Thursday, April 28, 2011

ازدواجات



دى اللى خدتنى منى ودى اللى بتحسسنى انى ملكت كل الدنيا ديا علشان لقتها
قابلت كتير وخفت وقلبى صدق لما شفت عنيها قلت خلاص لقيتها 
ببقى هموت واشوفها وقد ايه بيوحشنى خوفها كسوفها لما بكون واحشها 
دى دنيا كنت هموت واعيشها لقيتها فيها حلم حلمت بيه كنت هموت عليه
دى اللى معاها بس بدات احس ان اللى فات دلوقتى ممكن بين ايديها فى لحظة يرجع
تنسيك اى حد اهى دى اللى تستاهل بجد تعيش ليها الحياة ايه اللى يمنع
مش مقتنعه انها اغنية حزينة وحساها رومانسية جدااا وببقى فى قمة الرومانسية وانا بسمعها 
يبقى العيب فيا ولا فى الاغنية مش عارفة اللى يقدر يثبتلى انها حزينة يعنى يقنعنى 

كنتى عسل اوى وانتى بتقوليلى انا بحبه بس انتى عبيطة اساسا علشان انا عارفة بيبان فى عنيكى وانتى بتتكلمى عليه
بس كان المفروض اسجلك الاعتراف الخطير المرة الجاية بقى :P ربنا يخليكم لبعض يااااااارب وافرح بيكم ان شاء الله
كتبت هنا علشان يبقى تسجيل لليوم التاريخى اللى قلتى فيه :P 
الحب ككل القضايا الكبرى في الحياة ،
يجب أن تؤمني به بعمق ، بصدق ، بإصرار 
 و عندها فقط تحدث المعجزة

احلام مستغانمى

انا بحبببببببببببب
او مش بحب هتفرق مع اى حد فى ايه
اذا كان هى مش فارقه معاه هو شخصيا :D
بس علشان الفضول اللى هيموتكم ده وعلشان تتطمنوا عليا زى ما بتقولوا فانا هقولكم
هو اكتر حد حساس ورقيق ورومانسى عرفته 
 شفته من جواه لقيته طيب اوووووى ومطمناله اوى وفرحانة بيه اوى 
يمكن انا مش عارفة ايه مخلينى مبسوطة اوى كدا معاه وبحس ان العادى بتاعى الايام دى انى فرحانة
برغم اى حاجة تزعل بتحصل بس حسانى فرحانة اوى ومجرد ما افتكرله اى كلمه حتى لو كلمة ايوة بنسى اى زعل
ومهما بيعمل ومهما تحصل حاجة تزعلنى مش بحس انى زعلانه منه مش فاهمة ليه
واوقات كتير بفكر هو انا ليه ببقى مبسوطة اوى كدا مش عارفة بجد
لو حد عنده تفسير لحالة الفرح اللى بزيادة دى يقولى ياريت
الحب ليس رواية شرقية
بختامها يتزوج الابطال
لكنة الابحار دون سفينة
وشعورنا ان الوصول محال
هو ان تظل على الاصابع رعشة
...وعلى الشفاة المطبقات سؤال
نزار قبانى

على فكرة الشخص اللى بتكلم عليه الفترة ده مش بيشوف البلوج 
علشان فى ناس سالوا هو بيشوف الكلام ده فانا بقول اهو لا مش بيشوفه مش علشان مش عارفة 
هو بس مش مهتم :D ومش فاضى وبصراحة مبسوطة انا انه مش بيجى هنا 
أبسط لك كفّي..
لا لـ تقرأ.. !
بل لـ تكتب في راحتها..
ما شئت من النبوءات والكلمات..
وترسم فيها
...مايحلو لك من الخطوط والدروب والرموز
بوردتك..
أو .. بسكّينك !
غادة السمان

