Wednesday, March 6, 2013

اعزائى الكتاب





الكتب الجماعية 
ممكن كلامى فى الكتب الجماعية ميعجبش حد 
بقيت حاسة بمنتهى الصراحة ان الكتب دى " بتلم " ايوة بقى 
اى حد بيكتب اى حاجة شوية كلام كدا يعملولهم كام صفحة يقوم ايه بقى مشارك فى كتاب جماعى 
وحفلات توقيع و حوارات ولقاءات و بقى كاتب والف الف مبروك 
رغم انى بشارك فى كتب جماعية الا انى فى الفترة الاخيرة بقيت مركزة اكتر 
بشارك مع مين وليه مع مين اللى هى تشمل دار نشر ايه وهل بينتقوا الاعمال ولا لا 
و مين من الكتاب اللى بثق فى كتاباتهم موجود معايا 
اما ليه بقى فطبعا مفيش استفادة مادية لكن الاستفادة المعنوية كبيرة جدا
عايزة اعمل حاجة اكون فخورة بيها 
عايزة اتعلم من النقد واكتسب خبرة بجد مش يكون كتاب وخلاص 
عايزة اكتشف فـ نفسى مناطق ادبية جديدة وافكار مختلفة 
والاهم انى عايزة اوصل لحاجة مش عارفة ايه هى 

...................

هو يعنى ايه ابداع 
كان فى حد قالى من فترة ان الابداع بيكون فى التلاعب بالالفاظ و تطويع اللغة 
بس انا مؤمنة ان الابداع هو النظرة المختلفة لاى حاجة عادى فى حياتنا وخلق افكار جديدة 
وفى ناس تانية قالوا ان اصلا كل الكتاب بيتكلموا فى نفس الموضوعات يبقى فين الابداع 
كان ردى ان الابداع انى اوصل نفس الموضوع لنقطة مفيش حد وصلها قبلى 
لكن مش طول الوقت هفضل فى صراع مع نفسى وانا شايفة ان فعلا مفيش ابداع 
بين كل 50 كاتب فيه 2 او 3 بالكثير اللى بلاقى فى كتابتهم الابداع اللى انا فهماه 
ومع ذلك بلاقى ان كل الناس بتقول لاى حد بيكتب اى حاجة انت مبدع وكتاباتك جميلة واسلوبك رهيب 
طيب هى المشكلة فيا ولا فى مفهوم الابداع نفسه 
يمكن الصراع ده هو اللى مش مخلينى اكتب زى الاول 
بحاسب نفسى ما يمكن انا كمان زى الـ 38 اللى مش مبدعين بس صحابهم بيجاملوهم 
ما يمكن كتاباتى ملهاش اى معنى ولا اى هدف ولا فيها ابداع بس اهو كلام شكله حلو وخلاص 

.......................

حالات مفردة 
مش عارفة ليه بضايق لما حد  يقولى انه حس الكتاب رومانسى 
واقول لا انتوا مش فاهمين اخدتوا بس الجانب السطحى 
بس هو فعلا الكتاب رومانسى مش بفعل الموضوعات لكن بفعل  احساسى 
انا بطبيعتى رومانسية اوى شايفه ان اى موضوع فى الدنيا حله فى الحب 
واى مشكلة حلها فى الدعاء واى قوة مصدرها الايمان 
واحلى حاجة فى حالات مفردة ان تصنيف الكتاب اختلف تبعا لاعمار القراء 
اللى تحت العشرين قالوا انه كتاب متفائل الشباب قالوا انه كتاب رومانسى 
و فوق ال 40 قالوا انه اجتماعى وواقعى 
اختلاف الاراء خلانى فخورة اوى بالكتاب خلانى احس انه ينفع يتقرا دلوقتى 
وكمان عشر سنين وكل مرة حد هيستفاد منه حاجة مختلفة وهيلاقى فيه حاجة جديدة 

........................

بنكتب ليه 
تحديد الهدف بيوفر عليك حاجات كتير اوى ومش عيب انك تقول انا بكتب من غير هدف 
بتعبر عن حالة خاصة او عامة لمجرد انك توصف
براحتك طبعا ده قلمك و ده مكانك واللى مش عاجبه مش يقرا 
بس هو ليه اكتب عن فتاة بتدخن وامثلها مثال جيد او احطها صورة بروفيل وكانها شئ يدعو للفخر 
او اعتبر ان العرى هو الوجه الادق تفصيلنا و الاكثر تعمقا فى الفن 
هو ليه اقتبس كلمات من القرآن الكريم او استخدم مصطلحات العبادة 
واركبها على كلمات غزل او وصف حالة حب 
واقول عادى اصل دى كلمات فى اللغة العربية مش قصدى بيها حاجة 
هو احنا مينفعش نكتب الا اذا اسائنا للذوق العام او للرمز الدينى حتى لو كان كلمة 
مش لاقيه مبرر زى ما انا مش لاقيه وصف يعبر عن احساسى باللى بيعملوا كدا 

........................

