التربية والتعليم واول ما يقولوا فى تعينات 

كله يجرى على الادارة التعليمية جميع التخصصات واى مؤهل كله بيشتغل عادى المهم الوسطة 

اللى هتوصل ورقك من اول واحد  بيستلمه قبل ما يرميه فى الزبالة
 لحد اخر واحد فى الادارة التعليمية بالمحافظة 

وطبعا قبل اى حاجة توفيق ربنا لان بعد كل ده ممكن يخلوك تشتغل شوية ويوقفوك عن العمل 

علشان اكتشفوا فجاة ان ميزانية المحافظة لا تسمح 

 بتشتغل مدرس مجبر لان مفيش حاجة تانية تشتغلها هنا وطبعا النسبة الاكبر مش بتعرف تشتغلها كمان 

وطبعا مركزية الاعلام بتتلخص ان سكان القاهرة هما اكتر ناس بيطلعوا فى وسائل الاعلام 

نظرا لسهولة الانتقال طبعا حتى لو مستواهم بالنسبة لعلماء وفقهاء وكتاب الاقاليم لا يذكر 

ولو هنتكلم عن الثقافة بقى هتلاقى مليون سبب يخليك تكره الادب والكتابة والكتب 

المحافظة بيكون فيها 3 او 4 مكتبات بالكتير اوى وفى محافظات مش فيها غير مكتبة واحدة
 ومحافظات تانية متعرفش حاجة عن المكتبات غير انها بتبيع مستلزمات مدرسية ما بالكم بقى بالمراكز 

طبعا فى قصور ثقافة بس مهجورة اه هى فيها موظفين و مسابقات و شباب بيشتركوا
بس هى شكلها كدا مهجور واصلا ملهاش اى تاثير على المكان اللى حوليها 

بس مش هنكر انى كنت بروح قصر الثقافة وانا صغيرة 

واقرا كتب اللى هى اصلا مش كان موجود غير شوية كتب مقطعة وكام كتاب سليم لحسن حظى انهم كانوا 

" رباعيات جاهين - ديوان لـ محمود سامى البارودى ( من اروع ما قرات ) - مجلات ميكى ماوس "

اما بقى علشان تعمل كتاب ويكون عندك طموح فدار النشر هتجيبلك احباط بانها مش هتعملك دعايا 

وعن استلام نسخك فجهودهم مشكورة فى انهم يطلعوا عينك وروحك واى حاجة ممكن يطلعوها عادى

ولو هتكلمنى عن الارباح والتفاصيل او انك تعرف اى معلومة فاحسن انك تنسى خااااااالص

بس احنا ولا بيفرق معانا كل ده برغم اى احباطات فدايما فى نقطة رجوع اقوى 

صباحكم تحدى بقى :)

مش زيهم

لم تكن كالباقيات 

كانت هادئة كثيرا ثائرة احيانا حزينة دائما 

رغم تلك الابتسامة الرقيقة التى تعلو ثغرها الا ان حزن ما بات مميزا ليعنيها 

لم تشبهها أنثى أخرى قد كانت مخلصة الى حد الغباء 

نقية الى حد الشفافية تكاد ترى انحناءات قلبها و آثار الزمن عليه 

كانت ولا زالت مفردة 

...................

هو انتى ليه مبتزعليش زى البنات

او تعملى مـ الحبه قبّه وتخنقينى

ولا جيتى مره زعلتى على اتفه حجات

دايما كده من غير مناقشه بتعشقينى

نفسى مره مـ الزعل تتجننى

... او حتى مره تعيطى ..

فآخدك فـ حضنى عشان اوام تطمنى

او حتى تبقى خبيثه موت وتخططى

طب تعرفى ؟!..

إنك فـ وقت ما تضعفى 

انا ببقى أضعف بس

مش لازم أبيّن 

ورغم انى ببان قوى 

طيب أوى وقلبى حنين ؟!

زيك كده 

يا طيبه يا احن من ورد الجناين

عـ الايدين

انا نفسى مره تزعلى ده الفرح يخنق

لو دخل باب الروتين

عادى لو نزعل لمره

مادام هنفرح مرتين

زعقيلى وغيرى جدا وإمشى

لما اندهك ومترجعيش

هو انتى ليه مش زيهم

اقصد عشان مبتوجعيش

ولا حتى هونت عليكى انام

زعلان ..

دايما برئيه وطيبه

دايما مسامحه فـ اللى فات

مش زى غيرك مـ البنات

القصيدة اللى اتكلمت عنها فى البوست اللى فات 

لـ محمد إبراهيم 

...........................

عملت صفحة جديدة على الفيس بأسم المدونة
علشان اكتب فيها اكتر و اقتبس واغنى والعب
ابقى زرونى بقى :)
شئ سيبقى بيننا لـ آية محمد
 

فواصل مبهجة

أحبك جدا جدا جدا 

واعرف انى تورطت جدا 

اصرارك انى اكتب فى وقت انى مش عندى حاجة اكتبها 

على قد ما هو مشكلة على قد ما حبك بيخلينى اتورط فيها بمنتهى السعادة 

انا لا أحبك من أجل شال حرير و عطر مثير ولكن أحبك حتى أؤوكد ذاتى 

.............

هو انتى ليه مش زيهم  أقصد عشان مبتوجعيش 

دايما بريئة وطيبة دايما مسامحة فـ اللى فات 

مش زى غيرك من البنات 

 النهاردة كلمت محمد ابراهيم صاحب القصيدة دى

وقولتله عايزة قصيدة هدية منك ليا قالى اختارى انتى قولتله دى قالى موافق 

وانا فى حالة اندهاش وفرحة مش طبيعية اصلا 

هو فى كداااا طيب هو ده بجد حقيقى يعنى ولا ايه 

على ما استوعبت بقى وعملت حفلة قولتله اسميها ايه وبعدين طيب انا سمتها خلاص 

حسيت انه هيقول انا ايه خلانى اسمع كلام المجنونة دى ههههههههه

بس انا فرحانة اووووووى اوووووى بقى 

................