لو بتتعامل مع كل الناس بالطريقة دى يبقى مش تزعل على ان علاقاتك مش بتستمر
ولو بتتعامل معايا انا لوحدى بالطريقة دى فانا مش هقدر اعمل حاجة 
مش علشان اى حاجة غير انى وعدتك فى يوم من الايام انى مش هبعد مهما يحصل 
ومهما يحصل بردو مش هرجع فى وعدى 
لم تعذبها قسوته بقدر ما عذبتها حيرة مشاعرها نحوه، فهي لم تكن بالقسوة الكافية كي تكرهه تمامًا وهو يحنو أحيانًا
 ولم تكن قديسة كي تحبه تمامًا برغم كل ما يفعل
سارة درويش

انتى عارفة انى لما بقفل من حد مش بعرف ارجع تانى وانا فعلا بحبك اوى بس انتى زودتيها 
ومش فاهمة ليه بتعملى كدا ومش فاهمة بردو ايه اللى حصل علشان كل ده 
بس انا خلاص لا هسال تانى ولا هقولك ده من ايه اللى مريحه حاجة يعملها وانا كدا خلااااااص
فى بعض الاحيان تكون نوايانا انقى من قطرات الندى 
لكنها تتلوث باعتقادات الاخرين 
( مش عارفة بتاعت مين )

بما انى احتمال كبير مش اكسب فى المسابقة ومش هيتحقق الحلم اللى قولتلك عليه 
فكفايا ان حلم ان ناس تقرالى ويعجبها اتحقق وحلم ان يبقى عندى احساس بالفرح
أحبك حلما ينافس كل حقيقة
وأحبك حقيقة لا يجاريها اى حلم
خالد الباتلى  




Saturday, April 23, 2011

لحظة فرح


انا:  اشتركت فى المسابقة بحاجة مش حلوة اوى وهخسر
هو : طيب ليه انتى كتبتى حاجات حلوة كتير 
انا : بس الحاجات الحلوة قوى قديمة 
هو : طيب وايه يعنى 
انا : لا مش عايزة اى حاجة قديمة حتى لو هخسر
هو : اشمعنا يعنى 
انا : سبب شخصى

كنت بقرا اسماء ال16 اللى كسبوا وانا متاكده انى مش منهم بس اتفاجئت اوى لما لقتنى منهم
فرحت لدرجة انى عيطت من الفرحة مش فرحانة علشان كسبت 
فرحانة علشان انا كتبت الكلام ده ليك واشتركت بيه وانا مؤمنة ان من يوم ما عرفتك الحياة احلى 
فرحت علشان وقت ما اشتركت كان نفسى اكسب وتبقى انت السبب 
كان نفسى اجيلك واقولك انا كسبت بييييييييييك 
عارفة ان دى المرحلة الاولى ومش مستاهلة كل الفرحة دى بس انا مش فارقة معايا المسابقة اوى اصلا 
ولا فارق معايا هخسر بعد كدا ولا اكسب اللى فرق بجد احساسى الجديد 

تانى مرة اعيط من الفرحة فى حياتى اول مرة لما جبت جيد فى سنة اولى جامعة 
بردو مش كانت حاجة جامدة الجيد بس علشان حولت من انتساب لانتظام وكمان علشان كان تحدى 
لان كل الناس قالوا مش هجيب تقدير والقسم كان صعب اوى وتعبت جدا وقتها
فلما النتيجة ظهرت كانت فرحة جامدة اوى 
بعدها بقيت اجيب جيد جدا وعادى مش فرحت نفس الفرحة بتاعت اول سنة 
زى ما انا فرحانة كدا المرة دى مع انها مش المركز الاول 
بس فى حاجات صغيرة تفرح اوى اكتر من حاجات كبيرة 

انت صديق جامد جداااا مفرحنى اهتمامك اوى 
من زمان مش قابلت حد كدا انت فعلا نادر زى ما هى قالت عنك
ربنا يخليك يااااااااااااارب

