الأحد، 24 يونيو 2012

بحب نفسى








معرفش ليه كل ما اشوف والمح عنيا قصاد عنيه 
بحب نفسى 
 " حبى نفسك علشان هى تستاهل تتحب "
الجملة دى فى بالى بقالها كام يوم 
النهاردة بقى كانت مسيطرة عليا تقريبا 
كل ما بكون مضايقة منى او فى حاجة عملتها وحاسة انى قصرت فيها 
بفتكرك وانتى بتقوليلى الجملة دى وانا برد عليكى تفتكرى فيا استاهل 
كل ما افتكر وقتها قد ايه كنت ضعيفة وموجعة 
احس ان خلاص مرحلة الضعف دى استحالة ترجع تانى ابدا 
وافتكر انى بقيت دلوقتى احسن فى كل حاجة الحمد لله 
كمان حققت نجاحات عمرى ما تخيلت اوصلها 
واجرى بسرعه على سجادة الصلاة واصلى ركعتين شكر على اللى وصلتله 
عايزة اقولك وحشتينى اوووووى وبحبك اوى اوى جدا خالص يعنى 
وبحب الشرقية علشانك وحبيت مرسى علشانك بردو 
وعايزة اعترفلك اعتراف انا دلوقتى بجد بجد بحب نفسى :))))
مش علشان هى تستاهل علشان هى عندها طموج و اوقات بتعمل حاجات حلوة 

-----------------------------

" جربتى تحبى نفسك قد ما بتحبى اى حد من اللى حواليكى "
جملة بردو قالهالى صديق قديم افتكرتها دلوقتى 
وقتها مش كنت جربت ومش كنت متخيلة اساسا ان ممكن احب نفسى 
الفكرة مش فى انى مش مقتنعه بنفسى لكن الفكرة فى انى بحب اللى حواليا بزيادة 
وده بسبب ان عندى فوبيا الفراق فممكن اعمل اى حاجة فى سبيل ان مخسرش حد 
بس انا دلوقتى بعد ما حددت شكل علاقاتى بالناس و حسيت قد ايه الدنيا دلوقتى احسن 
جربت احبنى جربت اشوف جوايا ايه حلو وابص شوية عليه 
جربت افرح بنفسى لما الاقينى عاملة حاجة كويسة واقول ليا ايوة دى حلوة 
مش علشان انا شيفاها حلوة علشان ناس كتير قالولك دى حلوة 
والاحساس ده جالى بعد البوستين اللى فاتوا 
لما اكتر من 5 بنات عملوا شير لكلامى ولما لقيت صفحاتى على الفيس ناس كتير اشتركت فيهم 
ولما نزلت خبر للكتاب على مدونة احمد طوسون 
ولما لبنى عملت شير للخبر ولبنى عندى حاجة كبيرة اوى من العلامات المميزة فى حياتى كدا 
فانا فرحااااانة بيا بقى وكدا 

--------------------------------

" انتى مبدعة بجد وكلامك يستاهل يتنشر "
دى بقى جميلة مصطفى سيف الدين ولما مصطفى يقول كدا يبقى لازم اصدق بقى 
الجملة دى اتقالت من فترة شهرين تقريبا بس افتكرتها امبارح 
لما حسيت ان ناس بتقول على الفضفضة خاطرة وعلى القصة متدنية المستوى رائعة ومحصلتش 
حسيت ان فى حاجة غلط يا اما فيا يا اما فيهم 
بس لما قريت استاتيس على الفيس تقريبا بتقول نفس اللى حسيته بس بشكل واضح وصريح ومباشر 
افتكرت ان فى ناس شهدتلى بان كتاباتى حلوة وان كتابى اتقيم قبل ما يتوافق عليه 
حسيت ان لازم اصدق بقى انى بعرف اكتب الحمد لله وانى مش بشتغل نفسى وخلاص 
وياريت لو حد شايف انى بشتغل نفسى يقولى 
انا مش بزعل خالص من النقد لكن بتخنق من المجاملات والنفاق 
كتبت حاجة مش عجبت حد يقولى كتبت حاجة وحشة اسلوبها وحش اى حاجة ينقدنى 
ولازم تقروا الكتاب ان شاء الله علشان تنقدونى 
مهو لو فضلنا نقول حلو وجميل مش هنتعلم حاجة ولا هنطور نفسنا 

