الأربعاء، 18 يوليو 2012

من مذكرات طفلة فى العشرين 2




انه الثلاثاء وأشعر دوما ان الثلاثاء يحبنى كثيرا 
لذا من بين أيام الاسبوع الاخرى أنتظره وأبتهج لقدومه 
لا أذكر سببا على الاطلاق وكلما لاحظ أحد زملائى فى العمل حبى له 
يتطلع الى جدول حصصى فيجد ان الثلاثاء دوما مكتظ 
فتتحول أعينهم إلى فى نظرة غيظ :))

------------------------

يغار من الكتابة هكذا قلت لوالدته فبدا عليها الاستغراب 
وقالت " استغلى جميع  الفرص حتى وان كانت غضبه
فى المزيد من الابداع وانا أثق فى قدراتك "
فألزمنى الاستغراب الصمت 

--------------------------

عارف رمضان اللى فات كانت اول سنة اصلى قيام الليل طول الشهر
ولما كنت بضعف انت كنت بتقوينى علشان كدا كنت بعد الفجر بصلى قضاء حاجة 
وادعى ربنا تفضل جنبى طول العمر وتقوينى اكتر واكتر
ولما ربنا كتبك ليا نويت ان كل سنة ازود فى العبادات واقرب لربنا اكتر وانت معايا 

-----------------------------

- ايوة انا عايزة اتجوز يوم الثلاثاء 
- اشمعنا الثلاثاء يعنى الناس بتتجوز الخميس او الجمعة او حسب حجز القاعة 
- مش ليا دعوة بقى عايزة ثلاثاء انا 
- ادينى سبب مقنع طيب 
- بحبه 
- وده اكتر سبب مقنع مش يخلينى اعمله ثلاثاء 

-------------------------------

ينفع لما تزعل منى تطبطب عليا 
انت بتضايق وتزعل وانا اللى بيفضل واجعنى زعلك 

--------------------------------

هل تزهد عيناك النوم لغصة بقلبك منى ؟
كثيرا ما يردد قلبى السؤال مع تقبيلك وجنتى صباحا بعد شجار 
مرددا بانك تحبنى أكثر مما أحبك 

----------------------------------

احلى حاجة فى بتنا انه شكلنا اوى وانت واخدنى على قد عقلى 
وسايبنى اعمل فى الحيطان اللى انا عيزاه 
والزق حاجات بتنور فى الضلمة تفتكر ولادنا هيخافوا منها 
المشكلة اللى بجد بقى ان انا اللى اخاف منها 
وقتها لو قولتلك تغير لون الشقة هتعمل فيا ايه ؟

------------------------------------

- أحلى عروسة لعبة لأحلى عروسة بجد
- أحلى جملة سمعتها ايه ده طلعت رومانسى :$
- لا وايه العروسة بتمشى وبتقول وحوى يا وحوى
- ههههههههههههههه على اساس انى طفلة يعنى
- لا خالص هو انا قلت حاجة
- طيب استنى اروح افرجها لماما

-------------------------------------

 فى حضرتك تفقد الاشياء تماسكها وتنجذب إليكِ حتى أنا 
قالها منذ لحظة ضعفه الاولى وألزمنى عهدا بأن أكون له أقرب من هو لذاته 

-----------------------------------------

8 التعليقات:

Amira Ramadan يقول...

بحب كل حاجة بتكتبيها خاصة المذكرات دى عشان بتعرفنى اكتر على ارق بنوتة عرفتها فى حياتى

يارب دايما فرحانة ومبسوطة وتبقى احلى عروسة
وتتجوزى يوم الثلاثاء*_^
:)))

مصطفى سيف الدين يقول...

تصدقي
التلات ده انا باعتبره ارخم ايام الاسبوع ولو عليا نفسي الغيه :)
كان هو و السبت ايام غلسة في المدرسة حصصهم كتيرة و دايما الجدول يصادف يوم التلات يبقى يوم تقيل مافيهوش لا مجالات و لا العاب
بعدين السوق عندنا يوم التلات يعني زحمة و صحيان من الصبح و قرف و البيت يبقى مزحوم يوم التلات هتقوليلي لمة و ده كويس هاقولك لا مش عايز صداع
ايه بقى حبك في التلات انا مش فاهم
يلا علشان خاطرك بس
يا رب تتجوزي التلات

حنين محمد يقول...

صباح الغاردينيا آية
هههههههه وأنا كمان بحب التلات بس مش عشانه عشان جي بعده الاربع
بس عارفه دا كان زمان بس دلوقتي بعد ماحبيت فارس بحب أيام تانيه عشانه :)
عارفه حبيت اوي لما تضايق تطبطب عليا لأنه بجد لما بيتضايق ببقى أنا الي تعبانه :( جميل إحساسك وبحب صدقك وعفويتك ويارب تتجوزي يوم تلات :)
؛؛
؛ لروحك عبق الغاردينيا
كانت هنا
Reemas♡

زينة زيدان يقول...

مذكرات جميلة وذكريات أجمل

كل عام وأنتِ بخير

وأتمنى أن يمنحنا الله القوة لقيام هذا الشهر الفضيل

لا تنسونا من دعائكم

دمتِ بخير عزيزتي

الثلاثاااء.........!!
لا ما بظن إني بحبه

ضياء عزت يقول...

أنا التلات ده مابحبووووووووش خالص

سبحان الله

ربنا يسعدك دايما ويملي أيامك فرح

بالتوفيق

rona ali يقول...

الكل مبيبحش الثلاثاء ودة سبب يخليكى تتجوزى التلات هتكونى منفردة

اما انا فاعتقد يومى هو الخميس اما الثلاثاء مش بيفكرنى بشئ ههههههههه:)

بحب رقتك دى مذكرات حقيقيه واقعيه جدااا
ربنا يفرحك دايما يا آيه
متستغربيش رد والدته واضح انها مؤمنه بيكى وبقدراتك وعايزاكى تستغلى اللى بيحصل معاكى بالكتابه عنه وانك تطلعى جمل تبهرينا بيها :)

دومتى مبدعه يا احلى عروسه :)

سندباد يقول...

ربنا يخليكم لبعض ويجمعكم في الخير دايما
جميلة الفضفضة دي اوي حاجة بتريح وبتخلينا نشيل من علي صدرنا حاجات كتير
كل سنة وانتي طيبة ورمضان كريم وان شاء الله يكون يوم التلات يوما خير دايما عليكي

aya mohamed يقول...

ميرسى ليكم جميعا
وهو فعلا مفيش حد بيحب الثلاثاء غيرى
مع انى مش لاقية اى سبب يخلينى احبه بس اهو بقى انا دايما مختلفة كدا
ربتا يسعدك يارب كلكم ورمضان كريم عليكم ان شاء الله