الجمعة، 11 فبراير 2011

يوم النصر


امبارح بليل كنت خايفة اوى 
الخوف كان حاسس بيه كل الناس ان الجمعة دى هتبقى اصعب جمعة 
بس مش عارفة ليه كنت حاسة بتفائل مش توقعت التنحى صحيح بس كنت حاسة ان اليوم هيعدى بخير
نمت مرتاحة ومبسوطة
العادى انى اول ما بصحى من النوم بتكون عندى حالة مسيطرة عليا ساعات احس انى حلوة زيادة النهاردة
ساعات احس انى مش حلوة خالص ساعات احس بفرحة غير مبررة او حزن غير مبرر
النهارده صحيت وانا مبسوطة وحاسة انى حلوة اوى بزيادة ولاول مرة اقف ابص فى المراية وانا معجبة بنفسى
على غير العادة يعنى انا مش بحب ابص لنفسى خالص ولا مقتنعه انى حلوة اساسا
المهم هو ده كان احساسى النهارده  
و كالعادة اول حاجة بفتح التليفزيون اشوف ايه الجديد
سمعت خطبة الجمعة من مسجد القائد ابراهيم وابتديت اقلق واقول ربنا يستر
الساعه 2.5 بالظبط جالى اتصال من احد افراد الجيش فى مطار الماظه
الرئيس مشى .... اخد طيارته الخاصة من مطار الماظه ومشى
وفهمنا وقتها ان خلاص هيتنحى
والمغرب جه بيان عمر سليمان والرئيس فعلا اتنحى
ومن وقتها ولحد دلوقتى مش فاهمة انا ليه بعيط
مبسوطة بالتغيير وكان ضرورى وكان نفسى اشارك فى المظاهرات
مبسوطة ان اللى ظلمونا هيتحاكوا
مبسوطة ان الحلم اللى كنا فاهمين ان عمره ما يتحقق اتحقق
بس مش بعيط علشان مبسوطة
بعيط علشان خفت من انتقام ربنا اللى اتجسد فى الرجل ده
شكرا لكل شباب 25 يناير شكرا لكل مصرى
شكرا لاجمل يوم فى تاريخ مصر
حسيت ان اليوم كان بدا من اوله حلو كل حاجة حلوة حتى مصر النهارده كانت حلوة بزيادة
 قريت حاجة عبرت عن اللى جوايا تجاه مبارك وقلت انقلها هنا

رسالة الى الرئيس المصرى*السابق*محمد حسنى مبارك :
كان لك حسناتك ومساوئك مثل اى رئيس، وكنت عندما اقول ذلك يقولون انى منافق ويخونوننى لأنى قلت رأيى
والان انت مواطن مثلى مثلك وانا اقول رأيى لأرى لماذا سوف يخونوننى ،،
اتضحك عليك واتضحك علينا ، وكان حاشيتك هم السبب الاكبر وبما أنك الزعيم تحملت سيئاتهم
واكثر مما تحملوها فقد يكون خطأك الاكبر هو : ســوء الاختيار ، سوء الاختيار لمن كانوا يديرون الحياه فى مصر ،
واعطائك الثقة فيهم بأنهم يعملون من اجل الشعب ،، ولكن ايضاً فيكفى اننا بـ عصرك كنا بأمان من اى دولة خارجيه ،
اعتذر لك نيابة عن اى شخص اراد ان يهينك ، ولكن كان لابد من رحيلك ، كان لابد من بداية عصر جديد ،
كان لابد من بداية عصر جديد ، كان لابد من حرية اكثر مما اعطيتنا ، كان لابد من التغيير ،
ورحلت وتنحيت لتلبى مطالب شعبك ، ففى عهدك قامت ثورة سيسجلها التاريخ لجيل جديد من ابناء مصر
...
شكراً لك واكرمك كرمز لمصر
كرمز لمصر لمدة اكثر من 60 عاماً
كرمز لأكبر دولة فى افريقيا والشرق الاوسط
وان اهنتك فأنا ليس مصرى
فالمصرى لا يهين رمزه
المصرى لا يهين اى شخص حارب فى 73 حتى وان كانت هذه الحسنه الوحيده فى حياته
المصرى لا يهين اى شخص كان سبب فى استدراد الارض
لأن ان اهان المصرى رمزه لابد ان يتحمل اهانة الخارج لهذا الرمز ، أى اهانة الخارج لمصر
...
شكراً لك , ولكن كان لابد من التغيير