وكل الشيكولاته دى بقى لمحمد ولبنى و خالو ابراهيم وشيرين
علشان عرفوا رسايلهم فى البوست اللى فات
ربنا يخليكم ليا يارب

.........................

كمان بناء على طلبات الجمهور انى اجمع
المذكرات فى تدوينة واحدة
مذكرات كاتبة ريفية 1
مذكرات كاتبة ريفية 2
مذكرات كاتبة ريفية 3 
مذكرات كاتبة ريفية 4
مذكرات كاتبة ريفية 5 
مذكرات كاتبة ريفية 6 

والبقية تأتى إن شاء الله :)

رسائل حب

كل يوم فى حياتى حب بيكم بوجودكم دايما معايا 

بوجودى دايما وسطيكم واحساس الحب والاهتمام فى حروفكم 

(1) 

رغم اى حاجة فرحت اوى لما قولتلى ايوة انا حاسس ان فى حاجة غلط 

فرحت علشان اخيرا اقتنعت باحساسى و صدقتنى 

فرحت بس علشان كل ما احساسنا ببعض بيقوى بحس برضا ربنا عننا 

فى مسافات كتير اوى بنختصرها بإحساسنا 

وبقيت حاسة ان المسافة بنا تلاشت 

هو انت ازاى كدا اصلا 

(2) 

لما بتكلم معاكى مش بكون عايزة اقفل ابدا 

بحس انى نفسى احكيلك حاجات كتير اوى 

اوقات بحس انك امى بحس انى هتجوز علشان اجيلك 

كلامى معاكى النهاردة فرحنى انا عارفة انك مش هتفهمينى غلط 

بحسك شايفه اللى ورا كلامى حسانى زى ما انا حتى من غير ما اقول 

انا بحبك اوى 

(3)

صدمتينى خلتينى اقف وافكر تانى 

رجعتينى لنقطة مش كان نفسى ارجعلها ابدا 

ثقتى فى اللى حوليا رجعت تتهز رجعت افكر فى القلوب اللى بتعرف تغير وشها 

مبحبش حد يستهون بذكائى فى حاجات بتبان من رعشة الصوت 

وفى حاجات بتبان من غير كلام 

لو بتحبينى بجد هتعرفى انى مش عندى مشكلة مع حد 

ومتصالحة اوى مع نفسى ومع كل اللى جرحنى قبل كدا 

وبحبكم بردو 

" الرسالة مش لواحدة الرسالة دى لـ 3 "

(4)

انا كنت زعلانة منك علشان فكرت انك اتغيرت فى معاملتك معايا 

احساس انك صديق وزميل بعتز بيه جدا و بثق فى رايه اوى 

و تغيير مفاجئ وكمان مش بقيت بتعلق عندى رغم انك كنت اكتر حد بيتابعنى 

كنت فاكرة ان فى سبب وبعدين لقيت مفيش اى سبب وكلمتنى عادى ففرحت بقى 

ربنا يسعدك ويوفقك علشان انت تستاهل كل خير 

(5)

من اكتر الشخصيات اللى نفسى اقابلها 

وكمان نفسى اعرف شايفنى ازاى من يوم ما قولت انك شايفنى مختلفة 

وبتابعنى علشان تشوفنى صح اكتر وانا نفسى اعرف بقى شايفنى دلوقتى ازاى 

وبفرح اوى لما حد بيقولى انك اتكلمت معاه عنى 

وكنت فى منتهى البراءة كدا وانا بقول لمحمد ولماما بحس انه بيحبنى هههههههه 

بحس انك خالوا بجد نظرا لانى مش عندى خال وكدا 

يارب كل لحظاتك حب وسعادة و كل حاجة حلوة 

(6)

انتوا عيلتى طبعا انتوا عارفين الكلام ده 

مش بقيت بحس انى هكون غريبة فى القاهرة الكبيرة دى 

حاسة ان بقى ليا اهلى كتير اوى فى كل المناطق مش بقى عندى الخوف اللى كان فى الاول 

عايزة اجى بقى علشان اشوفكم كتير واكون جنبكم 

ربنا يخليكم ليا وميحرمنيش من وجودكم فى حياتى ياااارب 

(7)

فى بنوتات حلوين كدا بحبهم اوى اوى يعنى 

بحس انهم بيطبطبوا على روحى كدا طول الوقت 

الحب اللى هو غريب كدا بحس انى بحبهم اوى بردو من غير سبب 

حتى لو مش بكلمهم على طول بس بحس فى تعليقاتهم و دعواتهم 

ربنا يسعد قلوبكم ياااارب 

(8)

الاصدقاء الصامتون اللى بكتشف بالصدفة انهم بيتابعوا المدونة 

بتفرحنى الصدفة جدا وبفرح بردود افعالكم اوى

يارب دايما كلامى بيعجبكم كدا 

ملحوظة 

اللى هيعرف رسالته يبلغنى برقمها ولو الاجابة صح هتكون ليه هدية بمناسبة الفلانتين 

واللى مش هيعرف يقولى وانا اقوله وامرى لله 

واى اسئلة او استفسارات يرجى الاتصال عبر اى حاجة تحبوها 

وكل يوم وانتوا فـ حب

مذكرات كاتبة ريفية 6

كل عين تعشق حليوة وانتى حلوة فى كل عين 

يا حبيبتى انا قلبى عاشق واسمحيلى بكلمتين 

" اختصار الحب فيكى لون وحيد مرة دم ومرة تين

واحنا جينا نغنى ليكى وكلنا متفلتنين " 

