الاثنين، 31 ديسمبر 2012

بين عامين


فى نهاية السنة تلاقى كل الناس بتقول كانت سنة كبيسة 
يارب اللى بعدها تبقى احلى 
ويتكرر ده كل سنة بستغرب اوى وقتها هى تغيير ارقام السنين هو المشكلة 
ولا حياتنا هى اللى مش بتتغير ومش بنحاول نغيرها 
هو احنا عايزين السنة تبقى حلوة من تلقاء ذات نفسها كدا ازاى يعنى 
جربت تجيب ورقة فاضية وتكتب فيها كل الحاجات الحلوة اللى حصلتلك فى السنة اللى فاتت 
وقصادها ورقة تانية فيها الحاجات اللى مش حلوة او اللى كان نفسك تحصلك ومش حصلت 
وتشوف انهى ورقة اكتر 
لو الورقة اللى كلها فرح طلعت اكتر يبقى انت كدا ماشى صح 
لو بقى الورقة اللى فيها زعل طلعت اكتر يبقى عيد حساباتك تانى واكتب ورقة للامنيات 
وكل ما تحقق منها حاجة ف السنة الجديدة علم عليها 
كدا ان شاء الله هتكون سنة سعيدة عليك 

" جملوا أعوامك بالامنيات و استغلوها ف العمل " 

.........................

اتاخرت فى انى اكتب بوست السنة دى علشان حبتها اوى 
كنت عايزة استنى للساعات الاخيرة فيها 
السنة دى فرحتنى فى كل حاجة فى حياتى صالحتنى على نفسى وعلى الدنيا 
غيرت فيا حاجات كتير اووووى ضيعت اثر 2009 و تفوقت فى جمالها على 2010
وادتنى بداية قوية اكتر من 2011  كل يوم فيها كان مميز و جميل وكل شهر كان فيه مفاجات 
متفائلة بـ 2013 يمكن علشان انا اساسا بحب رقم 13 يمكن علشان رقم 3 بيمثلى حاجة مش عرفاها 
يمكن علشان بدايتها ثلاثاء كمان وانا من عشاق الثلاثاء اصلا مع ان مفيش حد بيحبه بس هو انا مجنونة كدا عادى 
يااااارب تكون سنة سعيدة على كل الناس وعليا يااااارب ودايما مع بعض واقوى ببعض 
ومصر تستقر وسوريا تنتصر و فلسطين تتحرر 
وكل المسلمين فى كل مكان يكونوا فى افضل حال 

.............................

مش هقول اللى زعلان منى ياريت مش يزعل لان انا عارفة انى مش مزعله حد اصلا ههههههههه
واللى زعلنى انا مسمحاه وعفا الله عما سلف 
بس اللى كانوا صحابوا ومش بقوا بمزاجهم فانا مش بعرف ارجع فى علاقات اتكسرت للاسف معلش 
حاولوا فى اتجاه تانى ربنا يكرمكم بصاحبة احسن منى مليوووووون مرة 
اى حد بقى عايز يطلب منى اى حاجة او يسالنى فى اى حاجة او يرغى لمجرد الرغى والفضفضة 
فانا بفرح جدااااا بالكلام معاكم 
اما بقى اللى عايز يكتب امنياته و يسيبها فى الامانات عندى فعلى الرحب والسعة هكون سعيدة جدااا 

...........................

مش تنسوا اهم حدث فى 2013 ان شاء الله 
وهو طبعا حفل توقيع كتابى عايزة اشوف كل المدونين وكل صحابى 
واعزموا كل اصحابكم ونجيب تورته شيكولاته ونسكافية و قهوة 
ونعمل قاعده عربى كدا ونرغى مع بعضينا :)))

استمتعوا باللحظات و تفائلوا واضحكوا استبشروا خير وان شاء الله ربنا هيكرمنا 



6 التعليقات:

موناليزا يقول...

happy new year my dear friend ♥

ليلى الصباحى.. lolocat يقول...

اتمنى ان يكون القادم اجمل وافضل لكل البشر ياااااااارب
وكل عام وانت بخير حبيبة قلبى

تحياتى بحجم السماء

ليلى الصباحى.. lolocat يقول...

اتمنى ان يكون القادم اجمل وافضل لكل البشر ياااااااارب
وكل عام وانت بخير حبيبة قلبى

تحياتى بحجم السماء

ابراهيم رزق يقول...

نعيب زماننا والعيب فينا وما لزماننا عيبا سوانا

كل سنة وانتى طيبة

عام سعيد عليكى

تحياتى

زينة زيدان يقول...

كل عام وأنتِ بألف خير

وأتمنى أن تحمل لكِ سنة 2013 عطاء أكثر من سابقتها
كم أود لو أستطيع أن أكون بينكم في حفل
التوقيع..تقبلي تهانيّ الحارة

جميلة لمحة التفاؤل في كلماتك

لك تحياتي عزيزتي

ŞΘ๏ŞΘ๏ يقول...

كل عام وانت بانتم صحه وعافيه

واتمنى لك سنه جديده اجمل

تقبلي مروري البسط

تحياتي