بلا ولا شيء

في لحظات الضعف والمواقف الصعبة أول حد بيجي في بالنا هو أكتر شخص بيحسننا بالأمان

من 4 سنين كنت في أصعب موقف وأكتر لحظات الضعف اللي معتقدش هيعدي عليا زيها تانى 

وكان أصعب من الموقف اني فعلا لوحدى ومش حاسة بالأمان ومفيش حد ممكن يسندي ويديني الاحساس ده

يمكن الجملة الوحيدة اللي بفتكرها من وقتها "كن قوياً لأجلك" 

اه انا مش بحس بالامان ويمكن فقدت الاحساس ده من سنين كتير أوي لكن بحاول أكون قوية 

علشان أقدر أتجاوز أي حاجة، علشان أقدر أواجه أي حاجة ونفسي فعلا في يوم من الايام أرجع احس بالأمان تانى

وقت وفاة بابا كنت ضعيفة جدا بدرجة تفوق اللي كنت أتخيله، منهارة بكل ما تحمله الكلمة من معني

عشر سنين بالظبط بين وفاة بابا ووفاة جدتي عشر سنين فيهم حياة اختلفت لكن الوجع ثابت 

الافتقاد لناس كانوا فحياتنا ثابت، من 2009 لـ 2019 فقدت ناس كتير أوي وكل حد بيروح بياخد جزء من روحي

الغريبة فعلا ان خلال  الـ 10 سنين اللي دخلوا حياتي كتير جدا لكن بقيت أخاف أقرب من حد بزيادة

حتى في العلاقات الانسانية العادية بفضل تكون علاقات عابرة علشان الوجع يكون أقل

المدونة أكتر مكان بحس فيه بأمان يمكن لان مفيش حد يقدر يدخلها أو يكتب فيها غيرى

المكان الاكثر دفئاً في العالم، المسودات اللي مش منشورة، صوت قلبي العالي اللي محدش بيسمعه غيرى

وقت ما اتقفلت كنت بعيط بشكل هستيري، وكل الناس تقولي اعملي واحدة جديدة طيب أجيب اللي كان فيها ازاى 

حياتى من 2007 وكل حاجة كتبتها فيها حتى اللي اتنشر في الكتب كله فيها 

من وقت ما رجعت وانا لازم كل يوم ادخل افتحها وخلاص حتى لو مش بكتب بحس بسعادة لما بدخل هنا

الأربعاء السعيد، أكتر يوم بحبه في الأسبوع 😍😍

طبعاً علشان أجازتي وعلشان كان مناسب لأن كل مناسباتي السعيدة تكون فيه زي ولادة مريم

الوقت اللي لنفسي ومج النسكافية اللي بعرف اشربه سخن، الهدوء والاغاني

والخروجات والسفر والروقان والاستجمام، يوم الاربعاء يستاهل يكون طول الاسبوع 💓

يمكن الشغل أثر كتير على شخصيتي، بقيت أحب أهرج كتير أتكلم صوت كتير 

اني افضل اكتب طول الوقت بقت حاجة صعبة أني ادخل فيس بوك بقت حاجة صعبة أكتر 

واكيد اني امسك الموبايل بقت حاجة اصعب بكتير، بقيت احب اهرب من التكنولوجيا 

بحب الزحمة أكتر وابص للناس علشان بفتقدهم بحب أتكلم مع ناس معرفهاش علشان بيوحشنى الكلام

انك تكون بتحب حاجات عكس بعضها او تعمل حاجات عكس بعضها مش انفصام 

وانك ترفض تعمل حاجة لحد من غير مبرر مش ندالة، وانك تفكر في الأسباب مش سوء ظن 

كل واحد فينا جواه شخصيات كتير بتظهر حسب الموقف وحسب المود وانا من زمان مجنونة بطبيعة الحال

واللي يعرفنا كويس أكيد بيكون عنده الشخصية الحقيقية الكود الفعلي "الأصل" اللي بيحتوي كل الحاجات دي

