الثلاثاء، 15 يناير 2013

ازدواجات " احتفالية مفردة "




الهدف الاساسى من المدونة هو تدوين اللحظات السعيدة 
والمواقف الهامة واى حاجة عايزة افتكرها فى وقت ما بعد كدا 
بس اوقات لما يكون فى كلام كتير اوى جوايا مش بعرف اقول ولا اى حاجة منه 
واوقات لما اكون مش لاقية حاجة اتكلم فيها بطلع احلى كلام 
فى الفترة الاخيرة كان فى حاجات كتير اوى عايزة ادونها يمكن نجاحات الحمد لله 
يمكن غضب و ثورة اوقات واحباطات فى عز الفرح 
كان فى مليون حاجة ينفع اكتب عنها بس مش عارفة ليه مش كتبت ولا اى حاجة
ولهذا السبب جت التدوينة دى متأخرة جدا 

" أعيد أكتشافى كلما مررت بموضع قلمى فينصت بشغف ولا أكتفى  "

..........................

حالات مفردة .. اول كتاب يوقع الكترونيا 
مانشيت لاخبار كتير انتشرت فى الفترة الاخيرة فى مواقع اخبارية كتير 
صدى البلد - فيتو - اخبارك - الجونال - مدونة احمد طوسون - دنيا الرأى 
فرحتنى اوى الاخبار دى حسيت انى نجحت بوجودكم جنبى 
بجملة " انا فرحانة بيكى اوى " اللى وصلتنى فى رسايل كتير على الفيس 
لدرجة انى ادمع مع كل بنوته تقولى كدا 
مبروك اللى اتقالتلى مع كتاب كبار و صحفيين مشهورين و اعلاميين ادتنى ثقة كبيرة اوى ف نفسى 
لانى كنت خايفة اوى من انها تجربة مش مضمونة هتنجح ولا لا 
بس بكلامهم وتشجيعهم حسيت انى كدا نجحت اصلا 

" يكفل لك الإختلاف دوما براة الحلم "

.............................

مش هينفع اسافر القاهرة ... ولا المنصورة ..... مش هينفع سفر 
كان نفسى اكون معاكم ف معرض الكتاب او حتى فى اى حفلة توقيع واقعية 
هو يعنى لو مش وقعت على الكتاب مش هتشتروه :(
اكيد هيجى يوم من الايام و نشوف بعض واوقعلكم يعنى 


وبعدين انا كنت عاملة حسابى على الحكاية دى وكتبتلكم فى الاهداء 
علشان لو مش قدرت اوقع باسم كل واحد فهو يعرف انى بهديله كتابى 
مش تزعلوا منى والله لو اقدر كنت لفيت محافظات مصر كلها بس غصب عنى 
كل حفلة توقيع لاى كتاب اعتبروها حفلة توقيع لكتابى واتكلموا عن كتابى بدالى 
مهو اساسا بيعبر عن حالات كل واحد فيكم عادى يعنى انا مفوضاكم بالنيابة عنى :)

" أعترف بأنى تعبت من طول الحلم الذى يعيدنى إلى أوله وإلى آخره


دون ان نلتقى فى اى صباح ... سأصنع أحلامى من كفاف يومى لأتجنب الخيبة "
محمود درويش 

...............................

من الحاجات المهمة جدا اللى فرحتنى اوى استفتاء goodreads لأفضل الكتب الصادرة ف 2012 
لحد اللحظة دى كتابى وصل للترتيب 18 ورغم انى مش مقتنعه اوى بالتصويت ده 
لان الاعداد اللى بتشارك ف الفوت مش كبيرة اوى بس بردو فرحانة جداااا لان كل ما بدخل اشوف 
بلاقى الكتاب بزيد وده معناه ان فى ناس بتدخل تشارك كل شوية و منهم اللى بيدى صوت لكتابى 
كمان فرحانة بكل الانطباعات اللى وصلتنى لحد دلوقتى من الناس اللى قراوا الكتاب 
فرحت عيون الناس بيك نعمة تستاهل انك تعمل المستحيل علشان تحصل عليها

" على هذه الارض ما يستحق الحياة "
محمود درويش 



..............................

ممتنة لكل المدونين اللى حضروا الحفلة واللى كانوا عايزين يحضروا ومش عرفوا 
واى حد ممكن يدخل الايفينت تانى و يكتب اى حاجة عايزها او يناقشنى فى اى حاجة 
الحفلة مفتوحة الى ما لا نهاية المهم ان الكتاب يكون يستاهل تهتموا بيه 
و يكون كلامى عجبكم واحساسى وصلكم 

" أمنيتى ان ألمس تلك المساحة المفردة بقلوبكم "



هامش
* الكتاب هيكون موجود ف معرض القاهرة الدولى للكتاب بجناح دار ليلى خيمة 2
** صفحة الايفينت " حفل توقيع كتاب حالات مفردة إلكترونيا "


6 التعليقات:

ابراهيم رزق يقول...

مبروك الكتاب مرة اخرى يا ايه

وياريت تقدرى تحضرى القاهرة بجد هتفرق كتير

تحياتى

ليلى الصباحى.. lolocat يقول...

السلام عليكم
مبروك حبيبتى وعقبال الكتاب الألف :)
وان شاء الله يحقق احلامنا كلنا بفضله ورحمته

( ارجو ان تذهبى لرسايلك بالفيس )

تحياتى بحجم السماء

مصطفى سيف الدين يقول...

الف مبروك يا ىية
تستحقي طبعا
ربنا يوفقك دايما و من نجاح لنجاح

aya mohamed يقول...

ابراهيم رزق

الله يبارك ف حضرتك
ربنا يسهل ان شاء الله

aya mohamed يقول...

ليلى الصباحى

الله يبارك فيكى يا حبيبتى
تسلميلى يارب

aya mohamed يقول...

مصطفى سيف

ربنا يخليك ويسعدك يارب
بالتوفيق والنجاح ليك انت كمان يارب