الأربعاء، 27 أكتوبر 2010

للايضاح ...لا أكثر





وما أبرئ نفسى إن النفس لامارة بالسوء إلا ما رحم ربى إن ربى غفور رحيم


انا عمرى ما احاول ارجعله تانى حتى لو روحى فيه

لما رجعلى المرة اللى فاتت قال انى دايما حاطه كرامتى بينى وبينه

واحنا مع بعض اه ممكن ابين كل مشاعرى لكن لما نقرر نبعد صعب انا اللى ارجع حتى لو كان البعد قرارى انا

مش علشان كرامتى زى ما هو بيقول لسبب تانى خالص

وهو ان انا دايما عيشاله هو عارف انى لا حبيت ولا هحب غيره فمهما يبعد انا ليه

انما هو حواليه اصحاب وبنات وحياة تانية والبعد بينسى مش كنت متخيلة انه يفضل يحبنى رغم كل الحاجات دى

الحاجة التانية وهى السؤال اللى شغل ناس كتير اوى هو ازاى قدر يسامحك ويرجعلك

انا كمان سالته السؤال ده وهو قال ان فى مليون حاجة بينا تخليه يسامحنى

بس لما مرة بقوله انت بتردى اللى انا عملته

قال حاجة غريبة اوى قالى انتى تفتكرى انا ممكن افكر كدا وبعدين انتى مش عملتى حاجة احنا كنا منفصلين

هو عارف ومتاكد انى مش خنته علشان كدا رجع كان واثق انى طول فترة بعدنا كنت محافظة عليه

زى ما هو عارف ومتاكد انى اسامح فى اى حاجة مهما عمل الا الخيانة

بعيدا عن يقينى بحاجة تانية بس اللى حصل فعلا خيانة مش ليها اى مسمى تانى

حاجة ثالثة ان اكيد هيكون ليا رد فعل مع صاحبتى حتى لو مش واضح

لا انا مش ليا اى رد فعل وبجد والله من قلبى بتمنالها كل خير وبدعى ربنا انها تقدر تسعده

هو كان ليه رد فعل قبل كدا فى نفس الموقف علشان هو كان بيدافع عن حقه فيا

انما انا متنازله عن حقى فيه مدام هو اختار كدا لسبب واحد بردو وهو انى لسه بحبه وبحترم قراراته

وانا مش هحب تانى كفايا تجربة واحدة فى العمر تكون حقيقية اوى كدا

ولما اتخطب اكيد هقول وكل الناس هتعرف بس بردو مش دلوقتى خالص

واى كلام عن الحب واى لحظة سعادة هعيشها فهى ملهاش اى صلة بعلاقة عاطفية خالص

علشان انا سعيدة جدا انى عشت احلى قصة حب فى الدنيا ..... وهفضل سعيدة بيها ..... وبس



