الثلاثاء، 18 سبتمبر 2012

بينى وبينى





كل ما حد يقولى انتى تستاهلى حد احسن بفتكرك على طول
 
من يوم ما قلتلى كدا وكل الناس بتقولى نفس الجملة 
نفسى بس اعرف الحد الاحسن ده مواصفاته ايه ؟!!
14 فبراير 2012 

لقيته خلاص هيييييييييييييييه الحمد لله 

............ 

اول مرة فى حياتى ابقى حاسمة كل مواقفى ومستغربانى انى قادرة اعمل ده 
يمكن علشان بقيت حاسة انى قوية وزى ما مش كنت هامة حد 
حبيت بردو اوصلهم ان انا كمان اقدر ابين ان مفيش حد هامننى 
2 أغسطس 2011

بقيت شاطرة اوى فى الحكاية دى يمكن علشان وصلت لحد الكفاية من البشر 
يمكن لانى بقيت شايفة كل الناس من جواها على حقيقتها اوى فمش شايفة اى داعى للتعامل 
لما تكون العلاقات سطحية كدا مع كل الناس احسن واريح كتيرررر

......................

جوايا مساحة مفيش حد بيدخلها غيرى 
لما بحب اقعد معايا شوية ونبقى مرتاحين سوا ومبسوطين ببعض 
بقفل عليا كل البيبان اللى وراها زعل وابص للسماء 
14 يوليو 2011

ولازلت بس لما بقيت ببص للسماء بتصل بيك 
انت والسماء فيكم من بعض اوى 

.....................

انا بحبببببببببببب
او مش بحب هتفرق مع اى حد فى ايه
اذا كان هى مش فارقه معاه هو شخصيا :D
بس علشان الفضول اللى هيموتكم ده وعلشان تتطمنوا عليا زى ما بتقولوا فانا هقولكم
هو اكتر حد حساس ورقيق ورومانسى عرفته 
 شفته من جواه لقيته طيب اوووووى ومطمناله اوى وفرحانة بيه اوى 
يمكن انا مش عارفة ايه مخلينى مبسوطة اوى كدا معاه وبحس ان العادى بتاعى الايام دى انى فرحانة
برغم اى حاجة تزعل بتحصل بس حسانى فرحانة اوى
ومجرد ما افتكرله اى كلمه حتى لو كلمة ايوة بنسى اى زعل

ومهما بيعمل ومهما تحصل حاجة تزعلنى مش بحس انى زعلانه منه مش فاهمة ليه
واوقات كتير بفكر هو انا ليه ببقى مبسوطة اوى كدا مش عارفة بجد
لو حد عنده تفسير لحالة الفرح اللى بزيادة دى يقولى ياريت
28 أبريل 2011

وقت ما كتبت الكلام ده كنت بألف علشان فى ناس كانت بتابعنى 
ولاهداف خاصة كتبت ان فى حد انا عايشة معاه فى خيالى وبحبه 
الغريب بقى ان كل الكلام ده ينطبق بالظبط على خطيبى 
أتارينى كنت بحبه من قبل ما أعرفه هههههههههههه

.....................

شخصية جديدة كله لاحظ وجودها الايام القليلة اللى فاتت دى وهو دكتور ميدو 
وطبعا مع انهم ملاحظين انى مبسوطة وفى ناس بتجزم انى فى حالة حب فحصل ربط 
وانا من موقعى هذا بقول ان مفيش اى صلة بين الحالتين طبعا كلكم عارفين ميدو وهو شخصية لذيذة جدا 
بيعمل كومنت كتير عادى يعنى وبيكتب حاجات تستاهل انى اعمل كومنت عليها مش اكتر 
هذا بالاضافة انى قد اكون فى حالة حب لكن مش ارتباط ولا هيكون ابدا علشان ترتاحوا يعنى
19 ابريل 2011

ازاى بقى بعد كل الكلام ده والاعتراف الخطير انك حد عادى 
تبقى فجاة كدا مش عادى خالص هو ده اللى نفسى اعرفه 

........................