الخميس، 3 فبراير 2011

مصر .... اولا



الرسالة وصلت ومصر سمعت 
المشكلة دلوقتى انى مش فاهمة 
يمكن لحد العصر كدا كنت مبسوطة والاوضاع الحمد لله فى طريقها للاستقرار 
بعد كدا الدنيا اتقلبت 
القنوات بتكذب بعض حتى القنوات المصرية 
الشعب بيضرب فى بعض 
قنابل مولوتوف وكرات لهب وسيارات دبلوماسية وعصابات منظمة 
هو فى ايه ؟ 
وشوية يقولوا دول اخوان لالا دول حزب وطنى لالا دول اساسا منظمات اجنبية 
ولا حد فاهم اى حاجة ولا حد عارف يتصرف
طيب ممكن نسيبنا من كل ده احنا اساسا مش عايزين نعرف حاجة
كل اللى احنا عايزينه دلوقتى كل واحد يحترم نفسه ويرجع بيته 
لهدف واحد بس 
مصر .... لازم نحافظ عليها 
لا مع مبارك ولا ضد مبارك ولا مع المتظاهرين ولا ضدهم ومش لازم نبقى مع حد ضد حد 
لازم نبقى مع مصر ومصر وبس 
هى دى حاجة صعبة اوى كدا يعنى ان كل واحد يرجع بيته 
وبعد ما نرجع بيوتنا الامن ينتشر ونحاول نظبط البلد ولو عايزين ترجعوا تانى ارجعوا 
مهو مفيش حد هياخد التحرير ويمشى بس نظبط نفسنا وارجعوا تانى واقعدوا براحتكم 
بس نحافظ على بلدنا الاول

................................................

فى لحظة حسيت ان المكان اللى انا عايشة فيه امان عن باقى محافظات مصر
وكنت عماله اتصل بكل اصحابى اطمن عليهم
وعماله افكر هساعد ازاى الناس المتضررين من اللى بيحصل
وبمجرد ما قفلت اخر تليفون سمعت الناس فى الشارع
ولقيت ان انا كمان عندى نفس المشكلة
سجن فى بلدنا اتفتح وخرج المسجونين اللى فيه وبيحرقوا وبيكسروا
وبمنتهى العفوية سالت هو فى سجن فى بلدنا
واكتشف ان اه فيه وسجن كبير كمان
وحالة من الرعب عندنا احنا واكتشفت ان انا كمان مش قادرة اخرج من البيت
مش احساس بالخوف قد ما كان احساس بالصدمة
هو ايه اللى بيحصل
كنت على قناعه ان اللى حصل فى سجون القاهرة مؤامرة لاخراج عناصر بعينها
طيب واللى فى باقى سجون الجمهورية لاخراج مين ؟
دى كانت صدمتى واللى بردو مش قادرة افهم لحد دلوقتى

............................................

رسالة يمكن مش وقتها بس حاسة انى لازم اقولها وخلاص
بحبك اوى بجد وانتى عارفة كدا كويس
مش قدرت اقولهالك وانا بكلمك
انا فعلا فكرت فى نفس الجملة اللى انتى قولتيها  
انتى اغلى عندى من اى حاجة فى الدنيا   
اسفة على احساس غبى وسؤال اغبى
مبسوطة جدا انك صاحبتى
وبحبك جداااااااا






