Friday, June 29, 2012

من مذكرات طفلة فى العشرين




- بتخاف عليا اوى صح
- اه طبعا
- يعنى لو تعبت انا مش هتروح الشغل
- لا يا حبيبتى هديلك دواء واروح الشغل
- طب يارب يارب يجيلى برد ومقدرش اقوم اعمل الغداء

------------------------------

- بتعيطى ليه دلوقتى ؟
- علشان انت قلت حاجات تخلينى اعيط
" أصلا كنت بعيط علشان بتبقى فى منتهى الحنية وانت بتقولى بتعيطى ليه :$ "

-------------------------------

- وشك حلو عليا يا حبيبتى
- يارب دايما ايه اللى حصل
- فى حاجات فى الشغل كانت متعطلة بس الحمد لله خلصت
- طيب بما ان وشى حلو عليك بقى عايزة هدية
- كيس شيبسى كالعادة ولا عايزة مصاصة معاه
" على فكرة زعلت بقى المفروض ان انا اللى اطلب
 افرض كنت هطلب حاجة تانية 
كدا احرجتنى بس عموما انا كنت هقولك
خليه شيبسى بالجبنة المتبله زهقت من الجبنة بس "

----------------------------------

- نفسى نمشى سوا على الكورنيش
- أجيبلك كورنيش منين انا دلوقتى
- لا مش تجيبه احنا نروحله

----------------------------------

- فاكر يوم ما عملتلك شاى وحش
- اه يوم ما وقعتى نصه ده
- انا موقعتش نصه على فكرة انت اللى لغطبتنى
- طيب المهم ماله اليوم
- اممممم نسيت اصلا عاجبك كدا
" لحد دلوقتى نفسى افتكر كنت عايزة اقول ايه اعمل فيك ايه انا دلوقتى "

------------------------------------

- كل حاجة فيكى زى الاطفال بتزعلى زيهم وبتفرحى زيهم
- يا سلام ... لا انا كبيرة اصلا
- لا صغيرة وطفلة خالص كدا حتى وانتى متغاظة دلوقتى عاملة زى الاطفال
- على فكرة اصلا مش متغاظة ولا اى حاجة فرحانة حتى اصلا
- اصلا اصلا هههههههه طيب
" ببينلك انى متغاظة علشان نفسى تعترف بقى انى كبيرة
مع انى بكون فرحانة لما بتقول طفلتك انا :$ "

----------------------------------------

- تحبى تأكلى ايه ؟
- هاكل زيك انت اختارلى
- افرضى انا اخترت حاجة مش بتحبيها
- هاكلها بردو وهحبها
- وليه كدا يعنى يا بنتى تأكلى حاجة مش عجباكى
- علشان بحبك
" يااااااه بتبقى قمر كدا وانت مكسوف وتختارلى بعدها اكتر اكله انا بحبها
ببقى صادقة اكسفك علشان مش تطلب حاجة مش بحبها اساسا يعنى شريرة انا "

-------------------------------------------

- بيحبك هو جدا باين عليه
- اه ما انا عارفة كفايا المشوار والله بيصعب عليا
- انتى كل اللى شيفاه المشوار مش واخده بالك من نظراته ليكى
- هو انتى مركزة مع نظراته كمان انا هكون مش يجى تانى اصلا
- انتى مجنونة
- ايوة انا مجنونة بقى ومحدش يبصله غيرى
- ايوووووة كدا بتغيرى يا مزة
- " بصه من فوق لتحت كدا " واغير ليه وانا عارفة انه مش بيبص لحد غيرى

-----------------------------------------------

- مش بحب الدباديب والجو ده
- امال بتحبى ايه
- بحب العروسة اللى رجليها طويلة دى

-----------------------------------------------

- انا بقيت بحب انغام من كتر ما انتى بتحبيها
- وانا بقيت بحب نفسى من كتر ما انت بتحبها

------------------------------------------------

- لما اجمع مذكراتى فى كتاب مش هخليك تقراها
- يا سلام ليه يعنى
- علشان فيها اعترافات عنك لو عرفتها هتفضل تغيظنى 

-------------------------------------------------

على هامش المذكرات

" مذكرات طفلة فى العشرين "
دى مذكرات يتم اعدادها للنشر ده لو عجبتكم يعنى ان شاء الله

24 التعليقات:

Amira Ahmed said...

جميلة جداااااااااااااااااا طبعا وعجبتنى اوووووووى التسلسل والشقاوة كل حاجه فيها عجبانى
بجد تدوينة توووووووووووووحفة يا يويو
:)))

rona ali said...