امنيتى  ..... ان اتسمى بك 
19 ابريل 2011

وقت ما كتبتها كان رد على سؤال بتتمنى ايه وقتها مش كان ف بالى حد معين 
بس كنت بفكر ان اقصى امنية انى اتسمى باسم حد بحبه 

.........................

" انتى بتعملى ايه للاطفال علشان يحبوكى كدا بشتغل هنا بقالى 10 سنين 
عمرى ما شفت الاطفال بيحبو حد بالشكل ده "
11 ابريل 2011 

الاستغراب اللى فى الجملة حصل امبارح من اولياء امور كتير جدا 
ومن المدير شخصيا هما اولياء الامور والاطفال حبوكى بسرعه كدا ازاى 
هو مش عارفة بس  ممكن علشان انا كنت رايحة فرحانة وعايزة احبهم 

.........................

الحب مش مجرد اتنين شافوا بعض وبيتكلموا كتير وخلاص 
الحب تفاصيل ملغبطة كل ما نحاول نهرب منها بتجمعنا 
حالة من اللاوعى المفاجاة وسط الوعى التام 
31 مارس 2011

:))) اكتشفت انى فيلسوفة على اخر الزمن 

........................

كنت عايزة اكتب البوست ده بالفصحى بس مش عارفة ليه عايزة اكتب عامية
دايما عندى حالة الرفض للى انا عيزاه ليه مش عارفة بس انا مجنونة عادى بقى
8 ديسمبر 2010

الحالة دى بتحصلى على طول كل مرة بكون عاية اكتب بوست 
افتح الصفحة واقول اكتب فصحى ولا عاميه بس بلاقى الكلام هو اللى بيختار لوحده 

.........................


كتير ناس قالتلى انى موهوبة وممكن اوصل ليه لا ووممكن فى يوم من الايام ابقى مشهورة 
واقابل ناس تقولى ممكن تمضيلى هههههههههه
بصرف النظر عن الشهرة الاعلامية بقى فانا بردو بحلم بالشهرة الاكاديمية 
اهى نوع من انواع الشهرة بردو 
المفروض انى بعمل تمهيدى ماجستير
15 يوليو 2010

كنت بحلم بس الحمد لله ان جه يوم من الايام اللى لقيت احلامى حقيقة 
مبسوطة بيا :)

.....................

مبروك لكل اللى كسبوا فى كتاب المائة تدوينة الاصدار التانى 
أستمتعت جدا بالتحكيم وان كان الامر شاق بعض الشئ لكن كانت تجربة رائعة 
فرحانة اوى بكل اللى فازوا و دايما بالتوفيق ان شاء الله 
18 سبتمبر 2012

.....................

وفى النهاية 

( هذه الفضفضة لا تعبر الا عن وجهات نظر كاتبها
واى تشابه فى التفاصيل لا يتصل باى شخص على الاطلاق )

31 مارس 2011





8 التعليقات:

مصطفى سيف الدين يقول...

لا تعليق يعبر عما استشفيته من تلك التدوينة سوى ابتسامة
:)
رائعة كعادتك دائما

ابراهيم رزق يقول...

اعلق على ايه و لا ايه ولا ايه
اعلف على ايه و لا ايه ولا ايه

بجد البوست دسك وكبير
فمش عارف اعلق
فهقول زى مصطفى
بدون تعليق

تحياتى

حنين محمد يقول...

صباح الغاردينيا آيه
البوست دا هو أنتي بكل أحاسيسك ولحظاتك
بجد شفت آيه برقتها بين السطور ولايهمك اكتبي فصحى او عامية
المهم ان احنا بنحسك :) "
؛؛
؛
لروحك عبق الغاردينيا
كانت هنا
Reemaas

Unknown يقول...

إنتِ حلوة :)
ربنا يسعدك يابنوتة ~

aya mohamed يقول...

مصطفى

الرائع هو انت يا مصطفى
دايما بيسعدنى وجودك
:)

aya mohamed يقول...

ابراهيم رزق

:) ابتسامة كبيرة
ولا تعليق بردو

aya mohamed يقول...

ريماس

حبيبتى ربنا يخليكوا ليا يارب
انا اصلا بحبك اوى :)

aya mohamed يقول...

نيللى

أنتِ أحلى
وحشتينى جداااا :)