الخميس، 27 يناير 2011

يا مصر ... سمعانى ؟



كان لابد ان اكتب لا لان الاوضاع تثير رغبتى فى التعبير انا الاخرى
ولكن لاننى سعيدة متفائلة ولاول مرة نستطيع ان نقول بان شباب مصر اجبر مصر ان تسمع
منذ الايام الاولى لبدء التنظيم ليوم 25 وانا اترقب فى خوف فلن يحدث الا تكرار لاحداث 6 ابريل السابقة ولا جديد
ولكن ما حدث بالامس واليوم وما سيستمر للايام القادمة حقا يدعو للتفائل
لن تبقى الاوضاع على ما هى عليه ولن يجبرنا الخوف على الصمت
ولم نطلب الا ما هو مسموح ولم نتجاوز
وما حدث من اعمال الشغب لا يغنينا عن الاشادة بالتجربة
منذ الساعات الاولى للمسيرات وقد بدت سلمية متحضرة اثبت بها شباب مصر انهم قدر تلك المسؤولية
وقد تسائل الكثيرون لماذا الان
ومنهم من ربط بين ثورة تونس ويوم الغضب المصرى
ومنهم من اتهم الاخوان المسلمون وحركة كفاية بالتحريض
ومنهم من قال انها اصبحت عادة تحدث سنويا وما من جديد
وقد تناسوا ان هناك العديد والعديد من الاسباب الاخرى والاهم لما حدث
ما حدث ببساطة شديدة تعبير الشباب عن الغضب لما هم فين ولما يحدث
واعتقد انه من الطبيعى ان يحدث ذلك خاصة بعد تشيكل البرلمان الجديد ونتائجه الصادمة
التحرك الايجابى اسعدنى كثيرا واعتقد ان الجواب المنتظر هو خطاب رسمى يمتص الغصب
ونحن منتظرون
............................

كتير بنادى عليكى
بسال ويرجعلى صوتى
بحلم واصحى القاكى فى سكوتى
كل اللى عملته جربت تانى
يا مصر .... سمعانى ؟
نفسى فى اجابة للسؤال
هو انتى كرهانى ؟
مشيت فى شوارعك بناديكى
جريت جوه حضنك نفسى الاقيكى
محتاج احس بامان لما بتكلم معاكى
محتاج احس انى مش بعتب عليكى
محتاج اكون جزء منك مش ذليل عايش عليكى
وكل اللى عملته بسالك
يا مصر ... فهمانى ؟
ده سؤالى بس من حبى فيكى
لو مش بحبك يبقى بعتب ليه عليكى
كل الحكاية مستغربك وبفكرك يمكن نسيتى
وبثور عليا قبل ما اكون بثورعليكى
وبفكرك هفضل هنا شايل سؤالى
ومستنيكى




الجمعة، 31 ديسمبر 2010

2010 وداعا


حاسة ان 2011 هتبقى سنة حلوة ان شاء الله
ليه علشان 2008 كانت احلى سنة فى حياتى و2009 كانت اسوء سنة فى حياتى
و 2010 كانت اهم سنة فى حياتى وبناء على ذلك هتكون 2011 سنة مهمة بردو ان شاء الله

كان فى بالى كلام كتير اوى اكتبه بس مش عايزة اكتبه دلوقتى هههههههه
كل سنة وكل الناس طيبين يارب والسنة الجديدة تكون جميلة علينا كلنا ان شاء الله

الأربعاء، 22 ديسمبر 2010

قصص الحب الجميلة

من كام يوم كدا جه فى بالى قصص حب اصحابى كلهم
ومين منها نجحت ومين منها لا
وبدات اهتم شوية بتفاصيل ما بعد النهايات
ووقفت عند جملة ان البنات اوفى فى الحب
ولقيت ان على العكس تماما البنات بتنسى بسرعه بمجرد عريس وخطوبة وفرح
انما الولد لما بيحب بجد مش بينسى خالص
الكلام ده مش كلامى على فكرة ده كلام واحدة صاحبتى
لما كنت بقنعها ان الولد سهل ينسى وقت ما يقرر ده ويعيش تانى ويرتبط لانه بياخد القرار
وبمنتهى العصبيه قالتلى انتى بتحاولى تقنعينى بايه
الواحد ممكن ينسى حاجة اكلها امبارح لكن مش ممكن ينسى انسان حبه ولو بعد مية سنة
هى نظرية بردو بصراحة

