عدت سنة

لو حكينا يا حبيبى نبتدى منين الحكاية ده احنا قصة حبنا ليها اكتر من بداية 

مش عارفة حبيتك امتى وازاى وفين وهو ايه اللى حصل اصلا
بس زى النهاردة من سنة كانت اجمل كلمات كتبتها فى حياتى
كانت اكتر كلمات عفوية كتبتها من غير ما افهم معناها من غير ما اركز ان كلمة بتقولك بحبك
طفلة انا زى ما انت دايما بتقولى علشان كدا لما حبيتك كنت طفلة بتتكلم عنك وبس 

انا فجاة حسيت حاجات وقولتها وكان ردك ولا زال محفور فى قلبى 

حسستنى انى ملكة اطلب وانت تنفذ اتمنى بس وانت هتعملى اللى عيزاه 

لما ببص فى ايدى دلوقتى واشوف دبلتك بحس انى ملكة فعلا 

ملكة بحبك ليا اللى مفيش اى حد فى الدنيا ينفع يبقى عنده مملكة زى بتاعتى 

علشان انت بتاعى انا بس :$

بحبك قد فرحتى بيك طول السنة اللى فاتت دى 

بحبك لانك منحة من ربنا ليا علشان تعوضنى عن اى تعب وتبدلهولى بفرح 

هو انت ازاى كدا اساسا هو انت بجد وحقيقى 

عارف اساسا خايفة عليك منى ربنا يحميك ويحفظك يااااااارب ويباركلى فيك يااااااارب 

ربنا يقدرنى واسعدك ولو جزء من السعادة اللى بحسها معاك يارب 

كنت عايزة اكتب كلام كتير اوى بس مش عارفة خالص 

فرحانة لدرجة انى مش لاقيه كلام بس اكيد انت حاسس بيه 

كل سنة وانت طيب ومعايا وجنبى كل سنة وانا بحبك اكتر من السنه اللى قبلها