الفلانتين فى الارياف زى كل مكان فى مصر شوارع مليها الاحمر 

سواء فى المحلات او البنات اللى ماشيين كله احمر 

اما بالنسبة للهدايا والكابلز وكدا فده بينحصر فى المخطوبين وطبعا المتزوجون يمتنعون 

والمخطوبين اللى زى حالاتى بيمتنعون بردو 

الحاجة الاجمل بقى ان وانت رايح الشغل تلاقى كل الناس بتقولك " صباح الحب ... كل سنة وانت طيب 

عملت ايه امبارح واللى بتصحبها ضحكات متتالية من الجميع وده لان ولا اى حد عمل اى حاجة طبعا 

احساس جميل لما تكون ماشى فى الشارع وكل حاجة تدعو للبهجة وكمان تروح الشغل تلاقى بهجة 

وقتها تقول لنفسك طيب هما ليه مش يخلوا الفلانتين طول السنة بس من غير هدايا 

كلام فاضى طبعا ال فلانتين ال وعلى رأى الخال ... بلد فلانتين صحيح 

لو ركزنا شوية هنلاقى ان بلدنا متميزة فى الحب عن اى بلد تانية 

ركز فى وشوش الفلاحين هتلاقى ابنسامة ورضا بشكل غريب 

هتلاقى طبيعية ساحرة وسما صافية و عصافير بتغنى من حواليك 

هو ده الجو الصحى للحب والطاقة الايجابية اللى تخليك عايز توزع الحب على كل سكان الارض 

فى الارياف مش هتلاقى تحرش علشان كدا هتلاقى الزحمة أمان 

ارمى نفسك جوه عيونهم و شوف كمية الحب والإيثار ولو حسوا انك غريب هيحبوك اكتر 

المصريين عموما الحب عندهم ملوش عنوان الحب فى قلوبهم بالفطرة 

بس فى حد بيحاول يغيرنا لكن طبعا مش هيقدر فترة وتعدى 

وكل نهار وانتوا أكثر سعادة وحب يااااارب 

مذكرات كاتبة ريفية 5

بناء على رغبة الجماهير عادونا البث
و اعتذر عن التأخير نظرا لظروف البرد اللى مش عايز يسيبنى فى حالى 

ورحلة البحث عن صوتى التى لم تثمر عن شئ
رغم انى اخدت ادوية على غير عادتى يعنى بس لم تفلح كافة المحاولات
وطبعا هتكونوا عارفين طب الريف عامل ازاى لو قريتوا " شاى بالنعناع " لدكتور احمد خالد توفيق 

انما لو مش كنتوا قريتوه فاحب اقولكم ان اى حاجة بتودى على كل الاماكن 

يعنى اى تعب خدله اسبرين و اى سخونية مع كحة تبقى انفلونزا 

والانفلونزا علاجها قرصين اسبرين و كوباية شاى بليمون و تتدفى كويس هتخف على طول 

واساسا مفيش حاجة اسمها كشف لكن فى حاجة اسمها وصف 

انت تنزل للصيدلى وتقوله بس بتحس بايه وهو هيتصرف ويقوم معاك بالواجب 

والصيدلى غالبا مش دكتور صيدلى على فكرة هى اساسا البلد كلها دكاترة 

اى حد ممكن يديلك علاج لاى حاجة وعن العلاج الطبيعى حدث ولا حرج 

مصر كلها دكاترة احنا المفروض نقفل كليات الطب دى

و نعمل اكتفاء ذاتى من الفتاوى اللى الناس بتقولها فى الطب
الحاجة الوحيدة اللى متلاقيش حد بيفتى فيها الاسنان لان احنا شعب بيعز الاكل حبتين
ومعنى ان ضرسك تاعبك يعنى مش هتعرف تاكل فتجرى تعالجه من غير اى مساعدات صديقة 

سمعت واحدة بتحكى من كام يوم انها اكتشفت بالصدفة ان عندها السكر 

لما فضلت تعبانة اسبوع من جنبها اللى هيموتها من الوجع والمسكنات مش جايبه نتيجة 

فقررت تكشف قام الدكتور طلب منها تحليل والتحليل اثبت انها عندها السكر من فترة وهى مش عارفة 

والدكتور كل ما يقولها بتحسى بكذا تقوله اه يقولها ما هو ده من السكر تقوله اصلى قلت ان ده عادى 

وطبعا المشكلة اللى فى جنبها حاجة والسكر ده حاجة تانية خالص 

بس اهى رب صدفة احسن من كشف مرتين 

مهو اصلا لو رحت لدكتور هيكتبلك كمية ادوية تحسسك انك هتموت اخر الاسبوع 

ده غير اننا مهما رحنا لدكاترة فى بلدنا استحالة نقتنع بكلامهم وعلشان نتاكد نروح نكشف عند 

دكتور فى المنصورة مثلا علشان نشوف كلامهم هيطلع زى بعض ولا مختلف 

والمشكلة مش فى التعليم ولا المستوى المادى الموضوع نفسى فى المرتبة الاولى 

اقتناع المريض هو اللى بيأثر فى انتظامه على علاج معين او تقبله لفكرة المرض فى حد ذاتها 