فى الفترة الاخيرة بقيت قليل اوى لما بعمل كومنت فى مدونة اى حد 
لكن بقرا وبتابع باستمرار 
حالة الصمت دى مسيطرة عليا جدا مش بس فى بلوجر 
ولكن مع كل الناس بتأمل الوشوش والكلمات 
بشوف مين حقيقى ومين قناع ومين هينسانى ومين هيفتكرنى 
كومنت خالو ابراهيم فى البوست اللى فات هزنى جدا حسيت انه شافنى لما كتبت كلام كتير ومسحته 
حسيت ان علاقتى بناس كتير لازم تقف وحسيت اكتر ان نفسى اعرف انا غالية عند مين 
ومين هيسال عليا لو بعدت شوية 
أتفاجئت بحاجات كتير اوى حصلت الفترة دى وناس كتير اوى سالوا 
حسيت ان الاشياء اللى بيننا اكتر بكتير من الاشياء اللى داخلنا 
ربنا يخليكوا ليا يارب 



12 التعليقات:

asmaa fathy said...

معاكي حق والله يا آية

أنا مسجلة في منتدى ببقى هتجنن من اللي بشوفة في القسم الأدبي بتاعهم بجد مهزلة

اي حد يكتب أي كلام والقى الناس بتصقف وبرافوا وممتاز وانتى مبدعة والتقييم ممتاز

بجد بيتحرق دمي

وبالنسبة للكتب اسهل حاجة دلوقتى تلاقى ناس عاملين كتاب كلام فاضي هههههههههه

عموما ياريت مش تغيبي تاني


تحيـــــــــــاتي
كانت هنا ورحلت
ASmaa Fathy

rona ali said...

انا لولا انى عارفه انى متوقفه من فتره
كنت شكيت ان انا اللى كاتبه البوست دة

في اكتر من فقره كده بيجد هو دة اللى بيحصل معايا ومش عارفه اعبر عنه صح
او التعبير الادق خايفه اقول دة مضايقنى قد إيه واشغل الناس معايا

وافظع شئ انى بقرأ دائما في صمت

على فكرة كتابك دايما معايا كل ما اتعب اعيش معاه وانسي الدنيا زى ميراند بالظبط

وظاهره الكتب الجماعيه اصبحت بقدر ماهى فرصه عظيمه بس لو مخدناش بالنا بنحط رجلينا مع انى كتاب وانى دار الكتاب دةمصيره يترسم عليه او يتلف بيه لب :(

وحشتينى ونفسي اكلمك بس فقره الصمت الساري عندك واصله عندى لمرحله متاخره

دومتى بخير

ابراهيم رزق said...

تعرفى يا اية

انى كاتب بوست عن الكتب الجماعية و خصوصا نوافذ مواربة
ههههههههههههه

بانتقد الكتاب و اعضاء لجنة التحكيم كمان
بس منزلتوش عشان حسيت انه ممكن يكون قاسى شوية

انا قفلت من الكتاب بسبب كم قصة معجبتنيش فقفلت نفسى عن الكتاب
و ده بيظلم الناس اللى بتكتب كويس
يمكن انا كتبت عن الكتاب لكن بطريقة غير مباشرة
اما عن الابداع فالابداع شرحه يطول
لكن مش دايما يكون غير المتوقع
لكنه الاكيد عندما يلمس شىء بداخلنا
او يكمل شىء ناقص فى احساسنا
او يعبر عما نعجز ان نعبر عنه
او حتى يمنحنا لحظات من السعادة

سعيد بالبوست ده قوى
و سعيد بتعليق رونا
و من هنا بقولها عودى يا رونا

تحياتى

مصطفى سيف الدين said...

على فكرة ده مش حال الكتب الجماعية بس لا ده كل سوق النشر الورقي
المفروض ان لجان القراءة في دور النشر تنتقي فعلا الجيد لكن الدار مبيهمهاش غير السبوبة
الكتب الجماعية اللي بتبقى محكومة بقوانين من بدايتها ادفع خمسين جنيه و ابعت مشاركتك و الحاجات دي لازم يكون مستوى اللي فيها كده لأنها في الاساس مش مشروع ابداعي لكن مشروع لكسب الرزق و دي مهزلة عايشنها
بالنسبة لتعريف الابداع انا متفق معاكي تماما الابداع فكرة مش اسلوب و لا سرد و لا حالة لغوية صحيح هم من ادوات الابداع بس لو متوجدتش الفكرة الجديدة هيبقى المبدعين ببغاوات بيعيدوا نفس الكلام بأصوات مختلفة
أما عن غيابك انا لاحظت اقلالك في بلوجر و انا زيك الصراحة بس كنت باشوفك على الفيس في صفحة مبدعون و ده يعني كان بيكفيني أني اتطمن عليكي
ربنا يوفقك دايما

ليلى الصباحى.. lolocat said...

