Friday, February 25, 2011

شهر الحب



اكتر شهر كتبت فيه لانه تقريبا اهم شهر فى حياتى
وفى حياة كل المصريين والعرب والعالم كله
ده هيبقى اخر بوست فى شهر فبراير
علشان كدا حبيت اتكلم عن انه شهر الحب واجمع فيه كل كلامى طول الشهر
النهارده اخر جمعة فى شهر فبراير
كل جمعة فى شهر فبراير كان ليها اسم طبعا من بعد اشهر جمعة فى تاريخ مصر جمعة الغضب28/1
تلاها جمعة الرحيل وجمعة الخلاص وجمعة النصر وجمعة الوفاء
مصر كانت فى اروع صورها الشهر ده

كل عين تعشق حليوة وانتى حلوة فى كل عين
يا حبيبتى قلبى عاشق
واسمحيلى بكلمتين

احمد فؤاد نجم

على اسم مصر التاريخ يقدر يقول ما شاء
انا مصر عندى احب واجمل الاشياء
بحبها وهى مالكة الارض شرق وغرب
وبحبها وهى مرمية جريحة حرب
بحبها بعنف وبرقة وعلى استحياء

صلاح جاهين

لو سالتم عن الحب اهو موجود وكيف نعثر عليه لقلت نعم ولكنه نادر
وهو ثمرة توفيق الهى وليس ثمرة اجتهاد شخصى
وشرط حدوثه ان تكون النفوس خيرة اصلا جميلة اصلا
والجمال النفسى و الخير هما المشكاة التى يخرج منها هذا الحب

د/ مصطفى محمود

افهموا الحب بمعناه الواسع الذى يشمل كل ما هو حق وخير وجميل
لا المعنى الضيق العقيم الذى لا يتجاوز حدود جسم امراه
احبوا ولكن ابقوا مسلمين

على الطنطاوى

نحن فى قرارة انفسنا نؤمن بالحب الرومانتيكى
الحب الفائض عن الصفات
لكننا نسفهه لان العالم حولنا يسفهه
فيجعلنا نبدو اقلية مضحكة
لقد سحق العالم العفوية ... فارعبنا
نحن نعرف اننا ضعفاء
اننا مشقوقون بالعواطف مريضون بالجمال
لكننا نظهر الامبالاه و الخشونة
لاننا نخشى الهزء والفضيحة

أنسى الحاج

نحن حينما نخاف من ان نحب شخصا .... نكون قد احببناه بالفعل

احلام مستغانمى

تشتاقه ولا تخبره
يشعر بها ... يهاتفها
فلا ترد
هى تستمتع بشوقها له كما تستمتع بأنسها به
كل ما هو " به " ممتع حتى لو اوجعها

سارة درويش

تعال اسرقك ليوم واحد ثم اقبل جبين الحياة شاكرة ممتنه واغادرها بسلام
تعال اعترف لك كم تمنيت ان ازور وطنك متخفية برداء الليل وظلمة الطريق كى اراك من بعيد
تعال نتجرد من تهذيب تربيتنا وحضارة المدينة بقطعة فحم نكتب بها على الجدران اسمى واسمك وتاريخ ميلادى وميلادك
تعال اقلم لك اظافر يديك وقدميك بجنون عاشقة فاذا ما انتهيت وضعت قصاصات اضافرك بيدى
وفتحت لك كفى واخبرتك بفرح ان لا شئ يعادلها لدى
تعال نسير فى الاسواق انتقى معك عطورك واقمشة ثيابك ومقاس حذائك
تعال افرد امامى ذراعيك ودعنى اغرقك بعطرك المفضل وابوح لك ان لا رجل بجاذبيتك انت
تعال توضئ للصلاة امامى ودعنى اقف خلفك اراقبك بحب امسك المنشفة بانتظارك لتجفف ماء وضوئك
تعال اصارحك انى تمنيتك فى زمن المستحيل

شهرزاد الخليج

كيف اقنعك انى لا اريد من الحب سوى
مقعد خشبى نتقاسمه
وطريق طويل نمشيه جنبا الى جنب
ووردة تقطفها لى من حديقة داركم ؟

واسينى الاعرج





Tuesday, February 22, 2011

فاصل منوعات 2



اول مرة اكتب بوست وانا مش عارفة احدد حالتى ايه
ممكن اكون حيرانه وجايز مبسوطة ويمكن مضايقة
هو الاكيد انى عايزة اكتب وخلاص
يمكن بشغل نفسى اصل مش لاقيه حاجة اشغل بيها نفسى
والشغل مش عايز يرجع كمان فيمكن حاسة بفراغ والنوع ده اسمه فراغ شغل مش فراغ تفكير

مش معنى انى مضايقة ابقى مش مبسوطة
بقت عندى القدرة انى احس بحاجتين فى وقت واحد
انا اساسا من يوم ما عرفتك ومفيش اى حاجة طبيعية فى حياتى
المشكلة انك متصور انى عايزة حاجة معينة وانا فعلا بجد مش عيزاها
ولو قلتها مش هصدقها او بمعنى اصح هتعمد مش اصدقها وهضحك واقولك وده حصل امتى
شفت بقى ان انا كمان عادى بس انت اللى مش واخد بالك
كل اللى انا عيزاه اننا نتعامل باهتمام زى اول كام يوم
مش انا اللى اديت لنفسى احساس انى مهمة من نفسى كدا
ومش انا لوحدى اللى عملت حاجات لمجرد انى حاسة انى عايزة اعملها
حاسة زى ما يكون بقالنا سنين نعرف بعض
هو ينفع اقولك ممكن نرخم زى زمان :D ?

ليس لدى امل فى شئ ما او شخص ما
ولكن لدى ثقة فى اختيارات الله
فلا احزن حد الموت ولا افرح حد الجنون
ففى الحالتين اسجد شكرا لله

هو حتى لو انا بحب هى دى حاجة تضايق حد
مقتنعه ان الحب احساس مش بنقدر نسيطر عليه زى ما مش بنقدر نسيطر على نفسنا
نفرح امتى ونزعل امتى ونبكى امتى ونضحك امتى
لكن نقدر نسيطر على نفسنا اننا مش نصارح اللى بنحبه او نصارحه او نقول لكل الناس او مش نقول
ومقتنعه بردو ان الحب حالة فردية لكن الجواز علاقة اجتماعية
يعنى ممكن احب حد ومش يعرف انى بحبه اصلا ومش مراهقة علشان يأذينى الحب ده
ومش بمشى ورا قلبى وبنسى عقلى وفى اتفاق انى متزنة فى تفكيرى
تبقى ايه المشكلة بقى
المشكلة انى بحب هههههههههه

قال لها : اخشى ان نفترق
قالت له : دعوت ( يارب ان لم تكتبه لى فلا تكتب على فراقه ) و لدى ثقة بالله
فقال : اللهم آمين
وتسأل : أأستحق ان تتمسكى بى
فصمتت وهى تردد داخلها : وحده الله يعلم انى تمنيتك منذ زمن فى دعائى

الاغنية دى حبيتها علشان معناها الدينى
علشان اول ما سمعتها اتمنيت انى اعمل بيت فيه ترابط اسرى ودينى كدا
علشان اول ما سمعتها قلت اللهم ارزقنى زوجا تقيا وذرية صالحة
سمعتها كتير جدا فى يومين وكل مرة بسمعها بحس بفرحة
مش لسبب اكتر من انها فعلا رائعة
وميرسى جدا للى عرفنى الاغنية جزاك الله عنا كل خير

فى بتنا اللى احنا عايشين فيه
بيبان الجنة مفتوحة عليه
مش عايزة كلام على الجنة مدام بنراعى ربنا فيه
ده بيت مؤمن ورزقه حلال دى نعمة ولا بكنوز المال
زوجين صالحين واحلى عيال فى احلى من كدا ايه
وصانا ... ربنا وصانا ... فى اهل بتنا امانة صونها واوفى الوعد
م الليلة .. صفحة جديدة م الليلة فى حضن لمة عيلة نفتح قلوبنا لبعض
مودة ورحمة واختبارات
تقوى بيت تزيده ثبات تضيق اوقات تروق اوقات سلمها بقي لله
مادام في البيت محبة وطاعة واهله في كل فرض جماعة
مسيرنا ننول اغلي شفاعة من رسول الله