لان الارياف نسبة المرض والعلاج بالايحاء عندهم عالية جدا 

اول ما تقول قدام اى حد انا تعبان من كذا وحاسس بكذا وكذا 

يقولك اه والله وانا كمان بقالى كام يوم بحس بنفس الحاجات دى بردو

حد ثالث يقوم قايلك بس تلاقيه ارهاق ريح نفسك شوية وانت هتبقى كويس 

تلاقيك خفيت قبل ما يخلص الجملة اصلا ( مبالغة يعنى بهرج ) علشان نفس الناس اللى بتفهمنى غلط :)

وبما انى ريفية اصيلة مش بحب الادوية ومش ممكن اروح لدكتور الا فى حالة الضرورة القصوى 

ولو شكل العيادة مش عجبنى بمشى و لو الدكتور قال كلام عكس تصوراتى عن تعبى 

مش بجيب العلاج ومش بروحله تانى وبالمناسبة صحيح مش بقتنع بالدكاترة الستات 

هو عامل نفسى بردو مع احترامى لكل صديقاتى الطبيبات ^_^

ادعولى بقى ابقى كويسة وصوتى يرجع بالسلامة علشان نغنى سوا فى الفلانتين
واعملكم حفلة ريفية مش هتلاقوها فى اى مكان تانى

مذكرات كاتبة ريفية 4

اسعد الله اوقاتكم و دام عليكم نعمة الابتسام 

فى حاجات كدا اول ما تسمعها تفضل تضحك  و تستغرب 

واحنا اصلا شعب كل حاجة فى حياته غريبة 

لكن من الحاجات اللى محيرانى انا شخصيا وبدأت افكر فيها فى الفترة الاخيرة 

ان لو نمت بالشراب عينى هتوجعنى 

وان اللى ياخد شاور بعد الاكل هيتعب

وان مينفعش أكل فلفل بليل ولا بصل 

بس مش مهم البصل علشان مش بحبه اصلا بس الفلفل ليه ده طيب والله 

واحب  بهذه المناسبة السعيدة اللى هى الفلفل يعنى اقولكم اننا معندناش فلفل الوان 

علشان الفلفل الالوان ده عملى عقدة من كل برامج الاكل اللى بتيجى فى التليفزيون 

ماله الفلفل الاخضر والشطه الحمرا حلوين وزى الفل 

وطبعا خطيبى عمال يقولى قوليلهم على الخرشوف قوليلهم على الخرشوف 

ايه المشكلة اننا مش عندنا خرشوف عايشين اهو الحمد لله وعندنا انواع اكل مش عندكم أصلا ترلالا 

نتكلم جد شوية  بقى 

من الحاجات المستفزة جدا ان الولد مش بيعمل اى حاجة اطلاقا فى البيت

معتمد فى الاول على ماما وبعدين اخواته البنات وبعدين مراته طبعا 

عيب اوى تكونى موجودة واخوكى عايز يأكل ومش تقومى جرى تعمليله الاكل وتوديه مكان ما هيقعد 

ولو عايز يشرب ممكن ينادى عليكى وهو قدام التليفزيون وانتى مشغوله فى ابعد مكان فى البيت
علشان تجيبيله يشرب واساسى ان الولد ضعف البنت حتى فى الاكل
" مش نظام ان الست تاكل بعد الراجل علشان الناس اللى بتفسر غلط كله بياكل سوا هو بس بيريح بزيادة "

لكن احب اقولكم فى نفس ذات الوقت احنا بنطلع عينه فى مصارف الجواز بقى بيجيب الشقة ويفرشها كمان 

وهو ده السبب فى انه بعد الجواز يفضل يقوم امال انا جبت كل ده ليه مش علشان ارتاح 

اما بقى عن الخروج بالولد زى البنت زى مقولنا قبل كدا لازم تقرير مفصل رايح فين لما يرجع عمل ايه 

وفى نفس ذات الوقت الجملة المعتادة هو حر يخرج براحته المهم ميتاخرش اوى يعنى 

تبقى مش فاهم طيب لما هو حر امال التقرير ده الداخلية هى اللى طلباه مثلا 

وفى هذا الاطار لازم نشكر الداخلية ورجالها طبعا اللى فى خدمة اى حد غيرنا 

ما عدا فى الارياف بقى احب اقولكم انهم مظبطنا نفسى اشوف ظابط فى بلدنا غلطة كدا ولا حاجة 

هو مش بيخرج من مكتبه اطلاقا لان طبعا الامن عندنا مستتب ولله الحمد 

انا اوقات كتير بحس انى مش فى مصر بس المصرية للاتصالات قربت كل المحافظات وبقيت تتصل 

على اى محافظة فى اى وقت بسعر الدقيقة العادية اللى هى مش عادية اوى بردو 

التناقض فى الريف هو نفسه التناقض فى مصر مفيش فرق وان كانت الفروق كتيرة اوى بردو 

انا بقول كفايا كدا علشان انا مش عارفة انا بقول ايه 

واعذرونى علشان تعبانة جدا بس اصريت انزل التدوينة علشان لو التعب زاد تلاقوا حاجة تقروها 

وان كنتوا مش هتهونا عليا وهرجع ارخم عليكم تانى 

واحتمال تكون دى الحلقة الاخيرة كمان بقى علشان شكلكم زهقتوا منى  :))))))))