عرفت منذ البداية اننا سنفترق


وكنت غبية حين ظننت ان الكون سيحزن معى على فراقك


انت بخير وانا بخير وابتسم


ولم تسقط من السماء نجمة ولم ينشق حزنا علينا القمر


كل منا يمضى فى طريقة


تاركين خلفنا تجربة حب فريدة



الاثنين، 11 أكتوبر 2010

words to u


يمكن دى هتكون اخر مرة اتكلم عنك او ليك

علشان خلاص تخطيت مرحلة اصدق ولا لا ومقتنعه تماما ان سواء كلامك صح ولا هما

فانا مش محتاجة اعرف الحقيقة لان النهاية واحدة

وبرغم كل حاجة جوايا ليك واللى برغم كل اللى عملته معايا لسه زى ما هى

وبرغم انى مقتنعه تماما باحساسى وان عمرى ما حسيت حاجة وطلعت غلط

حتى علاقتك بيها انت عارف انا قولتلك ايه وانت قولت ايه وقولتلك احساسى ايه وحصل

فى جمل حصلت مش عارفة ليه افتكرتها دلوقتى

انتى فى كفة وكل الناس التانية فى كفة ...كفة ايه ده انتى الميزان كله

متنسيش ابدا انى بحبك

هفضل احبك طول عمرى

سيبك من كلام اى حد ومن اصحابك والناس ركزى فى كليتك وشغلك ومش تصدقى اى كلام يتقال

انتى مقامك عندى عالى اوى خايف عليكى اوى

محدش يقدر ياخدنى منك كل حاجة فيا بتاعتك

احنا قصة حبنا مش هتنتهى ابدا مهما حصل فاهمة ولالا

حاسس انك ملكى اوى

حتى وانا بكلم اى حد بفكر فيكى مش عارف اعمل ايه فيكى

انتى اغلى حاجة عندى

بموت لمجرد التفكير انى اجرحك بس مفيش حل تانى علشان تنسينى

الجمل دى من اخر مقابلة واخر 3 مكالمات

وكل ده فى اسبوعين بس

فى شوية جمل تانية ناس مختلفة قالتلها بردو اثرت فيا جامد لما بفتكرها دلوقتى

هو : هو ليه بيتكلم زى ما تكونى ملكه ؟

انا : علشان انا فعلا ملكه

*********

انا : تفتكرى مبقاش بيحبنى

هى : انه بيحبك دى مفيهاش شك انما بيعمل معاكى كدا ليه دا اللى محيرنى

**********

انا : هو انا عملت ايه لكل ده

انت : انتى معملتيش حاجة ولا انا عملت حاجة بس مفيش فايدة

***********

صاحبك : انتى مكنتيش واحدة عادية فى حياته كلنا عارفين قد ايه بيحبك وبيعشقك

انا : اول مرة تقولى انه بيحبنى

صاحبك : مهى دى الحقيقة بس الظروف بقى

***********

صاحبتى : انتى هتموتنى نفسك حرام عليكى كدا علشان ايه كل ده

انا : مش مصدقة

صاحبتى : لا انتى مصدقة وكنتى عارفة وحاسة فوقى بقى

انا : بحبه اوى بجد

صاحبتى : وهو كمان مهو مش هيلحق يحب ويرتبط بسرعه كدا

انا : لا لحق

صاحبتى : مش فاهمه انتوا بتعملوا فى بعض كدا ليه هو عاش حياته خلاص افهمى بقى

انا : يعنى نسينى

صاحبتى : هينساكى فى اسبوع ازاى طيب ده حب خمس سنين

انا : علشان كدا مش مصدقة

**************

بس انت عملت اكتر حاجة مش كنت متخيلة ابدا انك تعملها علشان كدا عديت مرحلة انى اصدق

وعايشة زى قبل ما اعرف انك ارتبطت

مقتنعه ان اللى فرقنا النصيب والظروف وهفضل عند وعودى ليك

ومش زعلانه منها وانت عارف هى معذورة انت تتحب يا حبيبى وكمان صاحبتى وعارفة قد ايه حبيبتك

هتحاول تحبك اكتر ما انا حبيبتك وهتحاول تسعدك وهو ده بتمناه من ربنا

وعايزة اطمنك انى كويسة وباكل كويس زى ما طلبت منى وهخلى بالى من نفسى زى ما طلبت منى بردو

وهفضل افتكرك وادعيلك زى ما اتوعدت

بينى وبينك حب كبير

اكبر ما يفكروا بكتير

ده اللى ما بينى وبينك كان فى السماء متقدر

لازم كنت هحبك مهما لقانا اتاخر

كل كلامهم مش هياثر وانا ولا هبعد ولا هتغير

يمكن حتى هحبك اكتر مهما يحاولوا الناس بالعكس

حبنا جوه قلوبنا بيكبر

مهما يحاولوا يطفوا الشمس









السبت، 2 أكتوبر 2010

........

اجلس فوق سجاده صلاتي
ارفع يدي للدعاء بنسيانك

اتراجع
يرعبني نسيانك...

فمن نفس هذا المكان
رفعت ليـالي يدي ادعو الله
ان تكــون لي ومعي !

ومن نفس هذا المكان دعوت الله
ان تكن اسعد خلقه في كونــه

فأنت لم تكن شيئا عادياً في حياتــي,
ولم تكن احساساً عابراً..
ولم تكن مرضاً يمكن الشفاء منه.!