Thursday, February 17, 2011

to my friends


فكرت اعملكم مفاجاة لما تدخلوا تطمنوا عليا من هنا
تلاقوا التوبيك عنكم
فرحانة جدا انكم اصحابى وفرحانة اوى بالبلوج لانكم متابعين اخبارى منه
زعلانة علشان الاجازة طولت ومش عارفة اشوفكم
بس خير خير ان شاء الله هنشوف بعض كتير بعد كدا

الى احلى لحظة فى حياتى : بحبك جدا جدا يا الذ بنوته فى الدنيا وبفرح جدا بكلامى معاكى انتى عارفة طبعا
بطمنك انا تمام الحمد لله وبعترف ان احساسك صح بس دى مجرد حالة
اول ما اعترف انى حبيت اكيد انتى اول واحدة هتعرفى
وانا تمام اهو والامن مستتب ومفتقدة جدا لمتنا سوا

يويو الاعلامية العظيمة : بفرح جداااا انك بتدخلى هنا وبفرح لارائك فى البوست كلها
نفسى بس تقتنعوا وتعملوا اكونت على الفيس بوك علشان نتواصل احسن
واكيد لما الترم التانى يبدا ان شاء الله يعنى هاجى ولو مرة نشوف بعض
خلى بالى من خطة البحث ودى فرصة حلوة انك تشتغلى عليها قبل ما الترم يرجع

أميرة و رانيا و مروة : بحبكم جداااا والمسجات بتاعتكم بتفرحنى جدا
يمكن مش دايما بعرف ارد عليكم لظروف خاصة بخلص بتوعى بدرى بدرى
طبعا بعد خروجة المنصورة اللى باظت فانا قررت الغى خروجة اسكندرية
مصر مش ناقصه كفايا اللى حصل :P
ربنا يخليكم ليا يارب

لوليتاااا : اشتقتلك كتيررررر واحب من موقعى هذا اعترفلك اعتراف خطير جدا
نفسى اتكلم معاكى واحكيلك حاجات بس بقاوم
وانتى اكيد فاهمة اساسا من غير ما اتكلم

احلى صاحبة واحلى نونا : انطلاقا من كلمتك الاساسية ليا بطلى هبل فانا بطمنك انى بطلت :D
وانطلاقا من مبدا انى بحبك فانا بطمنك انى لسه بحبك بردو :P
ومن هذا البوست العظيم باطالبك اننا نعمل الرحلة القادمة بقى ونروح التحرير
انا وانتى بس ها واخده بالك انتى طبعا :P

هبة : هى جملة واحدة اذ يو لايك
وبطمنك عليا من خلال انغامى الرائعة

انا عايشة حاله مش عارفة ايه اخرها
مش عايزة حاجة من الدنيا تانى غيرها
عايشة وخلاص مش عارفة ايه هيجرى
ولا عندى اى فكرة بكرة مخبيلنا ايه




Monday, February 14, 2011

إليك .....


معك تعلمت ان للصداقة وجوه مختلفة اصدقها وجهك

معك تعلمت ان اللحظات المؤلمة تتحول الى ضحكات بوجودك

معك تعلمت ان جميع اوقاتى مباحة
وجميع اسرارى مباحة
وجميع مشاعرى مباحة
فقط لك

معك تعلمت ان بقدرتى تغيير ملامح اليوم اذا حادثتك


معك تعلمت ان لكل شئ بداية وذروة ونهاية
الا حديثك منذ بدايته وهو فى ذروة الامتاع

معك تعلمت ان لى شخصية لم اكن اعرفها الا بك

معك تعلمت ان ذاكرتى لن تكفى لما اتعلمه معك

معك تعلمت ان الكلمات الرقيقة والكلمات القاسية
يختبؤون خلف معانى اخرى لا يعرفها غيرك

معك تعلمت ان بامكان القلب ان يخفق بشدة
دون ان يكون فى حالة حب عندما اكون فقط تحت ضغط كلماتك

معك تعلمت ان هناك الكثير والكثير مما نفعله دون سبب معلوم
والمبرر الوحيد اننا احسسنا اننا نريد فعل ذلك

معك تعلمت ان كل علامات الحب كانت خاطئة
وان كل مؤشرات الحب كانت كاذبة
وان كل دراسات الحب كانت واهمة
فجميعها تنطبق ظاهريا وتختلف جوهريا فقط عند تطبيقها عليك