اممممممممممممم
لاء في حاجه غلط انا راي بلاش منها

ايوان انا شايفه في حاجه فيها محتاجه تتظبط

ايه بقي هيا بفكر اهو ههههههههه

بصي بلاش منها احسن

___________

لا بصي سيبك من الكلام اللى فوق
دة انا بعمل بفكرة استاذ ابرهيم من باب التغير بغير ههههههههههه
حلوة جدا جدا حسيت انى شايفه الاتنين دوال
ملحوظه بس وضحى اكتر مين بيتكلم انا توهت شويه يعنى ميزى هو بشرطه تانيه لون تانى كده يعنى :)

بس المجمل روعه روعه

Aya Mohamed said...

اميرة

ربنا يخليكى يا ميرو يارب
رفعتى من روحى المعنوية انا مش كنت مقتنعه بيها اصلا
ميرسى يا حبيبتى :)

Aya Mohamed said...

رنا

ههههههههه انا فى الاول صدقت
وقلت هحذفه بقى وخلاص
احسن تتوهى علشان تقرى البوست اكتر من مرة ههههههههههه
بحب كدا تفهموا لوحدكم بس هحاول اميز لو البوست باظ انتى حرة بقى :P
وحشتينى على فكرة :)

أحمد أحمد صالح said...

جميلة جدا ورائعة جدا،و اذا نشرتيها هيكون كتاب جميل..نفسنا في الرومانسية الرقيقة دي..تحياتي

Aya Mohamed said...

احمد

ميرسى يا احمد ربنا يخليك
مبسوطة انها غجبتك
نورتنى :)

Śђąžล ฬąђ٤єĐ ♥ said...

حلوه اوي يا آيه فيها روح وحياه

Aya Mohamed said...

شذى

ميرسى يا حبيبتى انتى احلى

مصطفى سيف الدين said...

ظريف البوست و احساسه جميل اوي
و الفكرة جديدة
يمكن فيه شبه من خبايا نسائية بس هنا جرعة الرومانسية اكتر

تسلم ايدك

موناليزا said...

جميلة يا آية :)
استمرى

سندباد said...

هههههههههه حلوة الشقاوة والدلع ده
تسلم ايديك علي العفوية والكلام اللي طالع من غير ترتيب
تحياتي لقلمك الرشيق

Tamer Nabil Moussa said...

جميلة

تسلم ايدك

مع خالص تحياتى

ريـــمـــاس said...

مساء الغاردينيا ايه
يااااااااااااااه
حرام عليكي انتي لسى بتفكري لو عجبنا
امممم انا عجبتي جدا جدا جدا
والله قريته مرتين بحب اللهجة المصرية وهي كلها احساس عفوي وطفولي وحنين زي الي كتبتي فيه البوست دا
بجد يا آيه ربنا مايحرمني ابداعك وقلبك "
؛؛
؛
لروحك عبق الغاردينيا
كانت هنا
Reemaas

MEROOooOOoo said...

جميل جدا والاحساس روووووعة

Aya Mohamed said...

مصطفى

يمكن خبايا نسائية فيه عموم اكتر
وموضوعات اعم واشمل
ميرسى لرأيك الجميل :)

Aya Mohamed said...

موناليزا

ميرسى يا حبيبتى
انتى اجمل :)

Aya Mohamed said...

سندباد

ميرسى جدا على الكلام الجميل ده
نورتنى :)

Aya Mohamed said...

تامر

وجودك هو الاجمل
دمت بخير :)

Aya Mohamed said...

ريماس

ربنا ما يحرمنى منك يا حبيبتى
فرحانة اوى انا انها عجبتك
:) <3

Aya Mohamed said...

مروة

انتى اجمل يا قمر
نورتينى :)

Radwa Ashraf said...

عثثثثثثل أوى بقى :)
لو إنتشرت إن شاء الله هتبقى تحفة اوى أوى بجد :)

جميلة و رقيقة يا أية :)

Aya Mohamed said...

رضوى

ميرسى يا حبيبتى
انتى اللى عسل والله
ربنا يخليكى يا قمر :)

Nelly Adel said...

إيــــــــــــه الجمال دة بــــقى :)
أنا أعصابى تعتبت النهاردة :D
كل الناس بتكتب عن الحب والرومانسية كل الناس كال الناس يعنى :D
أروح أحب على روحى أنا دلوفت ولا أعمل إيه فى نفسى ؟؟ :D ها ؟
تحفة تحفة يا آيه ^_^
ماشاء الله عليكِ بجد .. الله يسعدكوا يارب حبيبتى ويتمملك على خير ♥

Aya Mohamed said...

نيللى

دى بتاعت امبارح شوية وهنزل الجديدة
مش هتلاقيها رومانسية خالص هههههه
ربنا يخليكى يارب و يسعدك