ولحظة حب عشناها نعيش العمر تسعدنا
ومين ينسى ومين يقدر فى يوم ينسى شعاع اول شرارة حب
ومين ينسى ومن يقدر فى يوم ينسى ليالى الشوق ولا نارها وحلاوتها
ولا اول سلام بالايد ولا المواعيد ولهفتها



المهم ان احلى قصة حب كانت احمد واسماء اللى اتجوزوا وفى انتظار ياسين ان شاء الله قريب
واوفى ولد عبدالله اللى لسه بيحب هدى لحد دلوقتى مع انها اتجوزت وعاشت حياتها
واغرب قصة حب وحيد اللى خطب مرتين وفركش علشان لسه بيحب حسناء اللى اتجوزت خلاص وبتحب جوزها
واغرب بنت هبة اللى سامحت احمد على حاجات كتير اوى مش المفروض تسامح فيها لانها بتحبه
واغرب ولد احمد اللى بيرتبط ببنات كتير اوى مع انه لسه بيحب شيماء اللى اتجوزت خلاص
واعمق قصة حب كانت استاذ بيحب تلميذته فضل عمره كله يحبها وعاش من غير جواز
مع انها اتجوزت وولادها كبروا قدامه ودرسلهم وكانهم ولاده واتجوز وهو عنده 44 سنة وبعدها بكام شهر اتوفى
واكثر قصة مجنونة ايناس اللى سابت اسامة من غير سبب وسافر بره مصر هو ولسه بيحبوا بعض
واعنف قصة كريم اللى فضل يحارب علشان يتجوز ريهام وصبر و لما مامته اتوفت اتجوزها ومعاهم تؤام دلوقتى
ده غير قصص كتير جميلة زى محمد ومنى واحمد ومى و كتير اوى غيرهم

قصص الحب الجميلة اكيد ناقصها قصة
وبين كل الاغانى فى غنوة حب ناقصة
عارفة ومتقولش انت
انى انا وانت احنا القصة اللى ناقصة
فى قصص الحب الجميلة



الاغنية الاولى حليم ..اعز الناس
التانية نجاة .. قصص الحب الجميلة

الخميس، 9 ديسمبر 2010

أنا ...و....أنا



لحظات تجتاحنى وتحملنى الى اعماقى
تثير داخلى المزيد من الغرور بذاتى
تردد باذنى كلمات الاطراء التى سمعتها على مدار حياتى
تزيد من تكرار المميز والمتفق عليه من صفاتى
تعبث باوراقى القديمة وكلماتى المهملة فتبهرنى
فامسك بقلمى واكتب عن لحظاتى وليس عنى
فانا ساظل انا بينما اللحظات وحدها من يمضى

ولازال صوتها ياخدنى الى عالم خرافى عالم خاص بى
اشعر وكانها تغنى لى ولى فقط انها انغامى الرائعة احبها وهى تعاتب نفسها
وايضا عندما تعاتب حبيبها واحب قوتها وضعفها وكم احب تسامحها وثقتها بذاتها وحبها اللامتناهى
_____________

نعم تغير شئ ما داخلى فقد احببت عملى ومنذ عامين وانا احاول ان احبه
احببته لاننى اريد ذلك عندها احسست اننا نحب بارادتنا وليس شئ عشوائيا
سعيدة لاننى احببته سعيدة لاننى اذهب اليه وانا اشتاق لكل شئ فى المكان
فى الماضى كان تعلق الاطفال بى يسعدنى اما الان فهو تعلق ملفت للانتباه بشده
عندما ينتظرك الاطفال بشوق ويتسارعون اليك بلهفة عندما يتحدث اولياء الامور عن مدى تعلقهم بك
عندما يأبون الرحيل عندما يبكون خلفك عندها ستعرف ان للحب مذاق يختلف
مذاق رائع يجعلك تحب الحياة وليس العمل فقط
______________