معك تعلمت ان بامكانى تفسير ما اشاء كيفا اشاء
وبامكانك تفسير ما تشاء كيفا تشاء
ورغم ذلك احتفظ بقلبى وتحتفظ بعقلك

معك تعلمت ان الحياة مواقف مثيرة
تنتهى دوما بابتسامتك

معك تعلمت ان ما اتوقعه يتحقق وان ما لم اتوقعه ايضا يتحقق
فاصبحت فى ذات الوقت انتظرك ولا انتظرك

معك تعلمت ان الطفولة ليست المرحلة الاكثر براءة
وان المراهقة ليست الاكثر تهور
وان الشباب ليست الاكثر نضج
وان الشيخوخة ليست الاكثر ياس
فكل ذلك يحدث فى مرحلة واحدة معك

معك تعلمت ان الامتحان الاصعب ليس ان اجيب على الاسئلة
ولكن ان ادرك خطورتها ورغم ذلك اجيب بحرية
ولا احصل فى النهاية على نتيجة منك






Sunday, February 13, 2011

in love day


بوست غير العادة
مبسوطة جدااااا وعايزة اغنى من غير اى كلام وكمان فى مناسبتين
فبراير 14 & 12 ربيع الاول
مناسبتين فى يوم واحد
كل سنة وكل الناس طيبة ومصر كلها بخير يارب

مكتوب عليا ولا باديا حقيقة ولاولا حلم فى خيالى
ازاى فى لحظة وبكلمة واحدة عرفت عنيا يا عنيا سهر الليالى
لا كان ده قصدى ولا كنت بحسب ولا كان فى بالى

.....................

هو يا ترى عايز نتقابل هنا علشان نوعد بعضنا باحلى غرام
هى يا ترى هتحقق امنيتى وهتاخد هديتى وترضى اوام
هيقول بيا خلاص مشغول هتقول وتوافق على طول
ده انا اموت لو احساسى مش مظبوط يا سلام لو ضحكت الايام
انا جيتلك اهو قول لو عندك اسئلة يلا علشان مس...تعجلة ساكت ليه
هتكلم واقول بس محضرتش كلام انتى المنى واجمل احلام رايك ايه

.....................

اقول لعينيك ولا اخبي عليك عايشه الحياة انا ليك
معرفش من غيرك راح اعمل ايه
حياتي هواك والله بعيش بلقاك حتي الكلام وياك
بيرد فيا الروح حبيبي معاك
ايامي وطول لياليا والعمر اللي انا عيشاه
تعرف ولا قدرو عليا حبك مقدرش انساه
في عيني كلام احلي وارق كلام يلا تعالي قوام
انا قلبي مش قد الكلام وياك
وانا اعمل ايه في اللي بحس انا بيه قلبي اللي انا عايشه بيه
بينام علي صوتك وصحي عليه

......................

واه بوعدك انى افضل ليك وابقى قلبك وابقى عنيك وكل حلم بتحلم بيه
نسينى اللى قبلك عشتوا فى سنينى ووقت الضعف قوينى على الايام
احلامى فيك لقيتها حقيقة قدامى بخاف لتعدى ايامى حبيبى اوام
ده لو فكرت الاقى كلام اقوله حبيبى ليك
يفوت العمر كله يادوب وانا بوصف عنيك
قول من النهارده خلاص يا هموم مش هتبقى عيونا فى يوم
غير دموع الفرحه وبس
.....................
نفسى اقولك على اللى بيا نفسى اقولك كلمة واحدة
انت دارى بشوق عنيا متجاوبش ثانية واحدة
سيبنى اقولك من الكلام حاجة توصف اللى بيا واما اخلص فيك غرام ابقى رد انت عليا
انت مهما تقولى ايه مش هصدق غير عنيا
انا بشوف احلام عمرى جوه عنيك واما عينى تنام برضه بحلم بيك
حبيبى دوبت خلاص بعد تانى محال عيشت بيك احساس ابعد من الخيال
......................
وانا بين ايديك محتاجه ايه فى حاجة اكبر من كدا
وانا عمرى كنت احلم فى يوم اعيش حياة بالشكل ده
كل اللى فات مالعمر فات ومش بايدنا نرجعه
خلينا اكتر فى اللى جاى مبقاش فى وقت نضيعه
وانا مش هضيع عمرى تانى لو ثوانى هينفعوا
.......................
بحلم معاك بسفينة وبميناء ترسينا ونبحر تانى الريح تعاند
والاقيك فى عنيك واديك شطى وامانى
العالم كله باسراره عايش ويايا جايش جوايا
طول ما انت فى الرحلة معايا
اسمك واسمى يا حبيبى مدينتى وحكايتى
سكنى وترحالى
العالم كله باسراره عايش ويايا عايش جوايا
طول ما انت فى الرحلة معايا

