السبت، 21 يوليو 2012

رمضانكم أحلى



رمضان دايما بيجمعنا على الخير والذكر و الاخلاق 
يمكن وسط مشاغل الدنيا مش بنكون ملتزمين اوى 
لكن فى رمضان الوضع بيختلف كلنا بنتسابق لكل حاجة حلوة 
عايزين ربنا يكرمنا ويغفرلنا و يسامحنا عايزين نقرب لربنا اكتر 
رمضان دايما فيه حاجات كتير اوى حلوة 
يمكن احلى حاجة فى رمضان السنة دى - انتوا - من غير اسماء كدا
كلكم محليين رمضان السنة دى فرحانة ان دعايا هيزيد ناس كتير 
فرحانة بوجودكم فى حياتى وسؤالكم عليا و رسايل الفيس اللى جتلى 
اسفة انى اتاخرت عليكم بس كنت مشغولة جدا والله ومش كنت بقدر ادخل نت 
كل رمضان وانتوا منورين حياتى و مزودين دعايا و مجتمعين على الخير يارب 

يعنى ايه رمضان لو جيت كشفت عنها فى المعجم يبقى هتكشف عنها فى مادة " رمض "
اللى هى معناها الحدة فى الاشياء ورمضان مأخوذة من الرمضاء اللى هى شدة الحر 
الاساس فى رمضان شدة الحر تفتكروا الحر دلوقتى اهون ولا الحر زمان فى الصحراء 
ومفيش تكييف ولا مروحة ولا اى وسائل راحة وترفيه 
ولما نينا عليه افضل الصلاة والسلام يقولنا " من قام رمضان إيمانا واحتسابا غفر له 
ما تقدم من ذنبه " مش يبقى يستاهل اننا نستحمل و نحاول نستغله على قد ما نقدر 
بس من غير ما نفضل نشتكى ونقول بس والله الجو حر اوى مش عارفين نعمل ايه 
وحشة اوى فى حقنا ان ربنا يدينا فرصة زى دى ونكون من جوانا مش راضيين بقضائه 
فى ان الجو يكون حر حاولوا ترضوا وتبتهجوا وكل ما يزيد الحر اجتتهدوا اكتر 
والتمسوا من الله ثواب مضاعف 

انا دايما بحسب السنين برمضان يعنى من رمضان لرمضان سنة لرمضان وكدا يعنى 
لو حسبتوها كدا هتحسوا ان السنين بتزيد بس انا بحب احسب سنين عمرى كدا
يمكن علشان انا اتولدت فى رجب مش عارفة بس اعتقد ان دى حاجة حلوة جدا
لان رمضان الشهر الوحيد اللى حتى لو حصلك فيه حاجة وحشة فاكيد اكيد فيه مليون حاجة حلوة 

وفى بداية رمضان احب افكر نفسى ان اسوء رمضان فى حياتى هو رمضان 2010
كنت مقصرة لابعد الحدود للاسف واحلى رمضان هو رمضان 2011 معنى كدا ان 
لازم احافظ على اللى عملته السنة اللى فاتت واقرب اكتر واكتر 
ادعولى ربنا يثبتنى ويثبتكم ويقوينا جميعا يارب 

" دعاء بظهر الغيب يكفينى "
استاتيس كتير بكتبها على الفيس وكنت كتبتها فى اكتر من بوست طول السنة اللى فاتت 
جالى عليها اكتر من رسالة على الفيس فى اوقات مختلفة 
ناس سالونى تحبى ندعيلك بايه وناس تانيين قالولى دعينالك واخر واحدة بعتت تقولى 

انها عيزانى انا كمان ادعيلها وان هى بقت بتكتب الجملة دى فى الفيس بتاعها 
غالبية اللى بعتولى مش اعرفهم ومش ضيفاهم اساسا فده فرحنى جدا 
ياريت تدعوا لكل الناس اللى تعرفوهم واللى مش تعرفوهم يمكن حد تدعيله 
ويكون هو فى اشد الحاجة لدعائك وربنا يتقبل منك وكمان الملائكة هترد عليك ولك بالمثل
وعلشان احنا فى رمضان شهر الدعاء والاستجابة 
فدعاء بظهر الغيب يكفينا جميعا



9 التعليقات:

Alone Spirit يقول...

ربنا يكرمك وتتجوزي اديني دعيتلك اهه

aya mohamed يقول...

ربنا يخليك ليا يارب
وربنا يتقبل دعاك ياااارب

أحمد أحمد صالح يقول...

كل عام و انت بألف خير و الاسرة الكريمة،و كل عام و العالم الاسلامي بخير و امن و سلام،و ندعو الله ان يعيننا على الصيام و القيام و أن يتقبل منا صالح الأعمال..و كل عام و نحن من الله أقرب..رمضان كريم

eng_semsem يقول...

كل سنه وانت طيبه
وربنا يتقبل منا ومنك ومن صالح المسلمين اعمالهم
ويغفر لنا سيئاتنا
ويجعلنا من عتقائه من النار
تحياتي

حنين محمد يقول...

مساء الغاردينيا آيه
كل عام وأنتِ بخير
ودعواتي لكِ أن يهبكِ الباري الحب والصحة والسعادة ولايحرمك أحبتك ياغالية :)"
؛؛
؛
لروحك عبق الغاردينيا
كانت هنا
reemaas

Unknown يقول...

رمضانك كريم ياحُلوتى :)
جو المدونة جميل ^^
افتقدتك ~

شمس النهار يقول...

كل سنة وانتي طيبة وان شاء الله رمضان دايما يبقا جميل معاكي
:)
مبسوطة اني اتعرفت علي مدونتك

rona ali يقول...

كل سنه وانتى الى الله اقرب يا آيه

انا بقي بحسب السنه بتلت حاجات

برمضان وبعيد ميلادى وقبل ما اتخرج بوقت النتيجه لان التلت فترات دوال لازم هتحصل فيهم حاجه تفرجنى

ربنا يبسطك دايما :)

aya mohamed يقول...

ميرسى على الدعوات الحلوة دى
ربنا يتقبل يارب
وكل رمضان وانتوا اقرب الى الله :)