السبت، 9 مارس 2013

كلاسيكيات القلب



يحكى ان فتاة تشبهنى كثيرا تعشق تلك التحف القديمة
و تهتم كثيرا بذكرياتها لذا جمعتها على اسطوانة جرامافون
اطلقت عليها " كلاسيكيات القلب " كى تعيدها على قلبها كلما ارهقه التفكير 

(1)
لازلت اعتقد انه ينادينى انا كلما سمعته يتغزل بفتاته ذات المريلة الكحلى
وكثيرا ما ينتابنى احساس قوى  بانى سألتقى بيه يوما ليخبرنى انها انا حقا
وان شمندورة ما كانت الا وصف سرى لى لايفهمه سواى ولن يغنيه باحساس سواه


(2)
من قال ان الاصدقاء يمكثون للابد فبعد سنوات من الفراق يقتحمون افكارك عنوة
يترنحون هنا وهناك ويعبثون بجميع اشيائك فتلك كلماتك تتلاعب بها السنتهم
وذاك ديوانك المفضل وهناك ابتسامتك و بعض من احزانك
يقتحمون احلامك دون ميعاد مسبق للزيارة و يتركون بقلبك غصة من قلق عليهم
فمن منكم إذن الاكثر وفاءً

(3)

أغمرنى بحنان و تناول بعض دقات القلب المرهقة بفعل الذاكرة وأخبرنى
من احببت قبل ان تلقانى ومن هنا لا تعنى اسمائهن ولكنها تستنكر ان تكون حقا فعلت
أسالنى عن حبيبى السابق وليكن سؤالك قاسى بحجم خذلانه
لأخبرك انى ما احببت من بنى آدم سواك وان ما عاداك ما هو الا حماقات طفولية
تجاوز معى بحور الحب السبع و احكى لى قصة حب حدثت منذ زمن بعيد كان بطلاها نحن


(4)
السنة اللى فاتت زى النهاردة
كتبت اسمك على دبلتى
 وباقى شوية صغننين كدا واكتب اسمك فى بطاقتى
ان شاء الله
ربنا يخليك ليا ويباركلى فيك يارب

...................

وامتداداً لكلاسيكيات قلبى فأنا بحب أتسال جدا 
وبناء عليه هعمل زى خالو إبراهيم واقولكم 
أسالونى كتيررررررررر
وانا من موقعى هذا هسألكم ايه جه فى بالكم اول ما قريتوا كلاسيكيات القلب ؟



13 التعليقات:

ليلى الصباحى.. lolocat يقول...

ردا على سؤالك
الله خطر ببالى بعد ماقرأت رقم 2 صديقة كنت احبها كثيرا وكانت قريبة لقلبى مثل اختى من امى لم يكن لى بالجامعة صديقة سواها فكلهم كانوا زملاء دراسة

لكن


خطفها الموت فى يوم وليله

رحمها الله وغفر لها


اسأل الله لك اختى ان يتم عليك فرحتك بالزوج الصالح ثم الذرية الصالحة :)

تحياتى بحجم السماء

ابراهيم رزق يقول...

تعرفى انى اول ما قريت كلاسكيات ابتسمت

لانى لم اجد اى كلاسكيات
و انما طرح اخضر لقلب بكر

لسه بدرى على الكلاسكيات يا ايه متستعجليش

انا بقى هسالك اكثر سؤال اتسالته

يا ترى خطيبك بيتابع المدونة و ايه رايه فى كتابتك و فى بلوجر

تحياتى

aya mohamed يقول...

ليلى الصباحى

ربنا يرحمها يارب
وميرسى على الدعوة الحلوة دى
ربنا يسعدك يا حبيبتى يارب

aya mohamed يقول...

ابراهيم رزق

الله على الوصف الجميل
يمكن الفايدة من الكلاسيكيات هى الوصف ده
مش مستعجلة بس يمكن اخدت جرعات مكثفة من الدراما فى اول حياتى
فبقول كفايا عليا كدا :)
خطيبى بيتابع بلوجر اكتر منى و هو اللى بيزن عليا علشان انزل تدوينات
اكتر حد فى الدنيا مؤمن بيا
و بيشجعنى على الكتابة والاشتراك فى الكتب
واول حد بيقرالى واكتر حاجة تفرحه لما اقوله هنزل تدوينة جديد ههههههههه

مصطفى سيف الدين يقول...