Friday, February 11, 2011

يوم النصر


امبارح بليل كنت خايفة اوى 
الخوف كان حاسس بيه كل الناس ان الجمعة دى هتبقى اصعب جمعة 
بس مش عارفة ليه كنت حاسة بتفائل مش توقعت التنحى صحيح بس كنت حاسة ان اليوم هيعدى بخير
نمت مرتاحة ومبسوطة
العادى انى اول ما بصحى من النوم بتكون عندى حالة مسيطرة عليا ساعات احس انى حلوة زيادة النهاردة
ساعات احس انى مش حلوة خالص ساعات احس بفرحة غير مبررة او حزن غير مبرر
النهارده صحيت وانا مبسوطة وحاسة انى حلوة اوى بزيادة ولاول مرة اقف ابص فى المراية وانا معجبة بنفسى
على غير العادة يعنى انا مش بحب ابص لنفسى خالص ولا مقتنعه انى حلوة اساسا
المهم هو ده كان احساسى النهارده  
و كالعادة اول حاجة بفتح التليفزيون اشوف ايه الجديد
سمعت خطبة الجمعة من مسجد القائد ابراهيم وابتديت اقلق واقول ربنا يستر
الساعه 2.5 بالظبط جالى اتصال من احد افراد الجيش فى مطار الماظه
الرئيس مشى .... اخد طيارته الخاصة من مطار الماظه ومشى
وفهمنا وقتها ان خلاص هيتنحى
والمغرب جه بيان عمر سليمان والرئيس فعلا اتنحى
ومن وقتها ولحد دلوقتى مش فاهمة انا ليه بعيط
مبسوطة بالتغيير وكان ضرورى وكان نفسى اشارك فى المظاهرات
مبسوطة ان اللى ظلمونا هيتحاكوا
مبسوطة ان الحلم اللى كنا فاهمين ان عمره ما يتحقق اتحقق
بس مش بعيط علشان مبسوطة
بعيط علشان خفت من انتقام ربنا اللى اتجسد فى الرجل ده
شكرا لكل شباب 25 يناير شكرا لكل مصرى
شكرا لاجمل يوم فى تاريخ مصر
حسيت ان اليوم كان بدا من اوله حلو كل حاجة حلوة حتى مصر النهارده كانت حلوة بزيادة
 قريت حاجة عبرت عن اللى جوايا تجاه مبارك وقلت انقلها هنا

رسالة الى الرئيس المصرى*السابق*محمد حسنى مبارك :
كان لك حسناتك ومساوئك مثل اى رئيس، وكنت عندما اقول ذلك يقولون انى منافق ويخونوننى لأنى قلت رأيى
والان انت مواطن مثلى مثلك وانا اقول رأيى لأرى لماذا سوف يخونوننى ،،
اتضحك عليك واتضحك علينا ، وكان حاشيتك هم السبب الاكبر وبما أنك الزعيم تحملت سيئاتهم
واكثر مما تحملوها فقد يكون خطأك الاكبر هو : ســوء الاختيار ، سوء الاختيار لمن كانوا يديرون الحياه فى مصر ،
واعطائك الثقة فيهم بأنهم يعملون من اجل الشعب ،، ولكن ايضاً فيكفى اننا بـ عصرك كنا بأمان من اى دولة خارجيه ،
اعتذر لك نيابة عن اى شخص اراد ان يهينك ، ولكن كان لابد من رحيلك ، كان لابد من بداية عصر جديد ،
كان لابد من بداية عصر جديد ، كان لابد من حرية اكثر مما اعطيتنا ، كان لابد من التغيير ،
ورحلت وتنحيت لتلبى مطالب شعبك ، ففى عهدك قامت ثورة سيسجلها التاريخ لجيل جديد من ابناء مصر
...
شكراً لك واكرمك كرمز لمصر
كرمز لمصر لمدة اكثر من 60 عاماً
كرمز لأكبر دولة فى افريقيا والشرق الاوسط
وان اهنتك فأنا ليس مصرى
فالمصرى لا يهين رمزه
المصرى لا يهين اى شخص حارب فى 73 حتى وان كانت هذه الحسنه الوحيده فى حياته
المصرى لا يهين اى شخص كان سبب فى استدراد الارض
لأن ان اهان المصرى رمزه لابد ان يتحمل اهانة الخارج لهذا الرمز ، أى اهانة الخارج لمصر
...
شكراً لك , ولكن كان لابد من التغيير