عن مذكرات كاتبة أحدثكم

النهاردة اجازة مفيش مذكرات 

وكلمة اجازة فى حد ذاتها مدعاة للبهجة 

حبيت اوضح بعض النقاط الاساسية فى المذكرات دى 

نظرا لان اكتر من حد بعتلى كلام غريب اوى وكمان التعليقات هنا محتاجة بعض التوضيح 

انا من مركز بيلا محافظة كفرالشيخ من المدينة نفسها 

ومن الناس الفرافير اللى مش بيستحملوا ريحة الفلاحين وده عيب فيا اعترف 

لكن عمرى ما اتعاملت معاهم وحش او مش رضيت ادخل بيوتهم زى ما بعض الناس بتعمل 

مش نزلت المذكرات علشان اقول انى مقهورة فى بلدى بالعكس 

انا حبيت اوضح الفرق بين الريف والحضر من خلال نبذة صغيرة عنه 

وابين قد ايه الريف مهما كان فيه عادات سيئة فهتلاقوا فيه مليون حاجة احسن من المدن 

او يمكن حبيت اوصل رسالة لناس معينة 

واقولهم ايوة انا البنت الريفية اللى فضلت متمسكة بمبادئها رغم كل القرف اللى انتوا عملتوه معاها 

وبقت اقوى و احسن منكم قدام نفسها وقدام كل اللى عرفوا مش يعيبها انها مش قاهرية بالعكس يشرفها جدا 

او يمكن حبيت اوصل رسالة لنفسى 

واقولها برافو قدرتى تتحدى كل اللى حاولوا يوقفوكى مكانك ويحطولك عقبات المكان 

قدرتى تحققى حلمك وانتى فى مكانك وتثبتيلهم ان حتى لو قافلين عليكى مليون باب تقدرى توصلى 

او يمكن اكون بدون عن بلدى علشان لو حياة القاهرة حاولت تغيرنى ارجع هنا وافكرنى 

مش مهم تكون عايش فين المهم تكون من جواك عايش صح 

وبالنسبة لكل اللى فاكرين انى مش عارفة اعمل حفلات توقيع علشان من بلد بعيدة 

وان ده حال شباب الاقاليم بالعكس انا عمرى ما حسيت ان بلدى بعيدة ولا ان حلمى مرتبط بمكانى 

المشكلة عندى قيود عائلية ملهاش اى علاقة بالمكان اللى عايشة فيه ولا العادات والتقاليد 

كمان فكرة انى شخصية خجولة ومش ليا صحاب كتير مش ليها علاقة بالبيئة اللى عايشة فيها 

فكرة الصداقات وعلاقات الزمالة مش اللى قصدته بان البنت كويسة ولا لا
 ومش فاهمة انتوا فسرتوها كدا ازاى 

انا كنت بتكلم عن الحب والعلاقات العاطفية والارتباط وده حاجة تانية خالص 

والخروجات اللى من غير هدف كل يوم خارجة وخلاص باى حجة ولو كانت صغيرة 

وخروجات الشلة المشتركة ولاد وبنات هو ده اللى قصدته 

انما انا بكلم زملاء عادى فى الشغل و التدوين والادب مفيش اى مشكلة لكن فى حدود انما الصداقة 

اللى قصدتها اللى البنت بتكون فيها مع الولد صاحبها كأنها بتكلم بنت صاحبتها مفيش فرق 

هو ده اللى انا مش مقتنعه بيه ورفضاه

لكل الناس اللى شايفين ان الريفيين مهمشين ياريت تفوقوا احنا فى عصر ثورة المعلومات 

ولكل اللى زعلتهم المذكرات علشان حسستهم ان الريف اقل من المدينة انا مش آسفة خالص
انتوا اللى مش فهمتونى والمشكلة جواكم انتوا مش فى اى حد تانى ولا اى حاجة تانية 

ولكل الناس اللى منتظرين المذكرات بكرة ان اء الله هنكمل

مذكرات كاتبة ريفية 3

مساء الحب الافلاطونى والرومانسية العفيفة 

مسائكم نقاء زى قلوبكم بالظبط 

الحب ده حالة كدا مش ليها وصف اساسا بس ليها ظواهر و أدلة 

ازاى تعرف ان فى اتنين مرتبطين طبعا هتقولى تلاقيهم ماسكين ايدين بعض وماشيين على الكورنيش 

هرد عليك بمنتهى الحقد " اهو انا نفسى اجرب الحكاية دى "

هتقولى مش انتى مخطوبة يا بنتى يعنى عادى ده انا بقولك مرتبطين بس اصلا 

هقولك احنا معندناش واحد يخرج مع خطيبته اساسا ده غير اننا معندناش كوريش هههههههه

الحب فى الارياف لسه زى الافلام الابيض واسود بتاعت زمان دى 

لما عبدالحليم كان بيقف لسميحة تحت البيت ويفضل رايح جاى لحد ما تبص من البلكونة 

وجواب فى كشكول المدرس واهتمام بالنظرات و خوف يخليه يمشى وراها وهى مروحة كل يوم 

علشان بس يطمن انها وصلت البيت ولو بيحبها بجد عمره ما هيكلمها غير يوم ما يجى يقرا الفاتحة 

الحب عندما كمان التزام
 يقول لأهله انه بيحبها من ثانوى علشان يخلوا بالهم منها علشان فى الوقت المناسب يتقدملها 

كمان البنت متقدرش تعمل حاجة غير نظرات
وتتصاحب على اخته وبنت عمه و بنت بنت خاله و بنات الجيران 

المهم انها تكون قريبة وتعرف كل الاخبار من بعيد لبعيد 

تتلغبط لو بصلها وحد اخد باله و وشها يحمر لما يبتسملها حاجة كدا فيها ريحة زمان 

طبعا ده لو احنا بنتكلم عن الحب اللى بجد مش الارتباط المتعارف عليه 

لكن فى بردو عندنا الارتباط العادى اللى انتوا عارفينه لكن بيكون فضيحة و سمعة سيئة للبنت و الولد 

لكن هى بتقول لكل البنات اللى تعرفهم وهو بيعرف كل الشباب وبكدا بتكون هى كارت محروق وهو كذلك 

