Wednesday, December 12, 2012

لأنك حبيبى




المفروض انى اكتب البوست ده فى مدونتك 
بس انا فرحانة اوى بالبوست اللى انت كتبتهولى 
علشان كدا هكون شجاعة اكتب هنا وخلاص 
متفقه معاك ان كل حاجة بينا كانت غريبة جدا ومش منطقية 
بس احلى حاجة بتحصل ف حياتنا هى اللى بتكون عمرها ما خطرت ببالنا 
وجودك فى حياتى هى الصدفة اللى صالحتنى على الدنيا 
اصل فى اشخاص لما بتقابلهم حياتك بتتقلب حزن وتلاقى المشاكل حواليك من كل مكان 
مش شرط يكونوا هما السبب فيها بس ده دليل ان مش فيهم خير ليك 
انت بقى من النوع التانى اللى بمجرد قربهم من مدار حياتك بحركوه فى اتجاه الفرح 
كل الناس ملاحظة قد ايه بقيت بهتم بحاجات عمرى ما اهتميت بيها 
بقيت عايزة اعمل اى حاجة علشان تبقى فخور بيا بفرح اوى لما بتشجعنى 
وبفرح اكتر لما بتحسسنى انى من غير ما اعمل اى حاجة عجباك كدا وحبتنى كدا


المفروض ان النهارده يوم مميز وانا من زمان كان نفسى يحصلى حاجة مميزة فى اليوم ده 
يمكن فكرت اخطط علشان اى حاجة تحصل بس فى الاخر سيبتها لربنا 
ودعيت ربنا يبعتلى اشاارات مميزة والحمد لله كانت لحظة مميزة 
لما كلمتنى الساعه 12  واتمنيت انت ودعيت انا 
ولما كتابى نزل المكتبات ولما مسكت صندوق ورق بايدى اللى فيه بنفسجياتى
وكمان لما لقيتك بتتصل وتقولى على عرض انى انشر فى جريدة 
كل ده ف يوم واحد وكل ده مرتبط بيك 
على فكرة تاريخ خطوبتنا كمان مميز جداااا اكتشفت الحكاية دى النهاردة بالصدفة ههههههه
اساسا انا حافظة كل التواريخ اللى بينا مش لازم تكون متشابهة علشان تكون مميزة 
كفايا انك تكون معايا فيها 
كل لحظة معاك استثنائية ومميزة
انا كمان مميزة لانك حبيبى
واستثنائية لانى حبيبتك 
بحبك

11 التعليقات:

مروه زهران said...


ربنا يفرحك دايما
ويخليكم لبعض

shreif elsaftty said...

رائع جدا ماشاء الله ربنا يخليكوا لبعض يارب

salah abd el wahed said...

جميلة بجد . ربنا يخليكو لبعض وفرحكو دايما
ويارب يتمملكو علي خير ويوفقكو سوا

اللى ربي خير م اللى اشتري

ابراهيم رزق said...

عينى يا عينى
ربنا يخليكم لبعض
انا ماسك الخشب اهو

تحياتى

Aya Mohamed said...

مروة

تسلميلى يا حبيبتى
ربنا يسعد قلبك يارب <3

Aya Mohamed said...

شريف

ربنا يخليك يا شريف
ميرسى جدا :)

Aya Mohamed said...

صلاح

ميرسى جدا
مش دايما اللى ربى خير من اللى اشترى
الانسان بيتغير مع الوقت خصوصا لما يكون
اللى ربى ده باع وخان و غدر
ربنا يسعدك اكتر واكتر ويباركلكم يارب

Aya Mohamed said...

ابراهيم رزق

ربنا يخليك يا خالو يارب
كنت مفتقدة كومنتاتك جدااا
:)

Alone Spirit said...

salah abd el wahed
واحيانا بيبقى البنى ادم عايز يتربي من اول وجديد ولو وقع تحت ايد حد هيربيه هو واللى حدفه على البلوج

Amira Ahmed said...

ربنا يديم عليكم السعادة والهنا
بفرح اووووووووى لما بشوفك فرحانة اووووووووى كده يارب ما يحرمنى من سعادتك وفرحتك عشان انتى تستاهلى كل حاجة حلوة :))))

Aya Mohamed said...

اميرة

وحشاااااااانى بجد
انا بفرح كل ما بحس بفرحتك اصلا يعنى
ربنا ما يحرمنى منك ابدا يارب
ونفضل سوا دايما فى كل حاجة حلوة جاية ان شاء الله
بحبك انا <3