السبت، 28 يوليو 2012

استفتاءات فيسبوكية



موضوع الاستفتاءات اللى على الفيس بوك ده وصل لقمة الاستفزاز بصراحة
ما رأيك فى سياسة بشار الاسد ؟
مع - ضد
وتلاقى مع واخده النسبة الاعلى
ما هى ديانتك ؟
الاسلام - المسيحية - اليهودية - غير ذلك
لما يبقى فى 410 حد عامل غير ذلك منهم واحدة اعرفها يبقى ده اسمه ايه
وحاجات من كدا كتيرررر بس يمكن دول اكتر اتنين استفزونى جدا
 نفسى حد يعرفنى مين صاحب الاسئلة العظيمة اللى بيحصل عليها الاستفتاءات دى
وايه كمية البشر اللى بتجاوب دى بردو
مهو لما يبقى السؤال مستفز يبقى الناس اللى بتجاوب دى ............
النقط اللى فوق دى وصف حطه انت زى ما تحب مش هنختلف
بصرف النظر ان فى اسئلة مش فاهمين ايه الهدف منها
زى مثلا مين اكتر مرشح للرئاسة لازلت تحترمه ؟
ففى بقى اسئلة للترفيه على شاكلة
بتحب الايس كريم اكترولا البيبسى طيب بالنسبة للشيكولاته جلاكسى ولا كادبورى
طيب اكتر حاجة بتستخدمها الموبايل ولا الكمبيوتر ولا الاب على اساس ان الكمبيوتر
والاب توب مش نفس الاستخدام يعنى عادى بلاش تدققوا فى الحاجات دى
اما بقى بالنسبة للاسئلة الوطنية فالسؤال الاساسى بلدك ايه ؟
وتلاقى الاجابات مصرى وافتخر سعودى وافتخر وكله وافتخر
 وطبعا العرب كلهم دائما وابدا بيفتخروا بس بايه بالظبط هما نفسهم مش عارفين
اما بقى الاستفتاء اللى فرحنى شخصيا هو انت منين فى مصر ؟
وكل المحافظات مكتوبة عادى الا كفرالشيخ جنبها قلب وده طبعا معناه ان اللى كاتب السؤال كفراوى
فطبعا جاوبت علشان القلب هههههههههه وبينى وبينكم يعنى انا بفرح جدا باى حد بلدياتى فلازم اشجعه
بس فى المجمل انا بتستفزنى جدا الاسئلة الرهيبة دى وخصوصا فى المواقف التى لا تحتمل
اللى مش ليها غير اجابة وحدة المفروض وتلاقى مليون اختيار وناس غريبة
بترد اجابات اغرب بتستفزك اكتر
عارفة انه بوست مستفز بس مش مشكلة بقى واسيبكم مع اخر استفتاء
ايه اكتر الايام اللى بتحبها فى رمضان
ليلة الرؤية  - ليلة القدر - ليلة العيد

9 التعليقات:

Lobna Ahmed Nour يقول...

الفراغ بيعمل أكتر من كده
زي سؤال بيقول إيه أعظم كتاب قرأته

خليهم يتسلوا يا آية :D

أحمد أحمد صالح يقول...

تخيلي أنا عمري ما أشتركت في أي استفتاء من ده،يمكن مش بس لأني بأشوف معظمها هايف- و أحيانا بيكون فيها استفتاءات هامة- و لكن بسبب ايماني أن الشريحة التي تهتم و تشارك في هذا الاستفتاءات شريحة هايفة !!..و عموما و لأول مرة أشارك في استفتاء هاجاوب على سؤالك..أكتر ليلة بحبها في رمضان هي..ليلة اللحمة !!ههههه..كل سنة و انتي طيبة..تحياتي

ابراهيم رزق يقول...

بصى يا أيه

اولا صلى على النبى
زيدى النبى صلاه

انا مش بحب الفيس خالص عارفة ليه
لانى بتوه فى وسط الهيافة و لما احب اوصل للجد اكون تعبت و خلصت

بس خلاص

تحياتى

Amira Ramadan يقول...

ههههههههههههههه قمة الهبل والهيافة
انا عمرى ما جاوبت على الاسئلة دى أصلا
بس عشان خاطر عيون حبيبتى يويو
انا هجاوب على سؤالك وهعتبره سؤال عادى مش استفتاء ولا حاجة
انا بحب ليلة القدر اووووووووى
واتمنى لو السنة كلها تبقى الليلة دى
ربنا يسعدك ويهنيكى يااااااااااارب
:)))

aya mohamed يقول...

لبنى

اه ده كمان سؤال مستفز
سيباهم يتسلوا بس لازم اعبر عن انى اتخنقت ههههههه
نورتينى يا لولو :)

aya mohamed يقول...

أحمد

انا معاك هى استفتاءات هايفة فعلا
بس سؤالى مش كان استفتاء
ده نوع من الرخامة مش اكتر ههههههه
كل سنة وانت بألف خير يارب :)

aya mohamed يقول...

ابراهيم رزق

اللهم صلى وسلم علي سيدنا محمد
ليه بس كدا انا كنت فى الاول مش بحب الفيس
دلوقتى بقيت مدمنة تقريبا هههههه مش بفتح غيره
رغم انى ليا معاه شوية مشاكل بس ماشية

aya mohamed يقول...

أميرة

حبيبتى انتى يا ميرو
هو مش سؤال دى رخامة مش اكتر
رمضان من اول يوم لاخر يوم جميل
كفاية انه شهر الخير والبركة
ربنا يرزقك قيام ليلة القدر والدعاء فيها يارب
<3

Kombil يقول...

بسم الله .
بصراحه صفحتك كلها افكار و موضيع جميله و خصوصا انتي اجمل موضوع .. واحلا مشاعر.. لمواخذه انا مقصدش اعاكس بس انا لما بشوف حاجه حلوه لازم اكتب عنها انا كمان واتكلم عنها. ......
اما بخصوص موضوع الفيس بوك. فقبل محوضحو احب اقولك انك شديده الملحظه جداااااا لدرجه مذهله . فعلااا .والاجابه علي كل حاجه في كلامي الحتشوفيه دلؤتي.

فعلا استطلاعات الراي كتيره جداا في الفيس وتويتر ..وده لانها وسيله لدراسه الشعوب و المجتمعات .فالفيس وتوتر قدروو باسالتهم ده واتطلاعتهم ده قدرت اجهذه مخابرات اجنبيه كتير تدرس الشعوب العربيه وبشكل مكسف وكبير جداا ...تقدر دلؤتي تفهمي له الاستطلاعات ده .. لو مش مصدقي كلامي ابسط مثال.. اسالي عن فيده الاستطلاعات في الحروب الاستراتجيه وانجزتها.
ده شرح مختصر للاستطلاعات .
في حاجه اهم وخطيره الفيس وتوتر بيعملو عيلها . وهي اشاعه الفتن والاخبار الفسده والغير سليمه . لايغرك بعض الاخبار سليمه ولكن اكثر الاخبار لها هدف هو الفتنه وتوجيه الراي العام. للاسف الفيس معلهوش اي رقابه الرقيب الوحيد هو العقل وسبحان الله انتي وصلتي بس للملاحظه وانا بكل تواضع بقدملك معلومه لاوضحلك سبب تسائلك.. في دول في العالم تصدك للفيس وجوجل وتوتر زي الصين . معندهمش جوجل وتوتر والكلام ده و لو تفتكري عن خبر حدوث ازمه بين شركه جوجل والصين .. والكثير من الامور الاخره المخفيه. شكرا وياريت مكنش اطلت عليكي.