بس حتى وهى عارفة ان علاقاتها معروفة بتكون خايفة و دايما بتحاول تخبى و مش بتكون بالجرأة
اللى تخليها تقابله وتمشى معاه على الكورنيش الا فى حالات نادرة جداا وبيكونوا معروفين بالاسم كمان 

انا اول مرة شفت خطيبى كان يوم ما جه اتقدملى كان فاهم ان شخصيتى على المدونة والرغى والجنان 

هو ده اللى هيجى يلاقيه بس لما جه ولقانى مكسوفة خالص كدا و طفلة اساسا هو كمان اتكسف اوى 

قمت وافقت بقى علشان اتكسف اصل الولاد اللى عندهم حياء دول بقوا من بقايا الزمن الجميل 

بصراحة كنت خايفة جدا من فكرة انه قاهرى ومش هعرف اتعامل معاه بالرومانسية والحب اللى انا عرفاه 

وان عندهم الدنيا مفتوحة وخروجات بقى والحاجات دى 

لكن الحمد لله تفهم الوضع ولقيت انه فرحان جدا بالالتزام ده 

مشكلة كبيرة جدا بتواجه الحب وهى " الصديقة "
نظرا لان احنا مفيش عندنا حاجة اسمها ولد وبنت صحاب 

انا عمرى ما كان عندى صديق طفولة والكلام ده
ولا عمرى كلمت ولد فى الجامعة علشان اساله على حاجة اصلا 

ازاى بقى اقبل بفكرة ان حبيبى يكون ليه صحاب بنات 

وتأتى المبررات مهى قدامى من زمان هفكر فيها دلوقتى وانتى معايا ازاى يعنى .... دى مجرد صديقة 

دى اصلا مختلفة عنى جدا متنفعنيش ..... اعقلى ربنا يهديكى 

طيب انت تقبل انها تقولك نفس الكلام على صحاب زمان او ولد من قريبها حتى وتقولك انهم صحاب 

وطبعا هيقول لا علشان الولد عايز حبيبته ليه هو لوحده مفيش حد يكون قريب منها غيره 

الموضوع ده بالنسبالى عقدة من ضمن عقد الريف اللى عمرى ما هتنازل عنها 

وعن عقد ومتناقضات وغرائب وعجائب الريف هحكيلكم بكرة ان شاء الله 

ملحوظة صغنونة : المركز يختلف عن القرية والمدينة عن الفلاحين
انا من مركز ومدينة وبعيد عن القرى والفلاحين 

لكن كله ريف وارتباطهم ببعض هو سر جمالهم

مذكرات كاتبة ريفية 2

ونبدأ من حيث انتهينا 

الالتزام فى الريف مش مجرد لبس محتشم وحجاب 

الريف مش بياخد بالمظاهر يمكن فى المدن المظاهر  ليها دور مهم 

لكن الوضع عندنا مختلف تماما لان الناس كلها  عارفين بعض 

البلد كلها تعرف كل الناس اللى فيها وتعرف اهالى القرى المجاورة كمان

الالتزام عندنا اسلوب حياة بتعرفه بالصوت الواطى للبنات بالابتسامة الرقيقة 

اللى مستحيل تسمعلها صوت بالمشية المعتدلة اللى تخليك غصب عنك تبص فى الارض 

رغم انى اتحجبت فى ثانية ثانوى الا انى كنت اخر بنت اتحجبت فى مدرستى
واول بنت اتحجب فى عيلتىعلى اعتبار ان العائلات الارستقراطية مش بتحجب بناتها
كنوع من الانفتاح ومجاراة الواقع الحضرى

لكن انا وقتها كنت حابة الالتزام الدينى مش كان فارق معايا ان يكون باين عليا بنت عيلة وهاى كلس 

الالتزام كمان للولاد اصل عندنا الولد زى البنت وسمعة الولد تمام زى سمعة البنت 

علشان كدا احنا كمان بقى عندنا عنوسة وان كانت اكتر عنوسة ذكورية 

ايوة اصل الولد ممكن يلف على اكتر من بيت ويترفض لنفس الاسباب 

اصل الالتزام مش ولد رايح المسجد مع كل آذان ولا ان عمره ما عينه اترفعت فى بنت 

الالتزام ان الولد يكون متدين من جواه فيخرج ده فى صورة تعاملاته مع الناس 

فى التزامه الانسانى قبل مظاهر الالتزام الدينى 

ولان البيوت كلها عارفة كل حاجة عن بعضها بتلاقى ان حتى الولاد سهل اوى تعرف مين كويس ومين لا 

وده السبب الرئيسى اللى مخلى الكويس فى الريف اكتر من الوحش 

فى خوف من العادات والتقاليد حتى لو فى تحرر فكرى لكن بيكون بردو فى نطاق التزام نفسى 

من الافكار الغريبة جدا المنتشرة عندنا والخاصة بالجواز طبعا بالاضافة الى الالتزام اللى شرحناه فوق 

ان الدكتور مش يتجوز غير دكتورة او مهندسة والدكتورة استحالة تقبل باقل من دكتور ومهندس
اما بقى خريجى الكليات الاخرى بقى فيرضوا ببعض وطبعا الدبلومات لبعض وهكذا 

لذلك هتلاقى ان اهالى البلد بيستميتوا على دخول بناتهم كليات القمة حتى لو خاصة
علشان تضمن جوازه كويسة 

دى تقريبا النقطة الرئيسية فى الجواز تليها على طول نقطة العيلة 

والريف مقسم الطبقات الاجتماعية تبعا لترتيب العائلات مش الترتيب اللى انتوا عارفينه بتاع الدخل ده 

لالا خالص اول حاجة " اصل البلد " اللى هى كانت العائلة اللى كان منها العمدة
وولاده بيورثوا اللقب الى وقتنا هذا على فكرة وتغلب عليهم الطباع الارستقراطية 

