الثلاثاء، 26 يونيو 2012

بلياتشو







بلياتشو بيلعب على الوشين 
وش بيضحك وش حزين 
ساعه سؤاله يفرح قلبك وفجأة تبان دموع العين 
وتحاول تفهم خباياه ووشه الاصلى فى الاتنين 
بس مهما تحاول توصل راح تتحير اكتر واكتر 

---------------------------

بلياتشو يلون وشه بلون وكلامه بلون واتنين 
أحمر لون الحب و الاصفر للغيرة والحيرة فى الباقيين 
اللى عاجبهم وش ملغبط بالالوان 
مهما تحاول توصل بيهم للون ولبر أمان 
مش هيريحهم غير بلياتشو وشه ......علبة ألوان 

---------------------------

اول فقرة فى السيرك بلياتشو جبان 
والتانية بلياتشو كئيب عامل زعلان 
اما الثالثة حكاية بلياتشو قام من النوم حيران 
مش عارف مين راح فين ولا ايه حكاية السيرك كمان 
سيرك حياته زحمة ومليان 
ومهما تحاول تختار لازم فى الاخر ترجع ندمان 

------------------------------

سيرك حياتك فيه كام بلياتشو وكام فنان 
مين بيكون صادق فى الضحكة ومين بيغشك فى الاحزان 
انت كمان جواك بلياتشو ومش دريان 
حاول تتخيل صورتك فى عنيهم ازاى بتبان 
بس مهم تركز اكتر مين كسبان


34 التعليقات:

Amira Ramadan يقول...

سرك حياتك فيه كام بلياتشو وكام فنان
مين بيكون صادق فى الضحكة ومين بيغشك فى الاحزان
انت كمان جواك بلياتشو ومش دريان
حاول تتخيل صورتك فى عنيهم ازاى بتبان
بس مهم تركز اكتر مين كسبان

حلوووووووووووووة أوى يا يويو خاصة المقطع الاخير ده
جميل فعلا

βent Pasha يقول...

( انت كمان جواك بلياتشو ومش دريان )

جميلة وراائعة
:-))
سلمت الأيادي

aya mohamed يقول...

اميرة

انتى اجمل يا ميرو
ميرسى يا حبيبتى :)

aya mohamed يقول...

بنت باشا

الاجمل هو انتى :)

كريمة سندي يقول...

لكل منا في داخله مهرج يهرج نفسه!!!

مصطفى سيف الدين يقول...

يا عيني على الابداع و الجمال
روعة يا آية و الفكرة اكتر من ممتازة و عبرتي عنها حلو اوي

aya mohamed يقول...

كريمة سندى

صحيح فعلا
نورتينى :)

aya mohamed يقول...

مصطفى

ميرسى يا مصطفى
ده انت اللى رائع اصلا :)

Tamer Nabil Moussa يقول...

بوست اكثر من رائع اية

تسلم ايدك

مع خالص تحياتى

Alone Spirit يقول...

تدوينه مميزة لتعدد اشكال البلياتشو الحاليه باستخدام الوان دينيه او سياسيه او شخصيه تحيه مميزة

ابراهيم رزق يقول...

فكرتينى برباعية جاهين

بليتشاو قال ايه فيدة فنونى
و وقق مساحيق بيلونونى
و الطبل و المزامير و الجعير
اذا كان جنون زبونى زاد عن جنونى
عجبى ؟؟؟؟؟؟

بجد ما يفعله البعض حاليا يفوق ما يقوم به البليتشاو
بوست حقيقى و صادق

تحياتى

rona ali يقول...

اة يانى منك
جباااااااااااااااااااااار

حلو اوى

حنين محمد يقول...

مساء الغاردينيا آيه
جميعنا نخفي وجه حزين
ونصنع وجه مبتسم "
؛؛
؛
جميلة
لروحك عبق الغاردينيا
كانت هنا
Reemaas

Radwa Ashraf يقول...

حسيت أنى بقرأ لجاهين :)
جميلة أووى يا أية
و الفكرة بتاعة البلياتشو نفسها تحفة!
:)

Hanan w Haneen يقول...

حلوة اوي يا يويو بجد خصوصا الفقرة دى ( انت كمان جواك بلياتشو ومش دريان )

وفكرتيني بأغنية البلياتشو بتاعت مدحت صالح باين ولا مش فاكرة مين :D
بس بجد بتاعتك احلى من مليون اغنية :)

Unknown يقول...

رائعة فعلا
البيلياتشو ذكرني بشدة بهزي التنين
كلنا هذا البلياتشو
تحياتي

سندباد يقول...

حاجات كتير او جوانا لو خدنا بالنا منها هاتبهرنا او تصيبنا بالدهشة بس احنا للاسف مش بنفهم نفسنا او بنتصالح معاها عشان نقدر نفهمها
تدوينة جميلة
احسنتي

aya mohamed يقول...

تامر

ميرسى يا تامر
اسعدنى رايك :)

aya mohamed يقول...

محمد

مميزة انا بك :)

aya mohamed يقول...

ابراهيم رزق

انا كنت بقرا رياعية جاهين دى
قبل ما اكتب فعلا :)
مبسوطة انها عجبتك

aya mohamed يقول...

رنا

ميرسى يا حبيبتى :)

aya mohamed يقول...

ريماس

هو ده حالنا دايما
ميرسى يا جميلة :)

aya mohamed يقول...

رضوى

يااااه جاهين مرة واحدة
ميرسى يا حبيبتى نورتينى :)

aya mohamed يقول...

حنان

ايوة هو مدحت صالح فى فيلم البلياتشو
ميرسى لرايك يا حنون
نورتينى يا قمر :)

aya mohamed يقول...

اسامة

معاك حق كلنا هذا البلياتشو
اسعدتنى زيارتك :)

aya mohamed يقول...

سندباد

علشان كدا المفروض نوقف شوية
ونحاول نفهم نفسنا
نورتنى :)

إنسان || Human يقول...

انت كمان جواك بلياتشو ومش دريان

أو ممكن نكون داريين بس بنهرب منه


...

كلمات جميلة

ومبسوط اني موجود هنا .. اكيد مش هاتكون زيارتي الاخيرة :)

aya mohamed يقول...

محمد

الاجمل هى زيارتك
سعدت بك :)

Lobna Ahmed Nour يقول...

جميلة :)

Menna يقول...

البليتشو اللي في السيرك اكثر احتراما من البليتشو على سيرك الحياة
على الاقل صادق مع نفسه و مع اللي حوليه وعارف انه بمثل و مش بيحاول يقنعك ان دي حقيقته
تحياتي للافكار الجميلة و التعبيرات الرائعة

رؤى عليوة يقول...

جمييييييله يا ايه

حقيقية جدا

كل الناس بقت كده بالظبط وشوووووش


دمت بخير

aya mohamed يقول...

منة

مهى دى المشكلة فعلا ان سيرك حياتنا
بقى بشع فى كل حاجة
وفى كل المهرجين اللى مسيطرين عليه
نورتينى :)

aya mohamed يقول...

رؤى

المهم اننا نكون احنا الوش الحلو
ربنا يسعدك يا حبيبتى :)

aya mohamed يقول...

لبنى

انتى اجمل يا لولو :) <3