اللي جه في بالي اني ادعيلك انك دايما تفضلي عايشة الحياة بروح حالمة
ربنا ان شاء الله يخليكم لبعض و يسعدكم دايما و يتمملكم على خير

Amira Ramadan يقول...

أول حاجة جت على بالى إنى أدعيلك ربنا يسعدك ويتمم فرحتك على خير يارب
يا أطيب قلب وأرق وأنقى إنسانة قابلتها فى حياتى:))

شمس النهار يقول...

اولا :الف مبروك :)

ثانيا الكلاسيكيات تساوي عندي الذكريات
فمامعني الكلاسيكيات عندك :)؟

aya mohamed يقول...

مصطفى سيف

ربنا يخليك ويسعدك يارب
انت انسان جميل وتستاهل كل خير يا مصطفى :)

aya mohamed يقول...

اميرة

اول حاجة انتى وحشانى جدااا
وميرسى اوى اوى على الكلام الجميل ده
والدعوة الحلوة اللى زى قلبك يا حبيبتى
ربنا يسعدك ويتمملك على خير انتى كمان يارب :*

aya mohamed يقول...

شمس النهار

الله يبارك فيكِ يارب
كلاسيكيات هى ذكرياتى الجميلة الغالية اوى عندى
اسعدتينى :)

موناليزا يقول...

بسم الله الرحمن الرحيم
السؤال الأول: رابط مدونتك شمندورة! ماذا يعنى ؟
وما سبب اختيار اسم مدونتك "شئ سيبقى بيننا"
ولماذا يوجد اختلاف بين اسم الرابط واسم المدونة؟

السؤال الثانى: علاقتك بالمطبخ أخبارها إيه ؟ وإيه أكتر أكلة بتحبى تطبخيها ؟ وإيه آخر أكلة طبختيها ؟

السؤال الثالث: صفى نفسك بكلمتين

السؤال الرابع: صفات ورثتيها عن والدك وصفات ورثتيها عن والدتك؟

السؤال الخامس: حيوانك المفضل؟
ولو ينفع تربى أى حيوان عندك فى البيت مهما كان هتختارى إيه ؟

هذا وبالله التوفيق :)

aya mohamed يقول...

موناليزا

السؤال الأول: رابط مدونتك شمندورة! ماذا يعنى؟
شمندورة هى علامة فى وسط النيل بترشد الصيادين وانا اسمى آية معناه علامة ودليل وفى نفس الوقت اغنية لمنير
ما سبب اختيار اسم مدونتك "شئ سيبقى بيننا"
اكتر ديوان بحبه لفاروق جويدة واحساسى ان دايما فى حاجات هتفضل بينا مهما حصل وكان
ولماذا يوجد اختلاف بين اسم الرابط واسم المدونة؟
هو انا فى الاول كنت حابة انى اسمى المدونة شمندورة بس صديقتى قالتلى مش معبر عن الرسالة اللى عايزة توصليها


السؤال الثانى: علاقتك بالمطبخ أخبارها إيه ؟ وإيه أكتر أكلة بتحبى تطبخيها ؟ وإيه آخر أكلة طبختيها ؟
علاقتى بيه كويسة الحمد لله مفيش حاجة معينة بحب اطبخها كله زى بعضه ونظرا لانى بطبخ كل يوم فآخر حاجة عملتها كانت بامية
السؤال الثالث: صفى نفسك بكلمتين
مجنونة بعقل
السؤال الرابع: صفات ورثتيها عن والدك وصفات ورثتيها عن والدتك؟
عن بابا الالتزام عن ماما طيبتها
السؤال الخامس: حيوانك المفضل؟
ولو ينفع تربى أى حيوان عندك فى
البيت مهما كان هتختارى إيه
مش بحب الحيوانات

نورتينى يا مونمون وميرسى على الاسئلة الجميلة دى <3

nesma hatem يقول...


أغمرنى بحنان و تناول بعض دقات القلب المرهقة بفعل الذاكرة وأخبرنى
من احببت قبل ان تلقانى ومن هنا لا تعنى اسمائهن ولكنها تستنكر ان تكون حقا فعلت
أسالنى عن حبيبى السابق وليكن سؤالك قاسى بحجم خذلانه
لأخبرك انى ما احببت من بنى آدم سواك وان ما عاداك ما هو الا حماقات طفولية
تجاوز معى بحور الحب السبع و احكى لى قصة حب حدثت منذ زمن بعيد كان بطلاها نحن

:)