لستُ بــِ كاملة ولكنني أفتخر بمواضع نقصي ..
إنني أجتهد في كل اعمالي لأعالجها ..
إنني اعمل لأكون اليوم أفضل من الأمس ،
و غدًا أفضل من اليوم
آية الملوانى
_________________

لست متفائلة ولا حالمة ولا ارى الكون من خلف ستائرى الوردية
ولكنى فقط احسن الظن بالله فسبحانه وتعالى قال انا عند حسن ظن عبدى بى
فكل ما كان قد قدره الله لى ورضائى بقضاء الله جزء من ايمانى بالله
وكل ما انا فيه قد كتبه الله على وقدرتى على حمله جزء من يقينى بحكمة الله
وكل ما قد يكون قد اختارنى الله له ولا يحملنا الله ما لا طاقة لنا به
ولست بمثالية ولا مدعية ولا انتظر من احد شئ وحده الله يعلم ووحده الله يكفينى
___________________

معرفش ليه كل اما اشوف والمح عنيا قصاد عنيه بحب نفسى
أنغام
____________________
منذ فترة وقد اخبرنى الكثير باننى مغرورة ولكنى لم اكن صدق لكنى الان اصدق
وان كنت لا اعلم كيف يظهر غرورى بينما اتسال كيف لا اصاب بالغرور مع كل ذلك الاطراء
ويحتاج كل منا الى ان يشعر نفسه احيانا بمميزاته لاسباب خاصة
وقد احتاج الى ذلك لكننى لا اتعمد التحدث عن تلك الصفات
ولكن عندما يتكاثر الحديث عنك من اناس مختلفين وفى اوقات متقاربه جدا فبدون شعور قد تصاب بالغرور
وقد اصاب بذلك فلست ملاكا وكثيرا ما ادعو الله ( اللهم اكفنى شر نفسى ) . آمين
____________________

يعجبني أن يواجه الإنسان هذه الحياة وعلى شفتيه بسمة
تترجم عن رحابة الصدروسجاحة الخلق وسعة الاحتمال
بسمة ترى في الله عوضاً عن كل فائت وفي لقائه المرتقب سلوى عن كل مفقود

الامام محمد الغزالى



الأربعاء، 8 ديسمبر 2010

فاصل منوعات


كنت عايزة اكتب البوست ده بالفصحى بس مش عارفة ليه عايزة اكتب عامية
دايما عندى حالة الرفض للى انا عيزاه ليه مش عارفة بس انا مجنونة عادى بقى
ايوة بحب الفصحى جدا بس عندى حالة من الثورة عليها او الرفض لنفسى فيها
كتير من اصحابى مضيقاهم الحكاية دى بس اكيد فى يوم من الايام هرجع اكتب فصحى تانى كتير

جه فى بالى حاجات كتبتها اى كلام فاضى معقول يعنى
وفصحى اهو مخصوص علشان واحدة صاحبتنا مش تزعل

ويوما سندرك اننا تلاقينا على عجل
فالعمر قطار يمضى بلا وعد ولا امل
فلا تتنازلى صديقتى ولتكتبى بعض الجمل

ويوما تعودين لحروف كانت تجرحك
وستضحكين فكم كانت بريئة تشبهك
صغيرتى غدا سيعود بك الزمان ويسعدك

ويوما اثور علي ويوما احتوينى
فان امتلأ الكون فليس فيه من يحمينى
فاعودك اليك ربى فوحدك ايمانى ويقينى
وادعوك يا املا بقضائك ترضينى

