الاثنين، 16 يوليو 2012

وإنى أرغى





نظرا لأنى قررت أرغى فى البوست ده 
فياريت اللى مش عايز يوجع دماغه ممكن يرجع للبوست اللى قبل كدا
قصة حلوة مش مملة يعنى بس محدش يدخل ويخرج من غير رايه 
سيب رأيك فى اى مكان المهم تسيب دليل وجودك :)

رمضان الاسبوع الجاى كل سنة وانتوا طيبين 
والصراحة رمضان السنة دى كريم اوى معانا عامل الواجب وزيادة من قبل ما يجى 
أطول رمضان من 33 سنة علشان ميبقاش حارمكم من حاجة يعنى 
وكمان فى الحر الفظيع اعتقد مش هتلاقوا حر اكتر من كدا 
ناقص بقى ان كلنا نزود فى العبادات علشان يبقى كرم فى كل حاجة 
ربنا يقوينا على القيام والذكر وحسن العبادة يارب 

رمضان السنة اللى فاتت كان الحمد لله كريم معايا من اول يوم
وكان اكتر رمضان انجز فيه حاجات كتير جدا
الحمد لله ربنا يتقبل
و يكون رمضان السنة دى فرصة اكبر انى اثبت واكمل على اللى بداته السنة اللى فاتت
يمكن اللى مضايقنى السنة دى ان الفجر بيأذن الساعة 3 وتلت يعنى نبدأ قيام الليل من امتى مش عارفة 
مع مراعاة ان البنات غير الولاد فى غسل اطباق بعد الفطار و تجهيز سحور وارتباطات اخرى 
انما الولاد بقى مفيش اى مشكلة وبحس ان الرجالة فى رمضان بيفتروا اكتر 
مش بيقدروا ان احنا كمان من حقنا نلاقى وقت للعبادة زيهم مهو احنا كمان هنحاسب بس نقول ايه بقى 
عموما يارب رمضان يكون كريم معاكم فى الخير والأجر ان شاء الله 

فرحانة اوى  بمعرض فيصل الرمضانى ليه بقى علشان كتابى هيكون موجود بإذن الله 
كمان كتاب أبجدية إبداع عفوى وانا الابجدية بالنسبالى فرحتى الاولى فليه معزة خاصة 
كمان علشان كتاب جماعى ففرحتى بيه اكبر 
ولما كمان يكون فى اصدار تانى من كتاب ال 100 تدوينة فكدا يبقى انا فى قمة السعادة 
عايزين تعرفوا اكتر وتشاركونا حلمنا فى الاصدار التانى تعالوا هنا 
بالنسبة بقى للقاهريين اللى يعرفونى واللى مش يعرفونى وعادوا هنا بالصدفة 
فى معرض فيصل اللى فى أرض الهيئة العامة للكتاب بمحطة الطالبية من يوم 

26 يوليو ولـ 10 أغسطس هتلاقوا كتاب اسمه " حالات مفردة " لـ آية محمد حماد 
اللى هى تقريبا تبقى انا ياريت تشتروه علشان تطمنونى حلو ولا وحش ولا ظروفه ايه 
وده طبعا لانى مش هعرف اشوفه وتسلمولى عليه كدا لحد ما ربنا يسهل واشوفه بقى 
وياريت لو تروحوا على شهر 8 كدا لانه لسه مش دخل الطبع اساسا 
بس قلت اعرفكم بردو علشان تعملوا حسابك فى 15 جنية تمن الكتاب قبل رمضان 
انا عارفة الناس كلها بتفلس فى رمضان فمن قبلها اهو اعملوا حسابكم بقى 

فى حاجة مزعلانى من ناس كتير على بلوجر والفيس الا وهى الهمزة 
يا جماعة انا اسمى " آية " همزة مد بتعمل شيفت + حرف ى مش صعبة والله بس جربوا 
واللى مش هيكتب الهمزة بعد كدا مش هرد عليه علشان الهمزة عندى موضوع حيوى 
معقدة بقى لازم تستحملونى واكيد اللى مش عايز يستحملنى مش هيكون محتاج يكلمنى 
اتفقنا خلاص الحمد لله 