-------------------------------------

البوست ده رغى وتهييس على غير العادة ليه بقى 
علشان فرحانة ممكن وعلشان مش حضرت حاجة ممكن بردو 
وعلشان كان استفزتنى امبارح ظاهرة ان الرغى بيعمل كومنتات اكتر من الابداع :)))
وعلشان كان نفسى اكتب سياسة النهاردة وانا كنت قررت مش هكتب سياسة تانى 
بعد فشلى الفظيع فى بوست " فيونكات " اللى مفيش حد فهم انه سياسة 
كمان عايزة اقولكم 

حبوا نفسكم علشان هى تستاهل تتحب 
دوروا جواكم اكيد هتلاقى مليون حاجة حلوة 
بصوا للسماء وافرحوا بكرة اكيد احلى طول ما جوانا ثقة فى الله 

25 التعليقات:

Śђąžล ฬąђ٤єĐ ♥ يقول...

ههههههه
مش لازم يكون الرغي بيعمل كومنتات اكتر ولا حاجه
وبعدين فيونكات دي جميله جدااااا ومفيهاش اي فشل بالعكس لما وضحتي فكرتك وانها سياسه وقريتها تاني حسيتها احلى كتيييير

و ايه كمان يا ستي
اه
بالنسبه لانك بتعرفي تكتبي او لا
اعتقد انك مش لسه محتاجه تعرفي يا آيه
انتي اكيد بتعرفي تكتبي وبتعرفي كمان تطوري نفسك وده الاهم

رغيت انا كمان اهو :P

وهحاول احب نفسي ;)

ابراهيم رزق يقول...

بصى يا ستى
صلى على النبى
زيدى النبى صلاه
من حقك تكتبى اللى انتى عايزاه
حلو و حش مهم
برده من حق المتلقى انه يتلقاه زى ما هو عايز
يقول حلو ماشى
يقول وحش ماشى
يزهق و ميكملوش ماشى

اذا من حق اى حد يقول اللى عايزه
انطباعه فقط
لكن لما يجى يحلل يجب ان يخضع التحليل للعلم و المنطق
بصى يا ستى اتعودت مجاملش فى الفكر
اقصى ما اجامل به ان امتنع عن التعليق
انا بقول ليكى انك موهوبة
و انا زعلان انى متباعتكيش من زمان و مش عارف السبب
بس خلاص
سلام

Tamer Nabil Moussa يقول...

التدوين تعبير اساسى عن ما تجوش بة الانفس الاعجاب وقيمة الكتابة والاحرف فى الفكرة والهدف مما يكتب

الشكل والمضمون والتعبير اللغوى يختلف من انسان الى اخر ودة بيكون تكامل بين كل من يكتب كلنا نستفاد من بعضنا

ربنا يوفقك ويكرمك يا اية

مع خالص تحياتى

aya mohamed يقول...

شذى

ربنا يخليكى يا شوشو انتى اللى جميلة والله
بصى بالنسبة لانى بعرف اكتب ولا لا
مهو كل الناس بتعرف تكتب
المشكلة بتكتبى مختلف عن اى حد ولا العادى
اللى تحسى ان مفيش حاجة جديدة
وده مش ممكن اقول انى وصلتله خلاص ولو حتى
وصلت النهارده فمحتاجة دايما اعرف انا صح ولا لا اعرف اراء الناس طول الوقت
مش بقتنع برايئ عن نفسى لازم اراء اللى مش يعرفونى هما دول اللى هيقولوا الحقيقة من غير مجاملة
حبى نفسى علشان انتى فيكى حاجات حلوة كتيرررررررر اوى :)

aya mohamed يقول...

ابراهيم رزق

عليه افضل الصلاة والسلام
عليه افضل الصلاة والسلام كمان مرة
انا رائ حضرتك كان يهمنى جداااا
وشهادة اعتز بيها بجد
السبب انى مش كنت اعرف مدونة حضرتك
التقصير منى انا :(
بس حصل خير الحمد لله ومبسوطة جدا بوجود حضرتك ومتابعتى :)

aya mohamed يقول...

تامر

معاك حق فى كلامك بديل اننا لما بنقرب من
نهاية الشهر بنلاقى مستوانا اتحسن كتير
عن اول ما بدأنا الحملة
ميرسى ليك يا تامر ربنا يسعدك يارب :)

Amira Ramadan يقول...