مكالمة النهارده ريحتنى كتيررررر وعيزاكى كل ما تسافرى تسلميلى على الطريق وتدعيلى 
تفتكرى هفضل فرحانة كدا على طول ولا ايه خايفة اوى انا لما بفرح بتقلب مصيبة هههههه
ادعيلى كتير اوى ومش تغيبى عليا بحببببببببببببك 

معنى الصداقة هو اننى تلقائيا اراك جديرا بان ائتمنك على جزء من كرامتى 
د/ لحمد خالد توفيق 

لست اكثر من الطفل الذى تعلق بك فجأة ثم وضع بين اناملك الناعمة رسالة مجرد احرف مبهمة 
لا يدرى كيف كتبها واى طعم كانت تحمل ثم هرب خوفا من مواجهة رفضك 
واسينى الاعرج

اللهم اعطه من كل ما اعطانى اضعااااااااافه 
احلام مستغانمى



ياااااارب لم اعى السعادة بحق الا فى قربه .... فقربه اكثر




Tuesday, April 19, 2011

مقتطفات



كلام كتير جوايا نفسى اقوله ليك 
معرفش ايه بيجرالى قصاد عنيك 
مبقولش ليه وانا معااااااك 
وقولى انا اعمل ايه بقالى ليالى بدارى هوايا
انا معرفش ليه بقاسى فى بعادك ياريت معايا

بقطفلك بس هالمرة هالمرة عابكرة عبكرة بس 
شئ زهرة شئ زهرة حمرا وبس 
ولا بدى شئ بعد الا بداريك بيتى بيصير وعد لما بحاكيك
يا ويل عيونى كيف بتندهلك متل المجنونة وتصير تقولك
بحلم وبضل شهر بالى مشغول بيطلعلى قول شعر ما بعرف اقول

عامر منيب وفيروز مع النسكافية وشعر رومانسى جدا يبقى يوم مالوش حل طبعا
هو من بداية اليوم وهو غريب جدا بس لذيذ بجد يمكن علشان انا اساسا بحب يوم الثلاثاء اوى 
يمكن علشان جدولى يوم الثلاثاء بيبقى لذيذ اوى يمكن لما بنحب حاجة اوى بتخلينا نحس ان اى حاجة تحصل هتبقى حلوة 

شخصية جديدة كله لاحظ وجودها الايام القليلة اللى فاتت دى وهو دكتور ميدو 
وطبعا مع انهم ملاحظين انى مبسوطة وفى ناس بتجزم انى فى حالة حب فحصل ربط 
وانا من موقعى هذا بقول ان مفيش اى صلة بين الحالتين طبعا كلكم عارفين ميدو وهو شخصية لذيذة جدا 
بيعمل كومنت كتير عادى يعنى وبيكتب حاجات تستاهل انى اعمل كومنت عليها مش اكتر 
هذا بالاضافة انى قد اكون فى حالة حب لكن مش ارتباط ولا هيكون ابدا علشان ترتاحوا يعنى :P
وكان فى نظرية حبيت اثبتها ان مش اى حد يعمل كومنت كتير عند حد يبقى بيحبه ولا ان حد مش بيعمل كومنت او لايك 
عند حد يبقى الحد ده مش فارق معاه العكس جداااااااا هو الصحيح واللبيب بالاشارة يفهم ;)

علشان تصدقينى لما اقولك ان اسمه الفرح شفتى لما قولتلك اسمه خرجتى من حالتك وبقيتى مبسوطة ازاى 
يا بنتى ده مش اى حد ده الفرررررح بيغير الدنيا فى ثانية حتى لو مش موجود 
مش كنت هخليكى تكلميه اساسا علشان بغير اصلا :P

انتوا الاتنين وحشتونى جدا وكنت عايزة اقولكم على حاجة بس مش بتردوا
وانتوا اساسا مش بتسالوا اكيد هزهق فى يوم من الايام وابطل اسال انا كمان
ده تهديد على فكرة :P