الجزء ده في حب بنترست بقي، وجمال الصور والسعادة اللي بيخليني فيها الموقع ده 

اكتر هدية فرحت بيها الكاميرا، محمد شاف قد ايه بحب التصوير والصور فحب يديني الفرصة 

والحقيقة قد ما كنت بحب الصور بقيت بحب أصور أكتر وبعمل لقطات رائعة

التوثيق بالصور جميل جدا زي التوثيق بالكتابة وبيوصل لنفس الهدف سعادة وبهجة فلهاش حدود

وإن كانت التدوينة بتاخد ساعة مثلا وانا بكتبها باخد 3 ساعات علشان أختر الصور
وده الفراغ بقي والاهتمام بالتفاصيل 😂😂

كان في بالي إني أختم التدوينة الطويلة بأغنية كالعادة

لكن ظهرت قدامي الصورة 

فلاش باك

شخصيا من الناس اللي بتحب الفلاش باك في الحياة في الدراما بحب أرجع لورا واشوف ايه اتغير واقارن

بحب أعرف التفاصيل  اللي يمكن وقتها مش كانت بالوضوح ده، وإيه وصلنا للنتيجة دى

يمكن اكون كمان بحب الماضي بتفاصيله الصعبه واحلامه البسيطة 

لكن هفضل مؤمنه إن لكل مرحلة جمالها وتفاصيلها اللي بتخليها أحلى واللي بتخلينا نقدر نكمل بنفس الطاقة

فلاش باك لاسبوعين كدا، رمضان 2019 وأول رمضان مش أكتب رمضاني وما فيه

يمكن لأن رمضان كان مليان أحداث كتير لدرجة اني مش لاقيه اي وقت أكتب

لحد أخر يوم في رمضان وانا مشغولة ومتلخبطة جدا، لكن رمضان كان فيه تصحيح أوضاع 

كان فيه عودة للإلتزام وإجتهاد واجهاد وكل حاجة وعكسها

فلاش باك لكام سنة، هو انا ازاي بقيت قوية كدا.. باخد مواقف وبواجه بقوة من غير دموع

بنهار لوحدى لكن دموعى بقت بتاعتي لوحدى مش أي حد يشوفها 

شايفة نفسي ناضحة أكتر بعرف أسيطر وأتحدى 

وأوصل لنجاحات اللي حواليا شايفين انها تستاهل أكون فخورة أكتر بنفسي. 

فلاش باك لشغلي في المدرسة، وأنا قاعدة مع الاطفال وبنلعب وبعلمهم وبنحكى ونضحك

الاطفال اللي دلوقتي ما شاء الله بقوا طولي ولما شفتهم كنت مذهولة، واللي سلموا عليا بنفس الحب بتاع زمان

وكلام الامهات انهم لسه حافظين اسماء الله الحسني والاحاديث وانهم شاطرين علشان كان تعليمهم من البداية صح. 

السعادة أوقات إن اللي بيحصل زمان مش بيروح بيفضل أثره وبيكبر

فلاش باك للأماكن اللي أثرت فيا، وروحي المرتبطة بالحسين والسعادة اللي بحسها وانا في طريق كفرالشيخ 

والارتباط الغير مفهوم بوسط البلد وبإسكندرية والسلام النفسي المرتبط بأسوان
 بحس الاماكن بتشبهنا فيها من روحنا مش بس بنرتبط بيها مع الذكريات 

لكن ممكن نرتبط بمكان مفيش لينا معاه ذكريات قد ما هي راحة غير مفهومة أو العكس نفور بدون سبب

فلاش باك للمدونة ولتدوينات قديمة خلتنى أضحك ولتعليقات فرحتنى، ولبوستات على الفيس بوك من سنين 

فيها ذكريات حلوة ومواقف لذيذة، يمكن فيها حاجات مش فكراها 

لكن الاكيد أن كل التفاصيل دى هى اللي عملت كل العلاقات اللي موجودة دلوقتي

سعيدة بكل الناس اللي فضلت قريبة منى رغم مرور كل السنين دي، وبكل اللحظات الحلوة اللي دونتها