الأربعاء، 10 نوفمبر 2010

a7sas




احساس حلو اوى لما تلاقى ربنا بيبعتلك حاجات حلوة اوى مش كنت تتوقعها

اسبوع جميل بشكل مش طبيعى الحمد لله اوى على كل حاجة

احساس لا يمكن وصفه لما مامته تتكلم عنى ولاول مرة بشكل خلانى على قد ما مستغربة على قد ما انا طايرة من الفرحة

المفروض ان بقالها 4 سنين بتكلمنى وبتتكلم كويس يعنى عادى بس انها تتكلمى عنى انا وهو وعلاقتنا استغربتها فى دى

حتى وقت ما كنا مخطوبين المفروض وبتكلمنى عمرها ما اتكلمت عن انها حبنا او رايها فى شكل علاقتنا سوا

ياااااااه قد ايه كنت مبسوطة اه هو خلاص هو مش ليا بس المكالمة دى ريحتنى وفرحتنى جداااااااا

احساس جميل جدااا لما تبقى مش قادر تخبى انك فرحان وانك مستنى وانك خايف تضعف

واحساس اجمل انك تبقى فاهم ان اللى بيكلمك فاهم من غير ما تقول اى حاجة فرحتنى جداااا بشكل غير عادى

احساس لا يمكن وصفه لما تحس ان اطفال فى سن صغير اوى كدا يحبوك اوى كدا وبالشكل ده والاهتمام ده

كرم من ربنا ان حد يبقى بيحبك من غير اى هدف ولا اى سبب ولا اى مبرر للحب ده

حاسة ان هو ده الحب اللى بجد الحب الصادق

على فد ما كان كنت زعلانة انهم بيعيطوا علشان ماشية على قد ما كنت فرحانة جدا ان فى حد بيحبنى كدا

احساس جميل اوى ان حد يشوف بلوج بالصدفة وتعجبه حاجة وياخدها ويبقى مهتم يتعرف على صاحب البلوج

يمكن دى حاجة عادية بس علشان جت فى وقت كنت محتجاه فعلشان كدا فرحتنى

مكالمة تانية فى وقت جميل جداااا فرحتنى اوى واعترف ان طهارة القلب دى مش بقت موجودة فى الدنيا وفرحانة انى اعرف حد زيك

عملت البوست ده علشان اقول لنفسى انى من الناس المحظوظين فى الدنيا الحمد لله وعلشان وقت ما ابقى مضايقة اشوف البوست ده

وافتكر زى ما دايما يقولولى اللى ربنا بيحبه بيحبب فيه خلقه

وان اللى بيحصل مهما كان فكل دى اختبارات من ربنا ولما بننجح فى الاختبارات دى ربنا بيعرفنا بشكل تانى انه بيحبنا

0 التعليقات: