السبت، 20 أكتوبر 2012

تهييس



تهييس لسببين 
اولا انى بقالى كتير اوى وكل دموعى كانت فرح النهارده غيرت رايها وبقت حزن 
ثانيا فى حاجات كتير حاسة انى عايزة ادونها علشان ابقى ارجع اقراها تانى 
يمكن كونها تخاريف فاللى حابب يهيس يكمل باقى البوست 
واللى حابب ينكد على نفسه يكمل بردو اما بقى اللى محتاج يضحك فطبيعى لازم يكمل يعنى

حفل توقيع خبايا نسائية لمنى ياسين " موناليزا " يوم بستناه بقالى كتير اوى 
يمكن فرحانة بالكتاب ده ومستنياه اكتر ما مستنيه كتابى " دى حقيقة والله ومش عارفة ليه "
حاسه انى هلاقينى جوه مش عارفة ازاى بردو 
يمكن لانى لما قابلت منى فى حفلة توقيع ابجدية ابداع عفوى فى المنصورة
كانت هى خلاص اتقبل كتابها وانا وقتها كنت شيلت فكرة الكتاب من بالى
فاكرة كويس اوى وانا ماشية سلمت عليها
وقولتلها ان شاء الله يوم حفلة توقيع كتابك هتلاقينى اول حد احضر
 قالتلى عقبال كتابك انتى كمان قولتلها يارب ونعمل حفلة التوقيع هنا بردو ومشيت 
بعدها اشتغلت على كتابى جامد لحد ما بعته واتقبل فرحت اوى اننا هنكون فى مرحلة واحدة 
وفضلت احلم باليوم اللى هيكون فيه حفلة توقعها وبعديه حفلة توقيعى واننا نكون سوا 
بس للاسف مش عرفت احضر وفضلت اعيط بطريقة غريبة يمكن بقالى كتير اووووى مش عيطت كدا
كنت بعيط بحرقة بجد احساس بشع انك تبقى نفسك فى حاجة وعمال تحلم بيها وتعد الايام لحد ما تجيلك 
وفى الاخر حد يقولك لا 
اسفة اوى يا منى انى خذلتك اسفة لنفسى انى بوعدها بحاجات وبخذلها بس والله مش بإيدى 
ومبروووووك يا حبيبتى وان شاء الله كتابك هيكسر الدنيا انا متاكدة

بقالى فترة كدا عايزة ارقص تانجو مع انى مجربتش ارقص قبل كدا بس حاسة انى بعرف ارقصها 
كمان بردو الفترة دى مسيطرة عليا فكرة انى اسافر الهند
علشان اجرى فى المساحات الخضراء الكتيرة اوى 
اللى بتكون موجودة فى الافلام الهندى واشترى لبس هندى كتيررررر 
وبما ان عيد ميلادى كمان عشر ايام وبعد ما احتفلت بيا واشتريت فستان بنفسجى لها اليوم العظيم 
 فانا عايزة هدايا كتير اوى بقى عايزة مصحف بالخط العثمانى 
و قلم حبر اسود دهبى وناعم وكام رواية كدا على كام ديوان شعر
 ويا سلام بقى لو المجموعة الكاملة لمحمود درويش معاهم 
عايزة احس انى جميلة ليدى كدا زى ما كانوا بيقولوا فى جمالك مع فيت ههههههههههههههه 
بس فى حاجات معينة مثلا اسيب ضوافرى طويلة كدا من غير ما اكون مضايقة من نفسى 
اعمل ميك اب كدا زى البنات الطبيعيين من غير ما افضل اقول ايه القرف ده الطبيعة احلى 
كدا يعنى بس بجد بجد يعنى نفسى يوم فرحى ان شاء الله
يكون فستانى من ابداعات مصمم مشهور اى حد مش هعترض 
وتعملى الميك اب والطرحة نانيس سليم متواضعة جدا انا اصلا
عايزة اروح اسكندرية واقعد على البحر الفجر واجرى وانط فى المية من فوق مكان عالى
عايزة الشتا يجى بقى علشان اجرى تحت المطر واجيب ايس كريم
عايزة اقابل كل صحابى ونفضل نتكلم ونضحك وقت طويل 
اول مرة احس انى عايزة حاجات كتير علشان كدا قلت اكتبها
علشان افتكر ان فى يوم من الايام كان عندى مطالب و حاجات عيزاها
بدال ما طول الوقت عمالين يقولولى انتى عمرك ما قولتى عايزة حاجة 
اهو قلت اما نشوف هيحصل ايه يعنى بعد ما قلت عايزة :)))

