السبت، 31 ديسمبر 2011

عام البدايات




أعشق البدايات وان كنت اخشاها

بس متفائلة جدا ويارب التفائل ده يدوم
فاكرة زى النهارده من سنة لما قلت وداعا 2010
انى توقعت تبقى 2011 سنة سعيدة وتبقى احلى من كل اللى قبلها
والحمد لله كانت كدا مع بعض الاستثناءات
بس الاكيد ان 2011 كانت سنة البدايات ويارب يارب 2012 تبقى نجاح لكل البدايات

بداية الحرية وتحقيق الحلم اللى بقاله سنين ونثبت اننا نقدر نقول لا للخوف
بداية تغيير من جوانا بداية اننا نحلم واحنا واثقين ان من حقنا نحلم ونسعى لتحققه
بداية مصر جديدة متعرفش خوف ولا استسلام
هى مش بداية مصر بس هى بداية للوطن العربى

كتابنا " أبجدية إبداع عفوى " واحلى بداية حصلتلى فى السنة دى
احساس انى بكتب حلو ده كان عادى انما الجديد
هو احساس ان فى ناس مش يعرفوا بيقولوا انى بكتب حلو
تجربة الكتاب كانت من اولها غريبة ولذيذة فى نفس الوقت
فرحانة بكل أصدقاء التدوين اللى اتعرفت عليهم من حملة التدوين ومن الكتاب
سعيدة باول خطوة فى حياتى وان كنت مش عارفة هيكون فى غيرها ولا لا
بس انا مبسوطة اووووى بيها
وشكر خاص جدااا لـــ آية علم الدين & لبنى أحمد نور

بداية فرحة يارب تكمل على خير
واحساس بحالة مش بقدر اوصفها
بتدينى حافز على الكتابة والسعادة والتغير والتطوير
وحاجات كتير اوقات بحس ان مش ليها علاقة ببعض
بس الاكيد انى بكون مبسوطة


حاجة بس ناقصه فى بداية السنة الجديدة وهى ريماس
نبض الرومانسية الحالم وزهرة الغاردينيا الرقيقة
وحشتينى اوى ويارب ترجعى بالف سلامة
فى اسرع وقت ان شاء الله


كل صحابى وكل زوار المدونة وكل شخص عرفنى وعرفته فى 2011
وكل اللى بيتبعونى وكل اللى زارونى ولو مرة
فرحانة اوى بيكم وسنة جديدة مليانه سعادة عليكم ياررررب


اللهم انى اسالك خير هذه السنة المقبلة
يمنها ويسرها وامنها وسلامتها ونورها وبركتها
واعوذ بك من شرورها وصدودها وعسرها وخوفها وهلكتها
اللهم احفظ لى فيها دينى الذى هو عصمة امرى ودنياى التى فيها معاشى
ووفقنى الى ما يرضيك عنى فى ميعادى
يا أكرم الاكرمين يا الله


14 التعليقات:

Sara يقول...

هي سنة رائعة مهما كان :)

كل عام و أنتِ بخير

و السنة الجاية أحلى بإذن الله :)

aya mohamed يقول...

سارة

وانتى بالف خير يا قمر
وان شاء الله الجاى احلى لينا كلنا
نورتينى :)

Ahmed El_Desouky يقول...

كل عام وأنتِ بخير يا آيــه

بغض النظر عن أنك شايفة أن 2011 كانت سنة حلوة مع بعض الاستثناءات

يمكن أنا شايف العكس

إن شاء الله 2012 هتبقى أفضل من اللي فات وكل سنة هتكون أفضل من اللي قبلها

سعيد بيكي زي منتي سعيدة بينا وأكثر :)

كل سنة وأنتي طيبة

aya mohamed يقول...

أحمد

فينك من زمان مختفى كدا
بغض النظر عن ان الاستثناءات كتيرة
بس نظرا لانى طول السنين اللى فاتت مش حصلى ولا اى حاجة كويسة فالسنة دى كانت حلوة نسبيا عليا
ويارب 2012 تبقى احلى واحلى على الناس كلها ان شاء الله

وكل سنة وانت بالف خير وسعادة يارب :)

مونتي بوكيه ورد يقول...

اجمل حاجه في السنه الجديده انها بتعرفنا باشخاص مميزون نستغرب انهم كانوا هنا في عالمنا كل ذلك الوقت ولم نصادفهم سوي علي اعتاب سنه جديده 2012 اجمل
لانها تاتينا برقي المفاجئات يارب يستجب دعاكي و نبدأ السنه الجديده علي صوت من نحب

مصطفى سيف الدين يقول...

كل سنة وانتي طيبة وربنا يجعلها سنة سعيدة كلها فرحة
انا برضه سعيد بتجربة كتاب ابجدية ابداع عفوي كفاية انه يتحط اسمي مع زمرة من المبدعين مثلك صديقتي العزيزة

aya mohamed يقول...

مونتى بوكيه ورد

يارب تكون سنة اجمل لينا كلنا
وميرسي على الكلام الجامد ده :)

aya mohamed يقول...

مصطفى

انا سعيده اكتر بصداقتك ووجودك معانا
كل سنة وانت بالف خير يارب :)

nour alqamar يقول...

كل عام وانتى بخير ..
مع تحياتى لك
نور

aya mohamed يقول...

نور

وانتى بالف خير
عامك سعيد ان شاء الله :)

nesma hatem يقول...

بداية متفائلة جدا ان شاء الله بالبوست ده اكيد
:) آمين يارب
ويشفى ريماس ويرجعها بالسلامة كلنا مفتقدينها فعلا
ربنا يكتبلك كل الخير فى السنة الجديدة يا اية
كنت مبسوطة اوى بحملة التدوين علشان عرفتنى بناس كتيييييير واكيد انتى اولهم :)
تحيتى

aya mohamed يقول...

نسمة

يارب يا جميلة
ويارب تبقى سنة كلها خير للناس كلها
وانا سعيدة جدا انى اتعرفت عليكى بجد :)

أحمد الصعيدي يقول...

كل عام وأنتِ بخير

نتمناها سعيدة

aya mohamed يقول...

أحمد

يارب سنة سعيدة على كل الناس
وانت طيب وبألف خير
نورتنى :)