الأربعاء، 4 يوليو 2012

مواجهة خاصة





1/ عرف نفسك ؟


أعشق البدايات ودوما ارتقب لحظات الميلاد
لكن ما أصعب تلك البداية
فأعرب ما فى اليوم ان - انا - تسأل وكذلك - أنا - تجيب
وقد استوقفنى ذلك كثيرا رغم انى من وضعت تلك التساؤلات
لكن لم يخطر بذهنى حينها أنى مثلكم سأجيب
فكيف سأكون فى مواجهتى لا أعلم ربما أحلمنى بعدما أنتهى
لأقف بينكم وأرانى من بعيد كيف كنت
آية محمد ... 24 سنة .... ليسانس آداب اعلام شعبة إذاعة 
مدرسة رياض اطفال ..... مخطوبة  ...... وبس 

2/ ما أكثر ما يميز شخصيتك ؟

بسيطة حد التعقيد واضحة حد التناقض 
هادئة يترأى لهم مجنونة يصفونى عاقلة يظنون 
وبين انا وانا اجدنى استثننائية فى كل شئ سوى ان اتميز بشئ 

3/ ما هى اهم نقطة تحول فى حياتك ؟

حملة التدوين السنة اللى فاتت 

4/ كيف دخلت الى عالم التدوين ؟

من زمان اوى كانت صحبتى عندها مدونة وقالتلى اعمل واحدة واكتب فيها اى حاجة 
كنت عملاها علشان اكتب لصحابى وبس لحد حملة التدوين اللى فاتت 

5/ ما اسم مدونتك ولماذا اخترته ؟

هو اسم ديوانى المفضل وقصيدتى المفضلة لفاروق جويدة 
ولقيت ان دايما دايما فى شئ سيبقى بينا 

6/ صف مدونتك ؟
مدونة زى صاحبتها مجنونة احيانا رومانسية احيانا اخرى 
واقعية وخيالية و بسيطة ومعقدة وكل حاجة واى حاجة 
هى انا فى كل حالاتى 

7/ من هم أكثر ثلاث شخصيات أثروا بك من داخل عالم التدوين ؟ ومن خارجه ؟

آية علم الدين اللى اكتشفتنى ودخلتنى حملة التدوين اللى فاتت 
مصطفى سيف الدين اكتر حد بيشجعنى فى عالم التدوين و بيدينى دفعات معنوية رهيبة 
لبنى احمد نور افكارها وشخصيا وكتاباتها ومن اكتر الناس اللى كانت بتشحعنى بردو
و رنا على و شيرين سامى و رحاب الخضرى و احمد الدسوقى وناس تانية كتير أثروا فيا جدا

8/ ما هى طقوسك الخاصة عند الكتابة ؟

مج نسكافية و فيروز او انغام واحيانا عبدالوهاب 
ومش بكتب غير فى المدونة حتى لو مش هنشره واحفظه لحين الحاجة 
ولو فى فكرة جت فى وقت غلط بكتب اهم رموزها فى نوتس على الموبايل 

9/ ما هو الاسلوب المفضل لديك فى التدوين ؟

الاسلوب العفوى وكتير بكتب ومش بكون عارفة التدوينة هتطلع ازاى فى الاخر 

10/ فى رأيك ما أهم ما يميز تدويناتك ؟

الخاطرة القصصية بحب اكتب بالاسلوب ده جدا 
وده اللى شجعنى انزل كتاب ان مش لقيت كتير بيكتب كدا 
وبيكتب حلو بمعنى ان حد يقوله ان جامد فى الاسلوب ده 
حسيت ان دى بتميزنى بشهادة ناس كتير 

11/ ما هو تقيمك لعالم التدوين فى الفترة الاخيرة ؟

متوسط المستوى 

12/ اختر اقرب تدويناتك الى نفسك وضع رابطها وحدثنا عنها ؟

كل تدويناتى كان ليها خلفية خاصة علشان كدا كلها قريبة منى 
هتلاقوا فى التصنيف قصاقيص جوايا دى انا بعفوية 
و بعض منى انا بردو بس باسلوب أدبى شوية 

13/ استعرض اهم المواقف الغريبة او الطريفة التى صادفتك مع التدوين ؟

كنت قريت تدوينة لمدون صديق و ألهمتنى بفكرة
وكتبت تدوينة بعنوان من فيض أحساسه 
وبعد ما كتبتها كانت عبارة عن جمل منفصلة مش ليها اى علاقة ببعضها 
فقلت اخلى الجملة الطويلة دى تحت والقصيرة دى فوق زى البازل كدا
فضلت الغبطت فى الجمل وبعدين نزلتها 
الاقينى اكتشف بقى انها طلعت قصة وكنت مستغربة جدا
من تعليقات الناس ان نهايتها حلوة 
وانا مش مقتنعه اساسا ان ليها علاقة ببعضها 
ويطلع بقى ان هذا الذى أستلهمت منه الفكرة كان يقصدنى انا بتدوينته اساسا
 وانا كنت عبيطة ولا فاهمة حاجة 
و تدخل الخاطرة كتاب أبجدية إبداع عفوى وأدخل انا قلبه ونتخطب هههههههههه 

14/ هل أحدث التدوين تأثيرا عليك ؟ وكيف ؟

اه تأثير جامد جدااا بقيت بكتب بأسلوب ادبى اكتر و اشتركت فى كتاب و عملت كتاب ليا 

15/ اختر اى مدون ووجه له سؤال ؟

ايووووووووة بقى فرصتى جت 
خالو ابراهيم رزق شايفنى ازاى ؟ " عايزة صورة مفصلة واضحة المعالم :)) "

ومع نسمات الصباح الرقيقة ادعو الله ان تكونوا قد استمتعتم مثلى بذلك اليوم

صباحكم نسمات رضا وسعادة لا تنتهى ان شاء الله 

40 التعليقات:

Sarah Ashour يقول...

بسيطة حد التعقيد
كانت أول حاجة في بالي أوصف بيها نفسي وتاهت وأنا بكتب :)

لذيذة خالص انتي وذوقنا قريب من بعض "النسكافيه وفيروز وجويدة"

Unknown يقول...

بدأتى الكلام بضربى بالبوكس على وجهى وكأنك بتقولى ..فُووووق وصحصح لكلامى وكمان بالفصحى وحاجات كدا جدّ جدا..بس اتغير الوضع ولقيتك فعلا لذيذة زى سارة عاشور ما
قالت..ربنا يوفقك

aya mohamed يقول...

سارة

مبسوطة ان ذوقنا قريب من بعض
وسعدت جدا بريارة مدونتك
والنسكافية او القهوة وفيروز
قاسم مشترك عند مدونين كتير اكتشفت الحكاية دى النهارده
نوتينى يا جميلة :)

aya mohamed يقول...

اسامة

فى هذا الوقت العصيب اللى الناس كلها
هتكون داخلة تدور على حاجة مميزة
وعلشان تكمل باقى التدوينة
فلازم تلاقى كلام يصدمك ويفوقك فى الاول كدا ههههههههه
وميرسى جدا لرايك ولزيارتك ليا :)

yasmeen gamal khodeer يقول...

إجاباتك جميله جداً و أسلوبك عجبنى و أنتى بتكلمى :) ,

Unknown يقول...

إنتِ جميله يا أيه و إجاباتك 10/10
بتوقع لكتابك و بتمنى له النجاح و طبعاً هكون جنبك في أول حفلة توقيع :)

ربنا يوفقك دائماً و تحققي كل اللي بتتمنيه

أرق تحية لكِ

aya mohamed يقول...

ياسمين

ده انتى اللى جميلة
ربنا يخليكى يا قمر :)

aya mohamed يقول...

شيرين

يااااه مش هتتخيلى فرحانة قد ايه
وطبعا نفسى حفلة التوقيع تبقى النهارده علشان اشوفك بقى
ربنا يخليكى يا حبيبتى و يوفقك ويسعدك يارب

ابراهيم رزق يقول...

هههههههههههههههه

اولا انتى قريتى البوست قبل التصحيح اصل بلوجر بيخرف
هههههههه
صححت الاسم و المفاجة اللى متعرفهاش ان مراتى اسمها ايه
طبعا اجاباتك عجبتنى
بس فى حاجات عديتى عليها سريعا
بس متعديش على خالوا
مخطوبة
ايه مخطوبة دى
دى زى الابلكشين بتاع طلب وظيفة
يالله هفوتها

تحياتى

aya mohamed يقول...

ههههههههههه طيب هرجع اقراه تانى
مع انك كتبت بردو آية هنا من غير همزة
بجد دى بقى مفاجاة جامدة جدا كدا انا حبتهاكل اللى اسمهم آية بيكونوا جامدين جدا وفظاع وطيبين ومش عايزة اقولك باقى مواصفتنا احسن تفتكرنى مغرورة ولا حاجة ههههههه
هى مخطوبة اكتب بعدها ايه طيب ههههه
طيب ما تسألنى على طول اسئلة مباشرة وانا اجاوب انا بحب اتسئل اساسا ههههههه
وبعدين انا سألت سؤال فى الاخر فين اجابته بقى

حنين محمد يقول...