مش بتصل بحد ف الموبايل ومش عارفة هعيد على حد ولا لا 
مش لسبب غير انى مش عايزة حد يسالنى عن اى حاجة اصلا هو ليه كل كلامنا اسئلة 
مفيش فى المكالمات غير الاسئلة ولا مجال للجمل الخبرية 
كمان الرسايل النمطية بكرها بحب الرسايل اللى مكتوبة لحد معين باحساس خاص كدا
والفترة دى كنت ببعت رسايل نمطية لان مش كان عندى حاجة اقولها 
الرسايل الخاصة بعتها على الفيس لناس معيين طلبوها وفرحونى لما بعتلهم 
بمناسبة الرسايل وكم البهجة اللى بقت بتشع من انبوكس الفيس بتاعى كل شوية 
تقريبا فى اليوم الواحد بتوصلى اكتر من 7 رسايل دايما فيها ما بين رسالتين و 3 من اشخاص مش اعرفهم 
بقيت بفرح اوى لما بلاقى ناس مهتمه بالكلام والقراءة فى ناس عايزة تقرا بجد حاجة تفرح 
الحمد لله الفترة دى من اكتر فترات حياتى بهجة ربنا يكملها على خير يارب 
ويسعد كل الناس اللى بتسعدنى يارب

وفى نهاية الفقرة الرائعة دى نحب نغنى واهدى الاغنية الجاية لكل ضيفونا اللى منورنا 
واللى لسه هينورونا واللى ممكن مش ينورونا بس هما منورينا بردو 
ايه اللى انا بقوله ده ... ما علينا 
اسيبكم مع الاغنية بقى وتصبحوا على أمنيات محققة

طل و سألني اذا نيسان دق الباب خبيت وجيي و طار البيت في و غاب 
حبيت افتحلو عالحب اشرحلو طليت ما لقيت غير الورد عند الباب 
بعدك على بالي يا قمر الحلوين يا زهرة بتشرين يا دهبي الغالي 
بعدك على بابي يا حلو يا مغرور يا حبق و منتور على سطح العالي 
مرق الصيف بمواعيدو و الهوى لملم عناقيدو 
و ما عرفنا خبر عنك يا قمر و لا حدا لوحلنا بإيدو 
بتطل الليالي و بتروح الليالي و بعدك على بالي





14 التعليقات:

محمد سلامة يقول...

كلام حلو
أنا كمان كان نفسى أروح حفلة منى ياسين ومع إنى معرفاش بس زعلت إنى مرحتش
ونفسى الشتا يجيى وأجرى على الشط فى اسكندرية وأكل ايس كريم
بس مبيجليش رسايل على الفيس ولا حد بيتصل بيا ودايما كنت بتصل بالناس بس قررت خلاص كفاية عطاء لابد من مقابل بقى :(

ظلالي البيضاء يقول...

أختي آية .. كل عام وأنتم بألف ألف خير سلفاً ..
وهدية خاصة لأخت مميزة مصحف التجويد بالخط العثماني ممكن تعمليله داونلود من الموقع ده كومبيوتر أو موبايل : http://www.alemadi.ws/FlashTajweedQuran.htm
وباقي الطلبات على باقي الأصدقاء .. أنا اعملت اللي عليي .. والباقي على الله ..
تهييس جميل وفي كثير من الأحيان تكون مشاعرنا متضاربة وكثيرة ونحتاج لتسطيرها لنحافظ عليها ..
دمت طيبةً وبألف خير .. مع التحية الطيبة

الكاتبة والإعلامية فاطمة العبيدي يقول...