جملة اتقالتلى من فترة حوالى 3 شهور كدا تعليقا على كام بوست كتبتهم
انتى بتكتبى نص البوست فصحى والنص عامية
رديت بعفوية عادى هو فى حد بيقرا الكلام ده غيرى وانا بقرهولك وبشرحلك وانا بقرا ايه المشكلة بقى
ورد بردو بعفوية شديدة جدا انتى مجنونة اصلا
نفسى افهم انا بجد ايه حكاية مجنونة جدا دى بقت لقب خلاص كل الناس بتقولى انتى مجنونة هو باين عليا اوى كدا هههههههه
المشكلة بقى بجد انى اكتشفت ان فى ناس كتير بتقرا الكلام ده غيرى
فلو حد ضايقه ان بكتب فصحى مع عامية عادى يقفل الصفحة :P
لا بجد ده احساسى واللى بيجى فى بالى بكتبه
وسوف اقوم بكتابة مصدر الكلام المنقول واللى مش هيبقى تحتيه مصدر يبقى بتاعى علشان كتير بيسالوا انا اللى كاتبه ولا نقلاه
وسعيدة جدا جدااااا ان البلوج عجب ناس كتير

احساس رائع وفظيع ومش ممكن يتوصف ان حد يكون مشغول جدا ومش عنده اى وقت خالص
ويتصل بس علشان يقول انتى عاملة ايه وخلى بالك من نفسك
بحس وقتها انى مهمة وان فى حد فى الدنيا فاكرنى اوى كدا
وصدقت جدا الجملة دى الشخص الذى يحبك بصدق هو من يبحث عنك وهو فى قمة انشغاله

بقيت بحب الفيس بوك مع انى فى الاول مش كنت بحبه خالص
يمكن علشان حاسة ان فى حد معايا وبيقولى رايه زى المنتدى كدا
يمكن علشان بكتب اللى جوايا ومتحكمه فى مين يشوف ومين لا
يمكن علشان الصفحات اللى انا بقراها
المهم انى بقيت بحبه وخلاص

اه على فكرة انا مش مكملة جامعة حتى اشعار اخر
مش علشان صعبة ولا علشان حياتى واقفه على حد ولا علشان هو اللى كان عايز اكمل فبعانده
بمنتهى البساطة علشان انا تعبت وبحاول احب حياتى زى ما هى كدا
مصر مش هتخسر معيدة جامدة يعنى لما انا مش هكمل ولا مستقبل الاعلام فى مصر هيدمر علشان خاطرى هههههه

فى جملة من برومو دلوقتى حالا بيقولها تقبلى تتجوزينى
على فكرة الجملة دى جامدة مووووووت
وخصوصا بقى لما يبقى واقف كدا ويبص فى عنيكى ويقولك تتجوزينى
بجد احساس رااااااااائع ( عن تجربة شخصية :$) يارب تجربوه كلكم

فى علاقة حب فظيعة بينى وبين النسكافيه بشربه لما بكون مبسوطة بس
بحب استمتع بيه وبنفسى وافتكر احلى لحظات حياتى
ويا سلام بقى لو النسكافيه مع صوت انغام وبقرا شعر يااااه
فعلا وقتها بحب نفسى

ومع الاعتذار لانغام يعنى عايزة اغنى لفؤاد حبيبى

خبينى جوه حضنك يوم ودفينى
ده فاتوا سنين انا وعينى بنحلم بيك
ودينى دنيا تانية جديدة وكفايا
احس هواك ده جوايا واعيش حواليك
لا انا بحلم حبيبى فى يوم ولا بتمنى غير
اعيش العمر كله معاك واحس انك بخير
عيش جوه حضنى ومتسبنيش
مهما اقولك بردو مفيش كلمة توصف اللى انا فيه
واه بوعدك انى افضل ليك وابقى قلبك وابقى عنيك وكل حلم بتحلم بيه
نسينى اللى قبلك عشتوا فى سنينى ووقت الضعف قوينى على الايام
احلامى فيك لقيتها حقيقة قدامى بخاف لتعدى ايامى حبيبى اوام
ده لو فكرت الاقى كلام اقوله حبيبى ليك
يفوت العمر كله يادوب وانا بوصف عنيك
قول من النهارده خلاص يا هموم مش هتبقى عيونا فى يوم
غير دموع الفرحه وبس
واه مهما قطر العمر يفوت بردو هفضل احبك موت
وعمر شوقى ما يوم ينقص