Thursday, March 21, 2013

دواعى بهجة




بفرح اوى بكل بنوته بتبعتلى صورة فى مسج 
وبكل كلمة بتيجى فى وقت مش متوقع 
عندى فولدر مجمعة فيه كل الصور الهدايا اللى بعتهولى 
اما كلامكم فمحفوظ فى قلبى ... بحبكم اصلا 

تعب السنة كلها بيبان نتيجتة فى يوم الام اللى هو يوم المعلمة اللى هو يومى 
احساسى بفرحة الاطفال و بحب اولياء الامور سواء كانوا اولادى او اى اطفال فى المدرسة 
حاجة كدا بتخلينى فخورة بيا وطول اليوم بقول الحمد لله 
فخورة بـ فاطمة وهى بتقول سيناء وكان شايل الوانه 
وكامل وهو بيبصلى ويقول علمونا فى مدرستنا 
وعمر وزياد وهاجر ومريم و كل ولادى اللى حسسونى فعلا انى عملت حاجة 
فخورة بيا والمدير والناظر بيسلمونى شهادة تقدير المعلمة المثالية 
وعلشان كدا جبتلى شيكولاته كبيرررررة ^_^

ديوان اسبشيل فى الطريق ليا 
الديوان ما هو الا تسجيل لحقوق الملكية لشاعر جميل جداااا 
وتجربة اولى علشان يختار اللى هينشره فى الديوان اللى هيغزوا بيه المكتبات ان شاء الله 
وبما انه قايلى ده سر متقوليش لحد فانا مش هقول هو مين 
بس هقوله ربنا يوفقك يااااارب ويسعدك يا ........ :)))))

لما كتبت استاتيس " صديقاتى العزيزات .. شكرا " 
وصلتنى رسايل كتير من صديقات بيعتزروا على تقصيرهم معايا 
وناس كتبت كومنتات انهم بيحبونى 
وهذا ان دل على شئ يدل على ان اللى على راسه ...... احم احم 
مش محتاجة حد يقولى انه بيحبنى واو وحشاه فى حاجات كدا بتتحس مش بتتقال 
وان كنت فرحت جدا ان الرسالة وصلت

فى اكتر من حد بعتلى رايه فى كتابى " حالات مفردة " ولما بسال اشتريت الكتاب منين
يكون الرد فى صديقة اهدتهولى او استلفته من واحد صاحبى
مش مهم المبيعات المهم عجبهم ودوروا عليا علشان يقولولى
المهم الرسالة وصلت و سابت أثر ولو ابتسامة
الحمد لله :)

من الحاجات اللى بتسعدنى اوى كومنتات بلوجر 
تحس ان فى حد تعب نفسه وجالك بيتك مخصوص علشان يسيبلك رسالة على الباب ويمشى 
تخيل بقى لو الشخص ده بيجيلك كل يوم ياااااه 
من غير ما يكون مستنيك تزوره علشان يردلك الزيارة لا هو بيحب كلامك وبس 
علشان كدا انا بحب بلوجر اكتر من الفيس بوك 

آل بلوجر بحبكم :) 



8 التعليقات:

رؤى عليوة said...

عارفه الحاجة الحلوة بجد
ان وسط مليون مدونة كل عناوين تدويناتها كئيبة ومملة
زى بتاعتى برضه
وده غصب عننا من الحال واللى بيحصل

تلاقى عنوان كده يشدك وكأنك بتدور عليه وتلاقى جواه كلام بسيط يهدى

تسلمى يا ايه ودايما سعيدة ومبتهجة :)

ليلى الصباحى.. lolocat said...


وانت ياا ية جميلة وحبوبة وطيوبة وتستحقى حب كل اصدقائك وكل سنة وانت جميلة وبألف خير وسعادة يارب

بوست خفيف ودمه سكر :)

يمكن انا اكون من ضمن الناس اللى بتقصر معاك بس غصب عنى حقيقى :)
ويارب دايما الفرحة منورة روحك وقلبك وحياتك كلها حبيبة قلبى


اما موضوع رد الزيارة ده سخيف جدا والقلم الراقى والاحساس الصادق بيفرض نفسه ومش محتاج تعالى علشان اجيلك هههه

دمت بكل خير
تحياتى لك بحجم السماء

ابراهيم رزق said...

ايه ده يا ولاد

المعلمة المثالية مرة واحده
و حلوة قوى من بقك كلمة ابنائى

البهجة عدوة بتتنقل بين الجميع
ربنا يجعل ايامنا كلها بهجة

تحياتى

Aya Mohamed said...

رؤى

فرحنى الكومنت بتاعك حسيت انى عملت حاجة حلوة
ربنا يسعد قلوبكم يارب
ويصلح الاحوال :)

Aya Mohamed said...

ليلى الصباحى

تسلميلى يا حبيبتى ربنا يخليكى يارب
انتى اصلا من آل بلوجر اللى بحبهم جدا
وبيزورونى على طول
ربنا يخليكى ليا يارب و ميحرمنيش من طلتك ابدا :*

Aya Mohamed said...

ابراهيم رزق

هههههههه وجودك احلى والله
مبسوطة اوى انى عديتكم :)
ربنا يسعد قلبك يارب

asmaa fathy said...

جميلة دواعي بهجتك
ههههههههههه
يعني بوست خيف بيغير فعلا المود المنتشر اليومين دول
ومعلمه مثاليه مرة واحده
كده بقى مش هنعرف نكلمك
عموما الف مبروك وكل سنه وكل امهات ومعلمات مصر بخير

تحيـــــــــــــاتي
كانت هنا ورحلت
Asmaa Fathy

Aya Mohamed said...

اسماء

الله يبارك فيكى يا حبيبتى
تسلميلى يارب
<3