تهييس مميز بصراحة
كلنا أحيانا بنهيس وبنطلق لخيالنا العنان علشان نحلم ونحلم لحد ما تكبر أحلامنا لدرجة مش منطقية خالص لا مع طبيعة شخصياتنا ولا مع ظروفنا ولا مع حياتنا كلها مع ذلك لازم نحلم ونهيس علشان نحس اننا عايشين ونمني نفسنا بالآمال والأحلام لعل وعسى أن نصحى في يوم نلاقيها اتحققت وعلشان كمان ما نتخنقش ونزهق من حياتنا

أنا بصراحة
بحسدك ع التهييس ده
نفسي أهيش كده زيك

تحياتي

ابراهيم رزق يقول...

ههههههههههههههههههههههه
عجبنى موضوع التانجو ده
ايه رايك تروحى بعثة الارجنتين عشان تتعلمى التانجو على اصوله

اما عيد ميلادك فايه اعياد الميلاد اللى على طمع دى
على العموم ربنا يرزقك بالهدايا
ويريح بالك

اما فستان الفرح فبلاش عشان لو ايلى صعب و كرستيان ديور ولا بير كاردان مش هينفع تلبسيه
هههههههههههههههههههه

الف مبروك لمنى ياسين

تحياتى

aya mohamed يقول...

مسلم مصرى

هههههه ميرسى لذوقك ومشاركتك الوجدانية
اجمل ما فى العطاء ان تنتظر المقابل من الله
لا من احد
دمت بخير :)

aya mohamed يقول...

ظلالى البيضاء

وحضرتك بالف الف خير
جارى التجميل ربنا يباركلك يارب
فرحتنى هديتك جدا
ربنا يسعدك :)

aya mohamed يقول...

حكاية

طيب ما تجربى هتيسى انتى كمان
هتلاقى الكلام بيطلع لوحده كدا
احساس جميل انك تكونى بتكلم كل الناس
وانتى فى الاساس بتكلمى نفسك :)))

aya mohamed يقول...

خالو ابراهيم

لسه هستنى اما اتجوز علشان الاقى حد يودينى
طيب ما بعثة الارجنتين تيجى تعلمنى هنا اسهل ههههههه
ربنا يخليك يارب ومش لازم هدايا مادية
كفاية المشاركة المعنوية ولو بالكلام
اما بقى عن مصممين الازياء فانا عايزة
اكتشف الجزء الخفى فى تصميماتهم
واخليهم يصمووا حاجة مخصوص ليا
جبارة انا ههههههههه
ربنا يباركلنا فيك يارب

مصطفى سيف الدين يقول...

كل سنة و انتي طيبة يا آية و عقبال مليون سنة
و معلش ده حالنا كلنا ياما بنوعد و مبنوفيش
و دايما بيفوتنا كتير

حنين محمد يقول...

مساء الغاردينيا ياآية
كل سنة وأنتي طيبة مقدماً
وفي يوم ميلادك هجيب لك كم هدية على زوقي :)
اما التهييس هيسي يابنتي دا انتي عسل في كل حالاتك ههههههه
وبردو صممي على رأيك واعملي فستان فرحك عند مصمم عالمي :)
بشجع انا على الاحلام هههههه
على فكرة وحشتيني اوي :)
؛؛
؛
لروحك عبق الغاردينيا
كانت هنا
Reemaas

موناليزا يقول...

كلماتك لمستنى جداً .. وحقاً افتقدتك
وقلقت من تأخيرك ورغم اعتذارك اللى عرفنى انك خلاص مش هتيجى بس اطمنت انك بخير..

aya mohamed يقول...

مصطفى

وانت بألف خير يارب
قدر الله وما شاء فعل

aya mohamed يقول...

ريماس

على فكرة بقى وحشتينى اكتر والله
ومش تقلقى انا هصمم واحاول وربنا يسهل
تسلميلى يا حبيبتى :*

aya mohamed يقول...

منى

هتتعوض ان شاء الله
بحبك