تهييس عاقل جدااا

بعد اسبوع من النوم اللى مش بيكمل 3 ساعات 

والتناوب بين القهوة والنسكافيه كان طبيعى جدا اوصل لمرحلة التهييس 

والتهييس بالنسبالى هو التركيز مع كل الحاجات الحيويه اللى مش بكون مركزة معاها 

زى مثلا ليه لبان فله بيعمل بلونه بس مش بيفرقع 

وفضلت وراه فى المدرسة انا اعمل البلونه واستناها تفرقع مفيش فايدة 

لحد ما فرقعت وقولت هييييييه و تقريبا كل المكتب اتصدم منى 

ولقيتهم بيبصولى بازبهلال وانا بقولهم ما تشغلولنا مش هتيجى مش هروح 

بدل حماقى والنكد ده وتوالت نظرات الازبهلال تزداد وبعدين قالولى مالك يا بنتى 

وانا طبعا كنت فى قمة انشغلالى باللبان اللى مش عايز يقرقع 

اذ فجاة الناظر جاى يقولى الكتاب ده مش مكتوب عليه اسمه بتاع مين 

وبمنتهى الهدوء و الانشكاح رديت " مش مشكلتى على فكرة " 

طبعا الراجل مش متعود منى على كدا خرج من المكتب وهو بيكلم نفسه 

وباقى المدرسات بيضحكوا وهما بيقلدوا جملتى اللى اصبحت شهيرة مش مشكلتى على فكرة 

اللى اتكررت بعدها بدقايق معدودة كـ رد على مدرسة زميلة بتسالنى عن كتاب ولد فى فصلى راح فين

واللى بعد ما وصلتها لمرحلة انها اتعصبت خلاص ومشيت رحت جبتلها الكتاب بمنتهى السهولة 

فكرة انك تبقى مضغوط زيادة عن اللزوم صعبة بالنسبة لناس كتير وعادية جدا بالنسبالى 

لانى مريت بضغوط تفوق اللى انا فيه دلوقتى بمراحل كتير اوى 

الفكرة فى ان الاسهل هو انك تكبر دماغك لكن هما مش قادرين يفهموا كدا 

مش معنى انى ملتزمة زيادة عن اللزوم فى شغلى وانى بحب الاطفال انى اقبل ان حد يستغلنى 

لا انا ممكن اعمل اى حاجة علشان الاطفال بس بمزاجى لكن لو بيحبوا اللى يكبر دماغه فدى حاجة سهله والله 

ومش مشكلتى خالص ان فى حد تانى مكبر دماغه ومش عايز يتعب نفسه وجاى يتعبنى انا 

وبالنسبة للبان فالافضل هو الهارتى ارخص و بيعمل بلونه وبتفرقع كمان المصرى دايما متعدد المميزات
اما بقى المغزى من مش هتيجى مش هروح فهو نفس نظرية نيوتن لكل فعل رد فعل مساوى له فى المقدار و مضاد له فى الاتجاه
الاسبوع انتهى امبارح بفرح بنت خالتى و بانى اول مرة فى حياتى اتصور فى استديو صورة بجد
بـ ميك اب كامل و فستان كتب كتابى و المصور يقولى كمان اتفضلى يا عروسة
و بانى احاول لاول مرة بردو انى ازغرط والاقينى فى امل انها تطلع حلوة
اليوم خلص بانى اصحى من النوم علشان اتصل بيك علشان اتاكد انى مش بحلم واقولك بحبك قوى وانام تانى
وعلى فكرة بحبك اوى تفرق عن بحبك قوى بالالف بتعبر عن الحجم يعنى كتير لكن بالقاف بتدل عن القوة 

السؤال اللى بيطرح نفسه دلوقتى بقى ايه السر اللى مخلى الزبيب موجود مع البندق فى شيكولاته كادبرى 

سؤال يحتاج لدراسة و فرصة تهييسيه قادمة ^___^