بالنسبة بقى للمدونات اللى اوقات كتير بعلق فيها مرة وعشر مرات لا 
فده يرجع انى مشغولة بس هو انا مشغولة بايه مش عارفة 
بس والله اوقات بدخل مدونات واكتب تعليق وبعدين الجهاز يهنج اقوم قافله التعليق 
قبل ما ينزل واوقات ادخل اقرا ومش بكون عارفة اكتب ايه والحكاية دى بتحصلى كتير على فكرة 
مش بحب اقول جميلة ورائعة وخلاص لو لقتونى عملت كدا يبقى انا بنافق على فكرة 
وياريت تعذرونى ماليش فى المجاملات و كدا واكتر حاجة بتحرجنى وبقف قدامها كتير 
التعليقات اللى بتجيلى على اى بوست بفضل قد نص ساعه كدا
افكر ارد اقول ايه على كل واحد 
بس مينفعش مش ارد عليها ليه بقى
 علشان انا بضايق من الناس اللى مش بترد على التعليقات عندها 
ايوة انت وانت وهو مش بتردوا بتكتفوا بانكم عاملين اشراف على التعليقات وتقروها وخلاص
التعلقات دى تفاعل مش مجرد ابداء اعجاب وخلاص 
وعلشان انا بزعل فمتوقعه ان ممكن حد يدخل عندى ويزعل بردو 

انا كتبت بوست اهو علشان خاطرك انت بس عد الجمايل دى بقى :P
حاسة انك منتظم فى حملة التدوين دى اكتر منى 
فأنا اسفة علشان مش بقيت منتظمة حقك عليا و هى خلصت اساسا 
كل حملة تدوين وانت بتزن عليا انزل تدوينات 
وبتشجعنى وبتقوينى و وووووووو هبقى اقولك الباقى لما اكلمك بقى 
وكل رمضان وانت اقرب ليا من رمضان اللى قبله ;)



24 التعليقات:

Hanan w Haneen يقول...

تصدقي يا يويو انا كنت لسة بفكر اكتب حاجة كده عن رمضان بردو وحملة التدوين بس اخليها لاخر يوم او قبل الاخير

وبالنسبة للتعليقات .. انا كمان بحتار كتير فى الرد وبصراحة احيانا مش برد بس والله بيبقا غصب عنى بردو بقرأهم وبقوم مثلا او ببقى بكتب حاجات تانية وهكذا .. :(

وكل سنة وانتى طيبة ورمضان ده تحققي انجازات اكتر من رمضان اللى فات :))

وادعيلي اشارك فى كتاب الـ 100 تدوينة حلمــي بــجــد
وان شاء الله كتابك ينزل وكل النسخ تتباع كمان ^_^

aya mohamed يقول...

حنان

هستناكى تكتبى بقى فى اى يوم
وكل سنة وانتى احسن واحسن يارب
وربنا يتكبلك الخير وتشاركى فى الاصدار الجديد
ربنا يوفقك يا حبيبتى :)

مصطفى سيف الدين يقول...

الاول كل سنة و انتي طيبة
و الف مبروك لظهور كتابك للنور و ربنا يوفقك فيه
امممممممم
اما عن حكاية الاشراف على التعليقات و عدم الرد
و الله اكتشفت ان الرد على التعليقات بياخد وقت طويل الاحق بيه اتابع تدوينات تانية الا اذا كان هناك تعليق يستحق الرد مش شكرا و جميل و الله ينور و الحاجات دي
لما يكون في نقد موجه او تساؤل عن شيء ما او حاجة ضرورية تستوجب الرد
على العموم بعد الحملة هاحاول اهتم بحكاية الرد على كل التعليقات و متتضايقيش

ابراهيم رزق يقول...

قبل كل شىء كل سنة و انتى طيبة
بعد طده بطلوا نق على الرجالة
ثالثا مبروك الكتاب وعقبال الكتاب رقم 100
رابعا السنة الجاية انشاء الله ترتاحى من غسيل المواعين
ههههههه
فاهمانى
اما موضوع الرد على التعليقات فهى بالنسبة لى ظروف حملة و وقت ضيق فعلا

تحياتى

حنين محمد يقول...

صباح الغاردينيا آية
بصي أنا كتبت الهمزة اهوه شيليني بقى من القائمة السودا ههههههه وكمان انا شطورة وبرد على التعليقات في مدونتي بس والله بتعب لاني مش بلحق ارد في مدونتي ولا اتابع تدوينات وايه كمان ربنا يوفقك وبجد نفسي أقتني كتابك وأكيد حيحصل لانه جميل زيك وايه كمان ربنا يخليلك الي بيشجعك على الحمله :) عشان كدا احنا مستمتعين بيكي "
؛؛
؛
واخيراً بحبك واوعي تزعلي مني
لروحك عبق الغاردينيا
كانت هنا
reemaas

مصطفى سيف الدين يقول...

http://me3taf.blogspot.com/2012/07/46.html

ضياء عزت يقول...

كل سنة وانتي طيبة

مبروك على الكتاب .. وحاضر هعمل حسابي في 15 جنية :D
المشكلة إني مش هلحق المعرض لأني هقضي رمضان كله ف البلد.. ملحوقة إن شاء الله واشوف الكتاب في معرض القاهرة

بالتوفيق دايما .. ورمضان كريم

aya mohamed يقول...

مصطفى

وانت طيب وبالف خير يارب
والله يبارك فيك هستنى رايك بقى
اما عن الاشراف على التعليقات فهى فعلا بتضيع وقت احيانا
بس لاحظت ان فى تعليقات عندك كان المفروض ترد عليها ومش رديت بس
وخلاص مش مضايقة كفايا انك بتمتعنا بكتاباتك

rona ali يقول...

انا عرفت انتى بتحبينى اوى ليه
علشان مش بنسي دى آيه :)))

والله انا بحب فعلا التركيز في كتابه الاسم ليه
بقي
لانى قبل كده كتبت برضوا بوست والله العظيم انا رنا مش رانا مش هتنطقونى وانتوا بتمدوا في اسمى كان بوست فظيع :)

كل رمضان وانتى بخير ومقربه من ربنا وطاعته اكتر كل رمضان واحنا سوا ودة اول رمضان يعدي علينا سوا ورمضان اللى جاى تكونى في بيتك باذن الله :)

فيصل معرفش فين هههههههه قولتلك انا عايشه بكتشف اماكن عجيبه في القاهره وانا منها
هحاول باذن الله بكل طاقتى اعمل كده ادعي انتى

التعليقات انا كمان مقتنعه بجملتك اثبت وجودك ومقتنع بالرد بس احيانا الواحد فعلا بيكون مش قادر لضيق الوقت ميردش ويفضل يدخل يرد عليهم من خلال كتاباتهم امتع علي فكرة لان باختصار محدش عنده الوقت يرجع يشوف انتى ردتى عليه ولا لأ بس اكيد لو رديتى عنده علي البوست وعلي تعليقه عندك هيشوفه وهيحس باهتمام اكتر :)

بحبك

زينة زيدان يقول...

آية محمد

سعيدة بتواجدي هنا
وسعدت جدا بمرورك لدي
هأنا أترك تعليقي لاثبات حضوري (- _*)

كلامك لخص الكثير مما كنت أبحث عنه لأتعرف عليكِ

يعني جيه في وقته

تقبلي مروري

Śђąžล ฬąђ٤єĐ ♥ يقول...

كل سنه وانتي طيبه بقى
ومتخليش اي حاجه تزعلك بقى
ومبرووووووك على الكتاب بقى
وان شاء الله يبقوا 100 كتاب ان شاء الله
وبجد بجد هدور عليه ان شاء الله وهشتريه

وووو

كان في حاجه كمان ونسيت ايه هي
المهم .. رمضان كريم ^_^

Amira Ramadan يقول...

كل رمضان وانتى بخير وصحة وسعادة
ويارب نفضل أصدقاء على طول
بتمنالك السعادة دايما
وصراحة انا مش برد فى المدونة بس عشان مش تزعلى أنا هعمل بنصيحتك وارد عشان محدش يزعل منى
دمتى بخير:))))

aya mohamed يقول...