علشان نكون منصفين نقدر نقول ان الرأى العام فى مسألة الكتب الجماعية ربما تكون فعلا بتجمع وجهات نظر مختلفة و اقلام متفاوتة فى الابداع

لكن ايضا هناك بعض الكتب اجتهد اصحابها وقدموا افضل ما عندهم

وزى ماقال مصطفى الحكاية وراها دور النشر التى تروج لمثل هذه الكتب الجماعية وهى المستفيدة الوحيدة من وراءها

يمكن الكاتب او المدون يلجأ لمثل هذه الكتب الجماعية ليتمكن من تقديم فكرته واسمه وتكون بداية لكتاب فردى له

وفيه مبدعين كتير الى الان وبعد فترات طويلة من الكتابة وحياتهم الادبية ماقدموا اى كتاب خالص ومنهم اصدقاء مدونين كلنا نعرفهم

الابداع بيفرض نفسه دائما ومش محتاج صاحبه لكتاب جماعى او فردى لكن بيظهر فى فكرته وطريقة عرضها للقارىء

بالنسبة لغيابك لم الحظه ههههه لسبب بسيط انى كنت ايضا متغيبة فترة بسبب السفر
حمد لله على سلامتك حبيبتى
وحالتك دى صحية لانها بداية حياة ادبية جديدة ان شاء الله

تحياتى لك بحجم السماء

Amira Ahmed said...

عندك ألف حق يا آية كل كلمة قولتيها صح الحقيقة صعب على أى حد انه يوصف نفسه مبدع لأن المعظم بيكتب لمجرد إحساسه بحالات بيعيشها او بيتعايش معاها
انا عشت معاكى فى كل كلمة قولتيها لأنى مصدقاكى أوى
والكتب الجماعية على قد ماهى فرصة لإثبات بعض المواهب إلا إننا لازم نركز أوى إحنا بنقرأ لمين وفعلا مش اى حد بيكتب كلمتين يبقى كاتب ومبدع..
أما كتابك بقى فأنا بدون مُبالغة أنا لحد دلوقتى قريته حوالى عشر مرات ومش بزهق منه أبدا وكل مرة بكتشف فيه حاجة جديدة انا مشفتهاش قبل كده

أنا مقصرة فى حقك جدا بس انتى وحشانى اووووووووووى وكتابك دايما معايا بيفكرنى بيكى فى كل مكان بروحه دايما فى شنطتى...

دُمتى بخير ومزيد من التقدم ياااااااااااارب

Aya Mohamed said...

اسماء

حاضر يا اسماء
ان شاء الله هزهقكم منى :)))
اسعدتينى

Aya Mohamed said...

رنا

نورتى بلوجر والله ليكى وحشة يا رونى
انا وانتى واحد بقى هههههههه
والله اسعدتينى ومبسوطة ان الكتاب عجبك
ان شاء الله نتكلم قريب :)

Aya Mohamed said...

ابراهيم رزق

نوافذ مواربة انا شاركت فى لجنة التحكيم فيه
مش هنصف التحكيم لان دول بشر واذواق مختلفة
لكن تقيمى للكتاب ممتاز بالنسبة لكتب تانية
مجمل الكتاب لا يستحق واحد من عشرة
سعيدة جدا ان البوست عجب حضرتك
وبضم صوتى لصوتك وبقول عودى يا رونا :)

Aya Mohamed said...

مصطفى سيف

متفقة معاك فى الكتب الجماعية
اما بالنسبة لغيابى فانا موجودة فى جروب مبدعون بس تقريبا مش كان ليا اى وجود تانى فى الفترة دى
بس مبسوطة انك متابعنى
ربنا يخليك يا مصطفى :)

Aya Mohamed said...

ليلى الصباحى

وحشتينى يا حبيبتى
ومتفقة مع كلامك جدا كمان
نورتينى ومش تغيبى تانى انتى كمان بقى <3

Aya Mohamed said...

اميرة

حبيبتى ولا يهمك انا فرحت جدا بالكومنت بتاعك
ومبسوطة ان الكتاب عجبك كدا
<3