أولا انتى مش فشلتى فى بوست فيونكات ولا حاجه
الناس متعودة منك على الرقة والرومانسية مجاش فى بالها خالص انك ممكن تكتبى سياسة
ثانيا بقى انا من قبل ما اعرفك شخصيا وانا بحب مدونتك جدا
لانك بتكتبى حلو اووووووووى وده بشهادة ناس كتير
وانا متاكدة ان الكتاب هيطلع حلو ومن قبل ما اقراه لانى واثقة فى اختيارتك
ربنا يوفقك ويزيدك موهبة باذن الله
واكيد لازم نحب نفسنا عشان نقدر نحب الحياة
بوست مميز وبيدينا دفعه للامام وثقة بالنفس
ابدعتى:))))

aya mohamed يقول...

أميرة

اولا لازم اعترف انى فشلت لان المفروض
لما تكتبى حاجة احساسك بيها يوصل ومدام ده محصلش يبقى فى حاجة غلط لازم اكون
واضحة قدام نفسى علشان اعرف كان الغلط ايه واحاول اصله المرة اللى بعدها
ثانيا بقى مبسوطة اوى جدا يعنى بكلامك عنى
ربنا يسعدك يارب
ويوفقك انتى كمان يا حبيبتى

Radwa Ashraf يقول...

و أنا بحبك بقى :)
و هحاول فعلا أمشى بنصيحتك و بجد أحب نفسى :)

بحب بوستات الفضفضة دى أوى :)
و انتى تستاهلى .. خلى قدامك كتاب -إن شاء الله- دليل على إنجازات تقدرى تحققيها لما تثقى بنفسك كفاية :)

βent Pasha يقول...

اشكرك على النصيحة الغالية

وربنا يفرحك كمان وكمان
وعلى فكرة أحلى حاجة بتطلع هي اللي انتي مش بتكوني محضرة لها حاجة
:-))

سعدت بطريقة سردك للموضوع

تقبلي مروري

حنين محمد يقول...

صباح الغاردينيا ايه
طيب عارفة انك بنت عسولة اووي وبجد انتي موهوبة اوعي تقولي اني بجامل بجد انتي مبدعة انا الرغي عارفة بيبقى جميل عشان بسيط وحقيقي ومن القلب "
؛؛
؛
ممكن اشوف ابتسامتك الحلوة :)"
؛؛
؛
لروحك عبق الغاردينيا
كانت هنا
Reemaas

مصطفى سيف الدين يقول...

نصيحة من واحد دايما بيكتب حاجات متتفهمش
و اغلب كتاباته رمزية
انتي مفشلتيش و لا حاجة بالعكس انتي نجحتي توصلي احساس كل واحد يفهمه زي ما هو عايز
انا لما باكتب قصة كده بتجيلي تعليقات اني اقصد كذا و كذا و هي حاجات عمري ما قصدتها بس بااافرح بالتعليقات بتحسسني ان كتبت اربع او خمس قصص مختلفين عن اللي كتبته
مثلا قصة (من وراء البحر) محدش فهم اللي اقصده غير اتنين بس جمالها بقى ان الكل حبها و فهمها زي ما هو عايز ده فرحني اكتر
طيب تقدري تقوليلي مثلا نزار قباني في قارئة الفنجان يقصد ايه؟
هل يقصدالحبيبة و لا الحرية و لا فلسطين نفسها و لا ايه؟
مش مهم اللي هو يقصده المهم انك تحسي اللي بيكتبه مادام صادق
دانا لو عملت زيك كده و قلت فشلت علشان محدش فهم قصدي كنت قفلت مدونتي من سنتين :)
بطلي بقى يا آية اكتبي اللي تحسيه و اللي ييجي على بالك و صدقيني هتفرحي اكتر لما تحسي ان في عشر قصص في قصتك و اكتر من مية سيناريو
هتحسي انك مكتبتيش حاجة واحدة لا كتبتي مليون حاجة

مصطفى سيف الدين يقول...

نسيت صحيح
اوعي تكتبي تاني مرة لو لقيتي الناس مفهمتش اللي كنتي تقصديه
سيبيها حلاوتها في غموضها و مفاهيمها المختلفة

aya mohamed يقول...

رضوى

وانا بحبك اكتر جدا خالص بقى :)
لازم تحبى نفسك يا رضوى
لازم انا بقولك اهو هههههه
انتى هسولة وتستاهلى تحبيكى اصلا
وانا كمان هسمع كلامك بردو :)

aya mohamed يقول...