انت كنت في عمري
شيئاً يفوق عمري

برغم كل الكلام اللى بيوصلنى واللى بياكد عكس كلامك

برغم انك كنت بتثبتلى ان مستحيل يكون فى حاجة وبرغم انك لسه بتنكر وبتقولى مفيش حاجة

برغم انى لتانى مرة قولتلك كفايا علشان اريح احساسك لما قولتلى انا حاسس انى بخونك

برغم انك قولتلى سيبك من كلام كل الناس وثقى انى مش هحب غيرك طول عمرى

برغم كلامها عنك وبرغم انها المفروض كانت صحبتى

برغم انى اتسالت ايه هيكون رد فعلك فانا ماليش رد فعل علشان لسه بحترمك

و برغم كل حاجة حصلت لسه واثقة فيك

لسه مؤمنة بيك

لسه مصدقاك

لسه عند وعودى اللى قولتهالك اخر مرة اتكلمنا من 4 ايام

لسه مش مقتنعه ان مش ممكن حد ينسى حب عمره فى 4 ايام

لسه مش مصدقه ان واحدة تخون صاحبتها فى 4 ايام

لسه لحد امبارح بتقولى خلى بالك من نفسك علشان خاطرى وبقولك حاضر

لسه لحد امبارح بتقولى جميلة انتى واتكسف زى اول مرة قولتيلى

لسه لحد امبارح بتطمن عليا وبتودعنى زى ما اتعودنا

مش هنسى نظرة عنيك ليا اخر مرة اتقابلنا وكلامك ولمست ايديك

مش هنسى هزارك وضحكتك وحبك وخوفك ولهفتك عليا

مش هنسى ان كل ده كان لسه من كام يوم


مازال فى قلبى سؤال
كيف انتهت احلامنا
مازلت ابحث عن عيونك
علنى القاك فيها بالجواب
مازلت رغم اليأس
اعرفها وتعرفنى
و تحمل فى جوانحنا عتاب
لو خانت الدنيا
وخان الناس
و ابتعد الصحاب
عيناك ارض لاتخون
عيناك ايمان وشك حائر
عيناك نهر من الجنون


الثلاثاء، 7 سبتمبر 2010

دعاء



الحمد لله الذي فضلنا
على كثير من عباده المؤمنين

اللهم اني اعوذ بك من علم لا ينفع
ومن قلب لا يخشع
ومن نفس لا تشبع
ومن دعوة لا يستجاب لها..

اللهم يا مصوب خطأ الدعاء
بألا تجيب
ولذلك تحمي من الضر
من يدعو بالشر دعاءه بالخير.

سبحانك
- ولا تقال الا لك-
حذرتنا ألا نحكم في ما لا نعلم
حتى لا نحكم الأهواء في تزيين ما نشاء

وحسبنا من قولك عسى أن تحبوا
وعسى أن تكرهوا
ما أيده الواقع من شر
فيما نحب ومن خير فيما نكره.

اللهم انى اسالك  باسمك الرحمن الرحيم أن تنقذني من عيني فلا تريني الأشياء إلا بعينك أنت
و تنقذني من يدي فلا تأخذني بيدي بل بيدك أنت
تجمعني بها على من أحب عند موقع رضاك


الخميس، 22 يوليو 2010

to u



حاولت انام بس مش عرفت
اول ما غمضت عينى شفتك قدامى 
وكلمتنى تخيل فصحيت وفكرت انى نمت كتير 
لقتنى مش نمت غير ربع ساعه
طول الوقت بدعى ربنا انك تكون حاسس بيا اقولك سيبك من الكرم ده  
كتبت حاجة وقلت لازم اقولهالك دلوقتى عارفة انها هتعجبك 

عندما يعود حبيبى ساخبره 
كم من مرة تطاولت على  
وكم من مرة قسوة على 
وكم من مرة كذبت على 
عندما يعود حبيبى ساعاتبه
لماذا سمح لك ان تستخدم صوته حتى تقتلنى به 
ولماذا سمح لك ان تستخدم وجهه حتى لا اراه 
ولماذا سمح لك ان تستخدم انفاسه حتى تقنعنى انك هو 
عندما يعود حبيبى 
ستعرف انك ما كنت الا زيف مضى 
استخدمت كل شئ لكنك لم تتمكن من محوى 
فقلب حبيبى مغلق باحكام ولا يسكنه غيرى 