ابراهيم رزق

وحضرتك طيب وبالف خير يارب
وربنا يبارك فيك ميرسى :)
وبالنسبة للتعليقات فدى كانت ملحوظة اى كان السبب ففى ناس بتزعل بردو
انا كنت بفكر اقول فى البوست الجاى انى مش فضيت ارد على التعليقات دى
ههههههههههه بس بحب ارد عليكم

aya mohamed يقول...

ريماس

طبعا طبعا انا مش ممكن ازعل منك
وبعدين انا معنديش قائمة سودا لانى مش بفتكر
مين اللى مش بيكتب الهمزة بس مش تقولى لحد بقى ههههههههه
وربنا يسهل وتقتنى الكتاب او ابعتهولك يعنى مش مشكلة
وانا بحبك جدا جدا اصلا :)

aya mohamed يقول...

ضياء

الله يبارك فيك يارب
الكتاب ان شاء الله هيكون موجود بعد رمضان فى المكتبات بقى
مفيش اى حجة بتنفع معانا اعمل ان حسابك فى الفلوس واحنا علينا الباقى ههههههه
رمضان كريم عليك ان شاء الله

aya mohamed يقول...

رنا

لا انا بحبك علشان حاجات تانيه كتير
وفكرة انك مجربة الموضوع فواخدة بالك دى حاجة كويسة هههههههه
وبالنسبة لفيصل هشرحلك تروحى ازاى بالتفصيل وتعملوا رحلة انتى وكل البنات كمان
هو انا عندى اغلى منك يا رونى يعنى :))

aya mohamed يقول...

زينة زيدان

وانا سعيدة جدا انى اتعرفت عليكى
نورتينى واسعدنى وجودك هنا
رمضان كريم عليكى

aya mohamed يقول...

شذى

وانتى طيب وبالف خير يا حبيبتى
والله يبارك فيكى وعقبالك ان شاء الله
وتدورى ليه انا هكتبلكم كل اسماء المكتبات بالعناوين اى خدمة :))
ولو افتكرتى اللى نسيتيه ابقى تعالى قوليلى تانى بقى
المهم الله أكرم :)

aya mohamed يقول...

أميرة

طيبة انتى يا ميرو وبتسمعى الكلام :))
وان شاء الله نفضل اصحاب على طووول
ربنا يكرمك يا حبيبتى ورمضان سعيد عليكى يارب

aya mohamed يقول...

رنا

نسيت اقولك ان انا اوقات كتير برجع اشوف
الرد على التعليق اللى عملته
امال عرفت منين ان فى ناس مش بترد
مش عارفة ليه حسيت ان انا الفاضية الوحيدة فى بلوجر ههههههههه

سندباد يقول...

ان شاء رمضان السنادي يبقي خير وكيم علينا كلنا - لاننا فعلا كلنا محتاجين نهدي ونرتاح ونستقر شوية ويمكن يكون الجو الروحاني لرمضان هو الحل الوحيد عشان نهدي شوية
مبروك لكتابك وبالتوفيق دايما ان شاء الله
كل سنة وانتي والجميع بخير

aya mohamed يقول...

سندباد

اللهم آمين يارب
كل سنة وانت طيب وبالف خير

Asmaa Amer يقول...

كل سنة وانتى طيبة يا آية
وإن شاء الله كتابك ينطبع وينجح كمان أنا عن نفسى هحوش 15 جنيه من دلوقتى
حاجة جميلة ان اللى حواليكى بيشجعوكى على الكتابة , دا حافز ليكى عشان تستمرى وبنجاح
هستنى كتابك بفارغ الصبر
وربنا يسعدك ويوفقك فى حياتك ان شاء الله

aya mohamed يقول...

أسماء

وانتى طيبة وبألف خير يارب
ومبسوطة انك هتستنى كتابى يارب يعجبك يارب
مبسوطة اوى انك رجعتى للتدوين تانى
ربنا يسعدك ويوفقك يا حبيبتى