بنت باشا

اه فعلا والله
علشان كدا بفكر اعمل بوست من القلب كل 4 تدوينات :)))
انا سعدت اكتر بيكى
نورتينى يا جميلة

aya mohamed يقول...

ريماس

صباحك احلى يارب
انا ابتسمت اول ما شفتك اصلا والله :)
ورأيك انا بعتز بيه وعارفة انك
مش بتجاملى وانا بحب فيكى ده جدا
ربنا يخليكى ليا يارب :)

aya mohamed يقول...

مصطفى

طبعا مفيش اى كلام يتقال اساسا يعنى
وعلم وينفذ أستاذى :)
فرحانة بكل الكلام يعنى
وهقفل الموضوع ده على كدا بقى :))

Lobna Ahmed Nour يقول...

أنا حابة البوست ده أوي.. مش علشان اسمي فيه.. لأني أقل بكتير من ذوقك الجميل وقلبك الطيب
لكن علشان عايزاكي دايما تحبي نفسك أكتر.. وربنا يحبب الناس فيكي أكتر وأكتر

بحبك :)

دعاء مواجهات يقول...

جميل اوى اننا فى طظل كل الالم والوجع اللى احنا فية دا قادرين نحب نفسنا

دى معجزة ع فكرة

اسم المدونة بيمثلى ايقونة .. بحبها اوى

تحياتى

rona ali يقول...

قطيعه البوست دة عدى عليا وانتى ساكته يا هانم

ايه دة مافيش حاجه قولتها ليكى بتيجى في بالك يلا احسن انا كل كلامى مينفعش يتعلن عنه هنا اساسا اكيد اكبر من ان حد يفهمه مش كده هههههههههههه

انا مصممه ارغي معرفش ليه بس عندى كلام كتير اوى
اولهم انك حد جميل فعلا لازم تحبي نفسك كل ما هتحبيها هتحبي غيرك اكتر واكتر وهتدى اكتر كمان

اظن كلام دكتور مصطفي يثبت ان كلامى صح بالنسبه لفيونكات انا كمان كنت عايزة اقولك متقوليش قصدك تانى من اى شئ كاتبه انا بحب ان كل حد يفهم حاجه مختلفه وبحب الغموض وبحب كل مرة اقرأ افهم شئ جديد

وبعد كلام الخال ابراهيم معنديش برضوا حاجه اضيفها غير ان الراجل دة مبيجاملش فعلا واول مرة يندم علي حاجه يلا ياستى افرحى بقي :)))))

انا بقي بحب نفس آيه اوى ومؤمنه انها هتحقق اكتر من اللى حققته دلوقتى بس اى طريق بنمشي فيه لو مش مشيناه خطوه خطوه عمرنا ما هنستمتع بيه ابدا ولا هنتعلم لان النجاح لما بيجى بسهوله بيروح بسهوله

احب اقولك حاجه اخيره انتى من اللى علمونى حاجات كتير ومن اللى خلاونى اوصل لمستوى انا راضيه عنه في الكتابه لحد ما اعلى اكتر واكتر :))

rona ali يقول...

اة وارغي وهيسي علشان انتى عايزة ترغي وتفضفضي وبس مش علشان شئ تانى :))))

aya mohamed يقول...

لبنى

يارب يارب يارب انا وانتى يا حبيبتى
انا اصلا بحبك جدا جدا يعنى :)

aya mohamed يقول...

دعاء

هههههه مش لدرجة معجزة دى مجرد محاولة
وفرحانة بان مدونتى اسمها عجبك
نورتينى :)

aya mohamed يقول...

رنا

يا بنتى مهو انتى اللى بدات بيكى فى بوست بنفسجيات حبيبتى انتى يا رونى
انا بحبك وانتى بترغى ده اناهعمل كل خمس أربع بوستات بوست رغى ههههههه
ساعة ما قريت يا ستى افرحى وعماله اضحك :))) فرحانه اهو والله
ربنا يسمع منك ياااارب واوصل لحاجة انا مش عرفاها ولو الكتاب مش اتباع هخليكى تشتريه كله بقى هههههههه
وفرحانة اوى بجد انى قدرت افيدك يارب دايما يارب :)

موناليزا يقول...

وأنا بحبك :)