Tuesday, November 20, 2012

افتكاسات واقعية


- هو اصلا كل اللى بيكتبوا بيكونوا واخدين نفس الفكرة
 بس الابداع فى انك تصغيها صح وتوصليها بأسلوبك مفيش حاجة اسمها دى فكرتى 
" يعنى انا طلعت بشتغل نفسى وانا اللى كنت فاكرة انى بفهم  :))) "

........................

- كتابى الوحيد اللى اتاخر اوى كدا هو فى سبب خاص بيا ؟
- كتابك خلص اصلا .... بس الغلاف هو اللى لسه بس متقلقيش 
" يا رااااااااجل يعنى الغلاف اللى بقاله 5 شهور جاهز هو اللى لسه 
والكتاب اللى راجعته 4 مرات من الملل ولسه مسلماه من يومين هو خلص سبحاااان الله "

........................

- حضرتك رتبت المشاركات على اساس ايه مش ده  الترتيب اللى متفق عليه 
- على اساس الاسبقيه فى الاشتراك وارسال الحوالة 
- طيب انا رقم 9 و اللى سبقونى كانوا فى الاخر 
- لا ما هى المشاركات اللى فى اول الكتاب مش بتخضع لقاعدة الترتيب 
" حسبى الله ونعم الوكيل يتبعها هستريا ضحك "

......................

- لو قولتى انك محبطة فى ناس هتفرح بكدا 
- طيب انا محبطة جدااااااا 
" يا أيها الناس اللى عايزين تفرحوا فيا اتفضلوا معانا :)))) "

.......................

- إنتى عمرك ما استسلمتى .... اكتبى 
- مش عارفة أفكارى خلصت 
- جدديها 
" حوار بينى وبين نفسى بيحصل كل يوم 
مع مج النسكافية وصوت أنغام وبردو مش عرفت اكتب "

.........................

- متزعليش 
- مش زعلانة ما انت عارفنى رخمة ومفيش حاجة بتقدر عليا 
" والله نظرة من عنيك بالدنيا واللى فيها
 ومش عايزة اوصل لحاجة غير انى اشوف دايما فرحتك بيا "

........................

- الكتابات الجيدة بتفرض نفسها 
- مش مقتنعه
" لقيت نفس الجملة وانا بقرا رسايل الفيس فى 7 رسايل "

......................

الاربعاء 21 نوفمبر 
 إصدار النسخة الالكترونية من كتاب نوافذ مواربة 
وطبعا اسمى مكتوب بس ضمن اسماء اعضاء لجنة التحكيم 
تجربة مميزة جدا ليا وبعتبرها الخطوة التانية فى حياتى الادبية 
الكتاب يستاهل انك تقروه اكتر من مرة 
ويستاهل تحضروا حفلة الاصدار لو انتوا من القاهرة هتلاقوا التفاصيل هنا 
ولو انتوا من المنصوة او قريبين منها تقدروا تعرفوا التفاصيل من هنا 
اما لو انتوا مش هتقدروا تحضروا فممكن تحضروا اليكترونيا من خلال الحساب ده 

12 التعليقات:

ليلى الصباحى.. lolocat said...

هى حالة بالنهاية :)

خليط ومزيج من التوتر والترقب والانتظار والاحباط والعناد والاصرار والتألق لكن بالنهاية يتشكل انثى جميلة ورقيقة وحساسه اسمها اية محمد :)

بالتوفيق حبيبتى فى كل حياتك ....وكل شىء بقدر وتوقيت وان شاء الله كتابك يخرج للنور فى وقته تمام ( مليون مبرووووووووك )

دايما مبدعة ودايما فى رقى يارب

تحياتى بحجم السماء

Aya Mohamed said...

يا الله ..انتِ اللى رائعة وراقية
تسلميلى يا حبيبتى يارب
ربنا يخليكِ ويسعد قلبك دايما يارب

فشكووول said...

اللى يقول حاجه صدقيها وخلاص مش حتخسرى حاجه .. اصل يمكن الغلاف بالالوان واربعه لون يبقى بياخد وقت .. ويمكن الناشر عايز فلوس ومافيش فلوس .. ادى له اى عذر والسلام
انا بقى جيت هنا بناء على حملة التدوين والله تقريبا نسيت بتوع البلوجر .. منه لله الفيس بوك ورشة صنع الحديد والخبط والرقع

Aya Mohamed said...

ما انا مش عملت حاجة بالعكس
قولتله هعدل فى الغلاف بقى
مدام فاضيين ومش ورانا حاجة ههههههه
نورتنى بجد وممتنه لحملة التدوين
اللى خلت حضرتك تنور مدونتى :)

مصطفى سيف الدين said...

معلش يا آية
بيقولك كل تأخيرة و فيها خيرة
و بالنسبة للكتابة و افكارك المتجددة
اصبري شوية و هتلاقيكي بتكتبي على نفسك من كتر الافكار
محتاجة بس شوية هدوء و صفاء ذهن

مروه زهران said...

حلو كوكتيل الفضفضة ده يا آية
بعدى دايما من هنا وبقرألك بس للأسف مش بعرف أعلق
بس حبيت أشاركك المرة دية
ربنا يحلى أيامك
بالتوفيق يا قمر :)

محمود(باحث عن حب) said...

يارب يسعدك يارب
والكتاب يطلع يارب يدخل الفرحه فى قلبك

خواطر حلوه حوالين الكتاب

ريـــمـــاس said...

صباح الغاردينيا آية
بجد وحشتيني ياأرق بنوتة ولاتزعلي كلها حاجات وحتعدي وربنا يوفقك دايماً "
؛؛
؛
لروحك عبق الغاردينيا
كانت هنا
Reemaas

Aya Mohamed said...

مصطفى

:)
ربنا يسهل ان شاء الله
ميرسى اوى يا مصطفى

Aya Mohamed said...

مروة

وانا مبسوطة اوى بالمرة دى يا حبيبتى
منورانى دايما حتى لو من غير تعليق
:) <3

Aya Mohamed said...

محمود

ياااارب يا محمود
يسمع منك ربنا
ميرسى اوى ليك :)

Aya Mohamed said...

ريماس

ربنا يخليكى ليا ياررررب
انتى وحشانى اكتر اصلا :*