وعائلات كبيرة اللى هما العائلات اللى كان عندها حيازات زراعية كبيرة واتجوزوا من عيلة العمدة 

اخر حاجة بقى بقية البلد ودول طبعا كانوا هما اللى بيخدموا العائلات اللى فى الاول 

والحكاية دى كانت معقدانى فى حياتى نظرا لان كل عريس كان يتقدملى

 " تيتا " تتنرفز وتقول هما نسوا نفسهم ولا ايه ده كان جده بيشتغل عندنا وابصلها بصة مش لذيذة 

واقولهم ما انا كدا مش هتجوز مهى البلد كلها كانت بتشتغل عندكم واسيبهم وامشى 

والسيناريو ده خلانى احب عبدالناصر جداااا
 واستغل اى فرصة علشان اقول ان عبدالناصر هو احسن رئيس حكم مصر 

كفايا انه وزع الاراضى على الفلاحين ويرد عليا اى حد سامعنى من اهلى ويقولى فرحانة علشان اخد ملكنا 

المهم انى فى الاخر اتخطبت لدكتور ودى كانت اكبر صدمة لكل الناس 

علشان انا آداب يبقى ازاى اتخطب لدكتور وتظهر الاقاويل
هى ازاى عرفت تجيبه ... معقول دكتور بجد ... اااااه صله غريب ...
يبقى اكيد عندهم الحكاية دى عادى ... ده كفايا ان جدها العمدة لازم تتجوز جوازة حلوة 

بس هى الحكاية كلها تتلخص فى " الحب " 

وعن الحب فى الارياف هقولكم بكرة بقى ان شاء الله

مذكرات كاتبة ريفية 1

احساسك بالانتماء بيقوى لما تبدا تبعد 

كنت دايما بستغرب لما اسمع حد مصرى عايش فى دول تانية 

بيتكلم عن انتمائه لمصر وحبه ليها اللى محسش بيه غير وهو بعيد عنها 

انا كمان حسيت اوى بانتمائى لمدينتى اللى عمرى ما حبتها الايام دى 

بقيت بقول وبمنتهى الفخر انى كفراوية مع انى كنت مخنوقه من اى حاجة فيها كاف بسببها اساسا 

كل ده بسبب احساس انى خلاص بقى كل اللى يربطنى بيها كام شهر وهبقى قاهرية ان شاء الله 

هو انا يعتبر مش ريفيه اوى علشان من مدينة مش قرية وبلدنا شبه المدن جدا 

نظرا للعمارات الفارهة والفيلات اللى بقت اكتر من الناس اللى عايشين اصلا 

ومظاهر الترف على شباب القهاوى فى بلدنا اللى بيلبسوا سنييه و كل واحد قاعد بالاب توب بتاعه 

وصف العربيات اللى قدام القهوة وكلها احدث موديلات 

ولو سمحتم محدش يقولى الثورة علشان احنا مش بنسمع عنها غير فى التليفزيون بس 

ولا حد يقولى بطالة وازمة اسكان الكلام ده مش موجود عندنا اصلا 

وده لان الحيازات الزراعية و جوازات السفر لجميع الدول العربية خلت بلدنا فى نعيم 

علشان كدا شباب بلدنا ملهمش فى السياسة ولا ليهم علاقة بسلفيين و اخوان 

مع استثناء قلة من السلفيين الرافضين لمظاهر الترف الفاحشة 

وطبعا الشباب اللى عندنا دول مش هيكونوا مختلفين عن البنات يعنى 

وطبقا لتصنيف الشباب ففى بنات عندها ظروف وبنات محترمة 

والظروف تبعا لقول احد الشباب ان البنت تكون مرتبطه مثلا مقضياها خروجات مثلا 

متحررة فى الكلام واللبس مثلا مع التشديد على مثلا دى فتحس ان مثلا لوحدها جريمة 

اما البنت المحترمة دى فهى البنت اللى مش بتخرج من البيت فمفيش حد يعرفها فتبقى بكدا محترمة بقى 

وطبعا التصنيف ده ظالم جدا للبنات لان واحدة زيى كدا اتخنقت من قعده البيت
ومفيش مكان تخرج فيه ومفيش صحاب تخرج معاهم اساسا 

وكلمة عيب اللى الناس بتقولها اكتر ما بتقول بسم الله الرحمن الرحيم هى الدستور اللى بيربوا عليه البنات 

ايوة انا كنت شايفة كدا وكنت مخنوقه جدا من التزمت فى كل حاجة 

بس اكتشفت ان التربية دى احسن كتير مليون مرة من التحرر والانفتاح
وان كلمة ريفية صفة جميلة جدا لما تكون مرادفه للإلتزام

عايزين تعرفوا ليه هقولكم بكرة بقى ان شاء الله :)

ازدواجات صامته

(1)

بعض العبارات لا تحتاج لكلمات

فبعض العبارات تحدث داخلنا فقط لا احد يسمعها

ولا احد يتاثر بها كما ان لا احد يدرك وقعها علينا

....

تبعنى الى حيث كنت أقف ورمقنى بتلك النظرة التى اعادتنى الى عشر سنوات مضت 

الى حكاية حب تعدت اساطير العشق القديمة كما كنت أظن 

تركنى أمام عينيه ولم يلقى بالتحية .. وهل كنت لإجيب إن ألقاها ؟!!