اطهر انواع الحب 
ان تحب شخصا وانت تعلم انه لن يكون ملكك ولا من نصيبك ولكن تظل تحبه
وتحب ان تراه سعيدا فقط لانك تحب ان تراه سعيدا
الجملة دى فكرتنى بيكى لما قولتيلى انك بتحبيه اوى وانا قولتلك يا بنتى الحب من طرف واحد ده ماساه
فاكرة وقتها قولتيلى مش هتحسى بيا علشان مش جربتى 
انتى طيبة ومش تستاهلى اللى بيحصل ده ربنا معاكى

الحياة بدون حب مستحيلة وقد يخيل اليك انك تعيش بلا عواطف وانك لا تحب شيئا
ولكنك تحب دون ان تدرى
د/ مصطفى محمود
مش شرط يكون الحب اللى ليه هدف فى انواع كتير اوى من الحب من غير هدف 
حب الحياه وحب الناس وحب ابسط حاجة بتعملها واعمل كل حاجة بتحبها برومانسية وخلى طول الوقت 
فى جزء بتعمله وانت مستمتع بيه هتحس الدنيا بقت احلى كتيررررر

وكأن الحديث معه بنكهة القهوة شهى للغاية 
يذيب اعماقك يحسن مزاجك ولكنك قد تدمن عليه 
الجملة دى فكرتنى بجملتك ده انا بقيت ادمان بقى 
تخيل بقى ان عدى كام يوم من غير كلامك وكويسة اهو وعادى جدا 
بس هو هيحصل حاجة لو قلت ....       ؟
كتبتها وبعدين مسحتها اصل افتكرت انك بتعاقبنى على احساسى !!!

ما احلى الكلمات التى لا نقولها عندما نحس ان الحروف عاجزة عن استيعاب انفعالاتنا 
غادة السمان 

بحب اسمعك وماتكلمش واراقبك وانت بتتكلم 
واخزن فى دماغى مليون البوم صور ليك 
سارة درويش 

هناك امنيات معلقة بين السماء والارض 
فيارب يارب بحق كلمة لا اله الا الله 
اكتب لكل هذه الامنيات الحياة

امنيتى  ..... ان اتسمى بك 


Monday, April 11, 2011

i'm happyyy


من الاسبوع اللى فات عايزة اكتب بوست 
بس لظروف النت اللى كل دقيقتين بيفصل وكمان مشاكل الشغل 
المهم ان اخر تطورات الاوضاع زى ما انتوا عارفين بالظبط 
الاسعار غالية والحياة السياسية فى حراك دائم ومصر بين الجيش والشعب لم تستقر بعد
اما بقى عن الوظائف فربنا يدينا ويديكم طولة العمر يارب ونلحق نشوفها 
اما بقى عن عن انطباعى فانا بحب السنة دى جداااااا برغم اى حاجة فانا شيفاها احلى سنة فى حياتى كلهااااااااا
ومهما يحصل فيها فهى بردو سنة جامدة اخر مليون حاجة 

بالنسبة لصور الاطفال اللى عندى فى الفصل فانا هنزلهم على الفيس بوك بس 
علشان فى اعتراض انى انزلهم هنا واهى فرصة علشان تعملى اكونت يا لحظتى :P

انا تغيرت مش مصدقه نفسى طيب انتوا مصدقين 
بقيت بحب اتصور اوى كل شوية اقول لماما خدى صورينى وده طبعا مش طبيعى خاااالص
مش حكاية بقيت بحب شكلى بس بقيت مبسوطة بيا مش بقت فيا العقد بتاعت زمان دى 
مع ان فى ناس كتير اوى كانوا بيقولوا انى حلوة وانا مش كنت مقتنعه فانا مش بقت همانى حكاية حلوة دى اصلا 
بس مش عارفة ايه حصل وبقيت بحب الصور وال ايه كمان بنزلها على الجهاز وفرحانة بيها اوى 
وطبعا انتوا عارفين انا كنت عاملة ازاى فى موضوع الصور ده فاللى انا بقيت فيه دلوقتى يعتبر معجزة 