الخميس، 15 يوليو 2010

Dream of fame



كتير بحلم انى اكون مشهورة 

فى اى حاجة المهم انى ابقى مشهورة وخلاص 

يمكن يكون مجالى هو اللى بيخلينى احلم كدا

ويمكن لانى حاسة ان الشهرة محتاجة بس شوية مجهود وحظ

اوقات كدا  مع نفسى بحلم 

يااااه لو جمعت كل حاجة الفتها ونزلتها فى ديوان شعر

وبعد الديوان انزل قصة حياتى اللى بكتب فيها دلوقتى دى هتكسر الدنيا طبعا

بس يا ترى استنى اما ابقى صحفية معروفة وبعدين انزلهم ولا انزلهم وبعدين اشتغل صحفية

طيب واشتغل صحفية ليه انا المفروض مذيعة يبقى اشتغل فى مجال دراستى مذيعة

( ده على اساس انى لاقية شغل اصلا :lol: )

وهنا بقى يكمن الحظ انى الاقى فرصة كويسة وانطلق

كتير ناس قالتلى انى موهوبة وممكن اوصل ليه لا ووممكن فى يوم من الايام ابقى مشهورة 

واقابل ناس تقولى ممكن تمضيلى هههههههههه

بصرف النظر عن الشهرة الاعلامية بقى فانا بردو بحلم بالشهرة الاكاديمية 

اهى نوع من انواع الشهرة بردو 

المفروض انى بعمل تمهيدى ماجستير وكنت مرة راجعه فى المواصلات وكان قاعد جنبى 

واحد سالنى عن بحث كنت شيلاه معايا من كلامى معاه عرفت انه بيحضر الدكتوراه

بس طول الوقت كان بيقولى يا دكتورة بصراحة الكلمة كانت جديدة عليا اول مرة حد ينادينى بيها

الشخص ده حسسنى انى حاجة كبيرة اوى بس مش حاسة بقيمة نفسى

كان كلامه كله ثناء واعجاب بشخصيتى وافكارى البحثية واختيارى لموضوعات ابحاثى

مع انى كنت حاسة انى بس بجيد الكلام وعلشان كدا هو معجب بشخصيتى

وقالى لما توصلى هتنسى الناس وتتعاملى زى اى حد فى منصب سلطوى

وانا كنت بتحداه انى عمرى ما هوصل لكدا لان عندى مبادئ وقيم نفسى تبقى هى السائدة

ونفسى اوصل فعلا علشان احققها

ووقتها سالت نفسى هو انا عايزة مشهورة لمجرد انى اكون مشهورة ولا عايزة الشهرة ليه

ولقيتنى بجاوب بمنتهى العفوية عايزة الشهرة علشان احس ان فى ناس كتير اووووى بتحبنى

بجد هو ده الهدف الشخصى اللى عايزة احققه من حلم الشهرة

هل ممكن يجى يوم واوصل للشهرة واحقق حلمى

مين عارف ادينا مستنيين

 

 

الخميس، 8 يوليو 2010

fearing




فى عز فرحتنا دايما نلاقى الخوف واقف فى سكتنا مشتاق لينا وملهوف
كاننا واحشينه مع اننا عايشينه
خوف خلانا واحنا مغمضين بنشوف
لاعمرة خلى اليفرح فرحه بجد ولا عمرة خلى حد يطمن لحد 
يا ما حاولنا وكان نفسنا
ننسى روحنا نسيب نفسنا
بس تملى بفوقنا شعور بالخوف

 

خايفة من كل حاجة فى الدنيا
بقيت حاسة ان الخوف ده جزء اساسى منى
بس حاليا خايفة من الايام الجاية اوى
خايفة من النتيجة وخايفة من الامتحانات اللى انا فيها دلوقتى
خايفة من الفشل

خايفة من احلامى اللى بقت بتطاردنى فى كل وقت وبتحسسنى انى خذلتها
خايفة انام لاحلم بيك وخايفة اصحى لتصدم بعدك
خايفة ان الايام الجاية تكون لسه شايلالى مفاجات زى اللى فاتت

ربنا يستر وتعدى على خير

اللى بالبينك اغنية هدى عمار خوف من فيلم قص ولصق