Thursday, February 3, 2011

مصر .... اولا



الرسالة وصلت ومصر سمعت 
المشكلة دلوقتى انى مش فاهمة 
يمكن لحد العصر كدا كنت مبسوطة والاوضاع الحمد لله فى طريقها للاستقرار 
بعد كدا الدنيا اتقلبت 
القنوات بتكذب بعض حتى القنوات المصرية 
الشعب بيضرب فى بعض 
قنابل مولوتوف وكرات لهب وسيارات دبلوماسية وعصابات منظمة 
هو فى ايه ؟ 
وشوية يقولوا دول اخوان لالا دول حزب وطنى لالا دول اساسا منظمات اجنبية 
ولا حد فاهم اى حاجة ولا حد عارف يتصرف
طيب ممكن نسيبنا من كل ده احنا اساسا مش عايزين نعرف حاجة
كل اللى احنا عايزينه دلوقتى كل واحد يحترم نفسه ويرجع بيته 
لهدف واحد بس 
مصر .... لازم نحافظ عليها 
لا مع مبارك ولا ضد مبارك ولا مع المتظاهرين ولا ضدهم ومش لازم نبقى مع حد ضد حد 
لازم نبقى مع مصر ومصر وبس 
هى دى حاجة صعبة اوى كدا يعنى ان كل واحد يرجع بيته 
وبعد ما نرجع بيوتنا الامن ينتشر ونحاول نظبط البلد ولو عايزين ترجعوا تانى ارجعوا 
مهو مفيش حد هياخد التحرير ويمشى بس نظبط نفسنا وارجعوا تانى واقعدوا براحتكم 
بس نحافظ على بلدنا الاول

................................................

فى لحظة حسيت ان المكان اللى انا عايشة فيه امان عن باقى محافظات مصر
وكنت عماله اتصل بكل اصحابى اطمن عليهم
وعماله افكر هساعد ازاى الناس المتضررين من اللى بيحصل
وبمجرد ما قفلت اخر تليفون سمعت الناس فى الشارع
ولقيت ان انا كمان عندى نفس المشكلة
سجن فى بلدنا اتفتح وخرج المسجونين اللى فيه وبيحرقوا وبيكسروا
وبمنتهى العفوية سالت هو فى سجن فى بلدنا
واكتشف ان اه فيه وسجن كبير كمان
وحالة من الرعب عندنا احنا واكتشفت ان انا كمان مش قادرة اخرج من البيت
مش احساس بالخوف قد ما كان احساس بالصدمة
هو ايه اللى بيحصل
كنت على قناعه ان اللى حصل فى سجون القاهرة مؤامرة لاخراج عناصر بعينها
طيب واللى فى باقى سجون الجمهورية لاخراج مين ؟
دى كانت صدمتى واللى بردو مش قادرة افهم لحد دلوقتى

............................................

رسالة يمكن مش وقتها بس حاسة انى لازم اقولها وخلاص
بحبك اوى بجد وانتى عارفة كدا كويس
مش قدرت اقولهالك وانا بكلمك
انا فعلا فكرت فى نفس الجملة اللى انتى قولتيها  
انتى اغلى عندى من اى حاجة فى الدنيا   
اسفة على احساس غبى وسؤال اغبى
مبسوطة جدا انك صاحبتى
وبحبك جداااااااا