اجمل جمل اتقالتلى فى حياتى مش عارفة ليه بفتكرها اوى الايام دى كتير 
" حبى نفسك وافرحى بيها علشان هى تستاهل اوى انك تحبيها "
 " انا لو عملت حاجة فانا لافت نظرك لحاجات فيكى اصلا "
" بيعجبنى تفكيرك واحساسك انتى احساسك ملوش مثيل "
" انتى بتعملى ايه للاطفال علشان يحبوكى كدا بشتغل هنا بقالى 10 سنين عمرى ما شفت الاطفال بيحبو حد بالشكل ده "

بجد حب الاطفال ده احلى حاجة فى الدنيا واقوى حب فى الدنيا 
ببقى مبسوطة اوى بيهم وفرحانة اوى بحبهم ليا والسنة دى كمان بزيادة عن السنتين اللى فاتو 
يمكن علشان العدد السنة دى اكتر ربنا يخليهم ليا يارب ويخليلى  الحب ده ياااااارب

فرحانة اووووى كمان بصفحتى على الفيس بوك كل يوم عددها بيزيد ناس بيعجبها حاجات كتير اوى فيها
بفرح اوى لما الاقى ناس معجبة بكلامى 
فرحانة اكتر ان كل كلمة بكتبها بتبقى نتاج احساس فعلا مش مجرد كلام وخلاص 

فرحانة انى شفتك يا هوبة اووووووى وكان نفسى اشوفك يا نونا كمان بس مفيش نصيب بقى 
وفرحانة بصحابك يا رانيا اوى وكان يوم تحفففففففة انتى عارفة طبعا كان ناقصه ايه بس ربنا ليه حكمه فى كدا
وان شاء الله يتكرر بنفس الناس تانى وفى نفس المكان علشان عجبنى 

بحبك يا اسماء اكيد مش لازم اكتب هنا يعنى بس كتبت اهو علشان مش تزعلى 
وانتى عسولة وهفتقدك جدا لما تسيبى المدرسة 

توتا من يومين اتكلمنا فيها سوا حبيتك اوى وكنت فرحانة اننا بقينا صحاب كدا 
ابقى طمنينى عليكى دايما كدا ويارب نفضل اصحاب على طول 

مونمون لما بتدخلى ومش بلاقى عامله لايك عندى ولا كومنت بحس ان فى حاجة ناقصة 
بس بلاقيكى بعدها عملتى اوقات بحس انى نفسى نبقى صحاب قريبين بس مش عارفة تيجى ازاى دى 
بس انتى من الناس اللى بحبها اوى وبحس ان قلبك ابيض وعلى طبيعتك دايما 

لوليتااااااا حبيبتى لما رنيتى قولت ياااااه انتى لسه فكرانى :P اشتقتلك كتيررررر على فكرة 
بس مش بلاقيكى وكمان اصلا مش بفتح ميل كتير بس  ان شاء الله هحاول نتكلم قريب 


الا تخبرنى 
لماذا امامك تضيع الحروف 
وتبدو ابتسامه وبعض التمنى 
لماذا اتوق لبعض السؤال 
وشئ من الخوف يوقف ظنى
لماذا كلما اردت الرحيل 
اعود ولا اذكر همسى 
الم تخبرنى 
 بان الحياة جزينة دوما 
وان الفرح شبيه الخيال 
فهل تخبرنى 
لماذا الفرح يصاحب خطاك 
وان اشتقت لبعض السعادة اذكر هواك 
الم تخبرنى 
بان القدر يحتمل القرار 
وكل ما فى القدر باختيارى 
فهل تخبرنى
لما معك فقط احببت اختيارى ؟