Monday, December 17, 2012

خارج النص 2





اختفاء صوتى .. حزن انا عارفة لانه اتكرر قبل كدا 
بس انا فعلا مش بكون عارفة انا حزينة ليه 
افتكرت لما حصلتلى قبل كدا وقولتيلى " بتقلقينى عليكِ "
لما حصلتلى المرة دى انتى اول حد جه ف بالى 
كان نفسى اقولك ينفع تحضنينى 

.........................

فاكرة لما كنا بنرغى لحد الفجر واقرالك الكلام اللى بكتبه 
وتقوليلى رايك وتشجعينى اكتب اكتر 
فاكرة لما كنا بنزعل ونتصل نحكى لبعض ونعيط ونرخم على بعض 
فاكرة التفاصيل بتاعتنا المجنونة اوى 
ورسالة عيد ميلادى اللى وجعتنى اوى انها مجتش السنة دى 
واتصالى اللى اتاخر يومين عن عيد ميلادك 
طب هو احنا ليه بقالنا كتير كدا بعيد ... وحشتينى 

.............................

نفسى كل البنات يفوقوا من وهم التضحية والحب الضعيف 
هو لو بيحبك بجد مش هيقبل انك تضحى 
لازم تكونى قوية خلى قلبك فى اديكى مش تتنزلى عن حقوقك 
لو اتنازلتى مرة علشانه هيتنازل عنك مع اول واحدة تقدمله عرض افضل 

...............................

الفراق اهون كتير اوى من الخيانة 
الفراق جرح لحظة والخيانة جرح عمر 
لما قولتلها فى اغنية لأنغام بتقول كدا .. دمعت 
فسمعتها انغام تانى بس وهى بتقول 
ما تفوق انا من غيرك او بيك مش واقفة حياتى عليك وبعيش وهعيش 
وهواك كان غلطة تمنها كبير انا جيت على نفسى كتير وخلاص مبجيش 
قالتلى هحب أنغام علشان انتى بتحبيها كدا 

.................................

هو انت لو مش جنبى انا كنت هقدر أعيش ؟
كان هينفع اكمل حياتى وابقى قوية كدا ؟
كنت هقدر اخف من كل الجروح اللى فى قلبى ويبقى عندى حد اثق فيه ؟
ولا حد اصلا كان مصدق انى هقدر اضحك تانى وان دموعى ممكن يجى يوم وتخاصمنى 
انت كلمة السر لكل حاجة حلوة ف حياتى 

..................................

السنة قربت تنتهى واحب اقول ان السنة دى احلى سنة فى حياتى 
على كل المستويات الحمد لله  " الشخصية طبعا "
بهرتنى بكمية الاحداث اللى فيها والمفاجات اللى حصلت 
فرحتنى بكل الناس اللى خسرتها وكل الارواح الجميلة اللى كسبتها 
بكل الهدايا اللى جاتلى واللى عمرى ما اتخيلت انها توصل 
اللهم لك الحمد كما ينبغى لجلال وجهك و عظم سلطانك 



8 التعليقات:

Asmaa Amer said...

الحمد لله إن السنة اللى فاتت كانت حلوة معاكى ,وإن شاء الله السنة الجاية هتكون أحلى وأحلى.
كلامك عن صاحبتك معبر أوى وعجبنى جداً , ربنا يخليكم لبعض وتفضلوا سوا دايما . ويرحمها من عذابها وتنسى بسرعة بدل ماتعمل زى :(

Lobna Ahmed said...

حلوة التدوينة دي في بداية يوم جديد
يا رب كل الأيام تبقى حلوة وتكوني مبسوطة دايما يا يويو

ريـــمـــاس said...

مساء الغاردينيا آيه
بحب كلماتك وإحساسك الي تكلمتي عنها اوعي تبعدي عنها وطالما وحشاكي اكيد انتي وحشاها بالنسبة للفراق مؤلم اووي اهم حاجة في البوست انه السنه عدت عليكي حلوة ويارب كل سنة تبقى احلى واحلى :) "
؛؛
؛
لروحك عبق الغاردينيا
كانت هنا
Reemaas❤

;كارولين فاروق said...

عجبني كلامك جدا وخاصه وهم
التضحيه ونصيحتك للبنات في الصميم
جميل كلامك
تحياتي

Aya Mohamed said...

اسماء

حبيبتى ربنا يسعد قلبك ان شاء الله
ويعوضك خير ان شاء الله
مبسوطة جدا انك رجعتى التدوين تانى :)

Aya Mohamed said...

لبنى

انتى احلى اصلا يعنى
ربنا يخليكى يا لبنى ويحلى ايامك يارب

Aya Mohamed said...

ريماس

انا بقى بحبك انتى كلك كدا
ربنا يخليكى ليا يارب ويسعد ايامك يا حبيبتى <3

Aya Mohamed said...

كارولين

وانا سعيدة جدا بتعليقك
ويارب كل البنات تفوق من وهم التضحية فعلا
نورتينى