صباح الغاردينيا آيه
اممم هي كدا صح ولا مش حسلم بردو من خالو ابراهيم رزق هههههه بجد أنتي جميلة ياآيه وكتاباتك مبدعة أنا فاكرة لما كنت بتابعك زمان كنت بسيبك للآخر لأني بحب أستمتع بحرفك وحبيتك أكتر لما تعرفنا على بعض في الفيس كان مسج صغنن بس حسيتك قريبة مني اوي ومش حنسى لما في فترة غبت عن مدونتك وكتبت لي كومنت رقيق عمري ماهنساه انا أفتقدتك جداً :) اممم اصلي بتأثر على طول ههههههه
ربنا يوفقك يارب ولايحرمك حضن خطيبك وابقى اعزميني على الفرح ربنا يحفظكم ويوفقكم يارب "
؛؛
؛
لروحك عبق الغاردينيا
كانت هنا
reemaas

aya mohamed يقول...

ريماس

احلى صباح على عيونك يا حبيبتى
هى كدا صح ايوة هههههههه
وبعد كدا اللى هينسى الهموزة هدفعه غرامة اساسا ههههههه
حبيبتى انتى كلك ذوق وانا فعلا بحبك وبحب اتابعك ولما بتغيبى بحس ان فى حاجة ناقصة فى الدنيا
ان شاء الله هعزمك واجيلك كمان بإذن الله
ربنا يسعدك انتى كمان يا حبيبتى وافرح بيكى دايما يارب

rona ali يقول...

ههههههههههه انا فاكره القصه المضحكه والقدريه دى

بحبك اوى والله يابنتى مميزة وجميله ورقيقه وطيبه جداااا بتفكرينى بحتت كانت جوايا واستخبت مع الزمن :)))

المهم بسله مجاتش يعنى :)))

aya mohamed يقول...

رنا

ههههههه ماشى انا حاسة انك جاية البوست ده مخصوص علشان تسيحيلى اصلا
واكيد البسلة باظت فى الطريق الجو حر ههههههه
لا انتى لسه زى ما انتى بس انتى اللى مش بتاخدى بالك
بحبك انا اكتر اصلا

ظلالي البيضاء يقول...

اللي عمل الفكرة دي بالفعل لامع ..
يعني أحياناً التدوين بيوحي بشخصية معينة في أذهان القارئ .. بتتلون حسب كل قارئ وحالته النفسية والاجتماعية والاقتصادية ومش عارف إيه ..
بس بالآخر تطلع الصورة مختلفة خالص واللن مش هوه اللون الطبيعي ..
وفكرة تدوينة ابنهارده خلت الألوان طبيعية والصورة واضحة ..
هههههه
دمت بألف خير أختي آية ..

مصطفى سيف الدين يقول...

جميلة جميلة يعني اجاباتك جميلة بهبل
اشكرك الاول على الكلمتين الحلوين عني و اتمنى بجد اكون استاهلهم
بعين دي كوسة انتي اخترتي اسئلة محضرة اجاباتها النموذجية ههههههههه
حملة التدوين السنة اللي فاتت كان ليها مذاقها الخاص و سعيد بيها جدا انها عرفتني بمدونتك
بالنسبة بقى لتدوينة خطيبك و ردك عليه ده بس علشان انتو قلوبكم صافية و صدقيني لو رديتي عليه بحاجة اغرب من اللي كتبتيها و قلتي حتى ريان يا فجل :) بس باحساس صحو كانت برضه هتستساهل تدخل كتاب الابجدية و تستاهلي انتي تدخلي قلبه
الاهم في عالم التدوين هو الاحساس
و ده رايي
تحياتي ليكي
و شكر على اسئلتكم اللي تعبتني :)

Lobna Ahmed Nour يقول...

انتي جميلة
أوي <3

aya mohamed يقول...

ظلالى البيضاء

مهى فكرة الاسئلة دى فكرتى هههههه
بس مش لامع ولا اى حاجة الاسئلة كانت صعبة
مش حسيت بكدا غير لما جيت اجاوب :)
ميرسى جدا ليك دمت بالف خير وسعادة يارب

aya mohamed يقول...

مصطفى

اجاباتها النموذجية ايه يا مصطفى بس
ده انا فضلت قاعده من الساعه واحدة لحد 5 على ما اقتنعت انى ارد على الاسئلة اساسا كنت بفكر مش اجاوب ههههههه
الغريب فى تدوينته انى مش كانت قاصده ارد عليه اصلا هى الفكرة جت من جملة هو كاتبها
بس هو النصيب يعنى وبعديها هو اعتزل التدوين وانا استوليت على مدونته ههههههه
ومتفقه معاك جدا هو المهم الاحساس
والعفو كل اسئلة وانت طيب وبخير ومن غير تعب :)

aya mohamed يقول...

لبنى

انتِ حبيبتى اوى اوى اوى <3

ضياء عزت يقول...

بالتوفيق والنجاح دايما يارب

أحمد أحمد صالح يقول...

سعيد بما قمت بتعريفنا به عن نفسك،و اتمنى لك السعادة و التوفيق و النجاح في عالم التدوين و في حياتك بشكل عام..نحياتي

Unknown يقول...

اخيييييييييرا تعرفت على ذلك الفارس المجهول انسه اية اسعدني جدا انتى اتعرفت على حضرتك واسعدني اكتر وجودي في مدونتك
تقبالي خالص احترامي وتقديري

hasona يقول...

السلام عليكم

تعجبنا تلك المواجهة الخاصة

وعندما نضع الأسئلة للأخرين نظن ان الاجابة سهلة - لكن عندما توضع بين أيدينا تهرب منا الاجابات

eng_semsem يقول...

اكيد انت احسن حد هيعرف يجاوب على الاسئله واكيد اجاباتك جميله وعرفتنا بشخصيه تستحق الاحترام
تحياتي على اجابتك وعلى الفكره

Unknown يقول...

بعدما قرأت هذه التدوينة أكاد اجزم ان المدونيين بينهم عوامل مشتركة كثيرة

" ومش بكتب غير فى المدونة حتى لو مش هنشره واحفظه لحين الحاجة
ولو فى فكرة جت فى وقت غلط بكتب اهم رموزها فى نوتس على الموبايل "

نصيحة اقتني موبايل تاتش بشاشة كبيرة فحتكون الكتابة عليه سهلة جدا وبدل ما تكتبي الرموز فقط تقدري تكتبي الفكرة كاملة

تقبلي تحياتي

Menna يقول...

سعيدة اني اتعرفت عليكي
انتي حد لطيف جدا و دمك خفيف و يا رب يوفقك في كل حاجة بتحبيها و نفرح فيكي قريب D:

سندباد يقول...

سعيد جدا بحملة التدوين السنادي لاني استفدت كتير اوي علي المستوي الفكري وكمان علي المستوي الشخصي كسبت اصدقاء جداد في منتهي الروعو جميلة اجاباتك ودمها خفيف وتتميز بالتلقائية
سعداء لمعرفتك
تحياتي

aya mohamed يقول...

ضياء

ميرسى ربنا يخليك
بالتوفيق للجميع يارب

aya mohamed يقول...

احمد

ميرسى جدا يا احمد
ربنا يوفقنا جميعا يارب

aya mohamed يقول...

شريف

ههههههه مش فارس مجهول ولا حاجة
سعدت جدا بزيارتك ليا وبرأيك
ربنا يوفقك انت كمان يارب

aya mohamed يقول...

hasona

صح جدا
ففرق كبير بين وضع الاسئلة والاجابة عليها
نورتى :)

aya mohamed يقول...

سمسم

مش شرط يعنى انا قرأت اجابات احلى منى
وانا بحط الاسئلة مش جه فى بالى انى هجاوب عليها
ميرسى لذوقك نورتنى

aya mohamed يقول...

اسامة على

فعلا فى نقاط مشتركة كتير
ميرسى على النصيحة جدا ان شاء الله قريب اعمل بيها
ربنا يوفقك دايما يارب

aya mohamed يقول...

منة

انا سعيدة اكتر بجد والله
وميرسى جدا على كلامك الحلو دده
ربنا يسعدك دايما يارب

aya mohamed يقول...

سندباد

انا سعيدة اكتر بكل الناس اللى اتعرفت
عليهم من خلال حملة التدوين دى واللى فاتت
ربنا يوفقكم يارب

Sara يقول...

(و تدخل الخاطرة كتاب أبجدية إبداع عفوى وأدخل انا قلبه ونتخطب هههههههههه )
هههههههههه

عسل أوي يا آية :)

سعيدة بالتعرف عليكِ عن قرب أكثر

بالتوفيق دومـًا و أبدًا :*

aya mohamed يقول...

سارة

ربنا يخليكى يا قمرايه
انا سعيدة اكتر بزيارتك وتعليقك
بالتوفيق لينا جميعا ان شاء الله :)

Amira Ramadan يقول...

عجبتنى اوووووووووووى اجاباتك وعفويتك فى الكلام
وبحب جنونك جدااااااااااا
وبتمنى تكونى اسعد واحدة فى الدنيا بالتوفيق يار ارق يويو عرفتها:))))

aya mohamed يقول...

اميرة

انا فرحانة بيكى جدا جدا بجد
ربنا يوفقك فى حياتك ويسعدك يارب