فما كان ليستحق ان اترك له حذائى على درج العمر كى يبحث عنى 

ولا كان وفيا بالقدر الذى يدفعنى ليتناول سم الحنين اليه 

رمقنى بنظرة أخرى وتبعها بأخرى وأخرى حتى مضت ساعه 

كلانا صامتا كما يبدو لكن حوار ما يدور بداخلى وما ان انهيته حتى مضيت

(2)

بعض الكلمات تحمل فى طياتها أحاديث لم تحكى بعد

فبعض الكلمات تكفى لإحداث اقوى زلزال بالروح واعنف بركان بالقلب

ولن تحتاج للمزيد من العبارات التوضيحيه فهناك كلمات تختزل العمر

....

كعادتها معى هاتفتنى لتخبرنى بما حدث بينهما 

فهى تثق كثيرا برأيى ودوما ما تخبرنى ان نصائحى سر سعادتهما 

لكن تلك المرة مختلفة بعض الشئ فصوتها كان مفحما بالغضب 

اكاد اشعر بيديها ترتعش ودقات قلبها تعلو و تنخفض فى سرعه غير مسبوقه 

لا تبكى ولكن انفاسها تعلن قرب موعد الدمعات 

قصت على ما حدث ومع محاولاتى لتدارك الامر وتهوينه عليها سألتنى 

هل غفرتى لـ (..... ) عندما .. قبل ان تكمل  تداركت ما فعلت فعادت لتقول لم اقصد 

قاطعتها انا بدورى تلك المرة و طلبت اكمال الحديث فى الصباح 

لكن الصباح قد ابتعد كثيرا عنى وكانها اعادتنى بإسمه الى عمرى المظلم 

حيث لم ارد يوما ان اعود 

(3)

الصمت هو تلك المرحلة الاكثر صدقا فى المشاعر والكلمات 

هو انت وانا وآلاف المساحات المزهرة بالخيال

 جميع الكلمات امام سحر عينيك تتأمل مبتهجة 

فلا شئ يكتب ولا كلمات تقال فقط صمتى وبعض الابتسامات 

.....

انها المرة الاولى التى نسير معا على ضفاف النيل 

كم حلمت كثيرا بذلك اليوم وكم تمنيت لو تصحبنى الى هنا لأتامل الشروق بصحبتك 

تعلم انى اعشق الشروق على عكس العشاق مفتونة انا بالشمس 

اردت حبك حقيقيا كالضوء قويا كالوهج معلنا كالنهار 

وادعو الله مع كل صباح جديد ان ينير حياتى بك 

وها انا الآن اسير جوارك وان كنت لا استوعب انك بالفعل اصبحت لى 

تعلم كم أحب النظر اليك لكن اليوم لك سحر خاص وضوء الشمس ينكشف 

ويسدل على وجهك اضاءة ذهبية خافته .. يا الله 

لا اعلم هل مللت من الصمت ام لا لكنى مستمتعة للغاية بتأمل ابداع الله فى الكون وفيك 

شركاء الجريمة

هو انتوا بتكونوا مبسوطين 

وانتوا بتعملوا شير لفيديوهات الانتهاكات ؟؟

شئ مشرف انكم تعملوا شير لصور التعذيب !!!

هى ايه الفايدة من انتشار صور وفيديوهات فيها انتهاكات اعراض

هو انتوا شايفين انكم كدا بتحموا الثورة او بتعرفوا الناس ان الداخلية ومرسى زبالة 

عاجبكم طعم الوجع والاهانة ؟!!

الناس اللى بتجيب صور من محاضر البنات اللى تم الاعتداء عليهم وتعمله شير على النت 

ايه الهدف ؟ ارتاحتوا نفسيا كدا ؟ حليتوا المشكلة ؟

وبتستغربوا ان القرف ده بيزيد ؟؟؟

مهو انتوا السبب 

ايوة احنا لينا النصيب الاكبر من الجريمة 

مهو لما العيون تتعود على المناظر دى والقلوب تتعود على الوجع 

هتبقى حاجة عادية مش هنستصعبها بعد كدا لا بالعكس هنشوفها ومش هنتأثر 

ده بالنسبة للتاثير اللى هيحصل لاجيال كتير جاية 

اما بقى التاثير اللى بيحصل للشخصيات اللى انتوا بتفضحوها دى 

هو اللى انتوا شفتوه النهارده من حمادة 

هو المفروض كان يطلع يقولكم اه انا حصلى كل ده طيب ما انتوا شفتوا اعترافه هيفيدكم بايه 

لو الداخلية عرته مرة فأنتوا عرتوه مليون مرة 

مع كل صورة وكل فيديو كان بيتعملهم شير فى كل مكان وفى كل وقت 

كان ممكن محدش يعرف عنه حاجة وكان ممكن محدش يعرف اسمه ولا اى حاجة عنه 

لو مكانش فى كاميرا صورته كان ممكن يكون مجرد خبر وكلام هيتنسى 

كان هيبقى التاثير النفسى عليه اخف بكتير اوى لو مكناش احنا كمان اشتركنا فى الجريمة 

ايوة كفايا اللى هو فيه ارحموه بقى وارحموا كل واحد بيتعرض للاهانة فى بلده 

كفايا جبروب البلد والذل اللى شايفينه 

ولا هو البلد دى بقى شعبها كله مش فاضى غير للخوض فى اعراض الناس 

قال رسول الله صلى الله عليه وسلم 

" من رأى عورة فسترها كان كمن أحيا موؤدة "

" لا يرى مؤمن من أخيه عورة فيسترها عليه إلا ادخله الله بها الجنة "

" المسلم أخو المسلم لا يظلمه ولا يسلمه ومن كان فى حاجة أخيه كان الله فى حاجته 

ومن فرج عن مسلم كربه فرج الله عنه كربة من كربات يوم القيامة ومن ستر مسلما ستره الله يوم القيامة "