الخميس، 6 ديسمبر 2012

تخاريف


- انتى اخوان ؟
- اشمعنا 
- اصل متدينة اوى وكل كلامك لازم باسناد يا حديث يا قرآن 
- و هو مينفعش اكون مسلمة يعنى !!
" مش معنى انى ملتزمة ابقى اخوان ومش معنى ان الاخوان بيتكلموا بإسم الدين يبقوا ملتزمين بيه "

...................................

- ليه منفصله عن الاحداث و بتتكلمى ف حاجات تانية 
- مش بحب اتفرج على فيلم مرتين بحفظ تفاصيله من المرة الاولى 
واللى بيحصل زى ما تكونى بتتفرجى على نفس الفيلم اكتر من مرة 
يبقى على ايه بقى اتناقش مع حد وكل حد مقتنع برأيه والنهاية مش هتتغير 
" ممكن تدعو اللهم انك عفو كريم فأعفو عنا "

.....................................

عجبتنى جملة لـ ريم الماجد امبارح فى برنامج بلدنا بالمصرى 
وهى بترد على احد المعارضين اللى بيشرحلها ازاى الاخوان هجموا عليهم وبيضربوهم 
قالت " ليه نموت ببلاش "
ليه نقف قدام بعض ونموت ف بعض ليه بنعمل كدا 
ليه التعصب الاعمى ملئ القلوب بالشكل دا 
" إذا اراد الله بقوم سوء منحهم الجدل ومنعهم العمل ... عمر بن الخطاب "

.......................................

- على فكرة فى اهمال واضح ف الكتب شوفتى كتابك ؟
- لا لسه مش هشوفه دلوقتى 
" انا اصلا مش عايزة اشوفه بس بالله عليكم اللى يشوفه يقولى عامل ايه
سيبكم من الطبع والغلاف والفنيات دى ركزوا مع فنيات الكلام والموضوعات "

.....................................

انا كنت عايزة اكتب بوست رومانسى بس الاوضاع لا تسمح 
وبصراحة اول ما فتحت الفيس اكتئبت :(
بس هو انا بقالى كتير مش كتبت رومانسى وده يرجع لاسباب مش منطقية خالص 
نظرا لانى مجنونة طبعا 
فانا لاحظت ان كل ما كنت فرحانة اكتر و سعيدة اكتر فى علاقتى العاطفيه احم احم 
بكتب اكتر فى حاجات مختلفة تماما 
ولقيتنى مبسوطة كدا اكتر بحس ان حبى بيطلع فى نظرة مختلفة لكل حاجة حواليا 
" علشان كدا لما تلاقينى فضلت كتير مش بعبر عن حبى أتاكد انى بحبك اكتر واكتر واكترررررر "

.......................................

اللهم ان قومى لا يعلمون فأغفر لهم وارحمهم
واحفظ بلادنا و يسر امورنا وجنبنا الفتن ما ظهر منها وما بطن


هذه التدوينة تابعة لـ حملة التدوين الاسبوعى


4 التعليقات:

حنين محمد يقول...

صباح الغاردينيا آيه
معليش انا حسيب كل حاجة واعلق على الرومانسية والحب ربنا يوفقك ويحميكي من شر العين وتحبيه اكتر واكتر :) "
؛؛
؛
لروحك عبق الغاردينيا
كانت هنا
Reemaas

aya mohamed يقول...

ميرسى يا حبيبتى
ربنا يسعد قلبك
ويوفقك فى حياتك انتى كمان يارب
:)

غير معرف يقول...

مسلمة ومتدينة وزي الفل

بس بلاش والنبي تكتبي

aya mohamed يقول...

كان نفسى حد يقولى كدا من زمان :)
نورتنى